Ia “itoito” rahi anaˈe “i te mau ohipa maitatai”!
Ia “itoito” rahi anaˈe “i te mau ohipa maitatai”!
“[Ua] horoa [Iesu] ia ˈna iho no tatou, ia ora tatou ia ˈna i te mau parau ino atoa ra, ia tamâ oia ia tatou ei taata mau no ˈna iho, e te itoito i te mau ohipa maitatai.”—TITO 2:14.
1. Eaha te ohipa i tupu i te hiero i to Iesu taeraa mai i te 10 no Nisana 33 o to tatou tau?
UA TAE i te 10 no Nisana 33 o to tatou tau, maa mahana noa hou te oroa Pasa. E tiaa rahi taata haamori i roto i te hiero i Ierusalema tei tiai ru i te oroa. Eaha te tupu ia tae mai Iesu? Te haapapu ra e toru atoa taata papai Evanelia ra Mataio, Mareko, e o Luka, e o te pitiraa o te taime to Iesu tiahiraa i rapaeau te feia i hoo atu e i hoo mai. Ua faatiopa oia i te mau iri a te feia hoo moni e te mau parahiraa o te feia hoo uupa. (Mat. 21:12; Mar. 11:15; Luka 19:45) Aita te itoito rahi o Iesu i iti aˈe mai te taime i rave ai oia i te hoê â ohipa e toru matahiti na mua ˈtu.—Ioa. 2:13-17.
2, 3. E nafea tatou e ite ai e aita noa Iesu i itoito rahi i te tamâraa i te hiero?
2 Te faaite ra ta Mataio faatiaraa e i taua taime ra, aita noa Iesu i itoito rahi i te tamâraa i te hiero. Ua faaora atoa râ i te matapo e te pirioi tei haafatata ˈtu ia ˈna. (Mat. 21:14) Te faahiti ra ta Luka faatiaraa i te tahi atu mau ohipa ta Iesu i rave. Ua “tia [Iesu] i roto i te hiero i te haapiiraa, i te mau mahana atoa.” (Luka 19:47; 20:1) Ua ite-maitai-hia to Iesu itoito rahi i roto i ta ˈna ohipa pororaa.
3 I muri aˈe, ua papai te aposetolo Paulo ma te faataa ia Tito e ua “horoa [Iesu] ia ˈna iho no tatou, ia ora tatou ia ˈna i te mau parau ino atoa ra, ia tamâ oia ia tatou ei taata mau no ˈna iho, e te itoito i te mau ohipa maitatai.” (Tito 2:14) E nafea tatou e itoito rahi ai i te mau ohipa maitatai i teie mahana? E nafea te mau hiˈoraa o te mau arii maitai o Iuda e faaitoito ai ia tatou?
Te itoito rahi i te pororaa e te haapiiraa
4, 5. Mea nafea e maha arii i Iuda i itoito roa ˈi i te mau ohipa maitatai?
4 Ua faanaho Asa, Iehosaphata, Hezekia, e o Iosia i te mau tere tinairaa i te haamoriraa idolo i Iuda. “Ua hopoi ê atura [Asa] i te mau fata no te mau atua ěê ra, e te mau vahi teitei, e ua vavahi i te mau tii, e ua tâpû i te mau ururaau” aore ra pou moˈa. (Par. 2, 14:3) Ma te turaihia e to ˈna itoito rahi no te haamoriraa a Iehova, “ua hopoi-ê-hia e [Iehosaphata] te mau vahi teitei e te mau ururaau i Iuda.”—Par. 2, 17:6; 19:3. a
5 I muri iho i na mahana oroa Pasa e hitu ta Hezekia i faanaho i Ierusalema, “ua haere anaˈe ihora Iseraela atoa i tae mai i reira, i te mau oire atoa i Iuda, e ua vavahi i te mau tii, e ua tâpû i te mau vahi ururaau, e ua huri i te mau vahi teitei i raro, e te mau fata, i Iuda o Beniamina atoa ra, e Epheraima atoa hoi e Manase, e pau roa aˈera ia ratou.” (Par. 2, 31:1) E vau noa matahiti to te tamaiti ra o Iosia i riro mai ai ei arii. Te na ô ra te mau Papai e: “Tae aˈera hoi i te matahiti vau o to ˈna ra hau, i te vai-apî-raa oia ra, ua imi ihora oia i te Atua o tana tupuna o Davida; e tae aˈera i te matahiti hoê ahuru e ma piti, ua tamâ atura oia ia Iuda e ia Ierusalema i te mau vahi teitei, e te mau ururaau, e te mau idolo otiotihia e te mau idolo faatôhia ra.” (Par. 2, 34:3) Mea itoito roa teie toomaha arii i te mau ohipa maitatai.
