Pagsulti sa Tinuod Ngadto sa Imong Silingan
Pagsulti sa Tinuod Ngadto sa Imong Silingan
“Karon nga gisalikway na ninyo ang kabakakan, magsulti sa tinuod ang matag usa kaninyo sa iyang silingan.”—EFE. 4:25.
1, 2. Unsay panglantaw sa daghang tawo bahin sa kamatuoran?
ANG kamatuoran dugay nang gilantugian sa mga tawo. Sa ikaunom nga siglo W.K.P., usa ka Gregong magbabalak nga ginganlag Alcaeus miingon: “Adunay kamatuoran diha sa bino.” Nagpasabot kana nga mabutyag lamang ang kamatuoran human ang usa ka tawo masobrahan sa bino ug tingali mas ganahan na siyang moestorya. Ang unang-siglong Romanong gobernador nga si Poncio Pilato nagpakita usab ug hiwi nga panglantaw sa kamatuoran sa dihang siya maduhaduhaong misukna kang Jesus: “Unsa bay kamatuoran?”—Juan 18:38.
2 Sa atong adlaw adunay daghang nagkasumpaking mga panglantaw bahin sa kamatuoran. Daghang tawo nag-ingon nga ang pulong “kamatuoran” adunay daghang kahulogan o nagdepende lang kini sa matag indibiduwal. Ang uban mosulti lamang sa tinuod kon makabentaha sila niini o aron masulbad dayon ang usa ka problema. Ang librong The Importance of Lying nag-ingon: “Ang pagkamatinud-anon usa tingali ka hamiling hiyas, apan dili kaayo kini makatabang sa usa diha sa iyang pagpakigbisog nga mabuhi ug makabaton ug kasegurohan. Ang tawo halos walay mahimo nianang bahina—kinahanglan siyang mamakak aron mabuhi.”
3. Nganong si Jesus usa ka maayo kaayong ehemplo sa pagsulti sa kamatuoran?
3 Kinahanglang lahi niana ang panglantaw sa mga tinun-an ni Kristo. Para kang Jesus hinungdanon ang kamatuoran. Siya kanunayng nagsulti sa kamatuoran. Bisan ang iyang mga kaaway miila niana. Sila miingon: “Magtutudlo, nahibalo kami nga ikaw matinud-anon ug nagtudlo sa dalan sa Diyos subay sa kamatuoran.” (Mat. 22:16) Sa atong adlaw usab, ang matuod nga mga Kristohanon nagsundog sa ehemplo ni Jesus. Sila dili magpanuko sa pagsulti sa kamatuoran. Sila bug-os nga miuyon kang apostol Pablo, kinsa nag-awhag sa mga isigkamagtutuo: “Karon nga gisalikway na ninyo ang kabakakan, magsulti sa tinuod ang matag usa kaninyo sa iyang silingan.” (Efe. 4:25) Atong tagdon ang tulo ka bahin sa gipamulong ni Pablo. Una, kinsa ang atong silingan? Ikaduha, unsay gipasabot sa pagsulti sa tinuod? Ug ikatulo, sa unsang paagi nato kini ikapadapat diha sa atong adlaw-adlaw nga pagkinabuhi?
Kinsa ang Atong Silingan?
4. Dili sama sa unang-siglong Hudiyong mga lider, giunsa pagbanaag ni Jesus ang panglantaw ni Jehova kon kinsa ang atong silingan?
4 Sa unang siglo K.P., ang pipila ka Hudiyong mga lider nagtudlo nga ang mga isigka-Hudiyo o ang ilang suod nga mga higala lamang ang takos tawgong “silingan.” Apan, si Jesus hingpit nga nagbanaag sa personalidad ug panghunahuna sa iyang Amahan. (Juan 14:9) Iyang gipakita sa iyang mga tinun-an nga ang Diyos walay gipaboran nga rasa o nasyonalidad. (Juan 4:5-26) Dugang pa, ang balaang espiritu nagpadayag ngadto kang apostol Pedro nga “ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” (Buh. 10:28, 34, 35) Busa, angay natong isipon ang tanang tawo nga atong silingan, nga pakitaag gugma bisan kadtong nagalutos kanato.—Mat. 5:43-45.
