Ajunngitsuliornermik aallussilluarit!

“[Jiisusi] imminut tunniuppoq uagut pilluta inatsisaatsuliornernit sunilluunniit tamanit utertikkumalluta pigisaqalerumallunilu inuiannik minguitsunik ajunngitsuliornissamillu noqqaassuteqartunik.” — TITUSI 2:14.

1. Jiisusi ukiumi 33-mi nisanip qulingani tikiummat naalaffimmi qanoq pisoqarpa?

UKIUMI 33-mi nisanip qulingat qaavoq, poorskisiornissaq ullualunnik sioqqullugu. Pallorfiginnikkiartortorpassuit pissamaartut Jerusalemimi naalaffimmiipput. Jiisusi takkuppat qanoq pisoqassava? Iivangkiiliunik allattut pingasut — Matthæusi, Markusi Lukasilu — Jiisusip aappassaanik naalaffimmi tuniniaallutillu pisiniartunik anisitsineranik takunnittuupput. Taassuma aningaasanik nioqquteqartut nerrivii tuinillu nioqquteqartut issiavii uppikaatippai. (Matthæusi 21:12; Markusi 11:15; Lukasi 19:45) Jiisusi ukiut pingasut tamatuma siorna tamatumunnga assingusumik iliuuseqarami aallussilluarnermisulli aallussilluartigaaq. — Johannesi 2:13-17.

2, 3. Qanoq ililluta nalunngilarput Jiisusip aallussilluarnera naalaffimmik minguiaaneratiguinnaanngitsoq ersertoq?

² Matthæusip allaatigisaanit paasinarpoq Jiisusip pisimasumi tamatumani aallussilluarnera naalaffimmik minguiaaneratiguinnaanngitsoq ersertoq. Aamma tappiitsunik iloqiannillu imminut orniguttunik ajorunnaarsitsisarpoq. (Matthæusi 21:14) Lukasip allaatigisaanit erserpoq Jiisusi aamma allanik suliaqartartoq, imami allassimavoq: “Ullut tamaasa naalaffiup silarliani ajoqersuisarpoq.” (Lukasi 19:47; 20:1) Taamaalilluni Jiisusip  aallussilluarnera tamanut kiffartuuteqarnerani erseqqippoq.

³ Kingusinnerusukkut apustilip Paulusip Titusi allaffigaa nassuiaallugu Jiisusi “imminut [tunniuttoq] uagut pilluta inatsisaatsuliornernit sunilluunniit tamanit utertikkumalluta pigisaqalerumallunilu inuiannik minguitsunik ajunngitsuliornissamillu noqqaassuteqartunik.” (Titusi 2:14) Ullumikkut qanoq ililluta ‘ajunngitsuliornissamik noqqaassuteqarsinnaavugut’, imaluunniit ajunngitsuliornermik aallussilluarsinnaavugut? Judamilu kunngit ajunngitsut maligassiaat uagutsinnik qanoq kajumissisitsisinnaappat?

Oqaluussinermik ilinniartitsinermillu aallussilluarneq

4, 5. Judami kunngit sisamat ajunngitsuliornermik aallussilluarnertik qanoq ilillutik ersersippaat?

⁴ Asap, Joshafatip, Hizkijap Josijallu Judami guutipilussiornermik nungutitsinissartik siunniuppaat. Asap “allamiut pilliivii qattorngillu pilliisarfiit piiarpai ujaqqallu napasut sequtserlugit napasullu Asheramut pigititaasut killorlugit.” (2 Nalunaarsuutit 14:2) Joshafatip, Jehovamik pallorfiginninnermik aallussilluangaartup, “[qattorngit] pilliisarfiit napasullu Asheramut pigititat Judamit aamma piiarpai”. — 2 Nalunaarsuutit 17:6; 19:3. *

