‘Magmasiboton sa Maayong mga Buhat’!
‘Magmasiboton sa Maayong mga Buhat’!
“[Si Jesus] mihatag sa iyang kaugalingon alang kanato aron sa pagluwas kanato gikan sa tanang matang sa pagkamalapason ug sa paghinlo alang sa iyang kaugalingon ug usa ka katawhan nga iyaha lamang gayod, nga masiboton sa maayong mga buhat.”—TITO 2:14.
1. Unsay nahitabo diha sa templo pag-abot ni Jesus sa Nisan 10, 33 K.P.?
KADTO maoy Nisan 10, 33 K.P., pipila ka adlaw una pa ang pagsaulog sa Paskuwa. Naghinamhinam ang panon sa mga magsisimba sa templo sa Jerusalem. Unsa kahay mahitabo inig-abot ni Jesus? Ang tulo ka magsusulat sa Ebanghelyo—si Mateo, Marcos, ug Lucas—nagpamatuod nga sa ikaduhang higayon, gipang-abog ni Jesus ang namaligya ug namalit didto. Iyang gipanglintuwad ang mga lamesa sa mga tig-ilis ug salapi ug ang mga lingkoranan sa namaligyag salampati. (Mat. 21:12; Mar. 11:15; Luc. 19:45) Wala mausab ang kasibot ni Jesus sukad siya mihimog susama niana tulo ka tuig na ang milabay.—Juan 2:13-17.
2, 3. Nganong nahibalo kita nga ang kasibot ni Jesus wala lamang ipakita pinaagi sa paghinlo sa templo?
2 Ang asoy ni Mateo nagpaila nga ang kasibot ni Jesus nianang tungora wala lamang ipakita pinaagi sa paghinlo sa templo. Siya nag-ayo usab sa mga buta ug mga tawong bakol nga nanuol kaniya. (Mat. 21:14) Ang asoy ni Lucas naghisgot sa uban pang gibuhat ni Jesus. “[Si Jesus] nagpadayon sa pagpanudlo adlaw-adlaw diha sa templo.” (Luc. 19:47; 20:1) Busa, dayag kaayo ang kasibot ni Jesus diha sa iyang publikong ministeryo.
3 Sa ulahi, si apostol Pablo misulat kang Tito ug miingon nga si Jesus “mihatag sa iyang kaugalingon alang kanato aron sa pagluwas kanato gikan sa tanang matang sa pagkamalapason ug sa paghinlo alang sa iyang kaugalingon ug usa ka katawhan nga iyaha lamang gayod, nga masiboton sa maayong mga buhat.” (Tito 2:14) Sa unsang mga paagi kita mahimong “masiboton sa maayong mga buhat”? Ug sa unsang paagi makadasig kanato ang ehemplo sa maayong mga hari sa Juda?
Kasibot sa Pagsangyaw ug Pagpanudlo
4, 5. Sa unsang mga paagi nga ang upat ka hari sa Juda nagmasiboton alang sa maayong mga buhat?
4 Si Asa, Jehosapat, Ezequias, ug Josias mihimog mga kahikayan sa pagwagtang sa idolatriya gikan sa Juda. “Gikuha [ni Asa] ang mga langyawng halaran ug ang hatag-as nga mga dapit ug gigun-ob ang sagradong mga haligi ug giputol ang sagradong mga poste.” (2 Cron. 14:3) Tungod sa kasibot ni Jehosapat alang sa pagsimba kang Jehova, iyang ‘gikuha ang hatag-as nga mga dapit ug ang sagradong mga poste gikan sa Juda.’—2 Cron. 17:6; 19:3. a
5 Human sa pito ka adlaw nga pagsaulog sa Paskuwa nga gihikay ni Ezequias sa Jerusalem, “ang tanang Israelinhon didto, nanggula ngadto sa mga siyudad sa Juda, ug ilang gidugmok ang sagradong mga haligi ug giputol ang sagradong mga poste ug gitumpag ang hatag-as nga mga dapit ug ang mga halaran gikan sa tibuok Juda ug Benjamin ug sa Epraim ug Manases hangtod nga ilang nahuman.” (2 Cron. 31:1) Si Josias nahimong hari sa dihang siya nag-edad ug walo ka tuig. Ang Kasulatan nag-ingon: “Sa ikawalo ka tuig sa iyang paghari, samtang siya bata pa, siya misugod sa pagpangita sa Diyos ni David nga iyang katigulangan; ug sa ikanapulog-duha ka tuig iyang gisugdan paghinlo ang Juda ug ang Jerusalem sa hatag-as nga mga dapit ug sa sagradong mga poste ug sa kinulit nga mga larawan ug sa mga inumol nga estatwa.” (2 Cron. 34:3) Busa, kining upat ka hari masiboton alang sa maayong mga buhat.