5. Unsay buot ipasabot sa pagsulti sa tinuod ngadto sa atong silingan?
5 Apan, unsay gipasabot ni Pablo sa dihang siya miingon nga kita angayng magsulti sa tinuod ngadto sa atong silingan? Ang pagsulti sa tinuod naglangkit sa paghatag ug tinuod nga impormasyon, nga walay pagpanglimbong. Ang matuod nga mga Kristohanon dili magtuis o maghatag ug sayop nga impormasyon aron malimbongan ang uban. Sila ‘nasilag sa daotan’ ug ‘naghawid sa maayo.’ (Roma 12:9) Ingong pagsundog sa “Diyos sa kamatuoran,” kita kinahanglang maningkamot nga magmatinud-anon sa atong sinultihan ug binuhatan. (Sal. 15:1, 2; 31:5) Kon mag-amping kita sa atong pagsulti, bisan ang makauulawng mga situwasyon mataktikanhong madumala bisag dili mamakak.—Basaha ang Colosas 3:9, 10.
6, 7. (a) Ang pagkamatinud-anon ba nagpasabot nga kinahanglang itug-an nato bisan ang personal nga mga detalye ngadto sa tanang nangutana kanato? Ipatin-aw. (b) Kinsay takos hatagan ug bug-os o kompletong tubag?
6 Ang pagkamatinud-anon ba nagpasabot nga atong itug-an ang tanang detalye niadtong nangutana kanato? Dili sa ingon niana. Samtang dinhi pa si Jesus sa yuta, iyang gipakita nga dihay mga tawo nga dili kinahanglang tubagon nga direkta o hatagag impormasyon. Sa dihang ang salingkapaw nga mga lider sa relihiyon nangutana kaniya kon pinaagi sa unsang gahom o awtoridad nga siya naghimog mga ilhanan ug mga milagro, si Jesus miingon: “Mangutana ako kaninyog usa ka pangutana. Tubaga ninyo ako, ug sultihan ko usab kamo kon pinaagi sa unsang awtoridad nga ako nagbuhat niining mga butanga.” Sa dihang wala motubag ang mga eskriba ug ang tigulang nga mga lalaki, si Jesus miingon: “Dili ko usab isulti kaninyo kon pinaagi sa unsang awtoridad nga ako nagbuhat niining mga butanga.” (Mar. 11:27-33) Iyang gibati nga dili siya obligadong motubag sa pangutana tungod sa ilang daotang mga binuhatan ug sa ilang pagkadili-matinuohon. (Mat. 12:10-13; 23:27, 28) Karon usab, ang katawhan ni Jehova kinahanglang magbantay batok sa mga apostata ug sa ubang daotang mga tawo nga naggamit ug panglingla o lipatlipat alang sa hinakog nga katuyoan.—Mat. 10:16; Efe. 4:14.
7 Gipakita usab ni Pablo nga may mga tawo nga dili takos hatagan ug bug-os o kompletong tubag. Siya miingon nga ang “mga tabian ug hilabtanon sa mga kalihokan sa ubang mga tawo” ‘nanulti sa mga butang nga dili nila angayng isulti.’ (1 Tim. 5:13) Oo, mamatikdan niadtong maukit-ukiton sa kalihokan sa uban o niadtong dili makamaong motago ug sekreto nga ang uban magpanuko sa paghatag kanilag personal nga impormasyon. Busa mas maayong sundon ang tambag ni apostol Pablo: “Himoon ninyong tumong nga magkinabuhing malinawon ug magtagad sa inyong kaugalingong kalihokan.” (1 Tes. 4:11) Apan, usahay ang mga ansiyano kinahanglang mangutana bahin sa personal nga mga butang aron matuman ang ilang katungdanan. Nianang kahimtanga, angay kitang makigkooperar sa mga ansiyano pinaagi sa pagtug-an dayon kanila sa tinuod.—1 Ped. 5:2.
