Bosman We i Stret, Mo Hed Kampani Blong Hem

“?Hu ya i rili bosman we i stret mo waes, we masta blong hem i putumap hem blong lukaot long kampani blong ol wokman blong hem, blong i givim kakae we i naf long olgeta long stret taem blong hem?”—LUK 12:42, NW.

1, 2. ?Wanem impoten kwestin we Jisas i askem taem hem i stap talem saen blong ol las dei?

TAEM Jisas i stap talemaot plante samting we bambae oli mekemap wan saen blong ol las dei, hem i askem kwestin ya: “?Hu ya i rili slef ya we i stret mo waes, we masta blong hem i putumap hem blong lukaot long ol man blong hem, mo blong givim kakae long olgeta long stret taem blong hem?” Jisas i gohed blong talem se bambae slef ya i kasem blesing from we hem i mekem gud wok blong hem. Blesing ya se Masta bambae i putumap hem blong lukaot long olgeta samting blong Hem.—Mat. 24:45-47, NW.

² Sam manis bifo, Jisas i askem wan kwestin we i klosap sem mak. (Ridim Luk 12:42-44, NW. *) Long taem ya, hem i singaotem slef ya se “bosman” mo i singaotem “ol man blong hem” se “kampani blong ol wokman blong hem.” Wan bosman i maneja blong evri samting long haos blong masta blong hem mo i foman blong ol man  blong wok. Be bosman i wan man blong wok tu. ?Ale, hu ya slef ya, no bosman ya, mo olsem wanem hem i givimaot ‘kakae long stret taem blong hem’? I impoten we yumi evriwan i luksave rod ya we God i stap yusum blong givimaot save blong hem olsem kakae.

3. (a) ?Plante man blong Krisendom we oli eksplenem Baebol, oli talem wanem long saed blong “slef” we Jisas i tokbaot? (b) ?Hu ya “bosman” no “slef” ya, mo hu ya “ol wokman blong hem” no “ol man blong hem”?

³ Plante man blong Krisendom we oli eksplenem Baebol, oli talem se Jisas i stap tokbaot sam man we oli stap talem se oli Kristin mo oli gat spesel posisen no wok. Be Jisas we i “masta” long parabol ya, i no tokbaot plante slef we oli stap wanwan olbaot long ol defren jos blong Krisendom, nogat. Hem i talem klia se i gat wan “bosman” no “slef,” we bambae hem i putumap blong lukaot long olgeta samting blong hem. Taswe, plante taem Wajtaoa i eksplenem se bosman ya i minim “smol kampani,” no grup, blong ol disaepol we tabu spirit i makemaot olgeta. Jisas i tokbaot olgeta ya long buk blong Luk, jes bifo we hem i tokbaot bosman blong haos blong hem. (Luk 12:32, NW) “Kampani blong ol wokman blong hem” no “ol man blong hem,” hemia “smol kampani” ya yet, be tok ya i stap minim olgeta wanwan. Wan kwestin we i pulum tingting blong yumi, hemia: ?Ol memba blong grup ya we i olsem slef, olgeta wanwan oli joen long wok ya blong givimaot save blong God olsem kakae long stret taem blong hem? Ansa blong kwestin ya i kam klia taem yumi lukluk gud long ol tok blong Baebol.

Ol Man Blong Jeova Long Taem Bifo

4. ?Jeova i talem se neson blong Isrel bifo i olsem wanem samting? ?Mo i impoten blong save wanem long saed blong neson ya?

⁴ Jeova i tokbaot kampani blong ol man blong hem bifo, hemia neson blong Isrel, olsem wan man blong wok. Hem i se: “Yufala [plante man] i witnes blong mi. Mi mi jusumaot yufala blong yufala i man blong wok [wan man] blong mi.” (Aes. 43:10) Olgeta memba blong neson ya oli stap insaed long grup ya we i olsem man blong wok. Be i impoten blong save se ol pris wetem ol Livaet we oli no pris, olgeta nomo oli gat wok ya blong tijim neson blong Isrel long saed blong Loa.—2 Kron. 35:3; Mal. 2:7.

5. ?Jisas i talem se wanem bigfala jenis bambae i kamaot?

