‘Tenu Nyichima haNyidimu Yayiwahi’

‘Yesu wadiheni hadetu kulonda atukuuli kukuluwa kwejima, aditookesheli antu akudihetela, akuta nyichima hanyidimu yayiwahi.’—TITUSA 2:14.

1. Chumanyi chamwekeni mutembeli hampinji yenjiliyi Yesu haNisani 10, 33 C.E.?

 HADIÑA haNisani 10, mu 33 C.E., henohu kunashali dehi mafuku antesha nakwanakana Paseka. Antu amavulu enjili nakudifukula muYerusalema adiña mutembeli nakutalila mpinji yakutachika kwanakana. Chumanyi chamwekeni hampinji yashikiliyi Yesu? Ansoneki asatu aNsañu Yayiwahi—Matewu, Maku, niLuka, wejima wawu ashimuna nawu Yesu watemwini antu kapampa kamuchiyedi adiñi nakulanda nikulandulula mutembeli. Wahinwini jimesa jawakwakuhimpa mali nimatanda awakwakulandisha tupompa. (Matewu 21:12; Maku 11:15; Luka 19:45) Kufuma hampinji yakoñeli Yesu chuma chamuchidiwu hahitili yaaka yisatu ilaña iyena dindi hidafwomokeluku.—Yowanu 2:13-17.

2, 3. Tuneluki ñahi netu iyena daYesu hidakuminini hohu hakuwahisha tembeluku?

² Mukanda waMatewu washimunaña nawu iyena daYesu hayina mpinji hidadiña dakuwahisha hohu tembeluku. Wokili cheñi amputamesu niayifwayi enjili kudi yena. (Matewu 21:14)  Nsañu yaLuka yashimuna nyidimu yikwawu yakoñeliyi Yesu. ‘Yesu watañishileña hefuku hefuku mutembeli.’ (Luka 19:47; 20:1) Dichi, iyena daYesu damwekeneni chikupu mumudimu windi wakushimwina hatooka.

³ Nkumininaku, kapostolu Pawulu wamusonekeleli Titusa nakumuleja nindi, Yesu “wadiheni hadetu kulonda atukuuli kukuluwa kwejima, aditookesheli antu akudihetela, akuta nyichima hanyidimu yayiwahi.” (Titusa 2:14) Munjilanyi mutwatela kumwekeshela netu ‘twata nyichima hanyidimu yayiwahi’ makonu? Nawa yakutalilahu yawanyanta amawahi amuYuda yatukoleshaña munjilanyi?

Iyena daKushimwina niKutañisha

4, 5. Munjilanyi anyanta awana amuYuda mwamwekesheleluwu iyena dakwila nyidimu yayiwahi?

⁴ Asa, Yehoshafwati, Hezekiya, niYosiya wejima wawu adiña namudimu wakufumisha ankishi muYuda. Asa ‘wafumishili tumeña twawantu acheñi, niyinañanaña, wahumwini nituposhi twakupeshela, watemeni ninyiyombu.’ (2 Kushindulula 14:3) Hamuloña wakukeña kudifukula kudi Yehova, Yehoshafwati ‘wafumishili yinañanaña ninyiyombu muYuda.’—2 Kushindulula 17:6; 19:3. *

⁵ Hanyima yakwanakana chawija chaPaseka chamafuku atanu nayedi chaloñesheliyi Hezekiya muYerusalema, “aIsarela ejima adiñuku hiyakufuma munyikala yawaYuda, hiyakuya nakuhumona tuposhi twakupeshela, nakutema ninyiyombu, hiyakuhumona yinañanaña natumeña muYuda namuBenjamini mwejima, nimuEfweremi naManase nawa, nichakisañenuwu yejima.” (2 Kushindulula 31:1) Yosiya wekalili mwanta nayaaka yitanu nayisatu. Bayibolu yashimuna nawu: ‘Hamwaka wawanta windi wamuchitanu nachisatu, iku wuchidi kansi, hakutachika kukeñakeña Nzambi yankakulula yindi Davidi. Mumwaka wekumi nakayedi, hakutachika kutookesha Yuda naYerusalema kutookesha kwakufumishamu yinañanaña, ninyiyombu, niankishi akubaza, niankishi akusuñununa.’ (2 Kushindulula 34:3) Dichi, awa anyanta ejima awana adiña neyena dakwila nyidimu yayiwahi.

