Mangin “Makugi sa Maayong mga Buhat”!
Mangin “Makugi sa Maayong mga Buhat”!
“[Si Jesus] naghatag sang iya kaugalingon para sa aton agod maluwas niya kita gikan sa tanan nga sahi sang pagkamalinapason kag tinluan para sa iya kaugalingon ang katawhan nga iya lang gid, nga makugi sa maayong mga buhat.”—TITO 2:14.
1. Ano ang natabo sang nag-abot si Jesus sa templo sang Nisan 10, 33 C.E.?
NISAN 10, 33 C.E. sadto, mga pila ka adlaw antes sang Paskua. Nakunyag gid ang grupo sang mga sumilimba sa templo sang Jerusalem. Ano ang natabo sang nag-abot si Jesus sa templo? Ang tatlo ka manunulat sang Ebanghelyo nga sanday Mateo, Marcos, kag Lucas, nagpamatuod nga sa ikaduha nga higayon, ginpanabog ni Jesus ang mga manugbakal kag mga negosyante. Ginpamaliskad niya ang mga lamesa sang mga manugbaylo sing kuarta kag ang mga pulungkuan sang mga manugbaligya sang mga pating. (Mat. 21:12; Mar. 11:15; Luc. 19:45) Wala nagtahaw ang kakugi ni Jesus nga ginpakita niya sang nagligad nga tatlo ka tuig.—Juan 2:13-17.
2, 3. Paano naton nahibaluan nga si Jesus indi lamang makugi sa pagpaninlo sang templo?
2 Ginpakita sang kasaysayan ni Mateo nga ang kakugi ni Jesus sa sina nga tion indi lamang sa pagpaninlo sang templo. Gin-ayo man niya ang mga bulag kag ang mga piang nga nagpalapit sa iya. (Mat. 21:14) Ginpatuhuyan man sang rekord ni Lucas ang iban pa nga ginhimo ni Jesus. “Nagpanudlo [si Jesus] sa templo adlaw-adlaw.” (Luc. 19:47; 20:1) Makita naton sa ministeryo ni Jesus nga makugi gid sia.
3 Sang ulihi nagsulat si apostol Pablo kay Tito nga nagpaathag nga si Jesus “naghatag sang iya kaugalingon para sa aton agod maluwas niya kita gikan sa tanan nga sahi sang pagkamalinapason kag tinluan para sa iya kaugalingon ang katawhan nga iya lang gid, nga makugi sa maayong mga buhat.” (Tito 2:14) Sa anong paagi mangin ‘makugi kita sa maayong mga buhat’? Kag paano kita mapalig-on sang mga halimbawa sang maayo nga mga hari sang Juda?
Kakugi sa Pagbantala kag Pagtudlo
4, 5. Sa anong paagi makugi gid sa maayong mga buhat ang apat ka hari sang Juda?
4 Gintinguhaan nanday Asa, Jehosapat, Ezequias, kag Josias nga madula ang idolatriya sa Juda. ‘Ginkuha ni Asa ang mga halaran nga dumuloong kag ang mataas nga mga duug, kag ginwagwag ang mga obelisco kag ginpulud ang mga Asherim.’ (2 Cron. 14:3) Bangod sang kakugi ni Jehosapat sa pagsimba kay Jehova, “ginkuha niya ang mataas nga mga duug kag ang Asherim sa Juda.”—2 Cron. 17:6; 19:3. *
5 Pagkatapos sang pito ka adlaw nga selebrasyon sang Paskua nga gin-organisar ni Ezequias sa Jerusalem, “ang bug-os nga Israel nga nagtambong naggowa pakadto sa mga banwa sang Juda kag nagdugmok sang mga obelisco kag nagpulud sang mga Asherim kag naglumpag sang mataas nga mga duug kag sang mga halaran gikan sa bug-os nga Juda kag Benjamin, sa Efraim man kag sa Manases, tubtub nga nalaglag nila sila tanan.” (2 Cron. 31:1) Nangin hari si Josias sa edad nga otso anyos. Nagsiling ang kasaysayan: “Sa ikawalo nga tuig sang iya paghari, sang bataon pa sia, nagsugud sia sa pagpangita sa Dios ni David nga iya amay; kag sa ikanapulo kag duha nga tuig nagsugud sia sa pagtinlo sang Juda kag sang Jerusalem sang mataas nga mga duug, sang mga Asherim, kag sang mga larawan nga tinigban kag sang mga larawan nga tinunaw.” (2 Cron. 34:3) Gani ining apat ka hari nangin makugi gid sa maayong mga buhat.
