Agbalin a “Naregta iti Nasayaat nga Ar-aramid”!

‘[Ni Jesus] inyawatna ti bagina maipaay kadatayo tapno maispalnatayo iti tunggal kita ti kinakillo ket dalusanna a maipaay iti bagina ti maysa nga ili a naisangsangayan a kukuana, naregta iti nasayaat nga ar-aramid.’​—TITO 2:14.

1. Ania ti napasamak idiay templo idi simmangpet ni Jesus idi Nisan 10, 33 K.P.?

 NISAN 10, 33 K.P. idi, sumagmamano laengen nga aldaw sakbay ti Paskua. Adu a tattao nga immay iti templo idiay Jerusalem tapno agdayaw ti magagaranen a mangrambak iti dayta. Ania ngata ti mapasamak inton sumangpet ni Jesus? Tallo a mannurat ti Ebanghelio​—da Mateo, Marcos, ken Lucas​—paneknekanda nga iti maikadua a gundaway, pinagtalaw ni Jesus dagiti aglaklako ken aggatgatang sadiay. Binalintuagna dagiti lamisaan dagiti agsuksukat iti kuarta ken dagiti tugaw dagiti aglaklako ti kalapati. (Mat. 21:12; Mar. 11:15; Luc. 19:45) Saan a bimmaaw ti regta ni Jesus ta kasta met laeng ti inaramidna tallo a tawen sakbayna.​—Juan 2:13-17.

2, 3. Apay nga ammotayo a ti regta ni Jesus ket saan laeng nga agpaay iti panangdalus iti templo?

² Ipamatmat ti salaysay ni Mateo a ti regta ni Jesus iti dayta nga okasion ket saan laeng a maipaay iti panangdalus iti templo. Mangag-agas pay idi kadagiti bulsek ken pilay nga umas-asideg kenkuana. (Mat. 21:14) Ti surat ni Lucas dakamatenna pay dagiti dadduma nga inaramid ni Jesus. “[Ni Jesus] napan nangisursuro nga  inaldaw idiay templo.” (Luc. 19:47; 20:1) Ti regta ni Jesus ket nakabatbatad ngarud iti ministeriona.

³ Idi agangay, nagsurat ni apostol Pablo ken Tito ket inlawlawagna a ni Jesus ‘inyawatna ti bagina maipaay kadatayo tapno maispalnatayo iti tunggal kita ti kinakillo ket dalusanna a maipaay iti bagina ti maysa nga ili a naisangsangayan a kukuana, naregta iti nasayaat nga ar-aramid.’ (Tito 2:14) Kadagiti ania a pamay-an nga agbalintayo a “naregta iti nasayaat nga ar-aramid”? Ken kasano a maparegtatayo kadagiti ulidan dagiti naimbag nga ar-ari iti Juda?

Regta Maipaay iti Panangasaba ken Panangisuro

4, 5. Kadagiti ania a pamay-an nga impakita dagiti uppat nga ari ti Juda ti regta maipaay iti nasayaat nga ar-aramid?

⁴ Da Asa, Jehosafat, Ezekias, ken Josias nangaramidda iti kampania a naan-anay a mangikkat iti idolatria iti Juda. Inikkat ni Asa “dagiti ganggannaet nga altar ken dagiti nangato a disso ket rinumekna dagiti sagrado a munmon ket pinukanna dagiti sagrado a teddek.” (2 Cron. 14:3) Gapu iti regta ni Jehosafat iti pudno a panagdayaw, inikkatna “dagiti nangato a disso ken dagiti sagrado a teddek manipud Juda.”​—2 Cron. 17:6; 19:3. a

