Magmaliw a Maseseg ed “Saray Maabig a Gawa”!
Magmaliw a Maseseg ed “Saray Maabig a Gawa”!
“Initer [nen Jesus] so inkasikato ya insalat ed sikatayo, pian dondonen to itayo ed amin a kaugsan, tan linisan to so sakey a baley a nipaakar a kien ton dili, mapaga [odino, maseseg] ed saray maabig a gawa.”—TITO 2:14.
1. Antoy ginawa nen Jesus sanen sinmabi ed templo nen Nisan 10, 33 C.E?
NISAN 10, 33 C.E. ed saman tan pigaran agew labat et selebraan la so Paskua. Sayan selebrasyon et pitalaran na dakerakel a managdayew a nantitipon ed templo diad Jerusalem. Anto kasi nagawa diad isabi nen Jesus? Unong ed taloran managsulat na Ebanghelyo a di Mateo, Marcos, tan Lucas, diad mikaduan pankanawnawa et pinapaway nen Jesus iramay mansasaliw tan managtagilako diman. Imbalintuag to iray lamisaan na saray managsalat na pilak tan saray yurongan na managtagilako na saray malapati. (Mat. 21:12; Mar. 11:15; Luc. 19:45) Mapatpatnag a siansian ag-angumay seseg nen Jesus, a singa ed samay ginawa to taloy taon lay apalabas.—Juan 2:13-17.
2, 3. Panon tayon amta ya aglabat impanengneng nen Jesus so inkaseseg to diad samay ginawa ton impanlinis ed templo?
2 Ipapanengneng na salaysay nen Mateo ya aglabat napatnagan so inkaseseg nen Jesus diad satan ya impanlinis to ed templo. Pinaabig to met iray bulag tan piley ya inmasingger ed sikato diman. (Mat. 21:14) Wala ni inrekord nen Lucas a ginawa nen Jesus. Sikatoy “nambangat ya inagew-agew dia ed templo.” (Luc. 19:47; 20:1) Mapatpatnag sirin so inkaseseg nen Jesus ed ministeryo to.
3 Kalabas na pigaran taon, sinulatan nen apostol Pablo si Tito tan impaliwawa ton “initer [nen Jesus] so inkasikato ya insalat ed sikatayo, pian dondonen to itayo ed amin a kaugsan, tan linisan to so sakey a baley a nipaakar a kien ton dili, mapaga [odino, maseseg] ed saray maabig a gawa.” (Tito 2:14) Diad panaon tayo, panon itayon magmaliw a ‘maseseg ed saray maabig a gawa’? Tan panon itayon napaseseg na saray alimbawa na maong iran arari ed Juda?
Inkaseseg ed Panagpulong tan Panagbangat
4, 5. Panon tayon nibaga a saramay apatiran arari ed Juda et maseseg ed saray maabig a gawa?
4 Angorganisa si Asa, Josafat, Hezekias, tan Josias na saray kampanya pian ekalen so panagtalintao diad Juda. “Inekal [nen Asa] so saray sankaili ya altar, tan saray atagey a pasen, tan inggeba to so saray seklang tan binelang to so saray Ashera [odino, saray sagradon poste].” (2 Awa. 14:3) Ontan met nen Josafat, lapud seseg to ed panagdayew ed si Jehova, “inekal to so saray atagey a pasen tan saray Ashera a nanlapu ed Juda.”—2 Awa. 17:6; 19:3. *
5 Kayari na pitoran agew a selebrasyon na Paskua ya inorganisa nen Hezekias ed Jerusalem, “amin ya Israel a walara ya akaarap, linma ra ed saray syudad na Juda, tan binuybuyak da ray seklang, tan binatang da ray Ashera, tan binuybuyak da ray atagey a pasen tan saray al-altar ed amin a Juda tan Benjamin, dia ed Efraim met tan Manases, angga ed abagbag da ra ya amin.” (2 Awa. 31:1) No nipaakar ed si Josias, waloy taon to ni labat sanen sikatoy nan-ari. Oniay ibabaga na Kasulatan: “Dia ed komawalo a taon na impan-ari to, leleg ya ugaw ni, ginmapo a mananap ya ontumbok ed Dios nen David ya ateng to; et dia ed koma-labindua a taon ginapoan to a gogolan so Juda tan Jerusalem a manlapu ed saray atagey a pasen, tan saray Ashera, tan saray imbolik a talintao, tan saray imbobo a talintao.” (2 Awa. 34:3) Kanian, amin na sarayan apatiran arari et maseseg ed saray maabig a gawa.