⁵ Poorskisiorfiup pingaartorsiorfiusup Hizkijap aaqqissugaata ullunik arfineq-marlunnik sivisussusillip kingorna, “Israelikkut katersorsimasut tamarmik illoqarfinnut Judamiittunut aallararput, ujaqqallu napasut sequtserpaat napasullu Asheramut pigititat killorlugit, qattorngillu pilliisarfiit pilliiviillu Judamiittuinnaanngitsut aammattaarli Benjaminimiittut Efraimimiittullu Manassemiittullu aserorterlugit amiakkuerullugit.” (2 Nalunaarsuutit 31:1) Josija arfineq-pingasuinnarnik ukioqarluni kunnginngorpoq. Ima oqaluttuarineqarpoq: “Ukiut naalakkersuiffimmi arfineq-pingajussaanni — suli inuusuttuaraalluni — siuaasami Daavip Guutia ujarnialerpaa; ukiullu naalakkersuiffimmi aqqaneq-aappassaanni qattorngit pilliisarfiit, napasut Asheramut pigititat guutiliallu qiperukkat kuisallu Judamit Jerusalemimillu piialerpai.” (2 Nalunaarsuutit 34:3) Tassa kunngit sisamat taakku tamarmik ajunngitsuliornermik aallussilluarput.

6. Sooq oqaluussinerput Judami kunngit guutipilussiornermik nungutitsiniarlutik aalajangersimallutik iliuuseqarnerannut assersuunneqarsinnaava?

⁶ Ullumikkuttaaq uagut inuit upperisarsiornikkut ajoqersuutinit eqqunngitsunit guutipilussiornermillu aniguinissaannut ikiorniarlugit aalajangersimalluta iliuuseqartarpugut. Illumit illumut kiffartornitsinni “inuit tamalaat” naapittarpavut. (1 Timotheusi 2:4, NV) Niviarsiap Asiamiup eqqaamavaa anaanami angerlarsimaffimminni guutiliat assigiinngitsut saanni ileqqulersuuteqartarnera. Niviarsiaq eqqarsarpoq guutiliat tamarmik Guutimut ilumoortumut assersuutaasinnaanngitsut, taamaattumillu Guuti qinnuigigajuppaa kinarpiaaneranik paasinninnissaminut ikioqqulluni. Ullut ilaanni matuanut kasuttortoqarpoq, Jehovallu Nalunaajaasui marluk matup silataaniipput Guutip ilumoortup aqqanik, Jehovamik, paasinninnissaanut ikiuiumasut. Guutipiluit pillugit sallusuissut paasigamiuk qujamasoqaaq. Maanna nammineq oqaluussisartuuvoq aallussilluartoq inoqatiminik Jehovamik ilisarisimannilernissaannut ikiuisartoq. — Tussiaat 83:19; 115:4-8; 1 Johannesi 5:21.

7. Ilinniartitsisut Joshafatip nalaani nuna tamakkerlugu angalaartut ilaarniarlugit susinnaavugut?

⁷ Angalaarfigisartakkatsinni illumit illumut angalaaraangatta qanoq peqqissaartigisumik oqaluussisarpugut? Soqutiginarpoq Joshafatip ukiut naalakkersuiffimmi pingajuanni naalagartat tallimat, Levikkuusut qulingiluat palasillu marluk qaaqqutimmagit. Taakku peqquai illoqarfinnut tamanut angalaaqqullugit Jehovap inatsisai inuiannut ilinniartitsissutigalugit. Ilinniartitsiniarlutik immikkut suliniuteqarnerat ima sunniuteqarluartigaaq inuiaqatigiit eqqaamiui Jehovamik qunuginnilerlutik. (Atuaruk 2 Nalunaarsuutit 17:9, 10). Inuit piffissani assigiinngitsuni sapaatillu-akunnerata ulluini assigiinngitsuni pulaartarutsigit immaqa inoqutigiinni ataatsini inuit arlallit naapissinnaassavavut.

8. Qanoq ililluta inuit amerlanerusut oqaloqatiginissaannut periarfissaqalersinnaavugut?

 ⁸ Ullumikkut Guutimut kiffaasut ilarpassui oqaluussisartunik aallussilluartunik pisariaqartitsiffiunerusunut nuunnissamut piumassuseqarsimapput. Aamma illit nuussinnaassavit? Nuussinnaanngitsut ilaat angalaarfigisartakkaminni nunami allamiunut immaqa oqaluussisinnaapput. Ronip, 81-inik ukiullip, angalaarfigisartakkamini inuit assigiinngitsorpassuarnik inuiaassusillit naapittaramigit ilassinneriaatsit oqaatsit assigiinngitsut 32-t atorlugit ilinniarsimavai! Qanittukkut aappariit Afrikamiut aqqusinermi naapippai yorubasullu, oqaatsit taakkua ilitsoqqussaat atorlugit, ilassillugit. Taakkua Ron aperaat Afrikamiissimanersoq. Naameermat aperaat qanoq ililluni yorubasut oqalussinnaanersoq. Tamanna taassuma nalunaajaalluarneranik kinguneqarpoq. Aappariit kajumillutik atuagassianik piumapput adressertillu Ronimut tunniullugu, taassumalu ilagiinnut najukkaminiittumut ingerlateqqippaa Biibilimik atuaqqissaaqatigineqarniassammata.

