Ewe Chon Souan mi Tuppwöl me An we Mwichen Sou Pwüngüpwüng
“Iö chök ewe chon angang mi allükülük o tipachem? Ätewe nöün masta epwe seikätä pwe epwe nemeni nöün kewe chon angang o ngeniir wiser mongö lon fansoun fich.”—LUK. 12:42.
1, 2. Menni kapas eis mi lamot Jises a eäni atun an äweweei esissillen ekkewe ränin le sopwoloon?
ATUN Jises a awora esissillen ekkewe ränin le sopwoloon, a eäni ei kapas eis: “Iö chök ewe chon angang mi allükülük o tipachem? Atewe an masta epwe seikätä pwe epwe nemeni nöün kewe chon angang o ngeniir wiser mongö lon fansoun fich.” Mwirin, Jises a apasa pwe ena chon angang mi alükülük epwe feiöch pun nöün we masta epwe seikatä i woon pisekin kewe meinisin.—Mt. 24:45-47.
2 Jises a pwal eäni ena esin kapas eis fitu maram me mwan. (Älleani Luk 12:42-44.) A apasa pwe ewe “chon angang” i emön chon souan mi wisen akkota angangen ekkewe chon angang lon imwen ewe masta. Iwe nge, ena chon souan pwal i emön chon angang. Iö ena chon angang, me ifa ussun a kan awora “mongö lon fansoun fich”? A wesewesen lamot ngenikich meinisin ach sipwe esilla iö a kan awora möngö mi awattei sileach ussun Paipel.
3. (a) Met weween alon Jises ussun ewe “chon angang” me ren ekkan chon apworaus lon ekkewe lamalam mi tipin erä pwe iir chon Kraist? (b) Iö ewe “chon souan,” are “chon angang”? Met weween ekkewe “chon angang”?
3 Fän chommong, ekkan chon apworaus lon ekkewe lamalam mi tipin erä pwe ra äppirü Kraist ra ekieki pwe Jises a kapas ussun ekkewe nouwis. Nge Jises, ewe “masta,” ese erä pwe epwe wor chommong chon angang mi toropasfeil me lein keangen ekkena lamalam. Iwe nge, a affata pwe i epwe seikatä emön chök “chon souan” are “chon angang” woon pisekin kewe meinisin. Iwe, ei puk a fen äweweei pwe ena chon souan a liosuetä ewe “mwich mi kisikis,” weween, ewe mwichen chon käeö mi kepit. Mesemwan, lon chök Luk 12, Jises a kapas ussun chokkana. (Luk 12:32) Ewe mwichen “chon angang” a wewefengen me ekkena chon kepit nge a menlapei wisen emön me emön leir. A piitä ei kapas eis, Itä emön me emön chon ena mwich epwe wisen awora möngö lon fansoun mi fich? Epwe ffat pölüwan ika sipwe käeöfichi Paipel.
Nöün Jiowa we Chon Angang me Loom
4. Met Jiowa a apasa ussun ewe mwuun Israel loom? A lamot ach sipwe weweiti met ussun ena mwu?
4 Jiowa a apasa pwe nöün kewe aramas, ewe mwuun Israel loom loom, iir nöün chon angang. “‘Ämi [lap seni emön] chon Israel, ämi [lap seni emön] nei chon pwärätä pwal nei chon angang [emön chök]. Üa afilikemi.’” (Ais. 43:10) Chon ena mwu meinisin ra wewe ngeni ena chon angang. Iwe nge, a lamot sipwe weweiti pwe wisen chök ekkewe samolfel me chon Lifai ar repwe äiti ngeni ewe mwu masouen ewe Allük.—2 Kron. 35:3; Mal. 2:7.
5. Me ren Jises, menni siwil watte epwe fis?
5 Itä ewe mwuun Israel ina ewe chon angang Jises a kapas ussun? Aapw. Pun nengeni alon Jises ngeni chon Jus lon ränin we: “Kot epwe angei senikemi Mwün we o ngeni eu mwichen aramas mi awora ua ren ar föri föför mi pwüng.” (Mt. 21:43) A ffat pwe epwe fis eü siwil. Jiowa epwe äeä eü mineföön mwu. Iwe nge, än ewe “chon angang” asukula aramas ussun Paipel a ussun angangen nöün Kot “chon angang” lon fansoun Israel loom loom.
