I Ṭhenawm Hnenah Thu Dik Tak Sawi Rawh
I Ṭhenawm Hnenah Thu Dik Tak Sawi Rawh
“Dâwt sawi bânin, mahni ṭhenawm hnênah thu dik tak sawi ṭheuh rawh u.”—EPH. 4:25.
1, 2. Engtin nge mi tam takin thu dik chu an thlîr?
HUN REI tawh tak aṭangin mite chu thu dik chungchângah an lo inhnial tawh ṭhîn a. B.C.E. kum zabi ruknaah Grik hla phuah thiam Alcaeus-a chuan: “Uain-ah thu dik a awm,” a ti a. A sawi awmzia chu miin uain a ruih a, ṭawng nuam a tih hnuah chauh thu dik a sawi chhuak ṭhîn a tihna a ni. Kum zabi khatnaa Rom Ram Awptu Pontia Pilata pawhin Isua hnêna thu dik, a nih loh leh “Thutak engnge ni?” tia deusawh taka a zawh khân, thu dik chungchânga thlîr dân dik lo a neih chu a tilang a ni.—Joh. 18:38.
2 Kan hunah pawh hian thu dik chungchângah ngaih dân hrang a tam hle a. Mi tam tak chuan “thu dik” tih thu mal hian awmze hrang hrang a nei an ti a, a tehtu teh dân a zir a ni an ti bawk. Mi dangte chuan mahni tâna a remchân hun emaw, harsatna chinfel theihna a nih dâwn hun emaw chauhvah thu dik an sawi ṭhîn. The Importance of Lying tih lehkhabu chuan: “Rinawmna chu thil duhawm tak a ni ngei mai; mahse, chu chuan ei leh bâr, leh sum leh pai hmuh nâna thifahnukchata thawhna hmunah hian hlutna a nei mang meuh lo. He mi chungchângah hian miin duh a thlang thei lo—nun a duh chuan dâwt a sawi a ngai tlat,” a ti.
3. Engvângin nge Isua chu thu dik sawi kawngah entawn tûr langsâr tak a nih?
3 Mahse, Krista zirtîrte tân chuan a va dang lam tak êm! Isua thu dik thlîr dân chu chutianga ngaih ruat thil mai a ni lo. Englai pawhin thu dik chu a sawi reng ṭhîn a. A hmêlmate pawhin: “Zirtîrtu, mi dik tak i ni a, tih tak zetin Pathian kawng thu i zirtîr ṭhîn,” tiin an sawi hial a ni. (Mt. 22:16) Chutiang bawkin tûn laia Kristian dikte chuan Isua chu an entawn a. Thu dik sawi chu an tîm lo. “Dâwt sawi bânin, mahni ṭhenawm hnênah thu dik tak sawi ṭheuh rawh u,” tia tirhkoh Paula’n a unaute hnêna a fuihna chu an pawmpui thlap a ni. (Eph. 4:25) Hêng Paula thute hi kawng thumin ilo chhût chiang ang u. A hmasain, tute nge kan ṭhenawmte chu? A dawtah, thu dik sawi tih awmzia chu eng nge ni? A tâwp berah, engtin nge chu chu kan nî tin nunah kan nunpui theih? tihte chu.
Tute Nge Kan Ṭhenawmte Chu?
4. Kum zabi khatnaa Juda hruaitute ang lo takin, engtin nge Isua chuan kan ṭhenawmte chu tute nge ni tih chungchânga Pathian Jehova thlîr dân chu a târ lan?
4 C.E. kum zabi khatnaah, Juda hruaitu ṭhenkhatte chuan an Judapuite emaw, an ṭhian hnaite emaw chauh chu “ṭhenawm” tia koh phu niin an zirtîr a. Amaherawhchu, Isua chuan a Pa mizia leh ngaihtuahna chu sawisêl bovin a târ lang a ni. (Joh. 14:9) A zirtîrte hnêna Pathianin hnam emaw, chi emaw duhsak bîk a neih lohzia a hmuhtîr chu chhinchhiah tlâk tak a ni. (Joh. 4:5-26) Chu bâkah, thlarau thianghlim pawhin tirhkoh Petera hnênah “Pathianin mi duhsak bîk a nei lo . . . nimahsela, hnam tin zîngah tupawh amah ṭiha fel taka ti apiang a lâwmzâwng mi an ni ṭhîn,” tih a hrilh a ni. (Tirh. 10:28, 34, 35) Chuvângin, mi zawng zawng chu kan ṭhenawmte angin kan thlîrin, min hawtute hial pawh kan hmangaih tûr a ni.—Mt. 5:43-45.