6. Ngaa mapaanggid ang aton ministeryo sa mga kampanya sang matutom nga mga hari sang Juda?
6 Sa karon, nagapakigbahin man kita sa pagbulig sa katawhan nga mahilway sa sayop nga panudlo sang relihion, lakip na ang idolatriya. Masugilanon naton ang tanan nga sahi sang tawo sa aton pagbantala sa mga balay. (1 Tim. 2:4) Ang isa ka dalagita sa Asia naghinumdom kon paano ang iya nanay nagahimo sing ritwal sa atubangan sang madamo nga mga imahen sa ila balay. Bangod nagapati sia nga indi marepresentaran sang mga imahen ang matuod nga Dios, pirme sia nagapangamuyo nga tani makilala niya ang matuod nga Dios. Sang ginbuksan niya ang nagapanuktok sa ila puertahan, nakita niya ang duha ka Saksi nga handa sa pagbulig sa iya nga makilala ang ngalan sang matuod nga Dios nga si Jehova. Nagapasalamat gid sia nga natun-an niya ang kamatuoran parte sa mga imahen! Ginapakita niya karon ang iya kakugi paagi sa mapisan nga pagtudlo sa mga tawo parte kay Jehova kag sa iya kabubut-on.—Sal. 83:18; 115:4-8; 1 Juan 5:21.
7. Paano naton mailog ang mga manunudlo nga ginpadala ni Jehosapat sa bug-os nga pungsod?
7 Kon nagapakigbahin kita sa pagbantala sa mga balay, daw ano kaid-id naton nga ginakobrehan ang aton teritoryo? Talalupangdon nga sa ikatlo nga tuig sang paghari ni Jehosapat, ginpadala niya ang lima ka prinsipe, siam ka Levinhon, kag duha ka saserdote sa tanan nga siudad agod tudluan ang mga tawo sang kasuguan ni Jehova. Epektibo gid ang ila kampanya kay ang mga tawo sa palibot nga mga pungsod nagkahadlok kay Jehova. (Basaha ang 2 Cronica 17:9, 10.) Paagi sa pagbisita sa mga balay sa lainlain nga tion, mahimo naton maistorya ang pila ka miembro sang panimalay.
8. Paano naton mapasangkad ang aton pagpanaksi?
8 Madamo sa mga alagad sang Dios karon ang handa sa pagbiya sa ila puluy-an agod mag-alagad sa kon diin mas nagakinahanglan sang makugi nga mga Saksi. Mahimo mo man bala ini? Ang pila sa aton nga indi makasarang sa pagsaylo, mahimo manikasog nga mapanaksihan ang mga tawo sa aton lugar nga may tuhay nga lenguahe. Bangod halin sa lainlain nga mga pungsod ang masugilanon ni Ron sa ila teritoryo, sa edad nga 81 anyos nakatuon sia sing panamyaw sa 32 ka lenguahe! Sining karon lang, nasugilanon niya sa dalan ang mag-asawa nga taga-Aprika kag gintamyaw niya sila sa ila lenguahe nga Yoruba. Ginpamangkot nila si Ron kon nakakadto na sia sa Aprika. Sang nagsabat sia nga wala, namangkot sila kon ngaa makahibalo sia sang ila lenguahe. Nagresulta ini sa maayo nga panaksi. Ginbaton nila ang pila ka magasin kag ginhatag nila ang ila adres, nga ginpadala naman ni Ron sa kongregasyon nga malapit sa ila agod matun-an sila sa Biblia.