6. No te aha e faaauhia ˈi ta tatou pororaa i te mau tere tinairaa idolo a te mau arii taiva ore o Iuda?
6 I teie mahana, e tere ohipa atoa ta tatou no te tauturu i te taata ia tiamâ i te mau haapiiraa faaroo hape e haamoriraa idolo atoa. E nehenehe tatou e farerei i te mau huru taata atoa i te pororaa i tera fare i tera fare. (Tim. 1, 2:4) Te haamanaˈo ra te hoê tamahine no Asia e mea nafea to ˈna metua vahine i rave ai i te mau peu faaroo i mua i te mau hohoˈa rau i to ratou fare. Ma te feruri eita te mau hohoˈa atoa e nehenehe e faaite i te Atua mau, e pinepine teie tamahine i te pure ia ite o ˈna o vai te Atua mau. Ia ˈna i pahono i te hoê patotoraa i te uputa fare, ua ite oia e piti Ite tei ineine i te tauturu ia ˈna ia ite i te iˈoa hoê roa o te Atua mau ra, o Iehova. E auê ïa te rahi o to ˈna mauruuru i te iteraa i te parau mau no nia i te mau idolo! I teie nei te faaite nei oia i te hoê itoito rahi maitai ma te apiti tamau i te pororaa, ma te tauturu i te tahi atu mau taata ia ite ia Iehova e i ta ˈna opuaraa.—Sal. 83:18; 115:4-8; Ioa. 1, 5:21.
7. Eaha ta tatou e nehenehe e rave no te pee i te feia haapii tei haere ati aˈe i te fenua i te tau o Iehosaphata?
7 Ia poro tatou i tera fare i tera fare, e nafea tatou e rave hope ai i ta tatou tuhaa fenua? Ma te anaanatae, i te toru o te matahiti o to Iehosaphata ariiraa, ua tono oia e tii e pae taata rarahi, e iva ati Levi, e piti tahuˈa. Ua faaue oia ia ratou ia tere na te mau oire atoa no te haapii i te ture a Iehova i te mau taata. Inaha, ua rave hope roa ratou i ta ratou tere haapiiraa, haamata ihora te mau nunaa tapiri i te mǎtaˈu ia Iehova. (A taio i te Paraleipomeno 2, 17:9, 10.) Ma te haere i te mau fare i te tahi atu mau taime e mahana, e nehenehe paha tatou e paraparau i te melo rau o te hoê utuafare.
8. E nafea tatou e faaaano ai i ta tatou faaite-haere-raa?
8 E rave rahi tavini a te Atua i teie tau tei ineine i te faarue i to ratou mau fare e i te haere e tavini i te vahi e hinaaro-rahi-hia te mau Ite itoito rahi. E nehenehe anei outou e na reira? Te tamata nei vetahi te ore e nehenehe e reva i te poro i te mau taata no reira e paraparau nei râ i te hoê reo ê. No te rau o te nunaa ta ˈna e farerei nei i roto i ta ˈna tuhaa fenua, ua haapii Ron, e 81 matahiti i te aroha i te taata na roto e 32 reo! Aita i maoro aˈenei ua farerei oia i na hoa faaipoipo no Afirika i nia i te purumu e ua aroha ˈtu na roto i to raua reo Yoruba. Ua ui raua ia Ron ua haere aˈena anei o ˈna i Afirika. I to ˈna pahonoraa aita, ua ui raua mea nafea to ˈna iteraa i to raua reo. Ua faatupu te reira i te hoê faaiteraa maitai roa. Ua farii ohie raua i te tahi mau vea e ua horoa ˈtu ma te oaoa i te vahi o to raua nohoraa, ta teie ïa taeae i faatae i to reira amuiraa ia nehenehe na hoa faaipoipo e fanaˈo i te hoê haapiiraa bibilia.