6. Muloñadi mudimu wetu wakushimwina chitunateli kuwesekejela nanyidimu yawanyanta amuYuda ashinshika?

⁶ Makonu twakalakalaña mudimu wowumu wakukwasha antu aleki ntañishilu yakutwamba, kushilahu nikupesha. Mudimu wetu wakushimwina kwitala nikwitala watukwashaña kuwana antu ashiyashana. (1 Timotewu 2:4) Kankaña wumu wakuAsia wanukaña chadifukwileñayi mama yindi kudi ankishi amavulu mwitala dawu. Hakutoñojoka nindi ankishi ejima hiyemeneneñaku Nzambi walalaku, walombeleña kakavulu kulonda yeluki chekalayi Nzambi walala. Ifuku dimu, kwitala dawu kwadondomweneni antu, chenzunwiniyi kuchisu waweni aYinsahu ayedi adiloñesheli kumukwasha kwiluka ijina daNzambi walala dadimena, Yehova. Wazañaleli chikupu kudiza nsañu yalala kutalisha hadi ankishi. Chayinu mpinji wakalakalaña neyena chikupu mumudimu wakushimwina, nakukwashaku antu amakwawu kumwiluka Yehova ninkeñelu yindi.—Masamu 83:18; 115:4-8; 1 Yowanu 5:21.

7. Chumanyi chitunateli kwila hakwila nawu twimbujoli antañishi ayili nakutañisha mwituña dejima mumpinji yaYehoshafwati?

⁷ Neyi tunakukalakala mumudimu wakushimwina kwitala nikwitala, komana twashimwinaña chikupu mwiluña detu datwinkawu? Chakuhayamisha, mumwaka wamuchisatu wakuyuula kwindi, Yehoshafwati watemesheli atulamba atanu, aLevi atanu nawana niatupristu ayedi. Wayitemesheli munyikala yejima nakutañisha antu nshimbi jaYehova. Akalakeli mudimu wawu chachiwahi munyikala yejima chakwila antu amunyunza yakwakwihi atachikili kumutiya Yehova woma. (Tañenu 2 Kushindulula 17:9, 10.) Kuhitila mukuhempula matala hampinji yashiyashana nimafuku, tunateli kushimwina antu amavulu hamatala amboka-mboka.

8. Tunateli kushimwina ñahi chikupu?

 ⁸ Makonu, ambuña aNzambi amavulu adihanaña kushiya nyikala yawu nakuya nakuzatila kumaluña kudi kukankila kweneni kwawakwakushimwina adikita. Komana ninenu munateli kwila mwenimu? Etu amakwawu tukubula kutwesha kuya kudi kukankila tunateli kweseka kushimwina antu amwiluña detu ahoshaña idimi dacheñi. Hamuloña wawantu ashiyashana awanineñayi mwiluña dindi mwashimwinañayi, Ron wayaaka 81 wadizili kwimusha mumadimi 32. Katataka wawanini eyala namumbanda adisumbula amuAfrica mumukwakwa nawa wayimushili mwidimi dawu dachisemwa, Yoruba. Amwihwili Ron neyi chakwila washikahu dehi muAfrica. Chakwiliyi nindi inehi, amwihwili chelukiliyi idimi dawu. Chumichi chaletesheli yayishimwini wunsahu. Atambwili jimagazini nikumuleja keyala kawu, nawa Ron waheni keyala kenaka kuchipompelu chamwiluña dawu kulonda ana eyala namumbanda atachiki kudiza Bayibolu.