⁵ Kalpasan ti nadaeg a pito nga aldaw a selebrasion ti Paskua nga inorganisar ni Ezekias idiay Jerusalem, “amin dagiti Israelita a nasarakan sadiay napanda kadagiti siudad ti Juda, ket rinumekda dagiti sagrado a munmon ket pinukanda dagiti sagrado a teddek ket rinugpoda dagiti nangato a disso ken dagiti altar manipud iti intero a Juda ken Benjamin ken idiay Efraim ken Manases agingga a nalpasda.” (2 Cron. 31:1) Nagari ni agtutubo nga Josias idi agtawen laeng iti walo. Kuna ti salaysay: “Iti maikawalo a tawen ti panagturayna, bayat nga ubing pay laeng, rinugianna a biroken ti Dios ni David nga amana; ket iti maikasangapulo ket dua a tawen rinugianna a dalusan ti Juda ken Jerusalem manipud kadagiti nangato a disso ken kadagiti sagrado a teddek ken iti kinitikitan a ladladawan ken kadagiti sinukog nga estatua.” (2 Cron. 34:3) Gapuna, amin dagita nga uppat nga ari naregtada maipaay iti nasayaat nga ar-aramid.

6. Apay a mayasping ti ministeriotayo iti kampania dagiti matalek nga ari ti Juda?

⁶ Mangar-aramidtayo met ita iti umasping a kampania a mangtulong kadagiti tattao a lumapsut iti ulbod a pannursuro ti relihion, agraman ti idolatria. Maam-ammotayo ti amin a kita ti tao babaen iti ministeriotayo a panagbalaybalay. (1 Tim. 2:4) Malagip ti maysa nga agtutubo a babai a taga-Asia a ni nanangna mangar-aramid idi kadagiti ritual iti sango ti adu a rebulto iti balayda. Patienna a saan nga amin a ladawan ket irepresentarda ti pudno a Dios isu a masansan nga ikararag ti agtutubo a maammuanna koma no asino ti pudno a Dios. Idi pinasangbayna ti dua a Saksi nga immay iti balayna, sidadaan a tinulonganda a nangammo a ti naindaklan a nagan ti pudno a Dios ket Jehova. Anian a panagyamanna ta naammuanna ti kinapudno maipapan kadagiti idolo! Ita mangipakpakitan iti napalalo a regta babaen iti sipapasnek a pannakiramanna iti ministerio iti tay-ak, a tumultulong kadagiti sabsabali a mangammo ken Jehova ken iti pagayatanna.​—Sal. 83:18; 115:4-8; 1 Juan 5:21.

7. Ania ti maaramidtayo tapno matuladtayo dagiti mannursuro a naibaon iti intero a pagilian idi kaaldawan ni Jehosafat?

⁷ No makiramantayo iti ministerio a panagbalaybalay, mamin-ano a malpastayo ti naituding a teritoriatayo? Makapainteres ta idi maikatlo a tawen ti panagturayna, nangibaon ni Jehosafat iti lima a prinsipe, siam a Levita, ken dua a papadi. Imbaonna ida iti amin a siudad tapno isuroda kadagiti tattao dagiti linlinteg ni Jehova. Epektibo unay ti panangisuroda ta dagiti tattao kadagiti nasion iti aglikmut ti Juda nangrugida nga agbuteng ken Jehova. (Basaen  ti 2 Cronicas 17:9, 10.) Babaen ti panagsarungkar kadagiti pagtaengan iti nagduduma a tiempo ken aldaw, nalabit makasaritatayo ti nagduduma a miembro ti pamilia.

8. Kasano a mabalin a palawaentayo ti panangasabatayo?

⁸ Adu nga adipen ti Dios iti kaaldawantayo ti situtulok a mangpanaw kadagiti pagtaenganda ken umakar tapno agserbi iti lugar a dakdakkel ti pakasapulan kadagiti naregta a Saksi. Mabalinmo met kadi ti umakar? Dadduma kadatayo a di makabael nga umakar ti mabalin a mangasaba kadagiti tattao nga agnanaed iti lugartayo a naiduma ti lenguaheda. Gapu ta nagduduma ti nasionalidad dagiti tattao iti teritoriana, ni Ron nga agtawenen iti 81, sinursurona ti mangkablaaw iti 32 a nagduduma a lenguahe! Nabiit pay a naam-ammona iti kalsada ti agassawa nga Africano ket kinablaawanna ida iti bukodda a pagsasao a Yoruba. Dinamagda ken Ron no nakapanen idiay Africa. Idi imbagana a saan pay, dinamagda no kasano a nasursurona ti agsao iti lenguaheda. Gapu iti dayta, naaddaan ni Ron iti gundaway a mangasaba. Inawatda a dagus dagiti magasin ket situtulok nga intedda kenkuana ti adresda, ket inted dayta ni Ron iti lokal a kongregasion tapno mayadalan iti Biblia dagiti agassawa.

