“Lo77obaa Oottanau” Mishettiyaageeta Gidite!

“Iita ooso ubbaappe [Yesuusi] nuna wozanaunne lo77obaa oottanau amottiya [“mishettiya,” NW] ba geeshsha asa kessanau, nu gishshau, ba huuphiyaa immiis.”—TIITU 2:14.

1. Yesuusi Niisaana agina 10, 33 K.S., beeta maqidasiyaa yiido wode aybi hanidee?

WODEE Niisaana agina 10, 33 K.S., Paasikaa Baalaa bonchiyo wodiyaappe guuttaa kasetees. Yerusalaame beeta maqidasiyan goynnanau yiida daro asay baalaa bonchanau naagiiddi deˈees. Yesuusi yaa gakkiyo wode aybi hanidee? Wonggeliyaa xaafida Maatiyoosi, Marqqoosinne Luqaasi heezzaykka, Yesuusi bayzziyaageetaanne shammiyaageeta yaappe naaˈˈanttuwaakka kessidoogaa yootidosona. I miishshaa laammiyaageetu xarapheezaanne haraphiyaa bayzziyaageetu oydiyaa aatti yeggiis. (Maatiyoosa 21:12; Marqqoosa 11:15; Luqaasa 19:45) Yesuusi heezzu layttappe kase hegaadan oottido wodiyaappe doommidi, mishettiyoogaa aggibeenna.—Yohaannisa 2:13-17.

2, 3. Yesuusi mishettidoy beeta maqidasiyaa geeshshana xallaassa gidennaagaa waati eriyoo?

² Maatiyoosi xaafidobay qonccissiyoogaadan, Yesuusi mishettidoy beeta maqidasiyaa geeshshana xallaassa gidenna. Yan akko yiida qooqetanne wobbetakka pattiis. (Maatiyoosa 21:14) Luqaasi xaafidobay Yesuusi oottido harabaa yootees. “Yesuusi ubba gallassi Beeta Maqidasiyan tamaarissees.” (Luqaasa 19:47; 20:1) Yesuusi mishettiyoogee asau i sabbakido oosuwan keehippe qoncciis.

 ³ Takkidi, kiitettida PHauloosi Tiituyyo Yesuusi “iita ooso ubbaappe i nuna wozanaunne lo77obaa oottanau amottiya [“mishettiya,” NW] ba geeshsha asa kessanau, nu gishshau, ba huuphiyaa immiis” yaagidi xaafiis. (Tiitu 2:14) Nuuni ha wodiyan “lo77obaa oottanau” mishettiyaageeta gidana danddayiyoy ayba ogetuunee? Yihudaa kawotu leemisoy nuna waatidi minttettana dandday?

Sabbakanaunne Tamaarissanau Mishettiyoogaa

4, 5. Yihudan kawotida oyddu kawoti loˈˈo oosuwau mishettiyoogaa ayba ogiyan bessidonaa?

⁴ Asi, Yoosaafixi, Hizqqiyaasinne Yoosiyaasi Yihudaa biittaappe eeqaa goynuwaa xayssanau halchidi denddidosona. “Asi allaga xoossatuyyo yarshshiyo sohotanne goinniyo xoqqa sohuwaa xaissiis. Goinnanau shuchchaappe oottido tuussatakka mentterettiis; Asheero giyo xoossee misiletakka qanxxeretti oliis.” (2 Odiya 14:3) Yoosaafixi Yihoowa goynuwau mishettiyoogee a tamadan xuuggin, “goinniyo xoqqa sohotanne Asheero giyo Xoossee eeqa misileta Yihudaa biittaappe xaissiis.”—2 Odiya 17:6; 19:3. *