9. No te aha e mea faufaa ˈi ia taio roa ˈtu i te Bibilia i roto i te pororaa? A horoa i te hoê faahiˈoraa.
9 E “buka ture a Iehova” ta te feia haapii tei haere ati aˈe i te fenua ia au i te faaueraa a Iehosaphata. Te tutava nei tatou na te ao nei i te haapii i te mau taata ma te rave i te Bibilia, no te mea o te Parau a te Atua tera. E faaite tatou i te faufaaraa o te Bibilia i roto i ta tatou taviniraa ma te taio roa ˈtu i roto, ia ite te taata i te parau i papaihia. Ua faataa te hoê fatu fare ia Linda, te hoê Ite, e tia ia ˈna ia haapao i ta ˈna tane tei roohia i te maˈi i roto i te roro. Ua autâ taua vahine ra: “Aita vau i ite eaha ta ˈu i rave a vaiiho ai te Atua i teie mea ia tupu.” Ua pahono atu Linda: “E nehenehe anei au e haapapu te tahi mea?” I reira to ˈna taioraa i te mau parau a Iakobo 1:13 e ua na ô â oia e: “Te mau mauiui atoa ta tatou e faaû nei e oia atoa tei herehia, e ere ïa i te utua no ǒ mai i te Atua.” I reira, ua tauahi mai teie vahine ia Linda. Te farii ra Linda: “Ua nehenehe au e tamahanahana ia ˈna ma te rave i te Bibilia. I te tahi mau taime, te irava hoi ta tatou e taio ra i roto i te Bibilia aitâ ïa te fatu fare i faaroo aˈenei i te reira.” Ua faatupu teie aparauraa i te hoê haapiiraa bibilia tamau e teie vahine.
Te feia apî o te tavini nei ma te itoito rahi
10. Mea nafea Iosia i riro ai ei hiˈoraa maitai no te mau Kerisetiano apî i teie mahana?
10 Ma te manaˈo faahou i te hiˈoraa o Iosia, te tapao ra tatou e ua pee oia i te haamoriraa mau ei taata apî e fatata to ˈna e 20 matahiti i to ˈna raveraa i tera tere tinairaa i te haamoriraa idolo. (A taio i te Paraleipomeno 2, 34:1-3.) E rave rahi roa taata apî i teie mahana o te faaite nei i te hoê â itoito rahi i te pororaa i te Basileia.
11-13. Eaha ta tatou e huti mai i te taviniraa itoito rahi a te feia apî ia Iehova i teie tau?
11 O Hannah, e ora nei i Beretane, 13 matahiti to ˈna i haapii ai i te reo Farani i te fare haapiiraa a faaroo ai oia e ua haamauhia te hoê pǔpǔ reo Farani i roto i te hoê oire tapiri. Ua farii to ˈna metua tane e apee ia ˈna i to reira mau putuputuraa. I teie nei, 18 matahiti to Hannah e te poro nei oia ma te itoito rahi na roto i te reo Farani ei pionie tamau. E nehenehe atoa anei oe e haapii i te hoê reo ê e e tauturu i te tahi atu mau taata ia ite ia Iehova?
12 Mea au roa na Rachel e mataitai i te DVD Poursuivez des objectifs qui honorent Dieu. Ma te faataa i to ˈna huru feruriraa a haamata ˈi oia i te tavini ia Iehova i 1995, te na ô ra oia e: “Ua manaˈo vau e mea maitai vau i roto i te parau mau.” Te na ô ra oia i muri iho e: “I to ˈu mataitairaa i tera darama, ite atura vau e e mea iti roa ta ˈu i rave e rave rahi matahiti. E tia ia ˈu ia aro no te parau mau e ia horoa i to ˈu manaˈo e puai atoa no ta ˈu iho taviniraa e haapiiraa.” I teie nei, ua ite Rachel e te tavini nei o ˈna ia Iehova ma te itoito rahi aˈe. Eaha ta ˈna i ite ei faahopearaa? “Ua hohonu roa ˈtu â to ˈu taairaa e o Iehova. E pure faufaa aˈe ta ˈu, e haapiiraa hohonu e oaoa aˈe ta ˈu, e ua riro te mau aamu bibilia ei mea mau aˈe no ˈu. Ei faahopearaa, mea au roa na ˈu te pororaa e te oaoa mau ra vau i te iteraa i te mau parau a Iehova i te tamahanahanaraa ia vetahi ê.”