Pagsulti sa Tinuod Diha sa Pamilya
8. Sa unsang paagi ang pagsulti sa tinuod motabang sa mga membro sa pamilya nga masuod sa usag usa?
8 Natural lamang nga ang atong pamilya mao ang labing suod kanato. Aron mapalig-on kini nga relasyon, kinahanglan nga kita mosulti sa tinuod ngadto sa usag usa. Mamenosan o mawala ang mga problema ug dili-pagsinabtanay kon kita matinud-anon ug malulotong makigsulti kanila. Pananglitan, kon kita masayop, magpanuko ba kita sa pag-angkon niana sa atong kapikas, sa atong mga anak, o sa ubang membro sa pamilya? Kon tininuod ang atong pagpangayog pasaylo, motunhay ang kalinaw ug panaghiusa sa pamilya.—Basaha ang 1 Pedro 3:8-10.
9. Nganong ang pagsulti sa tinuod wala magpasabot nga kita mahimong sobra ka prangka o sakit manulti?
9 Ang pagsulti sa tinuod wala magpasabot nga kita kinahanglang sobra ka prangka ug dili mataktikanhon sa atong pagpakigsulti. Kon ang usa sakit manulti, dili ganahang maminaw kaniya ang mga tawo, bisan pag tinuod ang iyang gisulti. Si Pablo nagtambag: “Isalikway ninyo ang tanang mapangdaot nga kayugot ug kasuko ug kapungot ug sininggitay ug mapasipalahong sinultihan uban sa tanang pagkadaotan. Apan magmaluloton sa usag usa, magmalumo uban ang pagkamabination, kinabubut-on nga magpasaylo sa usag usa ingon nga ang Diyos usab pinaagi kang Kristo kinabubut-on nga nagpasaylo kaninyo.” (Efe. 4:31, 32) Kon kita mosulti sa maluloton ug matinahorong paagi, ang atong kaestorya ganahang maminaw kanato ug kana nagpakitag pagtahod kaniya.—Mat. 23:12.
Pagsulti sa Tinuod Diha sa Kongregasyon
10. Unsay makat-onan sa mga ansiyano sa maayong ehemplo ni Jesus sa pagsulti sa tinuod?
10 Si Jesus nakigsulti sa iyang mga tinun-an sa simple ug matinud-anong paagi. Ang iyang tambag kanunayng inubanan sa gugma, apan dili siya magpanuko sa pagsulti sa tinuod bisan pag dili mahimuot niana ang iyang mga mamiminaw. (Juan 15:9-12) Pananglitan, sa dihang ang iyang mga tinun-an kanunayng maglalis kon kinsa ang mas labaw kanila, si Jesus determinado apan mapailobong mitabang kanila sa pagsabot sa pagkahinungdanon sa pagpaubos. (Mar. 9:33-37; Luc. 9:46-48; 22:24-27; Juan 13:14) Sa susama, bisan tuod lig-ong nagbarog dapig sa pagkamatarong, ang mga ansiyano karon dili magharihari sa panon sa Diyos. (Mar. 10:42-44) Ilang gisundog si Kristo sa pagkahimong ‘maluloton sa usag usa,’ ug “malumo uban ang pagkamabination,” sa ilang pagpakiglabot sa uban.
11. Ang gugma alang sa atong mga igsoon angayng magtukmod kanato sa pagbuhat ug unsa diha sa atong paggamit sa dila?
11 Kon naa sa lugar ang atong pagkaprangka, atong masulti sa atong mga igsoon kon unsay atong gihunahuna nga dili sila masakitan. Sa pagkatinuod, dili gayod nato gusto nga ang atong dila mahimong “binaid sama sa labaha,” nga gamiton kana sa pagsultig makapasakit nga mga pulong. (Sal. 52:2; Prov. 12:18) Ang gugma alang sa atong mga igsoon magtukmod kanato sa ‘pagbantay sa atong dila batok sa daotan, ug sa atong mga ngabil batok sa pagsulti ug panglimbong.’ (Sal. 34:13) Niining paagiha, kita nagpasidungog sa Diyos ug nagpatunhay sa panaghiusa diha sa kongregasyon.