⁵ Hizqqiyaasi Yerusalaamen laappun gallassau bonchettiya Paasikaa Baalaa giigissidoogaa kaallidi, “he sohuwan de7iya Israa7eela ubbati Yihudaa katamata biidi, de7iyaabaa ubbaa xaissana gakkanaashin, eeqaa tuussata kinchcherettidosona; Asheero giyo xoossee misiliyaa qanxxi olidosona; Yihudaa biittaaninne Biniyaama biittan ubban, qassi Efireema biittaaninne Minaase biittan de7iya goinniyo xoqqa sohotanne yarshshiyo sohota laalidosona.” (2 Odiya 31:1) Yoosiyaasi kawotiyo wode ayyo layttay hosppuna xalla. Geeshsha Maxaafay hagaadan gees: “I kawotido hosppuntta laittan biron yelaga de7iiddi, ba maizza aawaa Daawita Xoossaayyo goinnanau doommiis; qassikka i kawotido tammanne naa77antto laittan Yihudaaninne Yerusalaamen de7iya goinniyo xoqqa sohotanne Asheero giyo xoossee misiletanne massi giigissidonne seerissi medhdhido misileta xaissiyoogaa doommiis.” (2 Odiya 34:3) Hegaa gishshau, oyddu kawotikka loˈˈo oosuwau mishettidosona.

6. Nu haggaazoy Yihudan kawotida ammanettida kawotu zamachaara waanidi leemisettii?

⁶ Nuunikka ha wodiyan, asay eeqaa goynuwaappenne worddo haymaanootiyaa timirttiyaappe naxa kiyanaadan maaddiyo zamachan shaahettoos. Nuuni sooppe soo biidi haggaaziyoogee ubba asaa demmanaadan maaddees. (1 Ximootiyoosa 2:4) Isiyaa biittaa naˈa gidida issi yelagiyaa bantta son deˈiya daro misiletu sinttan ba aayyiyaa goynniyoogaa hassayausu. Ubba misiletikka tumu Xoossaa kalˈˈatennaagaa akeekada, he naˈiyaa tumu Xoossay oonakko eranau ubbatoo woossaasu. I keettaa karee qoxettin dooyada, a gita sunttay Yihoowa gidido, tumu Xoossaa eranaadan o maaddanau yiida naaˈˈu Markkata demmaasu. Eeqaa xeelliyaagan tumaa eridoogan a keehi ufayttaasu! A haˈˈi haggaazuwan hara asaa ayyaanaaban maaddanau, minnada shaahettiyoogan loˈˈo hanotan mishettiyoogaa bessausu.—Mazamure 83:18; 115:4-8; 1 Yohaannisa 5:21.

7. Yoosaafixa wode Yihudaa biitta ubbaa biida asttamaaretuppe ayba leemiso gidiyaabaa tamaariyoo?

⁷ Nuuni sooppe soo biidi haggaaziyo wode, nuussi imettida moottaa ashshennan waati oottana danddayiyoo? Yoosaafixi kawotido heezzantta layttan ichashu daannata, uddufun Leewatanne naaˈˈu qeeseta kiittidoogee qofan wottana bessiyaaba. I eti ubba katamaa biidi asaa Yihoowa higgiyaa tamaarissana mala yootiis. Eti ha oosuwaa biitta ubban oottido gishshau, eta yuushuwan deˈiya kawotettan deˈiya asay Yihoowa yayyiyoogaa doommidosona. (2 Odiya 17:9, 10 nabbaba.) Dumma dumma gallassatuuninne wodetun eta soo biyoogan, daro asaara gayttidi etau yootana danddayoos.

8. Nuuni markkattiyo ogiyaa waatidi aassana danddayiyoo?

⁸ Ha wodiyan Xoossau oottiya daroti bantta  keettaa bantta dosan aggidi, mishettidi oottiya Markkati keehippe koshshiyo heeri oottanau boosona. Neeni hegaadan oottana danddayay? Nu giddoppe hegaadan baanau danddayenna amaridaageeti nu heeran deˈiya, hara qaalaa haasayiya asau markkattanau baaxetana danddayoosona. Rooni ba moottan, dumma dumma biittappe yiida asaara gayttiyo gishshau, ayyo layttay 81 gidido wode, 32u doonatun sarotiyoogaa tamaariis! I mata wode ogiyan haggaaziiddi, Afirkkaa biitta asa gidida azinaaranne macheera gayttidi, eti haasayiyo Yoruba qaalan sarotiis. Eti Rooni Afirkkaa bi eriyaakkonne oychidosona. I ba erikke giidi zaarin, bantta qaalaa i waati eridaakko oychidosona. Hagee i loˈˈo hanotan markkattanaadan oottiis. Eti sohuwaara amarida maxeeteta ekkidi bantta adarashaa ufayttidi immidosona; i he adarashaa eti deˈiyo heeran deˈiya gubaaˈiyau immin, eti haˈˈi xannaˈiiddi deˈoosona.