13 Ua faaitoito te tahi atu DVD, Les jeunes s’interrogent . . . Que vais-je faire de ma vie? ia Luke te hoê taata apî. I muri iho i te mataitairaa i tera faaiteraa, ua papai Luke: “Ua hinaaro vau e feruri faahou i to ˈu oraraa.” Ua farii oia: “Na mua ˈtu, ua faahepohia vau e tapi i te hoê oraraa moni papu ma te haere i te haapiiraa teitei e i muri iho e haapao atu ai i te mau fa pae varua. Eita teie faaheporaa e faaitoito i te haereraa i mua i te pae varua; e haaparuparu râ te reira ia oe.” E te mau taeae e tuahine apî, no te aha e ore ai e manaˈo e faaohipa i ta outou i haapii i te fare haapiiraa no te faaaano atu i ta outou taviniraa mai ia Hannah? E no te aha outou e ore ai e pee i te hiˈoraa maitai o Rachel ma te tapi i te mau fa e faahanahana mau i te Atua? A pee i te hiˈoraa o Luke, ma te ape atu i te mau ati atâta e riro ei marei no e rave rahi taata apî.
E pee anaˈe ma te itoito rahi i te mau faaararaa
14. Teihea haamoriraa ta Iehova e farii, e no te aha e mea fifi roa ˈi ia tapea i te reira i teie tau?
14 Ia fariihia ta ratou haamoriraa e titauhia ia vai mâ te nunaa o Iehova. Te faaara nei Isaia: “A haere, a haere, haere outou i rapae; eiaha e rave noa ˈtu i te mea viivii ra; e haere outou i rapae mai rotopu mai ia ˈna [Babulonia] ra; ia mâ outou, e tei hopoi i te mau farii a Iehova ra!” (Isa. 52:11) E rave rahi matahiti hou Isaia i papai ai i teie mau parau, ua rave uˈana te arii maitai ra o Asa i te hoê tere tinairaa i te taiataraa i Iuda. (A taio i Te mau arii 1, 15:11-13.) E senekele i muri aˈe, ua parau te aposetolo Paulo ia Tito e ua horoa Iesu ia ˈna iho no te tamâ i ta ˈna mau pǐpǐ ia riro mai ratou “ei taata mau no ˈna iho, e te itoito i te mau ohipa maitatai.” (Tito 2:14) I roto i te totaiete peu hairiiri roa o teie tau, e ere i te mea ohie—no te feia apî iho â ra—ia vai mâ noa i te pae morare. Ei hiˈoraa, e mea tia ia aro te mau tavini atoa a te Atua, te feia apî e te feia paari atoa, eiaha ratou ia viiviihia i te mau hohoˈa faufau i roto i te afata teata, te mau hohoˈa taviri, e i nia iho â ra i te Internet.
15. Eaha te tauturu ia riaria tatou i te mea ino?
15 E nehenehe te peeraa ma te itoito rahi i te mau faaararaa a te Atua e tauturu ia tatou ia riaria i te mea ino. (Sal. 97:10; Roma 12:9) Mea titauhia ia riri tatou i te mau peu faufau ia “matara mai i ta ˈna umeraa mana e te puai,” ia au i te parau a te hoê Kerisetiano. No te iriti i te mau tuhaa auri ovahine, e hinaarohia te hoê puai rahi aˈe i te puai e tapea amui ra i te reira. Oia atoa, e tautoo anaˈe eiaha roa ia hema i te mau peu faufau. Ma te ite râ e nafea te peu faufau e faaino rahi ai ia tatou e riaria ˈi tatou i te reira. Ua tutava uˈana te hoê taeae i te faaore i ta ˈna peu hiˈoraa hohoˈa faufau i nia i te Internet. Ua hopoi oia i ta ˈna roro uira i te hoê vahi e ite maitai ai te toea o te utuafare. Ua faaoti papu atoa oia e tamâ ia ˈna iho e ia itoito rahi oia i te mau ohipa maitatai. Ua rave atoa oia i te tahi atu taahiraa. No te mea e faaohipa iho â o ˈna i te Internet no ta ˈna ohipa, ua faaoti papu oia e rave noa i te reira i te taime tei pihai iho ta ˈna vahine ia ˈna.