9. Ngaa importante nga aktual nga basahon ang Biblia sa aton ministeryo? Maghatag sing halimbawa.
9 Ang mga manunudlo nga ginsugo ni Jehosapat may dala nga “tolon-an sang kasogoan sang GINOO.” Ginatinguhaan man naton nga tudluan sa Biblia ang mga tawo sa bilog nga kalibutan, bangod amo ini ang Pulong sang Dios. Ginapanikasugan gid naton sa aton ministeryo nga aktual mismo nga basahon ang Biblia. Ang isa ka tagbalay nagpaathag kay Linda, nga isa ka Saksi, nga naistrok ang iya bana kag kinahanglan niya atipanon. Nagsiling ang tagbalay: “Ambot kon ano ang sala ko ngaa gintugutan sang Dios nga matabo ini sa akon.” Nagsabat si Linda: “May isugid ako sa imo.” Dayon ginbasa niya ang Santiago 1:13 kag nagsiling: “Ang tanan nga pag-antos naton kag sang aton mga hinigugma indi silot sang Dios.” Bangod sini, ginhakos niya si Linda. Nagsiling si Linda: “Nalugpayan ko sia paagi sa paggamit sing Biblia. Kon kaisa ang teksto nga ginabasa naton sa Biblia wala pa gid nabatian sang tagbalay.” Ini nga pagsugilanon nagresulta sa regular nga pagtuon sa Biblia sa sini nga babayi.
Mga Pamatan-on nga Nagaalagad sing Makugi
10. Paano nangin maayo nga halimbawa si Josias para sa Cristianong mga pamatan-on subong?
10 Kon balikan naton ang halimbawa ni Josias, matalupangdan naton nga gintinguhaan niya ang matuod nga pagsimba subong isa ka pamatan-on kag mga 20 anyos sia sang nagsugod sa iya kampanya batok sa idolatriya. (Basaha ang 2 Cronica 34:1-3.) Madamo man nga pamatan-on subong ang nagapakita sing kaangay sini nga kakugi sa pag-alagad sa Ginharian.
11-13. Ano ang aton matun-an sa mga halimbawa sang mga pamatan-on karon nga makugi sa pag-alagad kay Jehova?
11 Si Hannah, nga taga-England, 13 anyos pa lang kag nagatuon sing Pranses nga lenguahe sa eskwelahan sang nabatian niya nga naporma ang isa ka grupo nga nagapamulong sing Pranses sa pihak nga banwa. Nagpasugot ang iya tatay nga updan sia sa pagtambong sa mga miting didto. Sa karon, 18 anyos na si Hannah kag makugi sia nga nagabantala sa mga Pranses subong isa ka regular payunir. Masarangan mo man bala nga magtuon sing iban nga lenguahe kag buligan ang mga tawo nga makatuon parte kay Jehova?
12 Nanamian gid si Rachel sa pagtan-aw sang video nga Pursue Goals That Honor God. Amo ini ang iya komento parte sa iya pagtamod sang una sang nagasugod pa lang sia sa pag-alagad kay Jehova sang 1995: “Abi ko kon nakapanggamot na gid sa akon ang kamatuoran.” Nagdugang sia: “Pagkatapos ko matan-aw ang drama, narealisar ko nga wala nagauswag ang akon pag-alagad sa sulod sang madamo nga tinuig. Kinahanglan ko tindugan ang kamatuoran kag mangin serioso sa akon pag-alagad kag personal nga pagtuon.” Mas makugi na karon si Rachel sa iya pag-alagad kay Jehova. Ano ang nangin resulta sini sa iya? “Nangin suod pa gid ako kay Jehova. Mas hanuot na karon ang akon pangamuyo, nag-uswag ang akon pagtuon kag mas makalilipay ini karon. Nangin mas matuod man sa akon ang mga kasaysayan sa Biblia. Bangod sini, nalipay gid ako sa pagbantala kag sa pagtan-aw nga nalugpayan ang iban sang pulong ni Jehova.”