6. Nganong ikatandi ang atong ministeryo sa gihimo sa matinumanong mga hari sa Juda?
6 Karong adlawa, kita nakigbahin usab sa buluhaton nga nagtabang sa mga tawo sa pagbiya sa bakak nga relihiyosong mga pagtulon-an, lakip na sa idolatriya. Pinaagi sa atong pagpamalaybalay, atong mahimamat ang tanang matang sa katawhan. (1 Tim. 2:4) Usa ka dalagita sa Asia nahinumdom nga ang iyang inahan naghimog mga rituwal atubangan sa daghang imahen sa ilang balay. Siya naghunahuna nga dili mahimo nga ang tanang imahen naghawas sa matuod nga Diyos, busa subsob siyang mag-ampo nga unta iyang mailhan ang matuod nga Diyos. Usa ka adlaw niana may duha ka Saksi nga nanuktok sa ilang balay. Sila mitabang kaniya sa pagkahibalo sa talagsaong ngalan sa Diyos, si Jehova. Ug mapasalamaton gayod siya sa pagkahibalo sa kamatuoran bahin sa mga idolo! Karon siya nagpasundayag ug dalayegong kasibot pinaagi sa makugihong pagpakigbahin sa pagsangyaw, nga nagtabang sa mga tawo sa pagkaila kang Jehova.—Sal. 83:18; 115:4-8; 1 Juan 5:21.
7. Unsay atong mahimo sa pagsundog sa mga magtutudlo nga milibot sa tibuok nasod sa adlaw ni Jehosapat?
7 Sa dihang kita mamalaybalay, bug-os ba natong gikobrehan ang atong teritoryo? Makaiikag nga sa ikatulo ka tuig sa pagmando ni Jehosapat, siya nagpadalag lima ka prinsipe, siyam ka Levihanon, ug duha ka saserdote. Iyang gipaadto sila sa tanang siyudad aron sa pagtudlo sa katawhan sa mga balaod ni Jehova. Epektibo kaayo ang ilang buluhaton nga ang mga tawo sa mga nasod sa palibot nakakat-on sa pagkahadlok kang Jehova. (Basaha ang 2 Cronicas 17:9, 10.) Pinaagi sa atong pagduaw sa mga tawo sa lainlaing panahon, hayan atong makaestorya ang ubay-ubayng membro sa panimalay.
8. Sa unsang paagi nato mapauswag ang atong ministeryo?
8 Daghan sa mga alagad sa Diyos sa modernong panahon ang andam mobiya sa ilang balay ug moalagad diin dunay mas dakong panginahanglan sa masibotong mga Saksi. Makahimo ka ba niana? Ang pipila kanato nga dili makabalhin mahimong mosangyaw sa mga tawo nga nagpuyo sa atong lugar apan nagsultig laing pinulongan. Tungod kay lainlaig nasyonalidad ang iyang mahimamat diha sa iyang teritoryo, sa edad nga 81 anyos, si Ron nakakat-on pagtimbaya diha sa 32 ka pinulongan! Di pa dugay iyang nahibalag ang usa ka Aprikanong magtiayon diha sa dalan ug gitimbaya sila sa ilang lumad nga pinulongan, ang Yoruba. Ilang gipangutana si Ron kon nakaadto na ba siya sa Aprika. Sa dihang siya mitubag ug wala, sila nangutana kon giunsa niya pagkakat-on sa ilang pinulongan. Misangpot kini sa iyang paghatag kanila ug maayong pamatuod. Sila nalipayng midawat ug mga magasin ug ilang gihatag ang ilang adres, nga iyang gipasa sa lokal nga kongregasyon aron ang magtiayon madumalahan ug panagtuon sa Bibliya.