9. Apay a napateg ti panangbasa iti Biblia iti ministeriotayo? Mangted iti pagarigan.

⁹ Dagiti mannursuro a napan iti intero a pagilian gapu iti bilin ni Jehosafat ket addaanda “iti libro iti linteg ni Jehova.” Iti sangalubongan ikagumaantayo nga isuro ti Biblia kadagiti tattao, ta dayta ti Sao ti Dios. Iti ministeriotayo, ikagumaantayo nga ipakita ken ipabasa kadakuada a mismo dagiti sasao ti Biblia. Imbaga ti maysa a bumalay iti Saksi nga agnagan Linda, a naatake ti asawana ket kasapulan nga asikasuenna. Insennaay ti bumalay: “Diak ammo no ania ti nakabasolak iti Dios ta impalubosna a mapasamak kaniak daytoy.” Simmungbat ni Linda: “Adda man la ngarud kayatko nga ipasigurado kenka.” Kalpasanna, binasana ti Santiago 1:13 sana innayon: “Amin a panagsagaba a mapasarantayo ket saan a pannusa ti Dios.” Gapu iti dayta, inarakup ti bumalay ni Linda. Insalaysay ni Linda: “Nakaipaayak iti panangliwliwa babaen ti panangusarko iti Biblia. No dadduma dagiti teksto a basaentayo manipud iti Biblia ket dagidiay saan pay a pulos a nangngegan ti bumalay.” Dayta a pannakisarita ti nangrugian ti regular a panagadal ti Biblia iti pagtaengan daytoy a babai.

Dagiti Agtutubo a Sireregta nga Agserserbi

10. Kasano a ni Josias ket nagsayaat nga ulidan kadagiti Kristiano nga agtutubo iti kaaldawantayo?

¹⁰ No sublianantayo ti pagarigan maipapan ken Josias, makitatayo nga intandudona ti pudno a panagdayaw manipud kinaagtutubona ket agtawen iti agarup 20 idi rinugianna ti nasaknap a kampania a mangikkat iti idolatria. (Basaen ti 2 Cronicas 34:1-3.) Adu nga agtutubo ita ti mangipakpakita iti umasping a regta iti ministerio.

11-13. Ania dagiti leksion a maadaltayo kadagiti agtutubo iti kaaldawantayo a sireregta nga agserserbi ken Jehova?

¹¹ Ni Hannah, agtawen iti 13 ken agnanaed idiay England, ket agad-adal iti lenguahe a Pranses idi nangngegna nga adda  nabuangay a grupo nga agus-usar iti lenguahe a Pranses iti kabangibang nga ili. Immannugot ni tatangna a mangkuyog kenkuana a makigimong sadiay. Ita ta agtawenen iti 18, sireregta ni Hannah a mangaskasaba babaen iti lenguahe a Pranses kas maysa a regular pioneer. Mabalinmo met kadi ti agadal iti sabali a lenguahe tapno matulongam ti dadduma a tattao a mangam-ammo ken Jehova?

¹² Ni Rachel naan-anay a tinagiragsakna a binuya ti video a Pursue Goals That Honor God (Ragpatenyo Dagiti Kalat a Pakaidayawan ti Dios). Maipapan iti panagpampanunotna idi rugianna ti agserbi ken Jehova idi 1995, kastoy ti kuna ni Rachel: “Impagarupko nga impatpategkon ti kinapudno.” Kalpasanna kinunana: “Idi nabuyak dayta a drama, nabigbigko a pagdamdamuan laeng dagiti ar-aramidek iti adu a tawen. Masapul nga ikalintegak ti kinapudno ken pagreggetak ti agserbi ken agadal a personal.” Marikna ni Rachel a naregregta itan nga agserserbi ken Jehova. Ania ti imbunga ti kinaregtana? “Simminged ti relasionko ken Jehova. Napaspasnek dagiti kararagko, immuneg ti pannakaawatko ken ad-adda a makagunggona, ken nagbalin nga napaypayso kaniak dagiti salaysay ti Biblia. Gapu iti dayta, tagtagiragsakekon ti ministeriok ken mapnekak unay no makitak a maliwliwa ti dadduma babaen kadagiti sasao ni Jehova.”

