Magin “Maigot sa Marahay na mga Gibo”!
Magin “Maigot sa Marahay na mga Gibo”!
“Itinao [ni Jesus] an saiyang sadiri para sa sato tanganing ikaligtas nia kita sa gabos na klase nin katampalasanan asin makalinig para sa saiya nin sarong banwaan na magigin saiya sana nanggad, maigot sa marahay na mga gibo.”—TITO 2:14.
1. Ano an nangyari sa lugar kan templo pag-abot ni Jesus kan Nisan 10, 33 C.E.?
NISAN 10, 33 C.E. kaidto, pirang aldaw na sana bago an selebrasyon nin Paskua. Ogmahon na nag-aantisipar an kadakol na parasamba na yaon sa lugar kan templo sa Jerusalem. Ano daw an mangyayari pag-abot ni Jesus? An tolong kagsurat kan mga Ebanghelyo—si Mateo, Marcos, asin Lucas—gabos nagpapatotoo na ini an ikaduwang beses na pinalayas ni Jesus an mga nagtitinda asin nagbabakal duman. Ibinalintong nia an mga lamesa kan mga pararibay nin kuarta asin an mga tukawan kan mga nagtitinda nin mga salampati. (Mat. 21:12; Mar. 11:15; Luc. 19:45) An kaigotan ni Jesus dai nainaan poon kan gibohon man nia iyan tolong taon na an nakaagi.—Juan 2:13-17.
2, 3. Paano niato naaaraman na an kaigotan ni Jesus bako sanang para sa paglinig kan templo?
2 An pagkasaysay ni Mateo nagpaparisa na an kaigotan ni Jesus sa pangyayaring iyan bako sanang para sa paglinig kan templo. Pinaomayan man nia an mga buta asin pilay na nagdolok sa saiya duman. (Mat. 21:14) Sinambit sa rekord ni Lucas an iba pang ginibo ni Jesus. “Nagtokdo [si Jesus] aroaldaw sa templo.” (Luc. 19:47; 20:1) Sa siring, an kaigotan ni Jesus risang-risa nanggad sa saiyang pampublikong ministeryo.
3 Kan huri, si apostol Pablo nagsurat ki Tito asin nagpaliwanag na “itinao [ni Jesus] an saiyang sadiri para sa sato tanganing ikaligtas nia kita sa gabos na klase nin katampalasanan asin makalinig para sa saiya nin sarong banwaan na magigin saiya sana nanggad, maigot sa marahay na mga gibo.” (Tito 2:14) Sa anong mga paagi kita ngonyan magigin “maigot sa marahay na mga gibo”? Asin paano makakadagka sa sato an mga halimbawa kan marahay na mga hade sa Juda?
Kaigotan sa Paghuhulit Asin Pagtotokdo
4, 5. Sa anong mga paagi nagin maigot sa marahay na mga gibo an apat na hade sa Juda?
4 Si Asa, Josafat, Ezequias, asin Josias gabos naggibo nin mga kampanya sa Juda tanganing haleon an idolatriya. “Hinale [ni Asa] an mga altar nin mga taga ibang daga asin an haralangkaw na lugar nin pagsamba asin rinaot an sagradong mga harigi asin pinutol an sagradong mga palo.” (2 Cron. 14:3) Huling napahiro si Josafat kan saiyang kaigotan para sa pagsamba ki Jehova, “hinale [nia] sa Juda an haralangkaw na lugar nin pagsamba asin an sagradong mga palo.”—2 Cron. 17:6; 19:3. *
5 Kasunod kan solemneng pitong aldaw na selebrasyon nin Paskua na inorganisar ni Ezequias sa Jerusalem, “an gabos na Israelita na yaon duman nagruluwas pasiring sa mga siudad nin Juda, asin rinaot ninda an sagradong mga harigi asin pinutol an sagradong mga palo asin rinumpag an haralangkaw na lugar nin pagsamba asin an mga altar sa bilog na Juda asin Benjamin saka sa Efraim asin Manases sagkod na matapos sinda.” (2 Cron. 31:1) An aking si Josias nagin hade kan sia otso anyos pa sana. An rekord sa kasaysayan nagsasabi: “Sa ikawalong taon kan saiyang paghade, mantang aki pa sia, pinonan niang hanapon an Dios ni David na saiyang apoon; asin sa ikadoseng taon pinonan niang haleon sa Juda asin Jerusalem an haralangkaw na lugar nin pagsamba asin an sagradong mga palo asin an kinortehan na mga ladawan asin an minoldeng mga estatuwa.” (2 Cron. 34:3) Huli kaini, an gabos na apat na hadeng idto nagin maigot sa marahay na mga gibo.