9. Nganong hinungdanon kaayo ang pagbasa sa Bibliya diha sa atong ministeryo? Paghatag ug pananglitan.
9 Ang mga magtutudlo nga gisugo ni Jehosapat sa paglibot sa nasod nagdala sa “basahon sa balaod ni Jehova.” Sa tibuok kalibotan kita naningkamot sa pagtudlo sa mga tawo pinasukad sa Bibliya, sanglit mao kana ang Pulong sa Diyos. Kita mohimog dugang paningkamot nga basahan sila sa Bibliya. Usa ka tagbalay ang miingon kang Linda, nga ang iyang bana naestrok ug kinahanglan niya kining atimanon. Ang tagbalay masulub-ong miingon: “Ambot kon unsay akong sala nga gitugotan man kini sa Diyos nga mahitabo kanako.” Aron mahupayan ang babaye gibasa ni Linda ang Santiago 1:13 ug siya midugang: “Ang tanang pag-antos nga nasinati nato ug sa atong mga minahal dili silot gikan sa Diyos.” Pagkadungog niana, siya gihalog sa tagbalay. Si Linda miingon: “Ako nakahatag ug kahupayan pinaagi sa paggamit sa Bibliya. Usahay ang mga bersikulo nga atong basahon wala pa madunggi sa tagbalay.” Kadto mitultol sa pagdumalag regular nga panagtuon sa Bibliya uban sa maong babaye.
Mga Batan-on nga Masibotong Nag-alagad
10. Sa unsang paagi si Josias usa ka maayong ehemplo sa Kristohanong mga batan-on karon?
10 Kon atong balikan ang ehemplo ni Josias, atong mamatikdan nga siya nagpakitag kasibot alang sa matuod nga pagsimba sa batan-on pa siya ug sa dihang siya nag-edad ug mga 20 anyos, iyang gisugdan ang dakong kampanya batok sa idolatriya. (Basaha ang 2 Cronicas 34:1-3.) Daghang batan-on karon ang nagpasundayag ug susamang kasibot diha sa ilang ministeryo.
11-13. Unsay atong makat-onan gikan sa modernong-adlaw nga mga batan-on kinsa masibotong nag-alagad kang Jehova?
11 Si Hannah, nga nagpuyo sa Inglaterra, nag-edad ug 13 anyos ug nagtuon ug Pranses sa eskuylahan sa dihang iyang nasayran nga dunay giporma nga grupo sa nagsulti nianang pinulongana diha sa duol nga lungsod. Misugot ang iyang Papa nga ubanan siya sa pagtambong sa mga tigom didto. Karon si Hannah 18 anyos na ug masibotong nagsangyaw ingong regular payunir gamit ang pinulongang Pranses. Makahimo ka ba usab sa pagtuon ug langyawng pinulongan ug pagtabang sa uban nga makakat-on bahin kang Jehova?
12 Si Rachel giganahan pag-ayo sa video nga Pursue Goals That Honor God. Sa paghisgot sa iyang panglantaw kaniadto sa bag-o pa siyang nagsugod sa pag-alagad kang Jehova niadtong 1995, siya miingon: “Abi nakog maayo na ang akong espirituwalidad.” Dayon siya midugang: “Human nako makita ang maong drama, akong naamgohan nga sulod sa daghang katuigan wala ra ko mouswag. Kinahanglan kong makigbisog alang sa kamatuoran ug maningkamot pag-ayo diha sa akong pagsangyaw ug personal nga pagtuon.” Karon gibati ni Rachel nga siya mas masibotong nag-alagad kang Jehova. Ingong resulta, unsay iyang naeksperyensiyahan? “Mas nasuod ako kang Jehova. Ang akong mga pag-ampo mas makahuloganon, ang akong pagtuon mas masangkaron ug mas makapalipay, ug ang mga asoy sa Bibliya nahimong mas buhi. Tungod niana, ganahan kaayo kong mosangyaw, ug dako ang akong kalipay nga makita ang uban nga nahupayan sa pulong ni Jehova.