9. Oqaluussinitsinni Biibilimit atuartarnissarput sooq taama pingaaruteqartigaa? Assersuuteqarit.

⁹ Ilinniartitsisut Joshafatimit peqquneqarlutik nuna tamakkerlugu angalaartut “[Jehovap] inatsisaasa allassimaffiat” nassartarpaat. Silarsuaq tamakkerlugu inuit Biibilimeersunik ilinniartinniarlugit iliuuseqartarpugut, taanna Guutip oqaaserimmagu. Oqaluussinitsinni Biibilip quppertarnissaa inuillu tassani qanorpiaq allassimasoqarneranik takutittarnissaat pingaartipparput. Arnap, oqaluussisartumit Lindamik atilimmit pulaarneqartup, uini aanaartoorsimanerarpaa taamaattumillu kisimiissinnaannginnerarlugu. Anersaarululluni ima oqarpoq: “Naluara susimanerlunga Guutip taamatut pisoqartimmagu.” Lindap ima akivaa: “Qiimmaallannartumik atuffassinnaavakkit?” Taava Jaaku 1:13 atuarpaa imalu nangilluni: “Tassa uagut nammineq asasattalu naalliuutigisartagaat Guutimit pillaatisiaanngillat.” Taava arnap Linda eqerujussuarpaa. Linda ima oqarpoq: “Biibili atorlugu tuppallersarpara. Ilaannikkut versit atuffassissutigisavut pulaakkatta tusarsimanngisaannartarpaat.” Oqaloqatigiinnermik kingunerisaanik arnaq aalajangersimasumik Biibilimik atuaqqissaaqatigineqartalerpoq.

Inuusuttut aallussilluarlutik kiffartortut

10. Josija ullumikkut inuusuttunut kristumiunut qanoq maligassaalluarpa?

¹⁰ Josijap maligassiaa uterfigeriarutsigu maluginiassavarput taanna inuusuttunnguunerminiilli upperisamik ilumoortumik malinninnialersoq aamma guutipilussiorneq nungutinniarlugu immikkut suliniuteqalerami 20-t missiliorlugit ukioqartoq. (Atuaruk 2 Nalunaarsuutit 34:1-3). Ullumikkut inuusuttorpassuit Guutip naalagaaffianut kiffartornermi tamatumunnga assingusumik aallussilluarput.

11-13. Ullumikkut inuusuttut aallussilluarlutik Jehovamut kiffartortut qanoq ilinniarfigisinnaavavut?

¹¹ Hannah, Tuluit Nunaanni najugalik, illoqarfimmi ungasinngitsumi franskisut oqaluttunut gruppeqalersimanera tusaramiuk 13-inik ukioqarpoq atuarfimmilu franskisut ilinniarluni. Hannahp ataataa panimmi franskisut ataatsimiigiaqatigisarnissaanut akuersivoq. Hannah, maanna 18-inik ukiulik, angalaarfigisartakkami franskisut oqaluffiusumi pioneriuvoq  aallussilluartoq. Aamma illit allamiut oqaasiinik ilinniarsinnaavit allallu Jehovamik ilisarisimannilernissaannut ikiorlugit?

¹² Rachelip filmi Sæt dig mål som ærer Gud nuannarisorujussuuaa. Oqaluttuarpoq 1995-imi Jehovamut kiffartuleqqaarami qanoq eqqarsartarsimanerluni: “Taamani isumaqarpunga sallusuissut pigiliussimallugu.” Imali nangippoq: “Filmi takoreerlugu paasilerpara ukiorpassuarni malinnaarusaaginnarsimallunga. Maanna paasivara sallusuissut pillugu akiuuttariaqarlunga, eqqarsaatiginneqqissaartariaqarlunga aamma oqaluussineq namminerlu atuaqqissaartarnera tamaviaarutigisariaqarlugit.” Maanna Rachel misigivoq Jehovamut kiffartornermini aallussilluarnerulluni. Tamanna sumik pissarsiffigaa? “Jehovamut qaninnerulerpunga. Qinnutikka imaqarnerulerput, sukumiinerusumik atuaqqissaartalerpunga aamma atuaqqissaartarnikka nalerisimaarnarnerulerput, aamma Biibilimi oqaluttuarineqartut takorlooruminarnerulerput. Maanna oqaluussineq nuannaraara Jehovallu oqaasiata allanut tuppallersaataasinnaanera takullugu assut nalerisimaartarlunga.”