Te faufaa o te haerea maitai
16, 17. Eaha te faahopearaa o to tatou haerea maitai i nia i te feia e hiˈo maira ia tatou? A horoa i te hoê faahiˈoraa.
16 Auê ïa haerea maitai ta te mau taeae e tuahine apî e faaite ra i roto i te taviniraa a Iehova, e auê hoi te taata i te putapû i ta ratou e hiˈo nei! (A taio i te Petero 1, 2:12.) Ua taui te hoê taata tei tae i te Betela i Lonedona i to ˈna manaˈo i te mau Ite no Iehova i muri aˈe i to ˈna tataîraa i te hoê matini neneiraa hoê mahana taatoa. Ua ite ta ˈna vahine e haapii ra i te Bibilia e te hoê Ite no taua vahi ra i te tauiraa te huru o ta ˈna tane. Na mua ˈtu, aita oia i hinaaro ia haere mai te mau Ite i to ˈna fare. Ia hoˈi mai râ oia na ta ˈna ohipa i te Betela, ua haapopou oia i to ratou maitai ia ˈna. Ua parau oia e aita e taata parau faufau. E mea faaoromai te taatoaraa, e e oraraa hau to ratou. Ua putapû roa oia i te itoito rahi o te mau taeae e tuahine e haa ra ma te aufau-ore-hia, e horoa noa ra i to ratou taime e to ratou puai no te tauturu i te neneiraa i te parau apî maitai.
17 Mea haapao maitai atoa te mau taeae e tuahine i ta ratou ohipa no te faatamaa i to ratou utuafare. (Kol. 3:23, 24) E pinepine e ohipa papu ta ratou, i te mea e te haafaufaa nei te paoti ohipa i to ratou huru haapao maitai e aita ïa ratou e hinaaro ra ia ere ratou i teie feia rave ohipa.
18. E nafea tatou e itoito rahi ai i te mau ohipa maitatai?
18 Ua riro to tatou tiaturi ia Iehova, to tatou faarooraa i ta ˈna mau faaueraa, e to tatou atuatu-maitai-raa i ta tatou mau vahi putuputuraa ei ravea no te faaite i to tatou itoito rahi i te fare o Iehova. Hau atu â, te hinaaro nei tatou e apiti i te pororaa i te Basileia e te faariroraa i te taata ei pǐpǐ ia au i tei maraa ia tatou i te rave. E feia apî anei aore ra e feia paari, ma te faaitoito hua i te ora ia au i te mau ture aveia mâ taaihia i ta tatou haamoriraa e ooti tatou e rave rahi haamaitairaa. E e ite-noa-hia tatou ei nunaa “itoito i te mau ohipa maitatai.”—Tito 2:14.
[Nota i raro i te api]
a Ua vavahi paha Asa i te mau vahi teitei haamoriraa i te mau atua ěê eiaha râ te mau vahi i haamori ai te taata ia Iehova. Aore ra ua faatia-faahou-hia tera mau vahi teitei i te pae hopea o to Asa ariiraa e na ta ˈna ïa tamaiti o Iehosaphata i vavahi i te reira.—Arii 1, 15:14; Par. 2, 15:17.
Eaha ta outou i huti mai i te mau hiˈoraa bibilia e o teie tau ma te ui
• e nafea outou e itoito rahi ai i te pororaa e te haapiiraa?
• e nafea te Kerisetiano apî e “itoito” rahi ai “i te mau ohipa maitatai”?
• e nafea ia matara mai i te mau peu viivii?
[Uiraa haapiiraa]
[Hohoˈa i te api 17]
Te faaohipa tamau ra anei oe i te Bibilia i roto i ta oe taviniraa?
[Hohoˈa i te api 18]
E tauturu paha te haapiiraa i te hoê reo ê i te fare haapiiraa ia faaaano atu i ta oe taviniraa