⁵ ?Olsem wanem? ?Neson blong Isrel nao hem i slef ya we Jisas i stap tokbaot? Nogat. Yumi save samting ya from ol tok we Jisas i talem long ol man Isrel long taem blong hem, se: “God bambae i tekemaot kingdom blong Hem long yufala, mo bambae i givim i go long wan neson we bambae i karem frut we i stret.” (Mat. 21:43, NW) I klia se  wan jenis bambae i kamaot. Jeova bambae i yusum wan niufala neson. Nating se i olsem, slef ya long parabol blong Jisas i mekem wok blong hem blong tijim ol man long samting we God i wantem, long fasin we i klosap sem mak long “man blong wok” blong God long Isrel bifo.

Slef We i Stret i Kamtru

6. ?Wanem niufala neson i stat long lafet blong Pentekos long yia 33 K.T.? ?Hu i joen long neson ya?

⁶ Niufala neson ya, “Isrel blong God,” hemia ol man we God i makemaot olgeta wetem tabu spirit. (Gal. 6:16, NW; Rom 2:28, 29; 9:6) Neson ya i stat long lafet blong Pentekos long yia 33 K.T., taem God i mekem tabu spirit blong hem i kamdaon long ol man ya. Afta long taem ya, olgeta Kristin we tabu spirit i makemaot olgeta oli joen long neson no grup ya we i olsem slef we Masta Jisas Kraes i putumap. Evri memba blong neson ya oli kasem wok blong talemaot gud nius mo pulum ol man blong oli kam disaepol blong Kraes. (Mat. 28:19, 20) ?Be evri memba blong grup ya bambae oli joen long wok ya blong givimaot save blong God olsem kakae long stret taem blong hem? Bambae yumi luk ansa we Baebol i givim long kwestin ya.

7. ?Fastaem, wanem bigfala wok blong ol aposol? ?Biaen, wanem narafala wok bakegen we oli kasem?

⁷ Taem Jisas i jusumaot ol 12 aposol blong hem, bigfala wok we Jisas i sanem olgeta blong mekem, hemia blong talemaot gud nius. (Ridim Mak 3:13-15.) Wok ya i laenap wetem mining blong Grik tok ya apostolos, we i kamaot long narafala tok ya “sanem i go.” Be taem ol yia oli pas mo i kam klosap moa long taem we Kristin kongregesen i stanap, ol aposol oli mekem wan narafala wok tu, hemia “wok blong lukaot” long kongregesen.—Wok 1:20-26, NW.

8, 9. (a) ?Wanem wok we ol 12 aposol oli tingbaot olsem faswan wok blong olgeta? (b) ?Biaen, hu, we hed kampani i agri long olgeta, oli kasem bigfala wok?

⁸ ?Wanem wok we ol 12 aposol oli tingbaot olsem faswan wok blong olgeta? Samting we i hapen afta long dei blong Pentekos i soemaot ansa blong kwestin ya. I gat wan rao i kamaot long saed blong kakae we oli seremaot evri dei long ol wido. Ale, ol 12 aposol oli singaot ol disaepol oli kam wanples mo oli talem long olgeta se: “Ol brata. I no stret blong mifala i lego wok ya blong talemaot tok blong God, blong go lukaot long ol samting ya.” (Ridim Ol Wok 6:1-6.) Ale ol aposol oli jusumaot sam brata we oli naf blong lukaot long “bisnes ya,” nao ol aposol oli fri blong gohed long ‘wok ya blong talemaot tok blong God.’ Jeova i blesem plan ya from we “tok blong God i stap goaot moa long ol man. Mo grup blong ol man we oli bilif long Jisas i stap kam bigwan moa long Jerusalem.” (Wok 6:7) Taswe bigfala wok ya blong givimaot save blong God olsem kakae i stap long han blong ol aposol.—Wok 2:42.