5. Ṭhenawmte hnêna thu dik tak sawi tih awmzia chu eng nge ni?
5 A nih leh, Paula’n kan ṭhenawmte hnênah thu dik kan sawi tûr a ni a tih awmzia chu eng nge ni? Thu dik sawi tih chu chanchin dik tak, dâwt tel lo inhrilh tihna a ni. Kristian dikte chuan mi dangte bum nân thu dik chu an vei herh lo va, dik lo takin an hrilhfiah bawk lo. ‘Sual lam chu an hua a, ṭha lam chu an pawm tlat a ni.’ (Rom 12:9) Thu dik, a nih loh leh “thutak Pathian” chu entawnin, kan thiltih apianga rinawm leh thu dik tak sawi ziah chu kan tum tlat tûr a ni. (Sâm 15:1, 2; 31:5) Dinhmun zahthlâk emaw, nuam lo deuh emawah pawh ṭawngkam hman tûr ṭha taka kan thlan chuan dâwt sawi ngai lovin, dinhmun chu thiam takin kan tiveng thei a ni.—Kolossa 3:9, 10 chhiar rawh.
6, 7. (a) Mi dangte hnêna thu dik sawi tih hian zawhna min zâwttu apiangte hnênah thil kimchang taka hrilh kher tûr tihna a ni em? Hrilhfiah rawh. (b) Tute’n nge thu dik kan hrilh phu?
6 Mi dangte hnêna thu dik sawi tih hian zawhna min zâwttu apiangte hnênah thil kimchang taka hrilh kher tûr tihna a ni em? Ni kher lo. Isua leia a awm lai khân, mi ṭhenkhat chuan chhânna emaw, chanchin ṭhenkhat emaw hrilhhriat an phu lo tih a târ lang a. Sakhaw hruaitu vervêk takte’n chhinchhiahna leh thilmak a tihte chu tu thua ti nge a nih an zawh chuan, Isua’n: “Kei pawhin thu kam khat ka zâwt ve ang che u; mi chhâng ula, tichuan tu thuin nge hêng thil hi ka tih ka hrilh ang che u,” a ti a. Lehkhaziaktute leh upahote’n an chhân duh loh tâkah chuan, Isua pawhin: “Kei pawhin tu thuin nge hêng thil hi ka tih ka hrilh bîk lo vang che u,” a ti. (Mk. 11:27-33) An thil chîn tenawm takte leh an rinna neih lohnate avângin an zawhna chu chhân ngai a ti kher lo a ni. (Mt. 12:10-13; 23:27, 28) Chutiang bawkin tûn laiah pawh, Jehova mite tân mahni hmasialna avânga fing vervêk taka thil ti, kalpêngte leh mi suaksual dangte laka invên a ngai a ni.—Mt. 10:16; Eph. 4:14.
7 Chutiang bawkin, Paula chuan mi ṭhenkhatin thu kimchang tak hrilh an phu lo tih a târ lang a. Ani chuan chûng “kamtam leh mite thiltih rêlsak” chîng mite chuan “thusawi loh tûr sawi” an chîng ṭhîn a ti. (1 Tim. 5:13) Ni e, mite thiltih rêlsak chîng mite emaw, thurûk vawng thei lo mite emaw chu mi dangte’n thil hrilh an hreh ṭhîn a ni. Thlarauva thâwk khuma Paula fuihna: “Mahni hna ṭheuh nei tlatin mahni kut ngei hmangin hna thawk rawh u,” tih thu zawm chu a ṭha zâwk fê a ni. (1 Thes. 4:11) Mahse, a châng chuan kohhran upate chuan an hna an thawh theih nân mi mal thilte pawh an zawh a ngai mai thei a. Chutiang hunah chuan thu dik tak hrilha kan thawhpuina chu a hlu hlein, anmahni ṭanpuitu ṭha tak a ni.—1 Pet. 5:2.