¹³ Ni Luke ket maysa nga agtutubo a naparegta babaen iti sabali pay a video, ti Young People Ask​—What Will I Do With My Life? (Iyimtuod ti Agtutubo​—Ania ti Aramidek iti Biagko) Kalpasan a binuyana daytoy a video, insurat ni Luke: “Pinampanunotko ti kasasaad ti biagko.” Inaminna: “Iti napalabas, inyun-unak ti manggun-od iti natalged a pinansial a kasasaad babaen iti nangato nga adal ket kalpasanna ipamaysakton dagiti naespirituan a kalat. Ngem ti kasta a kalat saan a makatulong kenka a mangpabileg iti relasionmo iti Dios; no di ket pakapuyennaka iti naespirituan.” Dakayo nga agtutubo, mabalinyo met kadi nga usaren ti naadalyo iti eskuelaan tapno mapalawa ti ministerioyo kas iti inaramid ni Hannah? Ken apay a dikay tuladen ti ulidan ni Rachel, babaen ti sireregta a panangragpat kadagiti kalat a pudno a mangidayaw iti Dios? Tuladenyo ti ulidan ni Luke tapno maliklikanyo dagiti peggad a nagbalin a silo kadagiti adu nga agtutubo.

Sireregta nga Ipangag Dagiti Pakdaar

14. Ania a kita ti panagdayaw ti anamongan ni Jehova, ken apay a narigat a salimetmetan ti kasta a panagdayaw ita?

¹⁴ Masapul a nadalus ti ili ni Jehova tapno maawat ti panagdayawda kenkuana. Namakdaar ni Isaias: “Pumanawkayo, pumanawkayo, rummuarkayo dita, dikay sagiden ti aniaman a narugit; rummuarkayo iti tengngana [ti Babilonia], pagtalinaedenyo a nadalus ti bagbagiyo, dakayo nga agaw-awit kadagiti aruaten ni Jehova.” (Isa. 52:11) Adu a tawen sakbay pay nga insurat ni Isaias dagidiay a sasao, ti naimbag nga ari a ni Asa sireregta nga intultuloyna ti kampania a mangikkat iti imoralidad iti Juda. (Basaen ti 1 Ar-ari 15:11-13.) Ket sinigsiglo kalpasanna, insurat ni apostol Pablo ken Tito a ni Jesus inyawatna ti bagina tapno dalusanna dagiti pasurotna ken pagbalinenna ida a “maysa nga ili a naisangsangayan a kukuana, naregta iti nasayaat nga ar-aramid.” (Tito 2:14) Iti agdama a kagimongan a nasaknap ti bisio, saan a nalaka ti agtalinaed a nadalus iti moral, nangnangruna kadagiti agtutubo. Kas pagarigan, amin nga adipen ti Dios, agtutubo man wenno nataengan, masapul nga ikagumaanda ti agtalinaed a di namulitan iti pornograpia a maipakpakita kadagiti karatula, telebision, sine, ken nangnangruna iti Internet.