9. Muloñadi kutaña Bayibolu mumudimu wetu wakushimwina chikwalemena? Shimunenu chakutalilahu.

⁹ Antañishi alejeluwu kudi Yehoshafwati kuya mwituña dejima asendeli “mukanda wanshimbi jaYehova.” Twafwilaña kutañisha antu nsañu yamuBayibolu mukaayi kejima, muloña Hiizu daNzambi. Twamwekeshaña kulema kwaBayibolu mumudimu wetu wakushimwina kuhitila mukuyitaña kulonda amakwawu eluki mazu ekalamu. Mwiniitala wumu wamulejeli chinsahu wumu wejina daLinda nindi, nfumwindi wadiña wakata kalepa nawa wakeñekeleña kumusha maana. Mwiniitala wadilili nindi: “Neluki wanyi chuma chineli hakwila nawu Nzambi yeteji chuma chamuchidiwu chinmwekeni.” Linda wamwihwili nindi: “Nukulejuku chuma chimu?” Kufumahu, watañili Yakoba 1:13 nakumuleja nindi: “Makabi ejima itwamonaña nimakabi amonaña antu itwakeña bayi neyi Nzambi diyi watubabeshañaku.” Kufumahu, mwiniitala wamukumbatili Linda hakumwekesha kumusakilila hayuma yahosheliyi. Linda washimwini nindi: “Namukundejeli kuhitila mukuzatisha Bayibolu. Mpinji jikwawu mavasi itwatañaña muBayibolu kanda ayitiyeñahu dehi kudi enimatala.” Mpanji yeniyi yaleñeleli atachiki kudiza Bayibolu mpinji yejima nanona mumbanda.

Atwansi Akalakalaña Neyena

10. Indi Yosiya wekala ñahi chakutalilahu chachiwahi kudi atwansi akwaKristu makonu?

¹⁰ Chakutalilahu chaYosiya, chinakumwekesha nawu watachikili kudifukula kwalala muwansi, nawa hampinji yatachikiliyi mudimu windi weneni wakufumisha ankishi wadiña nayaaka 20. (Tañenu 2 Kushindulula 34:1-3.) Makonu, atwansi amavulu anakumwekesha iyena dodimu mumudimu wawu wakushimwina Wanta.

11-13. Yumanyi yitunateli kudizila kudi atwansi amakonu anakumukalakela Yehova neyena chikupu?

¹¹ Hannah, washakamaña muEngland, wadiña nayaaka 13 hampinji yatachikiliyi kudiza idimi daFrench hashikola chatiyiliyi nawu mumukala wakwakwihi mudi izanvu dinakuhosha idimi daFrench. Tata yindi wetejeli  kuyaña nindi nakupompela kwenakuna. Chayinu mpinji Hannah wudi nayaaka 18, hipayiniya wampanji yejima nawa washimwinaña mwidimi daFrench. Komana ninenu kwila mudiza idimi dacheñi kulonda mukwashi antu kumwiluka Yehova nehi?

¹² Rachel watiyileña kuwaha chikupu kutala vidiyo yahoshaña nawu Pursue Goals That Honor God. Hakuhosha hayuma yatoñojokeleñayi hampinji yatachikiliyi kumukalakela Yehova mu 1995, wahosheli nindi: “Natoñojokeleña nami inakukalakala chachiwahi muchalala.” Wabombeleluhu cheñi nindi: “Hanyima yakutala ichi chimwenu, nelukili nami nadiña nakwila yuma yantesha hadi yaaka yayivulu. Natela kuzata nañovu muchalala kulonda nishuku maana chikupu kukudiza kwahalwami nikukalakala mumudimu wakushimwina.” Chayinu mpinji Rachel nakumukalakela Yehova neyena chikupu. Chumanyi chafumamu? Wahosheli nindi: “Wulunda wami naYehova wunakoli chikupu. Kulomba kwami kwatiyakanaña nankashi, nadizaña yuma yakunama nikudiluñisha chikupu, nawa nsañu yekala muBayibolu yanlumbulukilaña hama. Chinafumumu, inakudiluñisha mudimu wakushimwina nankashi hakumona mazu aYehova chiyanakukundejawu antu.”