In Chhûngkhurah Thu Dik Sawi Rawh
8. Engtin nge thu dik sawina chuan chhûngkuaa mite a inhnaihtîr?
8 A tlângpui thuin, chhûngkaw mite hi kan hnaih berte an ni a. Chhûngkua kan inlungrual theih nân, thu dik kan inhrilh tawn chu a pawimawh a ni. Inhawng tak, rinawm tak, leh ngilnei taka kan incheibâwl tawn chuan harsatna leh inhriatthiam lohna tam tak chu a tihtlêm emaw, a tihbo emaw theih a ni. Entîr nân, thil kan tihsual palhin, kan kawppuite, kan fate, a nih loh leh chhûngkuaa mi dangte hmaah kan thiltih sual chu pawm kan hreh em? Thinlung taka ngaihdam dîlna chuan chhûngkuaah remna leh inlungrualna a awmtîr a ni.—1 Petera 3:8-10 chhiar rawh.
9. Engvângin nge thu dik kan sawi avâng maiin mi hawihhâwm lo tak kan nih kher a ngaih loh?
9 Mi a hawihhâwm loh chuan thu dik a sawi pawhin miin a thusawi an hlut ṭhîn lo. Paula chuan: “Khâkna te, thinurna te, tauhna te, ânna te, sawichhiatna te zawng zawng chu bânsanin awm rawh se, sualna zawng zawng nên. Tin, inkhawngaih tawna lainatna neiin awm ula, Pathianin Kristaa a ngaidam che u ang bawkin inngaidam tawn rawh u,” tiin a sawi. (Eph. 4:31, 32) Khawngaihna nêna zaidawh taka thu kan sawi chuan chu chuan kan thusawi chu a timawiin, kan mi biakte a chawimawi bawk a ni.—Mt. 23:12.
Kohhran Thilah Thu Dik Sawi Rawh
10. Thu dik sawi kawnga Isua entawn tûr ṭha chungchuang siam aṭangin Kristian upate’n eng nge an zir theih?
10 Isua chuan a zirtîrte chu tluangtlam tak, tlang tak siin a be ṭhîn a. Zilhna chu ngaithlatute tihthinrim a hlauh avânga thu dik thup ni chuang si lovin, hmangaihna nei takin a pe ṭhîn a ni. (Joh. 15:9-12) Entîr nân, a tirhkohte chu an zîngah tunge ropui ber ang tih chungchângah an inhnial chhên a. Isua chuan khauh tak leh dawhthei tak bawk siin, inngaihtlâwmna neih a ṭûlzia hre thiam tûrin anni chu a ṭanpui a ni. (Mk. 9:33-37; Lk. 9:46-48; 22:24-27; Joh. 13:14) Chutiang bawkin, tûn laia Kristian upate chu felna atâna an ngheh rualin, Pathian berâmte chungah an in tilal lo. (Mk. 10:42-44) Anni chuan mi dangte chu ‘khawngaihna’ leh ‘lainatna neia’ cheibâwlin Krista an entawn a ni.
11. Kan unaute hmangaihna chuan kan lei hman dânah eng ti tûrin nge min chêttîr ang?
11 Kan unaute hnêna thu dik tak; mahse, tlang lutuk si lo va kan sawi chuan anmahni tithinur si lovin, kan rilru ang tak chu kan sawi chhuak thei a ni. Kan lei chu “bakmeh chêm hriam tak” anga ṭawngkam chhia nêna mite tihnat nâna hman chu kan duh lo ngei mai. (Sâm 52:2; Thuf. 12:18) Kan unaute hmangaihna chuan kan ‘lei chu sual lakah vêng ṭha a, kan hmui chu tihderna thu sawi lo tûrin min vên ṭhattîr ang.’ (Sâm 34:13) Chutiang chuan, Pathian kan chawimawiin, kohhranah remna kan awmtîr a ni.
