Yufala i Mas Tok Tru Long Yufala
Yufala i Mas Tok Tru Long Yufala
“Yufala i mas finis long ol giaman toktok. . . . ‘Yufala i mas tok tru nomo long yufala.’”—EFES. 4:25.
1, 2. ?Wanem tingting blong plante man long saed blong tok we i tru?
BLONG plante yia, ol man oli stap raorao se man i rili naf blong tok tru, mo man i rili save wanem nao ol tok we i tru. Long ol yia 500 B.K.T., wan man Gris we i raetem ol naes vas i talem se: “Ol tok we i tru i stap long waen.” Hem i stap talem se afta we man i dring mo i fuldrong long waen, ating hem i wantem blong toktok moa, mo long taem ya nao hem i stap talem ol tok we i tru. Long faswan handred yia, Hed Gavman blong Rom, Ponjes Paelat, i soemaot tingting blong hem se i no gat ol tok we i tru, taem hem i jikim Jisas se: “?Wanem nao ol tok ya we i tru?”—Jon 18:38.
2 Long taem blong yumi, i gat ol defdefren tingting long saed blong ol tok we i tru. Sam man oli no tok tru oltaem, oli tok tru samtaem nomo. Samfala oli tok tru nomo sipos fasin ya i save givhan long olgeta, no i wan rod blong stretem trabol kwiktaem. Buk ya, The Importance of Lying, i talem se: “Maet fasin blong no giaman i wan gudfala fasin, be i no save givhan long yumi blong winim ol hadtaem long laef mo blong stap sef. Man i no gat jus, hem i mas giaman blong stap laef.”
3. ?From wanem Jisas i givim wan gudfala eksampol blong fasin ya blong tok tru?
3 !Hemia i defren long tingting blong ol disaepol blong Kraes! Jisas i no gat sem tingting olsem ol man blong wol ya. Oltaem hem i tok tru. Ol enemi blong hem tu, oli talem se: “Tija. Mifala i save we yu yu wan stret man. Yu yu tok tru nomo, mo yu stap tijim ol man long fasin we God i wantem.” (Mat. 22:16) Sem mak tede, ol trufala Kristin oli folem eksampol blong Jisas. Oli no fraet blong tok tru. Oli agri fulwan wetem tok blong aposol Pol we i talem long ol Kristin se: “Yufala i mas finis long ol giaman toktok. . . . ‘Yufala i mas tok tru nomo long yufala.’” (Efes. 4:25) Yumi save tingbaot tri haf blong tok ya blong Pol. Faswan, ?yumi mas tok tru long hu? Namba tu, ?i minim wanem blong tok tru? Mo namba tri, ?olsem wanem yumi save mekem ol advaes ya i wok long laef blong yumi evri dei?
?Yumi Mas Tok Tru Long Hu?
4. ?Ol lida blong ol man Jiu long faswan handred yia oli tingting olsem wanem long ol narafala man? ?Olsem wanem Jisas i soemaot sem tingting olsem Jeova long saed blong ol man?
4 Long faswan handred yia, sam lida blong ol man Jiu oli tijim se ol narafala man Jiu, mo ol gudfala fren blong olgeta, olgeta ya nomo we i stret blong mekem i gud long olgeta. Be Jisas i folemgud eksampol blong Papa blong hem, mo hem i lukluk olgeta samting sem mak olsem Papa blong hem. (Jon 14:9) Tru ya, hem i soem long ol disaepol blong hem se God i no tinghae moa long wan laen no kantri blong man, i bitim ol narafala. (Jon 4:5-26) Antap long hemia, tabu spirit i soemaot long aposol Pita se: “God i stap mekem i sem mak nomo long olgeta man. . . . Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.” (Wok 10:28, 34, 35) From samting ya, yumi mas soem lav long olgeta man, wetem olgeta ya tu we oli mekem olsem se oli enemi blong yumi.—Mat. 5:43-45.
5. ?Olsem wanem yumi tok tru long yumi?