¹³ Angutip inuusuttup Lukemik atillip filmi alla, Unge spørger: Hvad vil jeg med mit liv?, killinneqaatigaa. Filmi takoreerlugu Luke ima allappoq: “Inuunerma eqqarsaatigeqqinnissaanut kajumississutigaara.” Ima nassuerpoq: “Siornatigut allanit kajumissaarneqartarpunga qaffasinnerusumik ilinniagaqarnikkut aningaasaqarnikkut toqqissisimaniaqqullunga taamaalioreerumalu aatsaat anersaakkut ittunik anguniagaqaqqullunga. Kajumissaarutit taama ittut anersaakkut siumukarnissamut siuarsaataanatik akornutaapput.” Ilissi qatanngutit inuusuttut, soormi eqqarsaatigigussiuk Hannahp iliorsimaneratut atuarfimmi ilikkakkasi iluaqutigalugit oqaluussinermi iliuuseqarnerusinnaannginnerlusi? Aamma soormi Guutimut ilumut ataqqinaataasunik aallussilluarlusi anguniagaqarnissigut Rachelip maligassiaa malikkussiuk? Lukep maligassiuilluarnera malissiuk napiaaniutit inuusuttorpassuit napitiffigisimasaat ingalassimallugit.

Aallussilluarlutit mianersoqqussutit eqqumaffigikkit

14. Jehovamit akuerineqarumalluta qanoq pallorfiginnissaagut, aamma sooq ullumikkut Jehovap piumasaqaataanik eqqortitsinissaq unamminiarnangaarpa?

¹⁴ Jehovap kiffai minguitsuusariaqarput pallorfiginninnertik akuerineqarsinnaassappat. Esaja ima mianersoqqusivoq: “Aallaritsi, aallaritsi, illoqarfimmit [Babylonimit] aallaritsi, mingunnartumik attueqinasi! Qimanniarsiuk, minguersaritsi, ilissi immersakkanik [Jehovap] piinik tigumiartusi!” (Esaja 52:11) Esajap taamatut allannissaa ukiorpassuarnik sioqqullugu kunngi ajunngitsoq Asa Judami kinguaassiuutitigut inuunerlunnermik nungutitsiniarluni immikkut suliniuteqarnissarsuarmik aallarniisimavoq. (Atuaruk 1 Kunngit 15:11-13). Ukiullu hundredit arlallit tamatuma kingorna apustilip Paulusip Titusi allaffigaa Jiisusi ajoqersukkani pillugit imminut tunniussimasoq ‘inuianngortikkumallugit minguitsut ajunngitsuliornissamillu noqqaassuteqartut’. (Titusi 2:14) Ullumikkut innuttaaqatigiinni ileqqussatigut ajortunngorsimasuni ileqqussatigut minguitsuujuarnissaq imaannaanngilaq — ingammik inuusuttunut. Assersuutigalugu Guutip kiffai tamarmik, inuusuttut utoqqaallu, isumartik assinit pornomut tunngasunit allagartarsuarni ussassaarutini, filmini, tv-kkut ingammillu internettikkut takutinneqartartunit mingutsinneqartikkumanagu akiuuttariaqarput.

15. Ajortunik uumiginninnermik ineriartortitsinissamut suna iluaqutigisinnaavarput?

¹⁵ Aallussilluarluta Guutip mianersoqqussutaanik eqqumaffiginninnerput ajortunik uumiginninnermik ineriartortitsinissamut iluaqutigisinnaavarput. (Tussiaat 97:10; Romamiut 12:9) Qatanngutip angutip kristumiup  oqarneratut pornografiip “kajungertitsinersuanit aniguiumalluni” pornografii maajugisariaqarpoq. Savimerngit saviup kajungerisai marluk avissaartissagaanni, nukik taakkua imminnut kajungerinerannit sakkortunerusoq pisariaqarpoq. Taamatuttaaq pornografiip ussernartui akiorniarlugit tamaviaarnissaq pisariaqarpoq. Pornografiilli uagutsinnut qanoq ajoqusiisinnaatigineranik paasinninnerput tamatuminnga maajuginninnissamut iluaqutigissavarput. Qatanngut angut internettimi nittartakkanik pornografiimut tunngasunik alakkaasarunnaarniarluni tamaviaarpoq. Qarasaasiani inimut ilaqutariinniittunit tamanit takuneqarsinnaasumiittumut nuuppaa. Tamanna ilutigalugu ileqqussatigut minguitsuuniarluni ajunngitsuliornermillu aallussilluarneruniarluni aalajangersimalluni iliuuseqarpoq. Allaat suli allamik iliuuseqarpoq. Suliffimminut atatillugu internetti atortariaqaramiuk aalajangerpoq aatsaat nuliani najuukkaangat internetti atortarniarlugu.