6. Taano an satong ministeryo ta ikakaagid sa mga kampanya kan maimbod na mga hade sa Juda?
6 Ngonyan, may ginigibo kitang kaagid na kampanya tanganing tabangan an mga tawo na makabutas sa falsong mga katokdoan nin relihion, kaiba an idolatriya. Paagi sa satong ministeryong pagharongharong, nakakaolay niato an gabos na klase nin tawo. (1 Tim. 2:4) Nagigirumdoman nin sarong hoben na babaeng taga Asia kun paanong an saiyang ina nagsasagibo nin mga ritual sa atubangan nin dakol na imahen sa harong ninda. Huling nangangatanosan an hoben na babae na bakong gabos na imahen ladawan kan tunay na Dios, parate siang namimibi na logod mamidbid nia kun siisay an tunay na Dios. Kan buksan nia an nagtutuktok sa pinto ninda, may duwang Saksi na andam na tumabang sa saiya na maaraman an daing kaagid na ngaran kan tunay na Dios, si Jehova. Asin kanigoan an pagpasalamat nia kan maaraman an totoo manongod sa mga idolo! Ngonyan nagpapaheling na sia nin kaomaw-omaw na kaigotan paagi sa mahigos na paglilingkod sa langtad, na tinatabangan sa espirituwal na paagi an ibang mga tawo.—Sal. 83:18; 115:4-8; 1 Juan 5:21.
7. Ano an magigibo niato tanganing maarog an mga paratokdo na naglibot sa bilog na nasyon kan panahon ni Josafat?
7 Kun kita naghaharongharong, gurano kalubos niatong ginigibo an teritoryo na iinasignar sa sato? Interesante nanggad, sa ikatolong taon kan paghade ni Josafat, sia nagsugo nin limang prinsipe, siyam na Levita, asin duwang saserdote. Pinalibot nia sinda sa gabos na siudad tanganing itokdo sa mga tawo an mga ley ni Jehova. Epektibong marhay an kampanya ninda kaya an mga tawo sa nakapalibot na mga nasyon nagpoon na matakot ki Jehova. (Basahon an 2 Cronica 17:9, 10.) Paagi sa pagdalaw sa mga harong sa manlaenlaen na oras asin laen-laen na aldaw, puede niatong makaolay an nagkapirang miembro nin pamilya.
8. Paano daw niato mapapahiwas an satong pagpapatotoo?
8 Dakol sa mga lingkod nin Dios sa presenteng mga panahon an andam na bayaan an saindang harong asin magbalyo tanganing maglingkod sa lugar na mas nangangaipo nin maigot na mga Saksi. Magigibo daw nindo iyan? An nagkapira sa sato na mayo sa kamugtakan na magbalyo sa ibang lugar puedeng maghingoa na magpatotoo sa mga tawo na nakaistar sa satong lugar alagad iba an lenguahe. Huling nakakanompong si Ron sa saiyang teritoryo nin mga tawo na laen-laen an nasyonalidad, sa edad na 81, nag-adal sia nin pagtaratara sa 32 na lenguahe! Kasuarin pa sana, nakanupar sia sa tinampo nin mag-agom na Aprikano asin sinda tinaratara nia sa saindang tataramon na Yoruba. Hinapot ninda si Ron kun nakaduman na sia sa Aprika. Kan sia magsimbag na dai pa, naghapot sinda kun taano ta aram nia an lenguahe ninda. Ini nagbunga nin marahayon na patotoo. Tolos nindang inako an nagkapirang magasin asin naoogmang itinao sa saiya an saindang adres, na itinao man nia sa lokal na kongregasyon tanganing may magtokdo sa Biblia sa mag-agom.