5 ?Pol i minim wanem taem hem i talem se yumi mas tok tru long yumi? Tok tru i min se yumi serem ol save we oli tru, we oli no giaman. Ol tru Kristin oli no twistim mo tanem mining blong ol tok blong lidim ol narafala oli gorong. Oli “agens long ol rabis fasin” mo oli “holemstrong ol gudfala fasin.” (Rom 12:9) Taem yumi folem eksampol blong “God blong trutok,” yumi traehad blong mekem evri samting i klia mo i tru. (Sam 15:1, 2; 31:5, NW) Sipos yumi jusum gud ol tok we yumi talem, yumi save toktok long kaen fasin we yumi no giaman nating, blong stretem enikaen samting, nating se i wan samting we maet i mekem yumi sem mo harem nogud.—Ridim Kolosi 3:9, 10.
6, 7. (a) ?Taem yumi tok tru, i min se yumi talemaot ol prapa bisnes blong yumi tu long evri man we i askem? Eksplenem. (b) ?Hu olgeta ya we yumi save trastem mo we oli gat raet blong save ol tok we i tru?
6 ?Olsem wanem? ?Taem yumi tok tru blong ansa long kwestin blong narafala, i min se yumi mas talemaot olgeta samting we yumi save long bisnes ya? Maet i no olsem. Taem Jisas i stap long wol, hem i soemaot we i stret blong givim klia ansa mo save long sam man. Be taem ol lida blong skul we oli gat tu fes oli askem long Jisas se hu i givim raet long hem blong mekem ol saen mo ol merikel, Jisas i talem long olgeta se: “Oraet, bambae mi askem wan kwestin long yufala. Sipos yufala i ansa long kwestin ya blong mi, bambae mi mi save talemaot long yufala olsem wanem mi mi gat raet blong mekem ol samting ya.” Taem ol tija blong loa mo ol elda oli no wantem givim wan ansa, Jisas i talem se: “Mi tu mi no save talem long yufala, se hu i givim raet long mi blong mekem ol samting ya.” (Mak 11:27-33) From we ol man ya oli gat kruked fasin mo oli givim nogud eksampol olsem ol man we oli no gat bilif, Jisas i no ting se i stret blong givim ansa long olgeta. (Mat. 12:10-13; 23:27, 28) Sem mak tede, ol man blong Jeova oli mas lukaot gud long ol man blong apostasi, * mo long ol narafala rabis man we oli wokem ol trik mo ol rabis plan blong lidim ol man oli go krangke mo blong kasem samting we olgeta nomo oli wantem.—Mat. 10:16; Efes. 4:14.
7 Long sem fasin, Pol tu i soem se maet sam man oli no gat raet blong save evri samting long saed blong wan bisnes. Hem i talem se ‘ol man blong mekem toktok, oli go insaed long bisnes blong ol narafala man, nao oli stap talem ol samting we oli no gat raet blong talem.’ (1 Tim. 5:13) Yes, maet i had long wan man blong talemaot prapa bisnes blong hem long man we i stap pusum nus blong hem long bisnes blong ol narafala, no long man we ol narafala oli no save trastem hem se bambae i holemtaet bisnes ya i blong hem nomo. I moagud blong lesin long advaes we tabu spirit i pulum Pol blong raetem long Baebol se: “Yufala i mas traehad oltaem blong yufala i stap gud long laef blong yufala, we yufala i stap lukaot long ol bisnes blong yufala nomo.” (1 Tes. 4:11) Be samtaem, maet ol elda blong kongregesen oli nidim blong askem sam samting long yumi long saed blong prapa bisnes blong yumi, blong bambae oli save mekem gud wok blong olgeta. Long taem olsem, bambae oli glad tumas sipos yumi rere blong talemaot ol samting we i tru blong givhan long olgeta.
Tok Tru Insaed Long Famle
8. ?Olsem wanem fasin blong tok tru i save pulum ol memba blong famle blong oli joengud moa?
