Koz laverite avek ou prosen
Koz laverite avek ou prosen
“Alor pour sa rezon rezet mansonz! Sakenn i devre koz laverite avek son prosen.”—EFE. 4:25.
1, 2. Ki mannyer bokou dimoun i konsider laverite?
LAVERITE i en size ki dimoun in debat lo la pour plizyer lannen. Dan sizyenm syek A.N.L., en poet Grek Alcaeus ti dir: “I annan laverite dan diven.” Sa poet ti oule dir ki en dimoun i pli pare pour koze e dir laverite selman apre ki i’n bwar tro bokou diven. Pons Pilat en Gouverner Romen dan premye syek ti montre ki li osi i ti annan en move pwennvi lo laverite ler i ti demann Zezi dan en zar pe boufonnen: “Ki si sa laverite?”—Zan 18:38.
2 Denozour dimoun i annan diferan pwennvi lo laverite. En kantite dimoun i dir ki i annan diferan kalite definisyon pour sa mo “laverite” oubyen son definisyon i diferan pour sak dimoun. Lezot dimoun i koz laverite zis ler i dan zot zentere oubyen ler i apropriye pour zot. Sa liv The Importance of Lying i dir: “Lonnekte i kapab en bon prensip, me i napa bokou valer dan sa lavi kot dimoun i lalit ant lavi ek lanmor pour sirviv e pour santi zot an sekirite. Zonm napa bokou swa dan sa sityasyon, i bezwen koz manti pour viv.”
3. Konsernan koz laverite, akoz Zezi ti en legzanp remarkab?
3 Pa i vreman diferan pour bann disip Kris! Zezi pa ti konsider laverite parey sa bann dimoun ki nou’n mansyonnen o konmansman. I ti toultan koz laverite. Menm son bann lennmi ti admet: “Met, nou konnen ki ou fran e ki ou ansenny semen Bondye dan laverite.” (Mat. 22:16) Pareyman, ozordi bann vre Kretyen i imit legzanp Zezi. Zot pa ezite pour koz laverite. Zot toutafe dakor avek zapot Pol ki ti konsey son bann frer ek ser Kretyen pour ‘rezet mansonz. Sakenn i devre koz laverite avek son prosen.’ (Efe. 4:25) Annou konsider trwa laspe dan sa ki Pol ti dir. Premyerman, lekel nou prosen? Dezyenmman, ki i vedir pour koz laverite? Trwazyenmman, ki mannyer nou kapab aplik sa konsey dan nou lavi tou le zour?
Lekel nou prosen?
4. Kontrerman avek bann sef Zwif dan premye syek, ki mannyer Zezi ti reflekte pwennvi Zeova konsernan lekel ki nou prosen?
4 Dan premye syek N.L., serten sef Zwif ti ansennyen ki zis bann Zwif parey zot oubyen zot zanmi pros ki ti merit ganny apele ‘prosen.’ Me Zezi ti reflekte parfetman personnalite son papa e i ti vwar keksoz parey li. (Zan 14:9) I enportan pour rapel, ki i ti montre son bann disip ki Bondye pa fer lapliferans pour en nasyon oubyen ras plis ki en lot. (Zan 4:5-26) Deplis lespri sen ti revel avek zapot Pyer ki “Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.” (Akt 10:28, 34, 35) Alor nou devret konsider tou dimoun konman nou prosen, e kontan menm bann ki azir konman nou lennmi.—Mat. 5:43-45.
5. Ki i vedir pour koz laverite avek nou prosen?
5 Me ki Pol ti oule fer resorti ler i ti dir ki nou devret koz laverite avek nou prosen? Koz laverite i enplik dir en lenformasyon ki egzakt san kasyet nanryen. Bann vre Kretyen pa deform oubyen dir bann lenformasyon ki pa egzakt pour tronp lezot. Zot “deteste sa ki mal e reste atase avek sa ki byen.” (Rom. 12:9) Parey “Zeova sa Bondye laverite,” nou devret fer bokou zefor pour azir dan en fason onnet e fran dan tou sa ki nou fer e dir. (Ps. 15:1, 2; 31:5) Ler nou byen swazir nou parol, menm bann sityasyon anbarasan oubyen enkonfortab i kapab ganny rezourd avek bon zizman san ki nou bezwen tronp lezot.—Lir Kolosyen 3:9, 10.
6, 7. (a) Eski koz laverite i vedir ki nou bezwen devwal bann detay personnel avek nenport dimoun ki kestyonn nou? Eksplike. (b) Lekel ki merit nou konfyans ek larepons konplet?