⁹ Biaen, sam narafala oli kasem bigfala wok tu. Tabu spirit i lidim kongregesen blong Antiok blong sanem Pol mo Banabas tufala i go mekem wok blong misinari. Ol man oli tingbaot tufala olsem aposol, nating se tufala i no stap insaed long grup blong ol faswan 12 aposol. (Wok 13:1-3; 14:14; Gal. 1:19) Hed kampani long Jerusalem i agri long tufala olsem aposol. (Gal. 2:7-10) Smoltaem biaen, Pol i joen long wok ya blong givimaot save blong God olsem kakae. Tabu spirit i lidim hem blong raetem faswan leta blong hem.

10. ?Long faswan handred yia, olgeta Kristin evriwan we tabu spirit i makemaot olgeta oli joen long wok ya blong rerem save blong God olsem kakae blong ol man? Eksplenem.

¹⁰ ?Be olsem wanem? ?Olgeta Kristin evriwan we tabu spirit i makemaot olgeta oli lukaot long wok blong prij long fulwol, mo rerem save blong God olsem kakae blong ol man? Nogat. Aposol Pol i talem se: “I no olgeta evriwan we oli aposol, no we oli profet, no we oli tija blong jos [“kongregesen,” NW]. I no olgeta evriwan we oli man blong mekem merikel.” (1 Kor. 12:29) I tru, olgeta Kristin evriwan we tabu spirit i makemaot olgeta oli joen long wok blong prij. Be God i yusum sam nomo, hemia eit man nomo, blong raetem ol 27 buk long Grik haf blong Baebol.

Slef We i Stret Long Taem Blong Yumi

11. Masta i putumap slef blong lukaot long “olgeta samting blong hem.” ?Wanem ol samting ya?

¹¹ Tok blong Jisas long Matiu 24:45 (NW) i soemaot klia se, long taem blong en, bambae i gat wan grup yet long wol we i olsem slef ya we i stret mo waes. Revelesen 12:17 (NW) i talem se olgeta ya oli “ol laswan” blong sid blong woman we oli stap long wol. Ol laswan ya we oli stap long wol, Kraes i putumap olgeta olsem wan grup, blong oli lukaot long olgeta samting blong Hem long wol.  “Olgeta samting blong hem” we bosman ya we i stret i mas lukaot long olgeta, hemia ol samting long wol ya we oli joen wetem wok blong Masta olsem King. Long olgeta samting ya, i gat ol man blong wol ya we oli obei long rul blong Kingdom, wetem ol branj ofis, haos wosip, mo ol narafala samting we ol man blong hem oli yusum blong mekem wok blong talemaot gud nius long wol.

12, 13. ?Olsem wanem wan Kristin i save se God i singaot hem blong i go long heven?

¹² ?Olsem wanem wan Kristin i save sipos God i singaot hem blong i go long heven, mo sipos hem i wan long ol laswan memba blong Isrel blong God long wol? Ansa i stap long ol tok we aposol Pol i talem long olgeta we oli gat janis olsem hem blong go long heven. Hem i talem se: ‘Olgeta we spirit blong God i stap lidim olgeta, oli pikinini blong God. Mo tabu spirit ya we God i givim finis long yufala, hem i no blong mekem yufala i olsem ol slef nomo blong God , we yufala i fraet long hem, nogat. Spirit ya i blong mekem yufala i pikinini blong God. Mo long paoa blong spirit ya, taem yumi prea, yumi stap talem long God se, “Papa blong mifala.” Spirit ya blong God i kam joen long tingting blong yumi, blong talemaot we yumi pikinini blong God. Nao from we yumi pikinini blong hem, bambae yumi save kasem ol gudgudfala samting we hem i putum olgeta oli tabu, se bambae oli blong ol man blong hem. Mo bambae yumi save joen long Kraes blong kasem haf long ol gudgudfala samting we God i putum olgeta oli tabu, se bambae oli blong Kraes. Mo from we yumi joen long Kraes blong harem nogud olsem we hem i harem nogud, be bambae yumi save joen long hem bakegen, blong kasem gudfala laef blong hem long heven.’—Rom 8:14-17.