8 Klosap oltaem, yumi joengud moa wetem ol famle blong yumi i bitim eni narafala man. Blong mekem fasin fren ya i kam strong moa, i impoten we yumi tok tru taem yumi storian wetem wanwan memba blong famle. Plante trabol mo ol raorao oli save godaon no oli save finis sipos yumi no haedem wan samting, yumi no giaman, mo yumi soem kaen fasin taem yumi storian tugeta. Tingbaot, sipos yumi mekem mastik, ?yumi rere blong talemaot samting ya long hasban no waef blong yumi, ol pikinini blong yumi, mo long ol narafala memba blong famle blong yumi? Sipos yumi talem sore we i kamaot long hat blong yumi, samting ya i save putum pis mo fasin joengud insaed long famle.—Ridim 1 Pita 3:8-10.
9. ?Blong tok tru, from wanem i no gat nid blong tok strong mo blong tok long fasin we i no soem respek?
9 Fasin blong tok tru i no min se yumi tok strong long man. Sipos man i talem ol tok we i tru, be hem i no tok wetem respek, samting we hem i talem bambae i blong nating nomo. Pol i talem se: “Yufala i mas lego olgeta fasin blong kros, yufala i no mas holem kros, mo yufala i no mas kros kwik. Mo taem yufala i kros, yufala i no mas sakem tok blong yufala i go antap, mo yufala i no mas tok nogud long yufala. Mo yufala i mas finis long fasin ya we yufala i stap badfren long yufala. Yufala i mas mekem i gud long ol Kristin brata mo sista blong yufala, mo yufala i mas kaen gud long olgeta. Mo yufala i mas fofogivim yufala, olsem we long Kraes, God i fogivim yufala finis.” (Efes. 4:31, 32) Taem yumi toktok long kaen fasin we i no flas mo i soem respek, samting ya i givim paoa long ol tok we yumi talem mo i soem ona long olgeta we yumi storian long olgeta.—Mat. 23:12.
Tok Tru Insaed Long Kongregesen
10. ?Wanem samting we ol Kristin elda oli save lanem long nambawan eksampol blong Jisas blong tok tru?
10 Jisas i toktok long ol disaepol blong hem long fasin we i isi mo i klia. Oltaem hem i givim advaes wetem lav, be hem i no giaman smol jes blong mekem ol man oli glad long ol toktok blong hem. (Jon 15:9-12) Traem tingbaot, taem ol aposol blong Jisas oli raorao bakegen mo bakegen se hu nao i hae moa long olgeta, Jisas i tok strong be wetem longfala tingting, blong halpem olgeta blong oli kasem save se oli mas gat tingting daon. (Mak 9:33-37; Luk 9:46-48; 22:24-27; Jon 13:14) Sem mak tede, ol Kristin elda oli mas strong long saed blong stretfasin, be oli no mas bos antap long ol sipsip blong God. (Mak 10:42-44) Taem oli “mekem i gud” long narafala mo soem “kaen” fasin long narafala, oli folem eksampol blong Kraes.
11. ?Lav we yumi gat long ol brata blong yumi i mas pulum yumi blong yusum tang blong yumi olsem wanem?
11 Taem yumi tok stret long ol brata blong yumi long fasin we i no strong tumas, yumi save talemaot samting we i stap long tingting blong yumi be yumi no spolem olgeta. I tru, yumi no mas “wan sapmaot” we yumi yusum tang blong yumi blong stikim man, tok nogud long man, mo daonem man. (Sam 52:2; Prov. 12:18) Lav we yumi gat long ol brata blong yumi, bambae i pulum yumi blong lukaot gud long tang blong yumi, blong ‘yumi no tok nogud, yumi no giaman.’ (Sam 34:13) Long rod ya, yumi stap ona long God mo leftemap fasin joengud long kongregesen.
12. ?Wanem fasin blong giaman we kot komiti i mas lukluk long hem? Eksplenem.