9. Taano ta mahalaga na magbasa kita sa Biblia sa satong ministeryo? Magtao nin halimbawa.
9 An mga paratokdo na pinagbotan ni Josafat na maglibot sa bilog na nasyon may darang “libro kan ley ni Jehova.” Sa bilog na kinaban hinihingoa niato na tokdoan an mga tawo basado sa Biblia, huling iyan an Tataramon nin Dios. Naggigibo kita nin espesyal na paghihingoa na ipaheling sa iba an aktuwal na sinasabi kan Biblia, na itinatampok iyan sa satong ministeryo. An sarong kagharong na babae nagpaliwanag ki Linda, na sarong Saksi, na an saiyang agom naistrok asin kaipuhan niang asikasohon. An kagharong mamondong nagsabi: “Dai ko aram kun ano an nagibo ko kaya tinogotan nin Dios na mangyari ini sa sako.” Si Linda suminimbag: “Puede ko daw tabing siertohon sa saimo an sarong bagay?” Dangan, binasa nia an sinasabi sa Santiago 1:13 asin sinabi pa: “An gabos na pagsakit na naeeksperyensiahan niato asin kan mga namomotan niato bakong padusa hale sa Dios.” Sa puntong iyan, maogmang kinugos kan kagharong si Linda. Inadmitir ni Linda: “Nakatao ako nin karangahan paagi sa paggamit kan Biblia. Kun beses, an mga bersikulo na binabasa niato sa Biblia iyo an dai pa noarin man nadangog kan kagharong.” An pag-oolay na iyan nagbunga nin regular na pakipag-adal sa Biblia sa babae.
Mga Hoben na Maigot na Naglilingkod
10. Paano sarong marahay na halimbawa si Josias para sa Kristianong mga hoben ngonyan?
10 Kun babalikan niato an halimbawa ni Josias, maheheling niato na pinagmaigotan niang magibo an tunay na pagsamba kan sia hoben pa asin sia mga 20 anyos na kan ponan nia an saiyang mahiwas na kampanya tumang sa idolatriya. (Basahon an 2 Cronica 34:1-3.) Dai mabilang na hoben ngonyan an nagpapaheling nin kaparehong kaigotan sa saindang paglilingkod sa Kahadean.
11-13. Anong mga leksion an manonodan niato sa presenteng panahon na mga hoben na naglilingkod ki Jehova na may kaigotan?
11 Si Hannah, na taga Inglatera, 13 anyos asin nag-aadal nin lenguaheng Pranses sa eskuelahan kan maaraman nia na sa kaharaning banwaan may naestablisar nang grupo sa lenguaheng Pranses. Nag-oyon an saiyang ama na ibanan siang mag-atender sa mga pagtiripon duman. Ngonyan na si Hannah 18 anyos na, sia maigot na nagpapatotoo sa lenguaheng Pranses bilang regular payunir. Puede man daw kamong mag-adal nin ibang lenguahe asin magtabang sa iba na makanood manongod ki Jehova?
12 Si Rachel naogmang marhay sa pagheling kan video na Pursue Goals That Honor God. Sa pagkomento manongod sa kaisipan nia kan magpoon siang maglingkod ki Jehova kaidtong 1995, sia nagsabi: “An paghona ko isinasapuso ko na an katotoohan.” Dangan sinabi pa nia: “Pagkatapos kong maheling an video na iyan, narealisar ko na sa dakol na taon dai ako nagseseryoso. Kaipuhan na ipaglaban ko an katotoohan asin talagang pag-isipan patin sabayan nin paghihingoa an sakong paglilingkod asin personal na pag-adal.” Ngonyan, aram ni Rachel na sia naglilingkod na ki Jehova na may orog na kaigotan. Ano an naeksperyensiahan nia bilang resulta? “Nagrarom an sakong relasyon ki Jehova. An sakong mga pamibi nagin mas makahulogan, an sakong pag-adal mas nagrarom asin nagin mas nakakakontento, asin an mga pagkasaysay sa Biblia nagin mas totoo sa sako. Bilang resulta, ikinakaogma kong marhay an ministeryo asin nakakamate ako nin tunay na satispaksion kun naheheling ko na an mga tataramon ni Jehova nakakaranga sa iba.”