¹³ Blong talem i klia nomo, tabu spirit blong God i makemaot olgeta ya wanwan, mo God i “singaot” olgeta no i invaetem olgeta blong oli go laef long heven. (Hib. 3:1) God nao i singaot olgeta wanwan. Mo olgeta oli talem ‘yes’ wantaem long God, oli glad blong kam ol pikinini blong hem, oli no askem kwestin, oli no gat tingting we i hafhaf, mo oli no fraet. (Ridim 1 Jon 2:20, 21.) Taswe, i no olgeta ya we oli jusum blong go long heven, be Jeova nao i putum mak blong hem no tabu spirit blong hem long olgeta.—2 Kor. 1:21, 22; 1 Pita 1:3, 4.

Stret Tingting

14. ?Ol man ya we tabu spirit i makemaot olgeta, oli gat wanem tingting long saed blong fasin ya we God i singaot olgeta?

¹⁴ ?Taem ol man ya we tabu spirit i makemaot olgeta oli wet blong kasem gudfala laef long heven, wanem tingting we oli mas gat long saed blong olgeta bakegen? Oli kasem save se i wan nambawan samting tumas we God i singaot olgeta, be oli tingbaot tu se oli no kasem gudfala laef ya yet, God i singaot olgeta nomo. Blong oli kasem laef long heven, oli mas stap tru long hem gogo kasem ded. Wetem tingting daon, oli talem sem tok we Pol i talem, se: “Ol brata mo sista. . . . Mi mi no ting se mi holem ol fasin ya finis, olsem we mi win finis. Hemia no yet ya. Be wan samting nomo mi stap mekem. Mi mi fogetem olgeta samting we oli stap long bak blong mi, nao mi stap traehad oltaem blong kasem ol samting we oli stap long fes blong mi. I olsem we mi stap resis i go stret long mak, we i gat praes blong man we i win. Mo praes ya, hemia we God i singaot yumi blong yumi joen long Jisas Kraes, yumi go stap antap, long ples blong hem.” (Fil. 3:13, 14) Olgeta we tabu spirit i makemaot olgeta we oli stap yet long wol, oli mas traehad fulwan blong ‘mekem fasin blong olgeta i stret gud long fasin blong God ya we i singaot olgeta finis. Oltaem, long olgeta samting, tingting blong olgeta i mas stap daon,’ oli mas ‘ona long God, mo fraet tu long hem.’—Efes. 4:1, 2; Fil. 2:12; 1 Tes. 2:12.

15. ?Wanem tingting we ol Kristin oli mas gat long saed blong olgeta we oli kakae bred mo dring waen long Memoriol? ?Mo man we tabu spirit i makemaot, hem i gat wanem tingting long saed blong hem wan?

¹⁵ ?Olsem wanem long ol narafala Kristin? ?Oli mas gat wanem tingting long wan Kristin we i talem se tabu spirit i makemaot hem, ale i stat blong kakae bred mo dring waen long Memoriol? Oli no mas jajem hem. Hemia bisnes blong hem nomo wetem Jeova. (Rom 14:12) Be ol Kristin we God i rili makemaot olgeta wetem tabu spirit, oli no mekem olsem we oli spesel. Oli no ting se from we tabu spirit i makemaot olgeta, oli gat spesel save we olgeta long “bigfala kampani” oli no gat, nating se plante long bigfala kampani oli bin stap plante plante yia long trutok. (Rev. 7:9, NW) Oli no ting se oli stap kasem moa tabu spirit i bitim ol brata sista blong olgeta we oli blong kampani blong “ol narafala  sipsip.” (Jon 10:16) Oli no ting se ol narafala oli mas mekem i moagud long olgeta from we God i singaot olgeta. Mo oli no stap talem se from we oli kakae bred mo dring waen long Memoriol, hemia i mekem se oli hae moa long ol elda long kongregesen.

16-18. (a) ?Olgeta man evriwan we tabu spirit i makemaot olgeta, oli joen long wok ya blong givimaot ol niufala trutok we God i soemaot? Talem wan eksampol. (b) ?From wanem i no gat nid blong Hed Kampani i askem tingting blong olgeta evriwan we oli stap kakae bred mo dring waen long Memoriol, bifo we i tekem wan desisen?