13 Si Luke usa ka batan-on nga nadasig sa laing video, ang Young People Ask—What Will I Do With My Life? Human kana makita, si Luke misulat: “Natukmod ako sa pagpamalandong sa akong paagi sa pagkinabuhi.” Siya miingon: “Kaniadto, gipit-os ko nga unahon pagkab-ot ang pinansiyal nga kasegurohan pinaagi sa taas nga edukasyon ayha pa ang espirituwal nga mga tumong. Ang maong pagpit-os dili makatabang kanimo nga masuod kang Jehova; hinunoa, makapahuyang kana sa imong espirituwalidad.” Mga batan-on, nganong dili ninyo sulayan paggamit ang inyong nakat-onan sa eskuylahan sa pagpauswag sa inyong ministeryo sama sa gibuhat ni Hannah? Ug nganong dili ninyo sundogon ang ehemplo ni Rachel pinaagi sa masibotong pagkab-ot ug mga tumong nga nagpasidungog sa Diyos? Sundoga ang ehemplo ni Luke, nga likayan ang mga kapeligrohan nga nahimong lit-ag sa daghang batan-on.
Masibotong Maminaw sa mga Pasidaan
14. Unsang matanga sa pagsimba ang dawaton ni Jehova, ug nganong lisod kanang mahuptan karon?
14 Ang katawhan ni Jehova kinahanglang magmahinlo aron dawaton niya ang ilang pagsimba. Si Isaias nagpasidaan: “Pahilayo, pahilayo, gula gikan dinha, ayaw paghikap ug mahugaw; gula gikan sa iyang [Babilonya] taliwala, pagpabilin kamong hinlo, kamo nga nagdala sa mga galamiton ni Jehova.” (Isa. 52:11) Daghang katuigan una gisulat ni Isaias kanang mga pulonga, ang maayong hari nga si Asa naningkamot pag-ayo sa pagwagtang sa imoralidad gikan sa Juda. (Basaha ang 1 Hari 15:11-13.) Ug daghang siglo sa ulahi, giingnan ni apostol Pablo si Tito nga gihatag ni Jesus ang iyang kinabuhi aron hinloan ang iyang mga sumusunod ug himoon silang “usa ka katawhan nga iyaha lamang gayod, nga masiboton sa maayong mga buhat.” (Tito 2:14) Sa daghag-bisyo nga kalibotan karon, dili sayon—ilabina sa mga batan-on—nga magmahinlo sa moral. Pananglitan, ang tanang alagad sa Diyos, bata ug tigulang, kinahanglang makigbisog nga dili mahugawan sa pornograpiya nga makita diha sa dagkong mga karatula, sa TV, sine, ug ilabina sa Internet.
15. Unsay makatabang kanato sa pagdumot kon unsay daotan?
15 Ang atong kasibot sa pagpaminaw sa mga pasidaan sa Diyos makatabang kanato nga maugmad ang pagdumot sa daotan. (Sal. 97:10; Roma 12:9) Kinahanglang kasilagan ang pornograpiya aron “makalingkawas sa daw magnet nga puwersa niini,” sumala pa sa pagtawag niana sa usa ka Kristohanon. Aron mabulag ang metal nga mipilit sa magnet, kinahanglang mangusog ka pag-ayo. Sa susama, nagkinahanglan usab ug pagpanglimbasog aron dili mahaylo sa pornograpiya. Apan ang pagkasabot kon unsa ka dako ang kadaot nga ipahinabo kanato sa pornograpiya motabang kanato sa pagdumot niana. Ang usa ka brader nanglimbasog pag-ayo aron mahunong ang iyang pagsigeg tan-aw ug pornograpiya diha sa Internet. Iyang gibalhin ang iyang kompiyuter ngadto sa dapit nga makita sa ubang membro sa pamilya. Gawas niana, nahimo siyang mas determinado sa paghinlo sa iyang kaugalingon ug sa pagkahimong masiboton alang sa maayong mga buhat. Duna pa gani siyay laing gihimo. Tungod kay kinahanglan niyang gamiton ang Internet alang sa iyang trabaho, nakahukom siya nga gamiton lamang kana kon naa sa iyang tupad ang iyang asawa.