12. Eng hunah nge dâwt sawi chu dân anga hrem a ngaih? Hrilhfiah rawh.
12 Upate chuan dâwt huatthlala tak sawitute lak aṭanga kohhran vênghim tûrin an thawk rim hle a. (Jakoba 3:14-16 chhiar rawh.) Dâwt huatthlala tak chu mi tuemaw tihnat tum rân chunga sawi a ni a, a tum taka chu kawng engemaw taka mi hrehawm tawrhtîr emaw, lungngaihna tawntîr emaw a ni. Dâwt huatthlala tak chu thil a nih dân tûr aia sawi uar emaw, mite ngaih sual theih tûrzâwnga sawi emaw mai a ni lo. Dâwt sawi hrim hrim chu a dik lo ngei mai; mahse, thu dik lo sawi apiangte chungchâng ngaihtuah tûra upate an ṭhutkhâwm ziah a ngai kher lo. Chuvângin, upate chuan miin thu dik lo a sawi chu a tum rêng vâng leh dâwt huatthlala tak, dân anga hrem ṭûl a nih leh nih loh an ngaihtuah hunah inbûk tâwkna, a âwm tâwk hriatna, leh ngaihruat thiamna an hman a ngai bawk a ni. A nih loh leh Bible aṭanga fuihna khauh tak, hmangaihna nei tak sia pêk chu a tâwk mai em?
Sumdâwnnaah Thu Dik Sawi Rawh
13, 14. (a) Engtin nge mi ṭhenkhatin an hnathawhna pute lakah thu dik lo an sawi? (b) Hnathawhnaa rinawm leh thu dik sawina chuan eng rah ṭha nge a chhuah theih?
13 Rinawm lohna hluar êm êm huna khawsa kan nih avângin, hnathawka min ruaitu chunga rinawm lo tûra thlêmna chu do a harsa hle thei a ni. Mi tam tak chuan hna an dîlin dâwt hulhual an sawi ṭhîn a. Entîr nân, hna ṭha zâwk emaw, hlawh sâng zâwk emaw an hmuh theih nân an thiltawn leh zirna te chu a nihna bâkin an sawi thei a. Tin, hnathawktu tam tak chu an hnathawhna company dân kalhin, mahni thil an tih laiin hnathawk angin an inchhâl ṭhîn. An hna nêna inkûngkaih lo thilte chhiarin, mi mal tâna phone-te hmangin, leh SMS leh E-mail te hmangin thute an thawn kual thei a, a nih loh leh Internet an en kual te a ni thei bawk.
14 Kristian dikte chuan rinawmna leh dikna chu duh thlan theih thil engemaw angin an thlîr lo. (Thufingte 6:16-19 chhiar rawh.) Paula chuan: “Engkimah dik taka awm kan duh,” a ti a. (Heb. 13:18, NW) Chuvângin, Kristiante chuan ni khat hlawh a puma hmu tûrin nilêngin hna an thawk a ni. (Eph. 6:5-8) Taima taka hna tawktu chuan kan Pa vâna mi chawimawina a thlen thei bawk. (1 Pet. 2:12) Entîr nân, Spain rama Roberto-a chu a rinawmna leh a hnathawhnaa a rin tlâk avângin a puin a fak hle a. Roberto-a mize ṭhatna avâng chuan, chu company chuan Thuhretu dang pawh a chhawr belh phah a. Anni pawh chuan hnathawktu ṭha an nihzia an lantîr a ni. Kum kalta chhûng zawngahte khân, Roberto-a chuan baptisma chang unau 23 leh Bible zirlai 8 te tân hna a hmuhsak a nih chu!
15. Engtin nge sumdâwng Kristiante chuan thu dik an sawi tih an târ lan ang?
15 Mahni hna thawk kan nih chuan, kan sumdâwnna thil engkimah thu dik kan sawi nge, a chângin kan ṭhenawmte hnênah thu dik lo kan sawi ṭhîn zâwk? Sumdâwngtu Kristiante chuan an thil zawrhte chu an hralh chak theih nân dik loh takin an fak mawi tûr a ni lo va, thamna an dawng emaw, an pe emaw tûr a ni hek lo. Miin min cheibâwl tûra kan duh ang bawka mi dangte pawh cheibâwl chu kan duh a ni.—Thuf. 11:1; Lk. 6:31.