A Pwä ewe Chon Angang mi Ällükülük
6. Menni mineföön mwu a fisitä lon Pentikos lon ewe ier 33? Iö kewe ra kapachelong?
6 Ewe mineföön mwu, “ewe Israelin Kot,” a wewe ngeni ekkewe mi kepit. (Kal. 6:16, TF; Rom 2:28, 29; 9:6) A fförütä ren ninitiuen ewe ngün mi fel lon Pentikos lon ewe ier 33. Mwirin, meinisin chon Kraist mi kepit ra kapachelong lon ewe mwu mi wewe ngeni ewe chon angang a seikitä me ren Jises Kraist, ewe Masta. Wisen emön me emön chon ena mwu an epwe afalafala ewe pworaus allim me föralo chon käeö. (Mt. 28:19, 20) Nge itä meinisin chon ena mwich repwe fiti ewe angangen awora möngö lon fansoun mi fich? Sipwe pii ifa ussun Paipel a pölüweni ena kapas eis.
7. Le poputään, ifa äkkäeüin angangen ekkewe chon künö? Ifa ussun a lapolo ar angang?
7 Atun Jises a filatä nöün kewe 12 chon künö, a äkkäeüin tiniirelo pwe repwe afalafala ewe pworaus allim. (Älleani Mark 3:13-15.) Wiser na a tipeeü ngeni weween ei kapasen Krik apostolos, ewe a pop seni eü kapas mi wewe ngeni “künölo.” Iwe nge, lo, lo, lo, lupwen epwe poputä ewe mwichefelin Kraist, a lapolo ewe wis chon künö pwe a kapachelong angangen sou emmwen.—Fof. 1:20-26, 15:1-22.
8, 9. (a) Met ekkewe 12 aposel ra äkkäeüin ekieki? (b) Iö kewe ra wiseni pwal ekkoch wis mi chou, me ewe mwichen sou pwüngüpwüng a tipeeü ngeni?
8 Ifa ewe mettoch ekkewe 12 chon künö ra äkkäeüin ekieki? A ffat pölüwan lon minne a fis mwirin Pentikos. Lupwen a fis änini ussun inetiin möngö ngeni ekkewe fefin mi mä pwülüwer, ekkewe 12 aposel ra amwicha ekkewe chon käeö, iwe, ra ereniir: “Esap pwüng ngenikem äm aipwe tümwününgau ngeni äm afalafala kapasen Kot fän iten äm tümwünü ewe angangen inetin mongö.” (Älleani Fofor 6:1-6.) Ekkewe aposel ra awisa ngeni ekkoch mwän mi äsimaü ena angang pwe ekkewe aposel repwe tongeni “afalafala kapasen Kot.” Jiowa a efeiöchü ena kokkot, iwe, “ewe kapasen Kot a chöfetal. Nge ewe mwichen chon lükü Jesus lon Jerusalem ra fokun chochomongola.” (Fof. 6:7) Ina minne, äkkäeüin wisen ekkewe aposel ar repwe awora möngö seni ewe kapasen Kot.—Fof. 2:42.
9 Mwirin och fansoun, pwal ekkoch ra wiseni wis mi chou. Fän emmwenien ngün mi fel, ewe mwichefelin Antiok a akünölo Paul me Parnapas pwe repwe misineri. Ra pwal iteni aposel, nge rese kapachelong lein ekkewe 12 mi kefilitä akkomw. (Fof. 13:1-3; 14:14; Kal. 1:19) Mwirin, ewe mwichen sou pwüngüpwüng lon Jerusalem ra tipeeü ngeni. (Kal. 2:7-10) Ekiselo mwirin, Paul a wisen awora pworaus mi fel mi ussun chök möngö ren an makkeei nöün we äkkäechöön taropwe.
10. Le manauen ekkewe sou künö, itä meinisin Chon Kraist mi kepit ra wisen awora äweween Paipel mi ussun chök möngö? Äweweei mwo.
10 Iwe nge, itä Chon Kraist mi kepit meinisin ra ekkemmweni ewe angangen afalafal me akkawora möngö seni Paipel? Aapw. Ewe aposel Paul a eis: “Ifa usun, ir meinisin ra soukünö, ika soufos, ika sense? Ifa usun, ir meinisin a wor rer tufichin föri manaman?” (1 Kor. 12:29) Inaamwo ika meinisin Chon Kraist mi kepit ra afalafalfeil, nge walimön chök me leir ra wisen makkeei ekkewe 27 puk lon ewe Tesin Krik.
Ewe Chon Angang mi Allükülük lon ach ei Fansoun
11. Met sokkun ‘pisek’ ewe chon angang epwe wisen tümünü?
11 Alon Jises lon Mattu 24:45 a affata pwe epwe chüen wor eü mwichen chon angang mi ällükülük me tipatchem mi manau woon fönüfan lon ewe fansoun sopwoloon. Pwarata 12:17 a apasa pwe iir “lusun” mwirimwirin ewe fefin. Ewe masta, Kraist, a seikatä ena mwich woon pisekin kewe meinisin woon fönüfan. A kapachelong nöün ewe King kewe aramas me mettoch meinisin ra kan äkkäeä le afalafala ewe kapas allim.