6. Akin et mipadpara so ministeryo tayo ed saramay kampanya na matoor ya arari na Juda?
6 Mipadpara, mibibiang itayo natan ed kampanya a panulong ed saray totoo a makabulos ed palson bangabangat na relihyon, tan sakey ed sarayan bangabangat et say panagdayew ed talintao. Dakel so nakakatongtong tayon nanduruman totoo diad pankakabkaabungan tayo. (1 Tim. 2:4) Sankanonot ni na sakey a kalangweran a biin taga’d Asia iray gagawaen nen nanay to a ritual diad arap na saray imahen ed abung da. Inisip na sayan kalangweran ya agnayarin irepresenta na amin na saratan ya imahen so tuan Dios, kanian mabetbet ton ipipikasi a nakabat to komon so tuan Dios. Aminsan et walay tinmoktok ed abung da a duaran Tasi. Akaparaan ira ya ontulong ed sikaton nakabat so nikabkabiig a ngaran na tuan Dios, salanti, Jehova. Tan agaylay pisasalamat to ta naamtaan ton palson dirios iray imahen! Natan et agaylay seseg ton mibibiang ed panagpulong, a tutulongan to ray arum a nakabat met si Jehova tan say linawa To.—Sal. 83:18; 115:4-8; 1 Juan 5:21.
7. Panon tayon naalig iramay linman nambabangat ed nanduruman syudad na Juda legay uley nen Josafat?
7 Sano mankakabkaabungan itayo, kasin seseguroen tayon nakobrian so interon teritorya tayo? Nen komatlon taon na uley nen Josafat, sikatoy angibaki na limaran prinsipe, siameran Levita, tan duaran saserdote ya onla ed amin a syudad pian ibangat iray ganggan nen Jehova ed saray totoo. Talagan epektibo iman a kampanya ta saramay totoo ed kaabay a nasyones et tinmakot ed si Jehova. (Basaen so 2 Awaran 17:9, 10.) No aliwan apasakey so oras tan agew na pankabkaabungan tayo, nayarin napitongtongan tayo so nanduruman membro na sakey a pamilya.
8. Panon tayon napalaknab so panagpulong tayo?
8 Mabulos a tinaynan na dakel a lingkor na Dios ed sayan panaon so ayaman da tan nanlingkor ed saray pasen a kakkaukolan iray maseseg a Tasi. Nagawaan mo met kasi itan? Aliwan amin ed sikatayo et makapanlingkor ed arum a lugar, balet ta sarag tayoy mansagpot pian napulongan iray totoo ed lugar tayo a dumay lenguahe ra. Alaen pay alimbawa nen Ron a mantaon na 81. Diad teritorya ra et dakel so taga’d arum a bansa, kanian kinabisado to so nanduruman panangibano diad 32 a lenguahe! Aminsan et walay sanasawan taga Aprika ya imbano nen Ron ed salita ran Yoruba. Tinepetan day Ron no kasin akakar la ed Aprika. Sanen “andi” kuan to, mankelaw ira no akin ya amta toy mansalita na Yoruba. Lapud satan et apulongan ira nen Ron. Tampol dan inawat iray magasin ya inyopresi to tan inter da met ed sikato so address da. Insan say ginawa nen Ron et inter to imay address ed matukoy a kongregasyon pian naiyaralan na Biblia iyan sanasawa.
9. Akin et importante so pangibasa ed Biblia sano manpupulong itayo? Mangiter na alimbawa.
9 Awit na saramay managbangat ya imbaki nen Josafat so “libro na tunong nen Jehova.” Diad sankamundoan, panggugunaetan tayon usaren so Biblia diad panagbangat tayo lapud Salita itan na Dios. Maseet tayon ipapanengneng so aktual ya ibabaga na Biblia diad ministeryo tayo. Singa bilang, nia so naeksperiensya na sakey a Tasi a si Linda. Walay akatongtong ton sakey a bii a kuan ton say asawa to et na-stroke tan kaukolan ton asikasoen. Oniay inyey-ey na samay bii: “Anto kasi agawaan kon kasalanan, akin et inabuloyan na Dios iyan nagawa?” Inmebat si Linda: “Wala pay labay kon ibasa ed sika pian naligliwa ka.” Imbasa nen Linda so Santiago 1:13 insan to inyarum: “Amin a dadalanen tayon irap et aliwan dusa na Dios.” Diad saman et nilakap na samay bii si Linda. Oniay amoria nen Linda: “Ayarian kon ligliwaen so sakey a too diad impangusar ko’d Biblia. No maminsan saray bersikulon babasaen tayo manlapud Biblia et agnin balot nadngelan na saray nakakatongtong tayo.” Say resulta na saman ya impantongtong da et nigapo so regular a panangiyaral na Biblia.