12 Ol elda oli wok strong blong protektem kongregesen long ol man we oli talem ol giaman tok blong spolem narafala. (Ridim Jemes 3:14-16.) Man we i talem wan giaman tok blong spolem narafala, hem i wantem mekem man ya i safa mo i harem nogud. Ol tok olsem, oli no jes ol smosmol giaman we i bitim samting we i tru mo i givim rong tingting long narafala. I tru, enikaen fasin blong giaman i rong, be i no evri toktok we i no tru we man i mas pas long kot komiti from.Taswe, ol elda oli no mas bitim mak. Oli mas gat stret tingting mo skelem gud ol samting, taem oli stap faenemaot sipos wan man we i talem ol giaman tok i stap mekem fasin ya bakegen mo bakegen, mo i mekem from we i minim nomo blong spolem narafala. Man we i mekem fasin ya, ol elda oli mas stretem hem. Sipos no, maet i naf blong oli givim woning we i kamaot long Baebol wetem lav.
Tok Tru Long Ples Blong Wok
13, 14. (a) ?Wanem samting we sam man oli mekem blong giaman long bos blong olgeta? (b) ?Wanem gudfala frut i kamaot from fasin blong no giaman mo fasin blong wok had?
13 Yumi stap long wan taem we fasin blong giaman i kam antap bitim mak, taswe maet i no isi blong blokem fasin blong wantem giaman long bos blong yumi. Plante man we oli wantem kasem wan wok, oli stap giaman we oli no sem nating. Taem oli fulumap pepa blong askem wan wok we i moagud long hemia we oli gat mo i givim moa pei, maet oli givim ol save we i no stret long saed blong ol wok we oli mekem bifo mo edukesen blong olgeta. Mo tu, plante wokman oli mekem olsem we oli stap wok, be oli rili stap mekem ol prapa bisnes blong olgeta nomo, we i no stret nating folem ol rul blong kampani. Maet oli stap ridim ol buk we oli no laenap wetem wok we oli mekem, oli yusum telefon blong kampani long prapa bisnes blong olgeta nomo, sanem leta tru long emel long kompiuta, mo lukluk Intenet.
14 Ol tru Kristin oli no mas ting se oli fri blong jusum sipos oli wantem mekem fasin blong no giaman mo fasin blong tok tru. (Ridim Ol Proveb 6:16-19.) Pol i talem se: “Mifala i wantem tumas we oltaem mifala i stap mekem i stret nomo.” (Hib. 13:18) From samting ya, ol Kristin oli mas wok had blong fuldei blong kasem pei we i stret long dei ya. (Efes. 6:5-8) Man we i wok had mo i no les, i givim ona long Papa blong yumi long heven. (1 Pita 2:12) Tingbaot, long Spen, bos blong Roberto i talem gudfala tok from we Roberto i no giaman mo hem i tinghevi long wok blong hem. Nao from gudfala fasin ya blong Roberto, bos i tekem sam moa Witnes blong Jeova oli wok long kampani blong hem. Olgeta ya tu oli mekem gudfala wok. Long ol yia we oli pas, Roberto i faenem wok blong 23 brata we oli baptaes finis mo 8 Baebol studen.
15. ?Olsem wanem wan Kristin we i wan bisnesman i soemaot se hem i tok tru?
15 Sipos yumi gat prapa bisnes blong yumi, ?yumi tok tru oltaem long ol man? Wan bisnesman we i Kristin, i no mas giaman long saed blong ol samting we hem i salem, blong pulum ol man blong oli pem kwiktaem. Mo hem i no mas givim presen long man blong pem hem blong mekem samting we i no stret, mo i no mas karem presen long wan man we i askem hem blong mekem samting we i no stret. Yumi mas mekem i gud long ol narafala man, olsem we yumi wantem blong olgeta oli mekem long yumi.—Prov. 11:1; Luk 6:31.
Tok Tru Wetem Ol Man Blong Gavman
16. ?Wanem samting we ol Kristin oli mas givimbak (a) long ol gavman? (b) ?long Jeova?