15. Ania ti makatulong tapno mapatanortayo ti pananggura iti dakes?

¹⁵ Ti regtatayo a mangipangag kadagiti pakdaar  ti Dios tulongannatayo a manggura iti dakes. (Sal. 97:10; Roma 12:9) Masapul a guraentayo ti pornograpia tapno “makalapsuttayo iti nabileg a pangallukoyna,” kas kinuna ti maysa a Kristiano. Tapno masinasina dagiti nagdedekket a metal nga addaan magneto, kasapulan ti maysa ti puersa a napigpigsa ngem iti magneto. Umasping iti dayta, kasapulan ti kasta unay a panangikagumaan a mangilaksid iti pangawis ti pornograpia. Ngem no maawatantayo ti panangdangran ti pornograpia matulongantayo a manggura iti dayta. Inkagumaan ti maysa a kabsat a lalaki nga insardeng ti ugalina nga agbuya iti pornograpia iti Internet. Inyakarna ti kompiuterna iti lugar a makitkita ti pamiliana. Determinado met nga agbalin a nadalus ken naregta iti nasayaat nga ar-aramid. Saan la a dayta ti inaramidna. Agsipud ta agus-usar iti Internet iti negosiona, inkeddengna nga usaren laeng dayta no kaduana ti asawana.

Ti Kinapateg ti Nasayaat a Kababalin

16, 17. No nasayaat ti kababalintayo, ania ti epekto dayta kadagidiay makapalpaliiw kadatayo? Mangted iti pagarigan.

¹⁶ Anian a nagsayaat a kababalin ti ipakpakita dagiti agtutubo a lallaki ken babbai nga agserserbi ken Jehova, ket makaawis daytoy kadagiti makaimatang! (Basaen ti 1 Pedro 2:12.) Maysa a bisita idiay Bethel iti London ti naan-anay a nangbalbaliw iti panangmatmatna kadagiti Saksi ni Jehova kalpasan ti nagmalem a panangtarimaanna iti maysa a makina a pagimprenta sadiay. Ni baketna, a makipagad-adal iti Biblia iti maysa a Saksi iti lugarda, nadlawna ti panagbalbaliw ti kababalin ni lakayna. Sigsigud a dina kayat a sumarungkar dagiti Saksi iti pagtaenganna. Ngem idi naggapu iti Bethel a nagtrabahuanna, napalalo ti panangidayawna iti nasayaat a pannakilangenda kenkuana. Imbagana nga awan ti agsasao ti dakes. Naanusda amin ken natalnada. Nagustuanna a nangnangruna dagiti agtutubo a lallaki ken babbai a sireregta nga agtartrabaho nga awanan sueldo, a situtulok nga us-usarenda ti tiempo ken pigsada tapno maipablaak ti naimbag a damag.

¹⁷ Kasta met, dagiti kakabsat a lallaki ken babbai nga agtartrabaho tapno maipaay ti kasapulan ti pamiliada ket nagaget ken nalaingda met nga agtrabaho. (Col. 3:23, 24) Masansan a saanda a masesante ta ipatpateg ida dagiti amoda.

18. Kasano nga agbalintayo a ‘naregta maipaay iti nasayaat nga ar-aramid’?

¹⁸ Ti sumagmamano a pamay-an a maipakitatayo ti regta iti balay ni Jehova ket ti panagtulnogtayo ken Jehova, ti panangtungpaltayo kadagiti instruksionna, ken ti panangaywantayo kadagiti paggigimongantayo. Kanayonanna, kayattayo ti naan-anay a makiraman iti panangikasaba iti Pagarian ken panangaramid adalan. Agtutubotayo man wenno nataenganen, sagrapentayo ti adu a gunggona no aramidentayo ti amin a kabaelantayo a mangsalimetmet iti kinadalus iti panagdayawtayo. Ket agtultuloy nga agbalintayo a nalatak kas tattao a “naregta iti nasayaat nga ar-aramid.”​—Tito 2:14.

[Footnote]

Manipud kadagiti pagarigan iti Biblia ken iti kaaldawantayo, ania ti nasursurom maipapan iti no

• kasano a maiparangarangmo ti regtam babaen ti panangasaba ken panangisuro?

• kasano a dagiti Kristiano nga agtutubo agbalinda a ‘naregta maipaay iti nasayaat nga ar-aramid’?

• kasano ti lumapsut kadagiti makadangran nga ugali?

[Salsaludsod]

[Ladawan iti panid 13]

Masansan kadi nga us-usarenyo ti Biblia iti ministerioyo?

[Ladawan iti panid 15]

Ti panangadal iti sabali a pagsasao bayat nga ages-eskuelaka matulongannaka a mangpalawa iti ministeriom