9. Nu haggaazuwan Geeshsha Maxaafaappe nabbabiyoogee keehippe koshshiyoy aybissee? Issi leemisuwaa yoota.

⁹ Yoosaafixi azazin Yihudaa biitta ubbaa biida asttamaareti, “GODAA Higgiyaa Maxaafaa banttanaara ekkidi” biidosona. Geeshsha Maxaafay Xoossaa Qaalaa gidiyo gishshau, alame yuushuwan nuuni asaa appe tamaarissanau baaxetoos. Nu haggaazuwan Geeshsha Maxaafaa goˈettidi, asaayyo appe nabbabanau dumma baaxiyaa oottoos. Issi keettayiyaa ba keettaaway i maadoy ubbatoo koshshiyo sahuwaa sahettiyoogaa Linddo geetettiya micheeyyo yootaasu. He maccaasiyaa yiilluwan: “Taani ay oottin, Xoossay ta bolli hagaa malabay gakkanaadan oottidaakko taani erikke” yaagaasu. Linda: “Neeni ammanettanaadan oottiya issibaa yootoo?” yaagaasu. Hegaappe simmada, Yaaqooba 1:13 nabbabada: “Nu bolli gidin nu siiqiyoogeetu bolli gakkiya tuggay Xoossa qixaate gidenna” yaagaasu. He wode maccaasiyaa ufayttada Linddo qoommaasu. Lindda: “Taani Geeshsha Maxaafaa goˈettada minttettana danddayaas. Nuuni issi issitoo Geeshsha Maxaafaappe nabbabiyo xiqiseta sooppe soo biidi demmiyo asay kase mule siyi erennaba” yaagaasu. A hegaadan oottidoogee maccaasiyaa iira ubbatoo Geeshsha Maxaafaa xannaˈanaadan oottiis.

Mishettidi Haggaaziya Yelagata

10. Yoosiyaasi ha wodiyan deˈiya yelaga Kiristtaanetuyyo loˈˈo leemiso gidiyoy ayba ogiyaanee?

¹⁰ Kase denttido Yoosiyaasa leemisuwaa zaarettidi qoppiyo wode, i yelagatettan tumu goynuwaa kaallidoogaanne ayyo layttay 20 heera gidiyo wode, eeqaa goynuwaa xayssanau wolqqaama zamachaa doommidoogaa akeekoos. (2 Odiya 34:1-3 nabbaba.) Ha wodiyankka daro yelagati bantta haggaazuwan hegaadan mishettiyoogaa bessoosona.

11-13. Ha wodiyan Yihoowayyo mishettidi oottiya yelagatuppe ay timirtte demmana danddayiyoo?

¹¹ Inggilize biittan deˈiya Haanno giyo 13u laytta naˈiyaa, a deˈiyo heeran deˈiya kataman Paranssayettuwaa haasayiya citay eqqidoogaa siyiyo wode, timirtte keettan Paranssayettuwaa tamaarawusu. A shiiquwau yaa biyo wode i aaway iira issippe baanau maayiis. Haˈˈi Haanniyyo layttay 18 gidishin, a Paranssayetto qaalan mishettada kumetta  wodiyaa haggaaziyaaro. Neenikka kare biittaa qaalaa tamaarada asay Yihoowabaa tamaaranaadan maaddana danddayay?

¹²Xoossaa Bonchissiya Halchota Kaallite giya viiduwaa beˈada Racheela keehi ufayttaasu. A Yihoowayyo haggaaziyoogaa doommido 1995 wodiyaabaa qoppada hagaadan gaasu: “Taani tumaa tabaa oottidabaadan qoppaas. SHin diraamaa beˈa simmada taani daro layttau baaso gidiyaabatu xalla oottidoogaa haˈˈi akeekaas. Taani tumaayyo baaxetana koshshees; haggaazuwaunne buzo xinaatiyau tumuppe qoppananne baaxetana koshshees.” Haˈˈi Racheela kaseegaappe aaruwan Yihoowau mishettada haggaaziyaabadan qoppausu. A hegaadan oottidoogan ay demmadee? Hagaadan gaasu: “Taayyo Yihoowaara deˈiya dabbotay minniis. Taani woossiyo woosay kaseegaappe aaruwan ufayssiyaagaa, kaseegaappe aaho ogiyan xannaˈayssinne keehippe ufayttays; Geeshsha Maxaafaa taariketi taayyo keehi qoncce gididosona. Hegaappe denddidaagan, Yihoowa qaalay harata minttettiyoogaa akeekiyoogan, haggaazuwan keehippe ufayttaysinne appe daro woppaa demmays.”