6 Eski koz laverite avek lezot i vedir ki nou bezwen rakont an detay tou keksoz avek nenport dimoun ki demann nou en kestyon? Pa neseserman. Ler i ti lo later, Zezi ti demontre ki nou pa merit donn en larepons direk oubyen serten lenformasyon avek serten dimoun. Ler bann sef relizye ipokrit ti demann li par ki pouvwar oubyen lotorite i ti fer bann siny ek mirak, Zezi ti dir: “Mon pou demann zot zis en kestyon e si zot reponn mwan, mon ava dir zot par ki lotorite mon fer sa bann keksoz.” Ler sa bann profeser Lalwa ek bann ansyen pa ti oule reponn, Zezi ti dir: “Mwan osi mon pa pou dir zot par ki lotorite mon fer sa bann keksoz.” (Mark 11:27-33) I pa ti santi li oblize pour reponn sa kestyon vi ki zot ti pe fer bann move keksoz e zot ti napa lafwa. (Mat. 12:10-13; 23:27, 28) Pareyman ozordi, pep Zeova i bezwen veye pour pa tonm dan pyez bann aposta ek lezot move dimoun ki servi trik oubyen riz pour zot prop dezir egois.—Mat. 10:16; Efe. 4:14.
7 Pol ti osi fer resorti ki pa tou dimoun ki merit en larepons konplet. I ti dir ki bann dimoun ki fer “bavardaz, zot endiskre, e koz keksoz ki zot pa devre koze.” (1 Tim. 5:13) Wi, bann dimoun ki mel dan zafer lezot oubyen ki nou pa kapab fer zot konfyans pour gard lenformasyon konfidansyel i kapab santi ki lezot pa anvi partaz okenn lenformasyon personnel avek zot. Pa i pli meyer pour swiv konsey Pol: “Fer tou pour viv an-pe, okip zot avek zot prop zafer.” (1 Tesa. 4:11) Me petet, parfwa bann ansyen dan kongregasyon i bezwen demann kestyon konsernan bann keksoz personnel pour kapab desarz zot responsabilite. Dan en ka koumsa, zot pou byen apresye ki nou korpere pour dir laverite e sa pou ed zot en kantite.—1 Pyer 5:2.
Koz laverite dan fanmir
8. Ki mannyer ler bann manm fanmir i koz laverite antre zot, zot vin pli pros avek kanmarad?
8 Normalman nou pli atase avek nou fanmir. Pour ranforsi sa lyen, i vreman enportan ki nou koz laverite avek kanmarad. En kantite problenm ek mal konprenezon i kapab diminyen oubyen disparet si nou koz fran, dan en fason onnet e dan en fason agreab. Par egzanp, ler nou fer en fot, eski nou ezite pour admet nou fot avek nou konzwen, zanfan oubyen lezot manm nou fanmir? Par senserman demann leskiz, sa i ede promot lape ek linite dan fanmir.—Lir 1 Pyer 3:8-10.
9. Akoz menm ler nou pe dir laverite napa okenn rezon pour koz brit e sek avek lezot?
9 I pa vedir ki ler nou koz laverite nou devret koz dan en fason brit e sek avek lezot. Ler nou koz dan en fason brit sa pa ogmant valer sa ki nou pe dir, ni fer li annan plis lefe. Pol ti dir: “Debaras zot avek tou move santiman, tou iritasyon, tou lakoler. Fer disparet tou kriye ek lensilt. Evite annan okenn santiman mesanste. Okontrer vin bon, ranpli avek lafeksyon pour kanmarad; e pardonn kanmarad, parey Bondye in pardonn zot dan Kris.” (Efe. 4:31, 32) Ler nou koz dan en bon fason e dan en fason respektab, sa pou fer sa ki nou pe dir annan valer e nou demontre respe pour bann dimoun ki nou koz avek.—Mat. 23:12.
Koz laverite dan kongregasyon
10. Ki bann ansyen i kapab aprann avek bon legzanp ki Zezi in kite konsernan koz laverite?
10 Zezi ti koz avek son bann disip dan en fason senp e fran. I ti touzour donn konsey avek lanmour, me i pa ti sanz son mesaz zis pour li pa ofans bann dimoun ki ti pe ekout li. (Zan 15:9-12) Par egzanp, kan son bann zapot ti kontinyelman argimante lo lekel ki ti pli enportan parmi zot, dan en fason ferm me avek pasyans Zezi ti ed zot konpran sa nesesite pour annan limilite. (Mark 9:33-37; Lik 9:46-48; 22:24-27; Zan 13:14) Pareyman, bann ansyen ozordi ki reste ferm pour sa ki drwat, pa konmann troupo Bondye. (Mark 10:42-44) Zot imit Kris dan lafason ki zot azir anver lezot par “vin bon [e] ranpli avek lafeksyon pour kanmarad.”