12. Kanus-a nga ang pagpamakak nagkinahanglag hudisyal nga aksiyon? Ipatin-aw.
12 Ang mga ansiyano maningkamot sa pagpanalipod sa kongregasyon batok niadtong nagsultig mapasipalahong mga bakak. (Basaha ang Santiago 3:14-16.) Ang mapasipalahong bakak gisulti sa tuyo nga daoton ang usa ka tawo—aron siya mag-antos o maguol. Kini naglangkit ug labaw pa kay sa pagsultig ginagmay, malimbongong mga pulong o paghinobra. Siyempre, sayop ang pagpamakak, apan dili tanang kaso sa pagkadili-matinud-anon ang nagkinahanglag hudisyal nga aksiyon. Busa, ang mga ansiyano kinahanglang magpakitag pagkatimbang, pagkamakataronganon, ug maayong panghukom sa pagtino kon ang usa nga namakak nagbatasan na ba sa pagsultig tinuyo ug mapasipalahong bakak nga magkinahanglag hudisyal nga aksiyon. O basin igo na ang paghatag ug bug-at apan mahigugmaong tambag gikan sa Kasulatan.
Pagsulti sa Tinuod Diha sa Pagpanarbaho
13, 14. (a) Sa unsang paagi ang uban wala magmatinud-anon sa ilang mga amo? (b) Unsay maayong resulta sa pagkahimong matinud-anon diha sa trabahoan?
13 Kita nagkinabuhi sa panahon diin kaylap ang pagkadili-matinud-anon, busa mahimong lisod ang pagsukol sa tentasyon nga dili magmatinud-anon sa amo. Sa dihang mangaplay ug trabaho, daghan ang mamakak. Pananglitan, ila tingaling pasobraan ang impormasyon nga ilang isulat diha sa ilang résumé bahin sa ilang naagiang trabaho o edukasyon aron makakuhag mas maayong trabaho. Sa laing bahin, daghang empleyado ang nagtrabaho konohay apan nagbuhat diay ug personal nga mga butang, bisan pag supak kana sa mga lagda sa kompaniya. Sila tingali magbasa ug mga basahon nga walay kalabotan sa ilang trabaho, mohimog personal nga mga tawag sa telepono, mag-text, o mag-Internet.
14 Ang matuod nga mga Kristohanon wala maghunahuna nga opsiyonal lamang ang pagkamatinud-anon. (Basaha ang Proverbio 6:16-19.) Si Pablo miingon: “Buot namong magmaminatud-on sa tanang butang.” (Heb. 13:18) Busa, ang mga Kristohanon motrabaho sa tibuok adlaw aron takos silang modawat ug entiro adlaw nga suweldo. (Efe. 6:5-8) Ang pagkamaayong motrabaho makahatag usab ug kadayeganan sa atong langitnong Amahan. (1 Ped. 2:12) Pananglitan, si Roberto nga taga-Espanya gidayeg sa iyang amo tungod sa iyang pagkamatinud-anon ug pagkakugihan. Tungod sa maayong panggawi ni Roberto, ang kompaniya nagpasulod pa ug ubang mga Saksi. Sila usab maoy maayong mga trabahante. Latas sa katuigan, si Roberto nakapasulod ug 23 ka brader ug 8 ka lalaki nga ginatun-an sa Bibliya!
15. Sa unsang paagi ipakita sa usa ka Kristohanong negosyante nga siya nagsulti sa tinuod?
15 Kon kita nanarbaho nga walay amo, kita ba matinud-anon sa atong mga kasabotan sa negosyo, o mapakyas usahay sa pagsulti sa tinuod ngadto sa atong silingan? Dili angayng pasobrahan sa usa ka Kristohanong negosyante ang impormasyon bahin sa iyang produkto o serbisyo aron lang makahalin dayon; ni mohatag o modawat siya ug hiphip. Gusto natong trataron ang uban sama sa gusto natong ipakita nila kanato.—Prov. 11:1; Luc. 6:31.