¹³Yelagati Oychiyo Oyshaa—Taani Ta Deˈuwan Ay Oottanee? giya diraaman Luuka geetettiya yelagay minettiis. I he diraamaa beˈi simmidi: “Taani ta deˈuwan oottiyoobaa wotta yeggada qoppanaadan denttettiis” yaagidi xaafiis. I: “Kase wodetun, xoqqa timirttiyaa koyro tamaarada aquwan dureta simmada, ayyaanaaban xeelaa wottanaadan sugettay gakkiis. Hegaa mala sugettay issi uri ayyaanaaban minnanaadan oottenna; ubba shugganaadan oottees” yaagidi yootiis. Yelaga ishatoonne michetoo, timirtte keettan tamaariyoobaa Haanniigaadan intte haggaazuwaa aassanau goˈettana danddayiyaakkonne ayssi qoppekketii? Xoossaa tumuppe bonchissiya halchota mishettidi kaalliyoogan, Racheeli leemisuwaa ayssi kaallekketii? Daro yelagatuyyo pire gidida daafaappe haakkiyoogan, Luuka leemisuwaa kaallite.

Akeekissuwaa Mishettidi Siyite

14. Yihooway ufayttiyoy ay mala goynuwaanee? Ha wodiyan hegaadan deˈiyoogee paacciyaaba gididoy aybissee?

¹⁴ Eta goynoy Yihoowa ufayssiyaagaa gidanaadan Yihoowa asay geeshsha gidana koshshees. Isiyaasi: “Inttenoo GODAA keettaa miishshata tookkiyaageetoo, kichchite, kichchite; yaappe kiyite. Tunabaa bochchoppite; a [Baabiloone] giddoppe kiyiichchite. Intte huuphiyaukka geeyite” yaagidi akeekissiis. (Isiyaasa 52:11) Isiyaasi hegaa xaafanaappe daro layttaa kasetidi, loˈˈo Kawuwaa Asi iita kandduwaa Yihudaa biittaappe xayssanau wolqqaama baaxiyaa baaxetiis. (1 Kawotu 15:11-13 nabbaba.) “Lo77obaa oottanau” mishettiya ba asaa geeshshanau, Yesuusi bana kaalliyaageetuyyo ba huuphiyaa aattidi immidoogaa, daro layttaappe guyyiyan kiitettida PHauloosi Tiituyyo yootiis. (Tiitu 2:14) Ha moorettida wodiyan kandduwaaban geeshsha gididi deˈanaagee, ubba qassi yelagatuyyo keehippe metiyaaba. Leemisuwau, yelaga gidin cima gidin, Xoossaa ashkkarati ubbay televizhiiniyan, pilimiyaaninne ubba qassi Intterinneettiyan bessiyo pornograafiyan hambbalaashettennaadan baaxetana koshshees.

15. Nuuni iitabaa ixxanaadan maaddana danddayiyaabi aybee?

¹⁵ Nuuni Yihoowa akeekissuwaa mishettidi siyiyoogee iitabaa ixxanaadan maaddana danddayees. (Mazamure 97:10; Roome 12:9) Issi Kiristtaanee qonccissidoogaadan, “magineetedan dafiyo wolqqay deˈiyo pornograafiyaa beˈiyo meeziyaa agganau” a keehippe ixxana  koshshees. Magineetiyan oyqetti uttida biratata yedissanau, issi urau biratati issippe oyqettanaadan oottida wolqqaappe daro wolqqay daana koshshees. Pornograafiyaa piriyan gelennaadan, hegaadan minttidi baaxetana koshshees. SHin pornograafee ay keena qohana danddayiyaakko akeekiyoogee, nuuni a shenetanaadan oottees. Issi ishay Intterinneettiyan pornograafiyaa beˈiyo meeziyaa agganau keehippe baaxetiis. Ba kompputeriyaa wottiyo sohuwaa ba soo asay beˈiyo qoncce sohuwau laammiis. Hegaa bollankka, i bana kaseegaappe aatti geeshshanaunne mishettidi loˈˈo oosuwaa oottiyaagaa gidanau murttiis. I hara tangguwaakka ekkiis. I ba oosuwau Intterineetiyaa goˈettana koshshiyo gishshau, a maccaasiyaa aara deˈiyo wode xallan goˈettanau murttiis.