Ileqqorinnissap pingaaruteqassusia

16, 17. Ileqqorissaarnerput uagutsinnik maluginiaasunut qanoq sunniuteqarsinnaava? Assersuuteqarit.

¹⁶ Qatanngutit angutit arnallu Jehovamut kiffartortut ileqqorissaarnerat allanit killinneqaatigineqangaartarpoq! (Atuaruk 1 Petrusi 2:12). Betelimut Londonimiittumut iluarsaassiartortup ulloq ataaseq naqiterummik aserfallatsaaliuereerluni Jehovap Nalunaajaasuinut isiginnittaatsini allanngortippaa. Nuliata, tamaani Jehovap Nalunaajaasuinit Biibilimik atuaqqissaaqatigineqartartup, uimi allatut isiginnittaaseqalersimanera maluginiarpaa. Siornatigut Jehovap Nalunaajaasuinik pulaartoqarusunneq ajorpoq. Ullorli ataaseq Betelimi sulereerluni inussiarnisaarfigineqarnini pillugu nersualaarisuinnaavoq. Oqaasipiluttoqannginnerarpaa. Kikkut tamarmik naammagittarput, avatangiisillu eqqissinartuupput. Ingammik ajasoorutigaa qatanngutit inuusuttut aallussilluarlutik akissarsiutiginagu piffissaminnik nukimminnillu nutaarsiassamik nuannersumik siaruarterinermut atuinerat.

¹⁷ Taamatuttaaq qatanngutit angutit arnallu ilaquttaminnik pilersuiniarlutik uummammit pisumik sulisarput. (Kolossemiut 3:23, 24) Tamanna pissutigalugu suliffimminni isumannaannerusumik inissisimasarput sulisitsisuisa taakkua peqqissaartuunerat pingaartikkamikku aamma annaarusunnginnamikkit.

18. Qanoq ililluta ‘ajunngitsuliornissamik noqqaassuteqarsinnaavugut’?

¹⁸ Jehovamik tatiginninnerput, taassuma unnersuussutaanut naalannerput ataatsimiittarfitsinnillu isumaginnittarnerput Jehovap illuanik ilungersuutiginninnitsinnut uppernarsaataasut ilagaat. Aammattaaq kissaatigaarput sapinngisarput tamaat Guutip naalagaaffianik oqaluussissutiginneqataanissarput ajoqersuganngortitsiortoqataanissarpullu. Inuusuttuugaluarutta utoqqaagaluaruttaluunniit aallussilluarluta najoqqutassiat Guutimik pallorfiginninnitsinnut tunngassuteqartut maleruarutsigit pilluaqqussutisiarpassuaqassaagut. Taava inuttut ‘ajunngitsuliornissamik noqqaassuteqartutut’, imaluunniit ajunngitsuliornermik aallussilluartutut, ilisimaneqartuassaagut. — Titusi 2:14.

[Quppernerup ataani ilanngussaq]

Biibilip nalaani ullumikkullu misilittakkanit uku pillugit suut paasivigit?

• Oqaluussinikkut ilinniartitsinikkullu qanoq aallussilluartoqarsinnaanera.

• Inuusuttuutilluni qanoq ‘ajunngitsuliornermik noqqaassuteqartoqarsinnaanera’.

• Ileqqut aserorsaataasut qanoq ajugaaffigineqarsinnaanerat.

[Atuaqqissaarnermi apeqqutit]

[Qupp. 20-mi assiliartaq]

Biibili oqaluussinermi atortuarpiuk?

[Qupp. 22-mi assiliartaq]

Atuarninni allamiut oqaasiinik ilinniarnerit oqaluussinermi iliuuseqarnerunissamut iluaqutigisinnaavat