13 Si Luke nga isa ka pamatan-on, napalig-on man sa isa pa ka drama nga Young People Ask—What Will I Do With My Life? Sa tapos niya ini matan-aw, nagsulat sia: “Napahulag gid ako nga usisaon liwat ang akon kabuhi.” Sia nagsiling: “Sang una, ginapilit gid ako nga tinguhaan anay nga magmanggaranon paagi sa pagkuha sing mas mataas nga edukasyon, kag ulihi na lang ang espirituwal nga mga tulumuron. Ini nga tulumuron wala nagapasuod sa aton kay Jehova, kundi nagapalayo pa gani.” Mga kauturan namon nga pamatan-on, ngaa indi ninyo gamiton ang inyo ineskwelahan agod mapasangkad ang inyo ministeryo kaangay ni Hannah? Ngaa indi ninyo pagsundon ang halimbawa ni Rachel paagi sa makugi nga pagtinguha sa mga tulumuron nga nagapadungog sa Dios? Sunda ang halimbawa ni Luke nga naglikaw sa mga katalagman nga mahimo magsiod sa mga pamatan-on.
Mangin Makugi sa Pagpamati sa mga Paandam
14. Ano nga sahi sang pagsimba ang ginabaton ni Jehova, kag ngaa mabudlay ini himuon karon?
14 Kinahanglan nga mangin matinlo ang mga alagad ni Jehova agod batunon ang ila pagsimba. Nagpaandam si Isaias: “Halin kamo, halin kamo, gowa kamo gikan diri, dili kamo magtandug sang butang nga dimatinlo; gowa kamo gikan sa tunga niya [Babilonia], paninloi ang inyo kaugalingon, kamo nga nagadala sang mga gamit sang GINOO.” (Isa. 52:11) Tinuig pa antes ginsulat ini ni Isaias, maukod na nga gintinguhaan sang maayo nga hari nga si Asa nga dulaon ang imoralidad sa Juda. (Basaha ang 1 Hari 15:11-13.) Pagligad sang pila ka siglo, ginsugiran ni apostol Pablo si Tito nga ginhatag ni Jesus ang iya kabuhi agod matinluan ang iya mga sumulunod kag mangin “katawhan nga iya lang gid, nga makugi sa maayong mga buhat.” (Tito 2:14) Sa sining puno sing bisyo nga kalibutan, indi gid mahapos, ilabi na sa mga pamatan-on, ang magpabilin nga matinlo sa moral. Halimbawa, ang tanan nga alagad sang Dios, bata man ukon tigulang, kinahanglan nga maglikaw sa impluwensia sang pornograpiya nga makita sa mga billboard, TV, pelikula, kag ilabi na sa Internet.
15. Ano ang makabulig sa aton agod madumtan ang malain?
15 Ang aton kakugi sa pagpamati sa mga paandam sang Dios makabulig sa aton nga dumtan ang malain. (Sal. 97:10; Roma 12:9) Dapat nga kangil-aran naton ang pornograpiya agod “makapanginpadlos kita sa makusog nga gahom sini kaangay sang magnet,” siling sang isa ka Cristiano. Agod maseparar ang duha ka magnet, kinahanglan sang isa ang puersa nga mas mabaskog pa sangsa puersa sang magnet. Sing kaanggid, kinahanglan man sing mas mabaskog nga panikasog agod mapamatukan ang pornograpiya. Kon mahibaluan naton kon daw ano ka makahalalit ang pornograpiya, makabulig ini sa aton nga kangil-aran ini. Ang isa ka utod nga lalaki nanikasog gid nga untaton ang iya huyog sa pagtan-aw sang pornograpiya sa Internet. Ginsaylo niya ang iya kompyuter sa lugar nga makita sang iya pamilya. Subong man, namat-od sia nga tinluan ang iya kaugalingon kag mangin makugi sa maayong mga buhat. Naghimo pa gid sia sang isa ka tikang. Bangod kinahanglan niya ang Internet para sa iya negosyo, namat-od sia nga gamiton lang ini kon ara sa tupad niya ang iya asawa.