Loˈˈo Eeshshaa Goˈˈaa

16, 17. Nu loˈˈo eeshshay nuna xeelliyaageeti waananaadan denttettana danddayii? Leemisuwan yoota.

¹⁶ Yihoowayyo haggaaziya yelaga attumaageetuyyoonne maccaageetuyyo keehi loˈˈo xeelay deˈees; hegee qassi harata keehippe denttettees! (1 PHeexiroosa 2:12 nabbaba.) Xuufiyaa attamiyo maashiniyaa giigissiiddi Inggilize Beeteelen issi gallassaa peeˈida issi bitanee, kase Yihoowa Markkatuyyo deˈiya ba xeelaa hegaappe simmidi muleera laammiis. Ba deˈiyo heeran deˈiya issi micheera Geeshsha Maxaafaa xannaˈiya a maccaasiyaa, ba azinaa xeelay laamettidoogaa akeekaasu. Hegaappe kase, Yihoowa Markkati ba soo yaana mala koyenna. SHin he oosuwaa Beeteelen oottidi soo yiidi, eti a oyqqido ogiyan keehippe ufayttidoogaa yootiis. Etappe ooninne shori baynna qaalaa haasayennaagaa yootiis. Yan deˈiya ubbay danddayancha; qassi hegan deˈiya hanotay sarotettay kumidoogaa. Hegan deˈiya yelaga ishatinne michoti damoozay qanxxettennan, bantta dosan bantta wodiyaanne bantta wolqqaa mishiraachuwaa aassanau mishettidi goˈettiyoogan keehippe garamettiis.

¹⁷ Hegaadankka, bantta soo asaayyo koshshiyaabaa kunttanau oottiya michotinne ishati bantta oosuwaa kumetta wozanaappe oottoosona. (Qolasiyaasa 3:23, 24) Hegee darotoo, ootissiyaagee eti minnidi oottiyoogaa akeekanaadan oottiyo gishshau, eti oosuwaappe kiyanaadan koyenna.

18 Nuuni “lo77obaa oottanau” mishettana danddayiyoy ayba ogiyaanee?

¹⁸ Nuuni Yihoowan ammanettiyoogee, a kaaletota kaalliyoogeenne nu shiiquwaa sohota loyttidi oyqqiyoogee Yihoowa keettau mishettiyoogaa bessiyo ogetuppe amaridaageeta. Hegaa bollankka, Kawotettaa mishiraachuwaa sabbakiyo oosuwaaninne erissiyo ashkkara oottiyo oosuwan nuuni danddayidoogaa keena ubban kumetta ogiyan shaahettanau koyoos. Nuuni yelaga gidin woy cima gidin, nu goynuwaara gayttidaban geeshsha gidanau wozanappe baaxetiyoogan, daro goˈˈaa demmoos. Qassi “lo77obaa oottanau” mishettiyoogan ubbatoo erettiyaageeta gidoos.—Tiitu 2:14.

[Footnotes]

Geeshsha Maxaafaappenne ha wodiyan deˈiya leemisuwaappe . . .

• tamaarissiyoogaaninne sabbakiyoogan mishettiyoogaa waati bessanaakko ay tamaaradii?

• Kiristtaane yelagati “lo77obaa oottanau” mishettiyaageeta gidiyoogaa waati bessana danddayiyaakko ay tamaaradii?

• hambbalaashiya meeziyaa agganau ay oottana bessiyaakko ay tamaaradii?

[Oyshata]

[Sinttaa 21n deʼiya misiliyaa]

Haggaazuwan Geeshsha Maxaafaa ubbatoo goˈettay?

[Sinttaa 23n deʼiya misiliyaa]

Timirtte keettan hara qaalaa tamaariyoogee haggaazuwaa aassanaadan nena maaddana danddayees