Saray Kalangweran a Maseseg a Manlilingkor
10. Akin et maong ya alimbawa si Josias ed saray Kristianon kalangweran natan?
10 Diad samay alimbawa nen Josias, naimano tayo ya anggaman ugaw ni et sinuportaan to lay dugan panagdayew. Duamploy taon to ni labat sanen inggapo to lay malaknab a kampanyan ekalen so panagtalintao. (Basaen so 2 Awaran 34:1-3.) Ipapanengneng met na dakel a kalangweran natan so ontan a seseg diad ministeryo ra.
11-13. Antoray naaralan tayo ed saray kalangweran natan a maseseg a manlilingkor ed si Jehova?
11 Si Hannah, a 13 años to ni labat tan taga Inglatera, et manaaral na lenguahen Pranses diad eskuelaan. Nadngelan ton diad asingger a baley et walay aporman grupo na saray Tasi a mansasalita na Pranses. Inmabuloy so tatay nen Hannah a mangiba ed sikato a miaral diman. Natan et 18 la nen Hannah, tan bilang sakey a regular payunir, maseseg ton pupulongan iray totoon mansasalitay Pranses. Sarag mo ta met so manaral na sananey a lenguahe pian natulongan so arum a nakabat si Jehova?
12 Agusgustoan nen Rachel imay video ya Pursue Goals That Honor God. Oniay nanonotan ton panmoria to sanen kakkapampabautismo to ni labat nen 1995: “Abaloan ko et maabig lay nagagawaan ko parad si Jehova. Balet kayarik a binantayan imay video, amoriak a singa ak labat manaya mimipmila’d agus ed dakel lan taon. Kaukolan kon seryosoen so katuaan tan pansesegan so panaglingkor ko ed si Jehova. Tan kaukolan ko met a pampelengan so personal a panagaral.” Natan et masetseseg la si Rachel ed panaglingkor to. Oniay inkuan to: “Mas inmapit ak ed si Jehova. Mas manlalapud la’d puso so pikakasik, mas makabkabaliksan tan makapnek so panagaral ko, tan mas mabilabilay ed siak iray salaysay ed Biblia. Kanian, lalok a panggagayagaan so ministeryok tan balibali liknaan ko sano nanenengneng kon naliligliwa na salita nen Jehova iray totoo.”
13 Si Luke et sakey a kalangweran ya apaseseg ed sakey nin drama a Young People Ask—What Will I Do With My Life? Kayari ton binantayan itan, oniay insulat to: “Apakiwas ak a nonoten a maong no anto lay gagawaen ko ed bilay ko.” Inaksobi to: “Nensaman, walaray manedesdes ed siak ya unaen so panaral ed unibersidad pian oninaway bilay ko tan kayari to et niyapasakey ko la kunoy imanok ed espiritualidad ko. Say ontan a desdes et agmakatulong, noagta deralen toy relasyon ed si Jehova.” Agagi mi ran tobonbalo, agta marakep no usaren yoy nanaaralan yo ed eskuelaan pian napalaknab yoy ministeryo yo a singa si Hannah? Tan agta marakep no aligen yoy alimbawa nen Rachel, diad maseseg a pangiyuna ed saray kalat a mamapagalang ed Dios? Maabig met no aligen yoy alimbawa nen Luke, a paliisan yo ray pakakapatitan na dakel a kalangweran.
Maseseg ya Unoren Iray Pasakbay
14. Anton klase na panagdayew so awaten nen Jehova, tan akin et aliwan mainomay itan a pansiansiaen?
14 Pian awaten nen Jehova so panagdayew tayo, nepeg a malinis itayo ed imaton to. Oniay pasakbay nen Isaias: “Ontaynan kayo, ontaynan kayo, a manlapud man, agkayo maniwit na anggan anto a bengatla ya agmalinis; ontaynan kayo ed pegley [na Babilonia]; linisan yo so laman yo, sikayo a maniwit ed saray kagawaan nen Jehova.” (Isa. 52:11) Pigaran taon antis ya insulat itan nen Isaias, nansagpotan ya inekal nen maong ya Arin Asa so imoralidad diad Juda. (Basaen so 1 Arari 15:11-13.) Tan kayari na pigaran siglo, imbaga nen apostol Pablo ed si Tito ya inter nen Jesus so inkasikato pian nalinisan iray papatumbok to, diad ontan et magmaliw iran “sakey a baley nipaakar a kien ton dili, mapaga [odino, maseseg] ed saray maabig a gawa.” (Tito 2:14) Diad sayan mundon dakerakel so bisyo na saray totoo, aliwan mainomay so pansiansian malinis ed moral, nagkalalo la’d biang na saray kalangweran. Kaukolan sirin ya amin a lingkor na Dios, ugaw man o matatken, et gawaen day anggaay nayarian da pian agnarutakan so isip da na saray mabanday a litraton walad billboard, palabas ed TV, sine, tan nagkalalo la diad Internet.