Ang Pagkahinungdanon sa Maayong Panggawi
16, 17. Unsay epekto sa atong maayong panggawi diha sa nakaobserbar kanato? Paghatag ug pananglitan.
16 Ang mga batan-on nga nag-alagad kang Jehova maayo kaayog tinamdan ug nakadayeg gayod niini ang nakaobserbar kanila. (Basaha ang 1 Pedro 2:12.) Ang usa ka bisita sa Bethel sa London nagbag-o sa iyang pagtan-aw sa mga Saksi ni Jehova human siya makagugol ug usa ka adlaw nga nag-ayo sa ilang imprentahan. Ang iyang asawa, kinsa nagtuon sa Bibliya uban sa usa ka Saksi, nakamatikod sa kausaban sa tinamdan sa iyang bana. Sa una, dili niya gustong moduaw ang mga Saksi sa iyang balay. Apan human siya makaduaw sa Bethel nakadayeg kaayo siya sa mga Saksi tungod sa ilang maayong pagtratar kaniya. Siya miingon nga walay namalikas. Ang tanan mapailobon, ug malinawon ang palibot. Ilabinang nakadayeg siya sa mga batan-on nga masibotong nagtrabaho nga walay suweldo, nga naghatag sa ilang panahon ug kusog aron sa pagpatik sa maayong balita.
17 Sa samang paagi, ang mga igsoon nga nanarbaho aron sa pag-atiman sa ilang pamilya maoy kugihan kaayong mga trabahador. (Col. 3:23, 24) Tungod niini, sila dili daling matangtang sa trabaho kay gipabilhan sa ilang mga amo ang ilang pagkamaayong motrabaho.
18. Sa unsang paagi kita mahimong “masiboton sa maayong mga buhat”?
18 Ang atong pagsalig kang Jehova, ang atong pagkamatinumanon sa iyang mga instruksiyon, ug ang atong pag-atiman sa atong mga dapit sa pagsimba nalakip sa mga paagi nga kita makapasundayag ug kasibot alang sa balay ni Jehova. Gawas pa niana, buot natong bug-os nga makigbahin sa pagsangyaw sa Gingharian ug sa paghimog mga tinun-an. Kita man bata o tigulang, pinaagi sa atong pagpanglimbasog nga magkinabuhi sumala sa hinlong mga sukdanan nga nalangkit sa atong pagsimba, atong maani ang daghang kaayohan. Ug kita padayong mailhan ingong mga tawo nga “masiboton sa maayong mga buhat.”—Tito 2:14.
[Footnote]
a Mahimong gigun-ob ni Asa ang hatag-as nga mga dapit nga gigamit sa pagsimba sa bakak nga mga diyos apan wala iapil kadtong mga dapit diin ang mga tawo nagsimba kang Jehova. O mahimong gitukod pag-usab ang hatag-as nga mga dapit sa ulahing bahin sa paghari ni Asa ug kini gigun-ob sa iyang anak nga si Jehosapat.—1 Hari 15:14; 2 Cron. 15:17.
Gikan sa Bibliya ug sa modernong-adlaw nga mga ehemplo, unsay imong nakat-onan bahin sa
• kon sa unsang paagi mapasundayag ang imong kasibot pinaagi sa pagsangyaw ug pagpanudlo?
• kon sa unsang paagi ang Kristohanong mga batan-on mahimong “masiboton sa maayong mga buhat”?
• kon sa unsang paagi mahunong ang makadaot nga mga batasan?
[Mga Pangutana sa Pagtuon]
[Hulagway sa panid 13]
Regular ka bang nagagamit sa Bibliya diha sa imong pagsangyaw?
[Hulagway sa panid 15]
Ang pagtuon ug laing pinulongan samtang nagtungha mahimong makatabang kanimo sa pagpauswag sa imong ministeryo