13 Si Luke sarong hoben na nadagka man kan saro pang video, an Young People Ask—What Will I Do With My Life? Pagkatapos na maheling ni Luke an video na ini, sia nagsurat: “Napahiro ako na pag-isipan liwat an sakong situwasyon sa buhay.” Inadmitir nia: “Kan nakaagi, naimpluwensiahan akong magmaigot na magkaigwa nguna nin pinansial na seguridad paagi sa mas halangkaw na edukasyon asin pagkatapos kaiyan magkonsentrar naman sa espirituwal na mga pasohan. An siring na impluwensia dai nakakatabang sa espirituwal na pag-oswag; imbes iyan nakakapaluya.” Mga hoben na tugang na lalaki asin babae, taano ta dai nindo helingon kun baga puede nindong gamiton an nanodan nindo sa eskuelahan tanganing pahiwason an saindong ministeryo arog kan ginibo ni Hannah? Asin taano ta dai nindo arogon an halimbawa ni Rachel paagi sa maigot na paghihingoang maabot an mga pasohan na totoong nagtatao nin onra sa Dios? Arogon an halimbawa ni Luke, paagi sa paglikay sa mga peligro na nagin siod sa dakol na hoben.
Maigot na Himateon an mga Patanid
14. Anong klaseng pagsamba an inaako ni Jehova, asin taano ta depisil nanggad ngonyan an pagpapadanay kaini?
14 An banwaan ni Jehova kaipuhan na magin malinig tanganing akoon nia an saindang pagsamba. Si Isaias nagpatanid: “Sumiblag kamo, sumiblag kamo, lumuwas kamo dian, dai kamo dumotdot nin maating bagay; lumuwas kamo sa saiya [Babilonya], magdanay kamong malinig, kamo na nagdadara kan mga kagamitan ni Jehova.” (Isa. 52:11) Dakol na taon bago isurat ni Isaias an mga tataramon na iyan, an marahay na si Hadeng Asa entusiastikong naggibo nin kampanya tanganing haleon an imoralidad sa Juda. (Basahon an 1 Hade 15:11-13.) Asin dakol na siglo pakalihis kaiyan, sinabi ni apostol Pablo ki Tito na itinao ni Jesus an saiyang sadiri tanganing linigon an saiyang mga parasunod asin gibohon sindang “sarong banwaan na magigin saiya sana nanggad, maigot sa marahay na mga gibo.” (Tito 2:14) Sa sosyedad ngonyan na pano nin bisyo, bakong pasil—nangorogna sa mga hoben—na magdanay na malinig sa moral. Halimbawa, an gabos na lingkod nin Dios, hoben sagkod gurang, dapat na maghingoang marhay na magdanay na dai madigtaan nin pornograpiya na ipinapaheling sa mga billboard, TV, pelikula, asin partikularmente sa Internet.
15. Ano an makakatabang sa sato na ikaongis an maraot?
15 An satong maigot na paghimate sa mga patanid nin Dios makakatabang sa sato na ikaongis an maraot. (Sal. 97:10; Roma 12:9) Kaipuhan niatong ikasurang nin grabe an pornograpiya tanganing “makabutas sa makosog asin garo magnet na puersa kaiyan,” siring kan pagkasabi nin sarong Kristiano. Tanganing mapagsuruway an mga pidaso nin metal na nagdurukotan huli sa magnet, an saro nangangaipo nin puersa na mas makosog kisa sa puersa na iyo an dahelan kan pagdurukotan kaiyan. Kaagid kaiyan, kaipuhan an makosog na paghihingoa tanganing labanan an pang-akit nin pornograpiya. Alagad kun nasasabotan niato kun gurano kadakulang danyos an magigibo sa sato kan pornograpiya, matatabangan kita na ikangiri iyan nin grabe. Dakulaon na paghihingoa an ginibo nin sarong tugang na lalaki tanganing mahale an saiyang ugale na pagheling nin pornograpikong mga site sa Internet. Ibinalyo nia an saiyang personal na komputer sa lugar na naheheling iyan kan ibang miembro kan saiyang pamilya. Kaiba kaiyan, sia personal na nagin mas determinadong linigon an saiyang sadiri asin magin maigot sa marahay na mga gibo. May ginibo pa ngani siang saro pang lakdang. Huling kaipuhan niang gumamit kan Internet sa saiyang negosyo, nagdesisyon sia na gamiton sana iyan kun kataed nia an saiyang agom.