15. Antoy makatulong pian naaralan tayon gulaen so mauges?
15 Pian naaralan tayon gulaen so mauges, makatulong so maseseg a pangunor ed saray pasakbay na Dios. (Sal. 97:10; Roma 12:9) Kaukolan tayon busolen so pornograpiya pian, unong ed impangikuan na sakey a Kristiano et “makalukpos itayo’d mabiskeg a pananangguyor na satan.” Alimbawa, no labay tayon ekalen so sakey ya a-magnet a metal, kaukolan tayoy manpuersa. Ontan to met, kaukolan so pinasyan sagpot pian nalabanan so pananagyat na pornograpiya. Balet pian naaralan tayon gulaen itan, kaukolan tayon talosan no panon kaseryoso so probleman iter na satan. Walay sakey ya agin laki ya akipuligesgesan pian makalukpos ed bisyo ton pannengneng na imoral iran site diad Internet. Say ginawa to et inyalis toy kompyuter to diad lugar a nanengneng na interon pamilya to. Likud ni ed satan, sikatoy nagmaliw a determinadon iwaklit so karutakan tan manseseg ed maabig iran gawa. Wala ni ingey arum a ginawa to. Lapud ta kaukolan toy mangusar na Internet ed negosyo to, nandesisyon a lukasan to labat itan no kaabay toy asawa to.
Say Kaimportantian na Maabig a Kondukta
16, 17. Antoy epekto na maong a kondukta tayo ed saramay makakaimaton? Mangiter na alimbawa.
16 Agaylay abig na awawey na saray tobonbalon manlilingkor ed si Jehova, tan pandinayewan iya na saray makakaimaton! (Basaen so 1 Pedro 2:12.) Sanen akakar so sakey a laki ed Bethel diad London pian apigeren so makinan panag-imprinta, anguma-umay panmoria to’d saray Tasi nen Jehova. Say akulaw to, ya iyaaralan na saray Tasi et akaimano’d impanguman na awawey to. Diad apalabas et aglabay na laki ya onla iray Tasi ed abung da. Balet ta kayari na samay inyakar to’d Bethel, pandindinayewan toy maabig ya impantrato ra’d sikato diman. Inkuan ton anggapoy anggan sakey a manaayew. Maan-anos tan makaaro iran amin. Say nagkalalon pandinayewan to et say inkakuli na saray tobonbalon agagi, a mankikimey ya anggapoy sueldo, tan mabulos dan uusarey panaon tan biskeg da parad kipalapag na maong a balita.
17 Mipadpara, saray agagin mantratrabaho pian nasuportaay pamilya ra et makulikuli met. (Col. 3:23, 24) Bilang resulta, ag-ira basta-basta eekalen ed trabaho lapud labalabay na amo ra so inkamatoor tan inkamatua ra.
18. Panon tayon nipanengneng so ‘inkaseseg tayo ed saray maabig a gawa’?
18 Say panagmatalek tayo ed si Jehova, say katutulok tayo ed saray instruksion to, tan say pangaasikaso tayo ed saray pasen a pantitiponan tayo, so pigara labat ed saray paraan a nipanengneng tayoy inkaseseg tayo parad abung nen Jehova. Niarum ni, labay tayon gawaen so anggaay nayarian tayon mibiang ed panagpulong tan panaggaway babangatan. Balanglan ugaw tayo ni o matatken tayo la, no panggunaetan tayon pansiansiaen a malinis so panagdayew tayo, nagamoran tayoy dakel a bendisyon. Sirin et lawas itayon nakabkabat bilang totoon ‘maseseg ed saray maabig a gawa.’—Tito 2:14.
[Paimano ed Leksab]
^ par. 4 Nayarin say inekal nen Asa ya atagey iran pasen et saramay parad panagdayew ed palson dirios, balet ta intilak to iramay atagey a pasen a pandadayewan na totoo nen Jehova. Odino nayarin walaray impaalagey lamet ya atagey iran pasen diad pansamposampot na uley nen Asa, tan inekal iraya na anak ton si Josafat.—1 Ara. 15:14; 2 Awa. 15:17.
Diad saray alimbawa nensaman tan natan, antoray naaralan mo nipaakar ed
• no panon mon nipanengneng so inkaseseg diad panagpulong tan panagbangat?
• no panon a nipanengneng na saray tobonbalon Kristiano so ‘inkaseseg ed saray maabig a gawa’?
• no panon a makalukpos ed saray bisyo?
[Tepetepet Parad Panagaral]
[Litrato ed pahina 13]
Kasin lanang mon uusaren so Biblia sano manpupulong ka?
[Litrato ed pahina 15]
Legan na paneeskuelam, nayarin makatulong so panaral na arum a lenguahe pian napalaknab moy ministeryom