11. Ki mannyer lanmour pour nou bann frer ek ser i devret pous nou pour servi nou lalang?
11 Ler nou koz fran avek nou bann frer ek ser, me pa dan en fason tro fran, nou kapab eksprim sa ki nou panse san ofans zot. Anfet, nou pa ti pou zanmen anvi ki nou lalang i “koupe parey en razwar,” par servi li pour dir bann parol blesan oubyen parol ki abes lezot. (Ps. 52:2; Prov. 12:18) Lanmour pour nou bann frer ek ser pou pous nou pour “protez [nou] lalang kont sa ki move, [nou] lalev kont dir keksoz pour anbet lezot.” (Ps. 34:13) Dan sa fason nou pou onor Bondye e promot linite dan kongregasyon.
12. Kan ki en dimoun ki’n koz lalang i merit pas devan konmite disiplin? Eksplike.
12 Bann ansyen i travay dir pour protez kongregasyon kont bann dimoun ki koz lalang avek move lentansyon. (Lir Zak 3:14-16.) En dimoun ki koz lalang avek lentansyon pour fer ditor en lot dimoun, i fer li avek sa bi pour fer sa dimoun soufer dan en serten fason. Sa i enplik plis ki zis fer bann remark ki pa toutafe vre oubyen ki egzazere lo en size ki pa enportan. Byensir, i mal pour koz nenport kalite mansonz, me pa dan tou ka kot en dimoun i koz lalang ki i bezwen pas devan konmite disiplin. Alors bann ansyen i bezwen rezonnab, annan balans, e bon zizman ler zot pe verifye si en dimoun ki’n koz manti i devret pas devan en komite disiplin akoz i abitye koz manti par ekspre e avek move lentansyon. Oubyen eski en konsey ferm ranpli avek lanmour baze lo Labib pou sifi?
Koz laverite dan biznes
13, 14. (a) Ki mannyer serten dimoun i koz manti avek zot anplwayer? (b) Ki bon rezilta nou kapab gannyen ler nou onnet e koz laverite dan travay?
13 Nou pe viv dan en letan kot dimoun i souvan malonnet, alor petet i kapab difisil pour reziste sa tantasyon pour onnet avek en anplwayer. En kantite dimoun pa kanmi pour koz manti ler zot pe fer laplikasyon pour en plas travay. Par egzanp, zot kapab azout bann lenformasyon an plis konsernan leksperyans oubyen nivo ledikasyon ki zot annan zis pour zot kapab ganny en pli bon plas travay oubyen en travay avek en pli bon lapey. De lot kote, en kantite travayer i dir ki zot pe travay, kan an realite zot pe aktyelman fer zot keksoz personnel, menm si sa i kont polisi zot lakonpannyen. Petet zot pe lir bann keksoz ki napa nanryen pour fer avek zot travay, fer bann kol telefonn personnel, anvoy bann mesaz oubyen get lenformasyon lo Internet.
14 Bann vre Kretyen pa konsider demontre lonnekte oubyen koz laverite zis konman en opsyon me plito konman en lobligasyon. (Lir Proverb 6:16-19.) Pol ti dir: “Nou oule fer sa ki byen [oubyen azir avek “lonnekte,” NW] dan tou sirkonstans.” (Ebr. 13:18). Alor, bann vre Kretyen i bezwen travay pour zot anplwayer en lazournen konplet pour ganny en lapey konplet. (Efe. 6:5-8) Ler nou en travayer konsyansye, sa i kapab osi anmenn loner lo nou Papa ki dan lesyel. (1 Pyer 2:12) Par egzanp, anplwayer Roberto ki viv Lespanny, ti felisit li akoz i en travayer onnet e responsab. Akoz bon kondwit Roberto, sa lakonpannyen ti ofer plas travay avek lezot Temwen. Sa bann Temwen ti montre ki zot osi zot bann bon travayer. Diran sa bann lannen ki’n pase Roberto in nobou rod louvraz pour 23 frer e 8 etidyan Labib.