¹³ Mukwenzi Luke chataliliyi vidiyo yaYoung People Ask—What Will I Do With My Life? wakolesheweli. Hanyima yakutala iyi vidiyo, Luke wasonekeli nindi: “Natela kutoñojokahu cheñi hayuma yinakwila muchihandilu chami.” Wahosheli nindi: “Hakusambila, ankanjikijili kutaña shikola yahewulu kulonda nakekali namali amavulu, kufumahu nakashikijeña yikonkwanyi yami yakuspiritu. Ikakeja damuchidiwu hidakoleshaña wulunda naYehovaku, ilaña dazeyeshaña.” Amana kwetu niahela atwansi, kwila muzatisha yuma yimwadizili kushikola kulonda muzati chikupu mumudimu wenu wakushimwina neyi cheliliyi Hannah nehi? Kwila mumwimbujola Rachel, kuhitila mukudikita chikupu hakufwila yikonkwanyi yamulemeshaña Nzambi nehi? Mwimbujolenu Luke kuhitila mukutondolwela yuma yafwana yekala nyihetu kudi atwansi amavulu.

Tiyililenu Chikupu Kusoñamisha

14. Indi Yehova wetejaña kudifukula kwamuchidinyi, nawa muloñadi kudifukula muniyi njila chikwakalila?

¹⁴ Antu jaYehova atela kwikala awunyonji hakwila nawu Yehova yeteji kudifukula kwawu. Isaya wasoñamishili nindi: “Fumenuku, fumenuku, idikenumu, bayi mukunka kuchuma chamajiluku. Fumenu mukachi kawu [Babiloni]. Ikalenu atooka enu mwasendaña yuma yaYehova.” (Isaya 52:11) Kufuma hampinji yadikitiliyi Mwanta wamuwahi Asa kulonda kufumisha yuma yatama muYuda, hahitili yaaka yayivulu hakwila nawu Isaya yasoneki awa mazu. (Tañenu 1 Anyanta 15:11-13.) Chimwahitili yaaka yayivulu, kapostolu Pawulu wamulejeli Titusa nindi, Yesu wadiheni kulonda kutookesha atumbanji twindi ekali “antu akudihetela, akuta nyichima hanyidimu yayiwahi.” (Titusa 2:14) Chakala kwikala nayililu yayiwahi mukanu kaayi katama, sweje-e kudi atwansi. Chakutalilahu, ambuña aNzambi ejima, atwansi niakulumpi, atela kuzata nañovu kulonda nyevulu yanzekesi yashañawu, haTV, mujifilimu nihaIntaneti, yibuli kuyiluwañesha.

15. Chumanyi chinateli kutukwasha kuhela yuma yatama?

¹⁵ Kuta muchima kukusoñamisha kwaNzambi kunateli kutukwasha kuhela yuma yatama. (Masamu 97:10; Aroma 12:9) Twatela kuhela nyevulu yanzekesi neyi chahosheliyi mukwaKristu wumu nindi, kulonda “tubuli kufwa  muñovu yachu yaletaña ikoku.” Hakwila nawu muntu yaambuli jimagineti jinadikwati, watela kwikala nañovu yabadika jimagineti. Chochimu, chakeñekaña kushaku ñovu chikupu hakutondolwela ikoku danyevulu yanzekesi. Hela chochu, neyi twiluka nyevulu yanzekesi chiyinateli kutuluwañesha tukuyihela. Mana kwetu wumu wazatili nañovu chikupu hakwila nawu yaleki chaaku chakutalaña nyevulu yanzekesi haIntaneti. Washili kompyuta yindi hatooka kulonda ayimoneña kudi amuchisaka chindi ejima. Kubombelahu, wafuukwiluhu kuditookesha chikupu nikuta muchima hanyidimu yayiwahi. Welili cheñi chuma chikwawu. Hamuloña wakwila wazatishileña Intaneti hakuzata mudimu wukwawu, wafuukwiluhu kuzatishaña Intaneti neyi adi hamu nañodindi.