Ang Kapuslanan sang Maayo nga Paggawi
16, 17. Ano ang epekto sang aton maayo nga paggawi sa mga nagaobserbar sa aton? Maghatag sing halimbawa.
16 Matahom gid ang ginapakita sang mga pamatan-on nga nagaalagad kay Jehova, kag ginadayaw man ini sang mga nakaobserbar! (Basaha ang 1 Pedro 2:12.) Sang nagkadto ang isa ka tawo agod kay-uhon ang imprintahan sa Bethel sa London, nagbag-o ang iya pagtamod sa mga Saksi ni Jehova. Natalupangdan sang iya asawa, nga nagatuon sa Biblia upod sa Saksi sa ila lugar, ang iya pagbag-o. Sang una, indi sia luyag nga magbisita ang mga Saksi sa ila balay. Apang sang nagpauli sia halin sa Bethel, nagdayaw gid sia sa mainayuhon nga pagtratar sa iya. Nagsiling sia nga wala sing may nagapamuyayaw. Ang tanan pasensioso, kag malinong ang palibot. Nagdayaw gid sia ilabi na sa mga pamatan-on nga mapisan sa ila trabaho pero wala sing sueldo, nga nagaboluntaryo sang ila tion kag kusog agod mabantala ang maayong balita.
17 Sing kaanggid, mapisan man ang mga kauturan sa ila sekular nga trabaho agod masuportahan ang ila pamilya. (Col. 3:23, 24) Bangod sini, nagadugay sila sa ila trabaho, kay ginapabaloran gid sang mga amo ang maayo nga mga empleyado.
18. Paano kita mangin “makugi sa maayong mga buhat”?
18 Ang aton pagsalig kay Jehova, pagtuman sa iya mga panuytoy, kag pagtatap sa aton duog tilipunan amo ang pila ka paagi nga mapakita naton ang aton kakugi sa balay ni Jehova. Isa pa, gusto naton nga makigbahin gid sing bug-os sa pagbantala sing Ginharian kag paghimo sing disipulo. Pamatan-on man kita ukon tigulang, ang aton panikasog nga masunod ang matinlo nga mga talaksan parte sa aton pagsimba makahatag sa aton sing madamo nga pagpakamaayo. Kag padayon kita nga makilala subong katawhan nga “makugi sa maayong mga buhat.”—Tito 2:14.
[Nota]
^ par. 4 Mahimo nga ginkuha ni Asa ang mataas nga mga duog nga naangot sa pagsimba sa butig nga mga dios pero indi ang mga duog nga ginasimbahan sang mga tawo kay Jehova. Ukon mahimo nga ang mataas nga mga duog ginpatindog sang ulihi nga bahin sang paghari ni Asa kag ginpakuha ini sang iya bata nga si Jehosapat.—1 Hari 15:14; 2 Cron. 15:17.
Gikan sa Biblia kag sa moderno nga mga halimbawa, ano ang imo natun-an parte sa kon
• paano mo mapakita ang imo kakugi sa pagbantala kag pagpanudlo?
• paano mangin “makugi sa maayong mga buhat” ang Cristianong mga pamatan-on?
• paano makapanginpadlos sa malaut nga mga paggawi?
[Mga Pamangkot sa Pagtinuon]
[Retrato sa pahina 13]
Pirme mo bala ginagamit ang Biblia sa imo pagbantala?
[Retrato sa pahina 15]
Ang pagtuon sang iban nga lenguahe samtang nagaeskwela makabulig sa imo nga mapasangkad ang imo ministeryo