15. Ki en Kretyen ki en biznesmenn i devret fer pour montre ki i koz laverite?
15 Si nou travay pour nou menm, eski nou onnet dan bann tranzaksyon biznes ki nou fer oubyen eski defwa nou koz manti avek lezot? En Kretyen ki en biznesmenn pa devret donn bann fo lenformasyon lo en prodwi oubyen servis zis pour vann li pli vit; i pa devret ni menm ofer oubyen aksepte gous. Nou anvi tret lezot parey nou ti pou kontan lezot i tret nou.—Prov. 11:1; Lik 6:31.
Koz laverite avek bann lotorite ki pe gouvernen
16. Ki bann Kretyen i bezwen rann (a) bann lotorite ki pe gouvernen? (b) Zeova?
16 Zezi ti dir: “Rann Sezar sa ki pour Sezar e rann Bondye sa ki pour Bondye.” (Mat. 22:21) Ki nou drwa Sezar, setadir bann lotorite ki pe gouvernen? Kan Zezi ti dir sa bann parol i ti pe diskit konsernan taks. Alor pour gard en bon konsyans devan Bondye ek zonm, bann Kretyen i obeir bann lalwa dan zot pei, enkli bann lalwa ki demann zot pour pey taks. (Rom. 13:5, 6) Me nou rekonnet ki Zeova i sa enn ki pli siperyer dan liniver, sa sel vre Bondye, ki nou kontan avek tou nou leker, nou nanm, nou lespri, e lafors. (Mark 12:30; Rev. 4:11) I pour sa rezon ki nou totalman soumet avek Zeova.—Lir Psonm 86:11, 12.
17. Ki pwennvi pep Zeova konsernan led finansyel ki gouvernman i donnen?
17 En kantite pei i ofer led sosyal oubyen servis pour ed bann dimoun ki dan bezwen lo kote materyel. Si en Kretyen i dan bezwen napa nanryen mal pour li ganny sa kalite led. Ler nou koz laverite avek nou prosen nou pa donn fo lenformasyon oubyen kasyet lenformasyon avek bann dimoun dan gouvernman zis pour ganny led finansyel avek zot.
Byenfe ki nou gannyen ler nou koz laverite
18-20. Ki byenfe nou gannyen ler nou koz laverite avek nou prosen?
18 Nou ganny en kantite byenfe ler nou koz laverite. Nou gard en konsyans kler ki donn nou lape lespri ek en leker kalm. (Prov. 14:30; Fili. 4:6, 7) En konsyans kler i annan en gran valer devan lizye Bondye. Alor, kan nou toultan koz laverite nou pa pou bezwen enkyet ki lezot i dekouver oubyen devwal sa ki nou dir.—1 Tim. 5:24.
19 Annou egzamin en lot byenfe. Pol ti dir: “Fer tou nou posib pour viv konman bann serviter Bondye . . . par parol laverite.” (2 Kor. 6:4, 7) Sanmenm sa ki en Temwen ki pe viv Langleter ti eksperyanse. I ti pe esey vann en loto avek en dimoun ki ti enterese. I ti eksplik sa dimoun tou sa ki ti bon e sa ki pa ti bon avek sa loto, enkli bann keksoz ki sa dimoun pa ti kapab vwar. Apre ki sa dimoun ti dray sa loto pour teste li, i ti demann sa frer si i ti en Temwen Zeova. Kwa ki ti fer li tonm lo sa konklizyon? Sa zonm ti remarke ki sa frer ti onnet e i ti’n byen sanze. Sa konversasyon ti permet sa frer pour donn sa zonm en bon temwannyaz.
20 Eski nou osi nou anmenn loner lo nou Kreater par toultan azir dan en fason onnet e koz laverite? Pol ti dir: “Nou’n fini rezet tou sa bann keksoz, ki fer onte e ki fer dan kasyet.” (2 Kor. 4:2) Alor annou fer tou nou posib pour koz laverite avek nou prosen. Par fer sa, nou pou rann glwar nou Papa ki dan lesyel ek son pep.
Ki ou pou reponn?
• Lekel nou prosen?
• Ki i vedir pour koz laverite avek nou prosen?
• Ki mannyer ler nou koz laverite sa i kapab rann glwar Bondye?
• Ki byenfe nou gannyen ler nou koz laverite?
[Kestyon]
[Portre lo paz 23]
Eski ou fasilman rekonnet ou bann defo, menm ou bann pti defo?
[Portre lo paz 24]
Eski ou koz laverite ler ou pe fer laplikasyon pour en travay?