¹⁶ ?Olsem wanem? ?Ol wanwan man we tabu spirit i makemaot olgeta long ol defren ples blong wol, oli stap toktok tugeta blong serem save mo storian long ol niufala trutok we God i soemaot? Nogat. I tru se slef ya olsem wan grup i gat wok blong givim kakae long ol man blong Kraes we tabu spirit i makemaot olgeta, be olgeta wanwan long grup ya oli no gat ol semfala wok. (Ridim 1 Korin 12:14-18.) Olsem yumi tokbaot finis, long faswan handred yia, olgeta evriwan long grup ya oli joen long impoten wok ya blong prij. Be sam nomo oli raetem ol buk blong Baebol mo lukaot long Kristin kongregesen.

¹⁷ Blong kasem save long poen ya, traem tingbaot: Sam vas blong Baebol oli tokbaot se “kongregesen” nao i tekem aksen agensem man we i mekem bigfala sin. (Mat. 18:17, NW) Be blong talem stret, hemia ol elda nomo we oli tekem aksen long bihaf blong kongregesen. Ol elda oli no goraon long ol memba blong kongregesen wanwan blong askem tingting blong olgeta, bifo we oli mekem wan desisen. Oli mekem wok we God i givim long olgeta, hemia blong wok long nem blong kongregesen.

¹⁸ Long sem fasin, wan smol namba blong ol man we tabu spirit i makemaot olgeta, oli wok tede long nem blong grup ya we i olsem slef. Smol namba ya, hemia Hed Kampani blong ol Witnes blong Jeova. Ol man ya we tabu spirit i makemaot olgeta, oli lukaot long wok blong Kingdom mo long wok blong givimaot save blong God olsem kakae. Olsem Hed Kampani long faswan handred yia, Hed Kampani tede i no askem long ol wanwan memba blong grup ya we i olsem slef blong oli talem tingting blong olgeta, bifo we i mekem wan desisen. (Ridim Ol Wok 16:4, 5.) Be olgeta Witnes evriwan we tabu spirit i makemaot olgeta, oli joen long impoten wok ya we i stap gohed naoia, blong karem kakae long garen. Grup we i olsem “slef ya we i stret mo waes” i wan kampani nomo, be ol memba blong grup ya, olgeta wanwan oli gat defdefren wok.—1 Kor. 12:19-26.

19, 20. ?Wanem stret tingting we bigfala kampani i gat long “slef ya we i stret mo waes” wetem Hed Kampani blong hem?

¹⁹ ?Ol save ya we yumi tokbaot finis, i mas mekem wanem long bigfala kampani we i gat janis blong laef olwe long wol? Kampani ya i haf blong olgeta samting blong King, taswe oli glad blong folemgud ol plan we Hed Kampani i mekem taem i wok long nem blong “slef ya we i stret mo waes.” Ol memba blong bigfala kampani oli gat bigfala tangkiu from ol save blong God we Hed Kampani i mekemrere mo i givimaot olsem kakae. Ol memba blong bigfala kampani oli respektem grup ya we i olsem slef, be oli lukaotgud blong no leftemap eni man we i talem se hem i haf blong grup ya. Ol Kristin we tabu spirit i rili makemaot olgeta oli no wantem we narafala i leftemap olgeta, mo oli no ting se ol narafala oli mas mekem olsem tu.—Wok 10:25, 26; 14:14, 15.

²⁰ Nating sipos yumi wan ‘man blong masta’ we tabu spirit i makemaot yumi, no yumi memba blong bigfala kampani, be yumi mas gat strong tingting blong wokgud wetem bosman we i stret mo Hed Kampani blong hem. I gud we yumi evriwan i gohed blong “lukaot gud” oltaem mo yumi stanap strong go kasem en.—Mat. 24:13, 42.

[Futnot]

?Yu Yu Rimemba?

• ?Hu ya ‘slef we i stret mo waes,’ mo hu ol man blong masta?

• ?Olsem wanem wan man no woman i save se God i singaot hem blong i go long heven?

• ?Wok ya blong rerem ol niufala save blong Baebol we i olsem kakae, i stap long hu fastaem?

• ?Man we tabu spirit i makemaot, hem i mas gat wanem tingting long saed blong hem wan?

[Kwestin]

[Tok blong pija long pej 25]

Tede, Hed Kampani i wok long nem blong slef we i stret mo waes. Hemia i sem mak long plan we ol Kristin oli folem long faswan handred yia