Sawrkâr Thuneitute Hnênah Thu Dik Sawi Rawh
16. Kristiante chuan (a)sawrkâr thuneitute hnênah eng nge an pêk? (b) Jehova hnênah eng nge an pêk?
16 Isua chuan: “Kaisara thilte chu Kaisara hnênah pe ula, Pathian thilte chu Pathian hnênah pe ta che u,” a ti a. (Mt. 22:21) Kaisara—sawrkâr thuneitute—hnênah eng “thilte” nge kan pêk ngai? Isua’n chûng thute a sawi lai chuan, chhiah chawi chungchâng sawiho a ni a. Chuvângin, Pathian leh mihring hmaa chhia leh ṭha hriatna thiang an neih nân, Kristiante chuan chhiah chawi pawh tiamin, an awmna ram dânte chu an zâwm a ni. (Rom 13:5, 6) Mahse, Jehova chu kan thinlung, thlarau, rilru, leh chakna zawng zawnga kan hmangaih Lal Chungnungber, Pathian dik awmchhun a ni tih kan hria a. (Mk. 12:30; Thup. 4:10, 11) Chuvângin, Pathian Jehova hnênah tiam chin awm lovin kan intulût a ni.—Sâm 86:11, 12 chhiar rawh.
17. Engtin nge Jehova mite chuan sawrkâr hnên aṭanga ṭanpuina dawn chu an thlîr?
17 Ram tam tak chuan mi retheite tân sum leh pai leh thil danga ṭanpui dân ruahmanna an siam a. Kristiante tân dawng tûra an tling a nih chuan chutiang ṭanpuina dawn chu thil sual a ni lo. Sawrkâr hnên aṭanga ṭanpuina dawng tûra thu dik lo kan hrilh loh emaw, kan bum loh emaw pawh hi ṭhenawmte hnêna thu dik sawina ni.
Thu Dik Sawi Avânga Malsâwmnate
18-20. Ṭhenawmte hnêna thu dik tak sawinain eng malsâwmnate nge a thlen?
18 Thu dik sawina chuan malsâwmna tam tak min thlen a. Rilru leh thinlunga thlamuanna leh damna min petu, chhia leh ṭha hriatna thiang chu kan vawn reng theih phah a. (Thuf. 14:30; Phil. 4:6, 7) Chhia leh ṭha hriatna thiang neih chu Pathian mithmuhah a hlu êm êm a ni. Tin, thil engkima thu dik kan sawi chuan, mite’n an hre chhuak leh ang tih kan hlauh thâwn a ngai lo bawk a ni.—1 Tim. 5:24.
19 Malsâwmna dang hi han ngaihtuah leh teh. Paula chuan: “Pathian rawngbâwltute angin engkimah mi mit tlungin kan awm . . . thutak [sawi] thuah te,” tiin a sawi a. (2 Kor. 6:4, 7) He thu dikzia hi Britain-a awm Thuhretu pakhat chunga thilthleng hian a nemnghet a ni. Ani chuan a car lei tumtu hnênah chuan a ṭhatnate chauh ni lovin, hmuh theih lohva awm a ṭhat lohnate pawh a hrilh vek a. A lei tumtu chuan car chu a han khalh chhin hnu chuan unaupa chu Jehova Thuhretu a nih leh nih loh a zâwt a ni. Engvângin nge Thuhretu a nih chu a rin? Chu pa chuan unaupa rinawmna leh a lan dân fel fai tak chu a hmuh vâng a ni. Chu chuan thu hrilh theihna hun remchâng a thlen phah a ni.
20 Keini pawhin mize ṭha lantîrin chutiang chuan Siamtu kan chawimawi ve em? Paula chuan: “Thil zahthlâk inthupte chu kan malmâk ta zâwk a, ngamthlêmna thu kan hmang lo,” a ti a. (2 Kor. 4:2) Chuvângin, ṭhenawmte hnêna thu dik sawi tûrin theih tâwp i chhuah ang u. Chutianga kan tih chuan, kan Pa vâna mi leh a mite kan chawimawi ang. (w09 6/15)
Engtin Nge Kan Chhân Ang?
• Kan ṭhenawmte chu tute nge ni?
• Ṭhenawmte hnêna thu dik sawi tih awmzia chu eng nge ni?
• Engtin nge thu dik sawina chuan Pathian a chawimawi?
• Thu dik tak sawinain eng malsâwmnate nge a thlen?
[Zirlai Atâna Zawhnate]
[Phêk 23-naa milem]
Thil tihsual palh ho tê tête i pawm nghâl em?
[Phêk 24-naa milem]
Hna i dîlnaah thu dik i sawi em?