12, 13. Ifa ussun Chon Kraist ra silei pwe ra eäni ewe kökköön läng?
12 Ifa ussun Chon Kraist ra silei ika ra eäni ewe äpilükülükün manau lon läng me ra kapachelong lein lusun “ewe Israelin Kot”? A pwä pölüwan lon alon ewe aposel Paul ngeni chienan kewe mi eäni ewe chök äpilükülük allim: “Ir meinisin mi nouni chon emmwen ewe Ngunun Kot, ikei ir mi noun Kot. Pun ami ouse mo angei ngunun kichiniwel pwe oupwe niuokus, nge oua angei ewe ngunun manau. Ren ewe Ngun, sia tongeni apasa, “Appa, Samach. Ewe Ngun a pwisin eti ngunuch le pwarata pwe kich noun Kot. O are kich noun, iwe, sia pwal chon alemwir, chon alemwirin Kot, chienen Kraist le alemwir, are sia eti i le riaffou, pwe sipwe pwal eti i lon an ling.”—Rom 8:14-17, TF.
13 Weween, ra kepit ren än Kot we ngün mi fel me ra eäni ewe “kököön läng” are ‘ketiw.’ (Ipru 3:1, TF) Ra en me angei ar ketiw seni Kot. Iwe, ra mwittir ngüüri ar repwe nöün Kot nge rese tipemwaramwar are niuokkus. (Älleani 1 Jon 2:20, 21, TF.) Rese pwisin filatä ena äpilükülük, nge Jiowa a mecheniir ren an fang ngeniir ngün mi fel.—2 Kor. 1:21, 22, TF; 1 Pit. 1:3, 4.
Ewe Ekiek mi Pwüng
14. Mei fet ekiekin ekkewe mi kepit ussun ar kökkö?
14 Epwe fet ekiekin ekkewe mi kepit ussun pwisin iir atun ra witiwiti liwiniir lon läng? Inaamwo ika a fokkun amwarar ar kökkö, nge ra weweiti pwe eü chök ketiw ena. Repwe tuppwöl tori mälo ren ar repwe tufichin angei winner. Ra aloni alon Paul fän tipetekison: “Ämi pwii kana, ngang won inisi üsap ekieki pwe üa fen angei ewe win, nge eu mettoch üa föri. Üa manükala mine a nom lükisöküri, nge üa achocho ngeni ai üpwe fori mine a nom mwei. Iei mine üa säwenewen ngeni ewe sopolan ai üpwe angei ewe win, iei än Kot kö ren Kraist Jesus ngeni ewe manau esemüch.” (Fil. 3:13, 14) Lusun chon kepit repwe achocho ükükün ar tufich pwe repwe ‘manaueni eu manau mi fich ngeni ewe kö seni Kot me tipetekison fansoun meinisin,’ “fän niuokus me chechech.”—Ef. 4:1, 2; Fil. 2:12; 1 Tes. 2:12.
15. Epwe fet ekiekin Chon Kraist ussun chokkewe mi angei ewe pilawa me wain atun Ächechemenien Mäloon Kraist? A fet ekiekin chon kepit ussun pwisin iir?
15 Iwe nge, epwe fet ekiekin ekkewe ekkoch Chon Kraist ika emön a erä pwe a kepit me a poputä le angei ewe pilawa me wain lon ewe Fääfen Ach Samol? Resap apwüngü i. Ena mettoch lefilen chök emönnewe me Jiowa. (Rom 14:12) Iwe nge, Chon Kraist mi enletin kepit resap ekiekin küna än aramas afoner. Rese ekieki pwe ar kapachelong lein chon kepit a wewe ngeni pwe a sokkolo watteen ar weweiti masouen Paipel lap seni chokkewe mi äsimaü lon ewe “mwich mi lapalap.” (Pwar. 7:9) Rese lükü pwe a sokkolo watteen ar angei ewe ngün mi fel lap seni chiener kewe “pwal ekkoch siip.” (Jon 10:16) Rese ekieki pwe epwe sokkolo watteen än aramas aücheaaniir; rese pwal apasa pwe ar angei ewe pilawa me wain a atekieeretä seni ekkewe elter lon ewe mwichefel.
16-18. (a) Itä meinisin chon kepit ra fiti ewe angangen uwawu mineföön pworaus mi enlet seni Paipel? Äweweei mwo. (b) Pwata ewe Mwichen Sou Pwüngüpwüng ese pwüngüpwüngfengen me meinisin mi apasa pwe iir chon kepit?