Pagsulti sa Tinuod Ngadto sa mga Awtoridad
16. Unsay ihatag sa mga Kristohanon ngadto (a) sa mga awtoridad sa kagamhanan? (b) kang Jehova?
16 Si Jesus miingon: “Busa, ibayad ninyo kang Cesar ang mga butang ni Cesar, apan ang mga butang sa Diyos ngadto sa Diyos.” (Mat. 22:21) Unsang matanga sa “mga butang” ang utang nato kang Cesar, sa ato pa, sa mga awtoridad sa kagamhanan? Sa dihang gipamulong kini ni Jesus, ang ilang gihisgotan mao ang buhis. Busa aron mahuptan ang hinlong konsensiya atubangan sa Diyos ug sa mga tawo, ang mga Kristohanon motuman sa sekular nga mga balaod, lakip na niadtong maylabot sa pagbayad ug mga buhis. (Roma 13:5, 6) Apan atong giila nga si Jehova mao ang Supremong Soberano, ang bugtong matuod nga Diyos, nga atong gihigugma sa tibuok natong kasingkasing, kalag, hunahuna, ug kusog. (Mar. 12:30; Pin. 4:11) Busa kinahanglang ihatag nato kang Jehova nga Diyos ang bug-os nga pagpasakop.—Basaha ang Salmo 86:11, 12.
17. Unsay panglantaw sa katawhan ni Jehova sa pagdawat ug hinabang gikan sa gobyerno?
17 Daghang nasod ang nagtanyag ug programa o mga serbisyo nga maghatag ug materyal nga tabang ngadto sa nanginahanglan. Walay daotan kon ang usa ka Kristohanon modawat niana nga tabang—basta siya kuwalipikado niana. Ang pagsulti sa tinuod ngadto sa atong silingan nagpasabot nga kita dili mohatag ug bakak o malimbongong impormasyon ngadto sa mga awtoridad sa kagamhanan aron lang makadawat ug hinabang.
Mga Panalangin sa Pagkahimong Matinud-anon
18-20. Unsang mga panalangin ang moresulta sa pagkahimong matinud-anon ngadto sa atong silingan?
18 Daghan ang mga panalangin sa pagkahimong matinud-anon. Atong mahuptan ang hinlong konsensiya, nga maghatag kanatog kalipay ug kalinaw sa hunahuna. (Prov. 14:30; Filip. 4:6, 7) Ang pagbaton ug hinlong konsensiya bililhon kaayo sa mata sa Diyos. Dugang pa, kon kita matinud-anon sa tanang butang, kita dili angayng mabalaka nga masakpan o mayagyag ang atong binuhatan.—1 Tim. 5:24.
19 Tagda ang laing panalangin. Si Pablo miingon: “Sa tanang paagi among ginarekomendar ang among kaugalingon nga mga ministro sa Diyos, pinaagi . . . sa matinud-anong sinultihan.” (2 Cor. 6:4, 7) Mao kini nahitabo sa usa ka Saksi nga nagpuyo sa Britanya. Kay gusto niyang ibaligya ang usa ka awto, iyang gisulti sa pumapalit ang tanang maayo ug dili maayong impormasyon bahin niana, lakip na kadtong dili makita. Human nila masulayi pagpadagan ang awto, ang pumapalit nangutana sa igsoon kon siya usa ba ka Saksi ni Jehova. Nganong nakaingon man siya niana? Namatikdan sa tawo ang pagkamatinud-anon sa igsoon maingon man ang kahapsay sa iyang pamesti. Misangpot kana sa paghatag ug maayong pamatuod.
20 Kita ba usab naghatag ug kadayeganan sa atong Maglalalang pinaagi sa atong pagkamatinud-anon? Si Pablo miingon: “Kami mibiya na sa sinuwitik nga mga butang nga angayng ikaulaw, nga wala magalakaw pinaagig lipatlipat.” (2 Cor. 4:2) Busa, maningkamot gayod kita sa pagsulti sa tinuod ngadto sa atong silingan. Sa pagbuhat niini, kita makahatag ug kadayeganan sa atong langitnong Amahan ug sa iyang katawhan.
Unsay Imong Tubag?
• Kinsa ang atong silingan?
• Unsay buot ipasabot sa pagsulti sa tinuod ngadto sa atong silingan?
• Sa unsang paagi ang pagkahimong matinud-anon maghatag ug kadayeganan sa Diyos?
• Unsang mga panalangin ang moresulta sa pagkahimong matinud-anon?
[Mga Pangutana sa Pagtuon]
[Hulagway sa panid 17]
Dali ka bang modawat sa ginagmayng mga sayop?
[Hulagway sa panid 18]
Mosulti ka ba sa tinuod sa dihang mangaplay ug trabaho?