An Halaga nin Marahay na Gawe-Gawe
16, 17. An satong marahay na paggawe puedeng magkaigwa nin anong epekto sa mga nagmamasid sa sato? Magtao nin halimbawa.
16 Marahayon nanggad na ugale an maheheling sa hoben na mga lalaki asin babae na naglilingkod ki Jehova, asin napapahanga nanggad an mga nagmamasid! (Basahon an 1 Pedro 2:12.) An sarong bisita sa Bethel sa Londres nagbago an bilog na punto de vista dapit sa mga Saksi ni Jehova pagkatapos nin sarong aldaw na paghirahay nia kan makinang pang-imprenta duman. Narisa kan saiyang agom na babae, na nakikipag-adal sa Biblia sa sarong taga duman na Saksi, an pagbabago kan saboot kan saiyang agom. Dati, habo kaini na magdalaw sa harong ninda an mga Saksi. Alagad nagpuli sia hale sa pagtrabaho sa Bethel na biyong inoomaw an nagin maboot na pagtratar sa saiya. Sinabi nia na mayo nin nagtataram nin maraot. An gabos mapasensia, asin an palibot matoninong. Sia partikularmenteng napahanga na an hoben na mga tugang na lalaki asin babae maigot na nagtatrabaho asin mayo nin sueldo, na nagboboluntaryo kan saindang oras asin kosog tanganing makatabang sa pagpahayag kan maogmang bareta.
17 Siring man, an mga tugang na lalaki asin babae na may sekular na trabaho tanganing maasikaso an saindang mga pamilya nagtatrabaho man nin bilog na kalag. (Col. 3:23, 24) Ini parateng nagreresulta sa mas marahay na seguridad sa trabaho, huling pinapahalagahan kan mga among an pagkaonesto kan mga Saksi asin habo ninda na mawaran sinda nin siring na mga empleyado.
18. Paano kita magigin “maigot sa marahay na mga gibo”?
18 An pagtitiwala niato ki Jehova, an pagkuyog niato sa mga instruksion nia, asin an pag-asikaso niato sa satong mga tiriponan kaiba sa mga paagi nin pagpaheling niato nin kaigotan para sa harong ni Jehova. Dugang pa, gusto niatong makikabtang nin lubos, sagkod na makakaya niato, sa paghuhulit kan Kahadean asin paggibo nin mga disipulo. Baga man kita hoben o gurang, paagi sa maigot na pagsuportar niato sa malinig na mga pamantayan na konektado sa satong pagsamba, magkakamit kita nin dakol na pakinabang. Asin padagos kitang mamimidbid bilang mga tawong “maigot sa marahay na mga gibo.”—Tito 2:14.
[Nota sa Ibaba]
^ par. 4 Tibaad hinale ni Asa an haralangkaw na lugar nin pagsamba na may koneksion sa falsong mga dios alagad bakong an mga lugar na duman sinasamba kan mga tawo si Jehova. O tibaad itinogdok liwat an haralangkaw na lugar nin pagsamba sa huring parte kan paghade ni Asa asin hinale an mga ini kan aki niang si Josafat.—1 Ha. 15:14; 2 Cron. 15:17.
Basado sa Biblia sagkod sa mga halimbawa sa presenteng panahon, ano an nanodan nindo manongod sa
• kun paano ipapaheling an saindong kaigotan paagi sa paghuhulit asin pagtotokdo?
• kun paano an mga hoben na Kristiano puedeng magin “maigot sa marahay na mga gibo”?
• kun paano mahahale an nakakaraot na mga ugale?
[Mga Hapot Para sa Pag-adal]
[Ritrato sa pahina 13]
Regular daw nindong ginagamit an Biblia sa saindong ministeryo?
[Ritrato sa pahina 15]
An pag-adal na magtaram nin ibang lenguahe mantang nag-eeskuela puedeng makatabang sa saindo na pahiwason an saindong ministeryo