Chichalemena Kwikala naYililu Yayiwahi

16, 17. Chumanyi chinateli kwilawu antu atumonaña neyi twikala nayililu yayiwahi? Shimunenu chakutalilahu.

¹⁶ Atwansi amayala niambanda amukalakelaña Yehova amwekeshaña yililu yayiwahi, nawa chumichi chazañaleshaña antu ayimonaña. (Tañenu 1 Petulu 2:12.) Muntu wumu wahempwili Beteli yamuLondon wahimpili yililu yindi kutalisha hachayimweneñayi aYinsahu jaYehova hanyima yakuzatilahu ifuku dimu nakuloñesha ikina dapulintaña nyikanda. Ñodindi, wadizileña Bayibolu naChinsahu wamwiluña dawu wamweni nfumwindi chahimpiliyi yililu yindi. Hatachi, hakeñeleña aYinsahu kwinza hetala dinduku. Chafuntiliyi kufuma haBeteli hayiliyi nakuzatila wahamekeli chikupu hakumwakamena munjila yayiwahi. Wahosheli nindi kwosi muntu wahosha chatama. Antu ejima adiwunjika nawa awunda. Chuma chamutiyishili kuwaha hiiyena dawamana kwetu niahela atwansi akalakalaña chakadi kuyifweta, nakuzatisha mpinji yawu niñovu kulonda kukwasha mudimu wakushimwina nsañu yayiwahi.

¹⁷ Hohamu, amana kwetu niahela azataña nyidimu yakumujimba kulonda kwakamena yisaka yawu akalakalaña nyidimu yawu namuchima wejima. (Akolose 3:23, 24) Chumichi chaleteshaña ayiñija nyidimu kuyilemesha hamuloña wakwikala nakashinshi, nawa akeñaña nawu atwalekuhu kuzata.

18. Tunateli kwikala ñahi antu ‘ata nyichima hanyidimu yayiwahi’?

¹⁸ Kumukuhwelela Yehova, kwovwahila nshimbi jindi, nikuhemba chachiwahi maluña etu akupompela jekala hinjila mutwamwekeshelaña iyena detala daYehova. Kubombelahu, tunakufwila kuzata hakumina ñovu jetu mumudimu wakushimwina Wanta nikwilisha atumbanji. Chili tudi atwansi chili akulumpi, neyi tuzata hakumina ñovu jetu kulonda kuhemba nshimbi jajiwahi jakundama kukudifukula kwetu, twakaañula nkisu jajivulu. Nawa akatwalekahu kutwiluka nawu tudi antu ‘ata nyichima hanyidimu yayiwahi.’—Titusa 2:14.

[Tumazu twaheshina]

Yumanyi yimunadizi hayakutalilahu yamuBayibolu niyamakonu kutalisha

• hakumwekesha iyena dakushimwina nikutañisha?

• hadi akwaKristu atwansi chiyanateli ‘kuta nyichima hanyidimu yayiwahi’?

• hakuleka yaaku yatama yaluwañeshaña?

[Malwihu aKuzatisha haKudiza]

[Mwevulu wudi hefu 18]

Komana mwazatishaña Bayibolu mpinji yejima mumudimu wakushimwina?

[Mwevulu wudi hefu 20]

Kudiza idimi dacheñi hampinji yimudi kushikola kukuyikwasha kuzata chikupu mumudimu wakushimwina