16 Itä meinisin ekkena chon kepit woon unusen fönüfan ra angangfengen fän iten ar repwe pwärawu mineföön pworaus mi enlet seni Paipel? Aapw. Inaamwo ika unusen ewe mwichen chon angang a kan wisen amöngööni chon le imwen Kot kewe, nge sap minne a löllöfengen angangen are wisen emön me emön lon ewe mwichen chon angang. (Älleani 1 Korint 12:14-18.) Sia fen käeö me mwan pwe le manauen ekkewe aposel, meinisin ra fiti ewe angangen afalafal. Nge ekkoch chök ra wisen makkeei puken Paipel me emmweni ewe mwichefelin Kraist.
17 Äwewe chök: Fän ekkoch, Paipel a kapas ussun än ewe “mwichefel” apwüngü chon tipis. (Mt. 18:17) Nge a enletin wewe ngeni än ekkewe elter chök angang woon pun iir chon tupuni ewe mwichefel. Sap minne ekkewe elter ra chuuri meinisin chon ewe mwichefel pwe repwe eisiniir ussun meefier mwen ar repwe uwawu ar apwüng. Ra kan apwönüetä wiser we me ren Kot, me ra angang fän iten unusen ewe mwichefel.
18 Pwal ina chök ussun, ekkoch chök mwän mi kepit ra wisen tupuni ewe mwichen chon angang. Iir chon ewe Mwichen Sou Pwüngüpwüng än Chon Pwäratä Jiowa. Ekkena mwän mi kepit ra ekkemmweni ewe angangen afalafal me ewe kokkotun kaworen möngö mi alongolong woon Paipel. Iwe nge, ena Mwichen Sou Pwüngüpwüng ese pwüngüpwüngfengen me meinisin lon ewe mwichen chon angang mwen an epwe apwüngalo och pworaus, nge a pwal ina chök ussun le manauen ekkewe aposel. (Älleani Fofor 16:4, 5.) Iwe nge, chon kepit meinisin ra tinikken lon ewe angangen ioni aramas lon ei fansoun. Ewe “chon angang mi allükülük o tipachem” eü chök mwich, nge emön me emön a wor en me an angang.—1 Kor. 12:19-26.
19, 20. Ifa ewe ekiek mi pwüng chon ewe mwich mi lapalap ra eäni ussun ewe “chon angang mi allükülük o tipachem” me an we Mwichen Sou Pwüngüpwüng?
19 Iei a chommongolo chon ewe mwich mi lapalap a eäni ewe äpilükülükün manau esemuch woon fönüfan. Epwe fet meefier ussun ekkena pworaus asan? Pokiten iir nöün ewe King, iwe, ra pwapwa le tipeeü ngeni ekkewe kokkot ewe Mwichen Sou Pwüngüpwüng a föratiw, pwe ena mwich a tupuni “ewe chon angang mi allükülük o tipachem.” Chon ewe mwich mi lapalap ra kilisou ren ewe möngö seni Paipel a katowu fän emmwenien ewe Mwichen Sou Pwüngüpwüng. Nge inaamwo ika chon ewe mwich mi lapalap ra süföliti ewe mwichen chon angang, nge repwe tümünüür pwe rete atekiatäi chokkewe mi erä pwe ra kapachelong lein ena chon angang. Chon Kraist mi enletin kepit ren ewe ngün mi fel resap mochen are ekiekin küna ena mettoch.—Fof. 10:25, 26; 14:14, 15.
20 Ese lifilifil ika kich “chon angang” mi kapachelong lein lusun ekkewe chon kepit, are chon ewe mwich mi lapalap, nge epwe pposolo letipach pwe sipwe unusen tipeeüfengen me ewe chon souan mi tuppwöl me an we Mwichen Sou Pwüngüpwüng. Sipwe achocho le “mamasa” me kamwöchünnük woon ach tuppwöl tori ewe sopwoloon.—Mt. 24:13, 42.
Ka Chechemeni?
• Met weween ewe “chon angang mi allükülük o tipatchem”? Met weween emön me emön ekkewe chon angang?
• Ifa ussun aramas ra silei ika ra fen angei ewe kökköön läng?
• Äkkäeüin wisen iö ar repwe ammolnatä möngö mi alongolong woon Paipel?
• Epwe fet ekiekin emön chon kepit ussun pwisin i?
[Ekkewe Kapas Eis Fan Iten ewe Lesen]
[Sasing lon pekin taropwe 31]
Lon ei fansoun, ewe Mwichen Sou Pwüngüpwüng a tupuni ewe chon angang mi allükülük o tipatchem. A wor ena sokkun kokkot le manauen ekkewe aposel