16 Jisas i talem se: “Samting we i blong Sisa, yufala i givimbak long Sisa. Mo samting we i blong God, yufala i givimbak long God.” (Mat. 22:21) ?Wanem ol defdefren “samting” we oli blong Sisa, hemia ol gavman? Taem Jisas i talem ol tok ya, hem i stap tokbaot blong pem takis. Taswe, blong holem wan tingting we i klin long fored blong God mo ol man, ol Kristin oli mas obei long ol loa blong kantri, wetem ol loa long saed blong pem takis tu. (Rom 13:5, 6) Yumi luksave se Jeova i Hae Rula blong heven mo wol, mo Hem nomo i tru God ya we yumi lavem hem wetem olgeta hat, laef, tingting, mo paoa blong yumi. (Mak 12:30; Rev. 4:11) From samting ya, yumi agri blong stap daon aninit long han blong Jeova God long saed blong evri samting.—Ridim Ol Sam 86:11, 12.
17. ?Ol man blong Jeova oli gat wanem tingting long help we i kam long gavman?
17 Plante kantri oli stanemap ol program, no oli sanem ol wokman blong givhan long olgeta we oli nidim help. I no rong we wan Kristin i kasem help olsem, sipos ol samting long laef blong hem i soemaot se hem i stret blong kasem help ya. Sipos yumi tok tru long ol man, bambae yumi no save giaman, no givim rong save long ol man blong gavman jes blong kasem help mo mane long gavman.
Ol Blesing We Yumi Kasem Taem Yumi Tok Tru
18-20. ?Wanem ol blesing we yumi kasem taem yumi tok tru long ol man?
18 I gat plante blesing we yumi kasem taem yumi tok tru. Yumi holem wan tingting we i klin long fes blong God, nao long rod ya yumi save gat pis long tingting, mo tingting we i kwaet. (Prov. 14:30; Fil. 4:6, 7) Tingting we i klin i rili impoten long ae blong God. Mo tu, sipos yumi tok tru long saed blong evri samting, yumi no nid blong wari olsem ol man blong giaman, we oli fraet se ol man bambae oli faenemaot olgeta mo mekem giaman fasin blong olgeta i kamaot long klia ples.—1 Tim. 5:24.
19 Tingbaot wan narafala blesing. Pol i talem se: “Long olgeta samting we mifala i mekem, mifala i stap soemaot we mifala i man blong wok blong God. . . . Mifala i stap talemaot trutok.” (2 Kor. 6:4, 7) Hemia nao samting we i hapen long wan Witnes long Briten. Hem i traehad blong salemaot trak blong hem long wan man. Ale, hem i tokbaot sam haf blong trak we oli gud mo sam haf we oli nogud, wetem sam haf we man i no save luk. Afta we man ya i ronron smoltaem long trak blong luk sipos i laekem, hem i askem long brata ya sipos hem i wan Witnes blong Jeova. ?From wanem hem i askem olsem? Man ya i luksave se brata ya i no giaman, mo tu, klos mo hea blong hem i stret nomo. Storian blong tufala i givim janis long brata ya blong givim wan gudfala witnes.
20 ?Olsem wanem? ?Yumi tu yumi tok stret mo tru oltaem blong presem Bigfala Man ya we i Wokem yumi? Pol i talem se: “Mifala i lego finis ol fasin blong haed, mo blong sem. Mifala i no save mekem ol giaman fasin.” (2 Kor. 4:2) From samting ya, yumi mas mekem bes blong yumi oltaem blong tok tru long ol man. Taem yumi mekem olsem, yumi karem ona i kam long Papa blong yumi long heven mo long ol man blong hem.
[Futnot]
^ par. 6 Fasin blong lego trufala bilif mo agensem hem.
?Bambae Yu Yu Ansa Olsem Wanem?
• ?Yumi mas tok tru long hu?
• ?I minim wanem blong tok tru long ol man?
• ?Olsem wanem fasin blong tok tru i givim ona long God?
• ?Wanem ol blesing we yumi kasem taem yumi tok tru?
[Kwestin]
[Tok blong pija long pej 21]
?Olsem wanem? ?Yu yu talemaot ol smosmol mastik blong yu?
[Tok blong pija long pej 23]
?Olsem wanem? ?Yu yu tok tru taem yu askem wan wok?