Pilittaasoq aalajaatsoq taassumalu siulersuisoqatigiivi

“Kinaavami pilittaasoq ilumoortoq silatoorlu naalagaata kiffaminut nerisassanik tunniussisaqqusaa piffissaq eqqorlugu?” — LUKASI 12:42.

1, 2. Ullunut kingullernut nalunaaqummut tunngatillugu apeqqut pingaarutilik suna Jiisusip apeqqutigaa?

JIISUSIP ullussanut kingullernut tamarmik ataatsimut nalunaaqutaasussat oqaluttuarigamigit ima aperivoq: “Kinaavami inussiaq aalajaallunilu silatooq, naalagaata kiffaminut paarsisunngortitaa piffissaq eqqorlugu nerisassaannik tunisaqqullugit?” (NV) Jiisusi tamatuma kingorna oqarpoq inussiaq taanna aalajaannini pillugu akissarsisinneqarumaartoq Naalakkap pigisaanut tamanut paarsisussanngortinneqarnermigut. — Matthæusi 24:45-47.

² Qaammatit arlallit tamatuma siorna Jiisusi tamatumunnga assingusumik apeqquteqarpoq. (Atuaruk Lukasi 12:42-44). Inussiaq  ‘pilittaq’-mik taavaa. Pilittaq tassaavoq illumi pisortaatitaq, kiffanut paarsisunngortitaq. Pilittarli nammineq aamma kiffaavoq. Inussiaq, imaluunniit pilittaq, taanna kinaava, qanorlu ililluni ‘piffissaq eqqorlugu nerisassanik’ tunniussisarpa? Anersaakkut inuussutissat suna aqqutigalugu tunniunneqartarnerannik tamatta ilisimanninnissarput pingaaruteqarpoq.

3. (a) Kristumiuunerartuni Biibili pillugu oqaaseqartartut Jiisusip ‘inussiaq’ pillugu oqaasii qanoq nassuiarniarsarisimavaat? (b) ‘Pilittaq’, imaluunniit “inussiaq”, kinaava, ‘kiffallu’ kikkuuppat?

³ Kristumiuunerartuni Biibili pillugu oqaaseqartartut Jiisusip oqaasii taakku amerlanertigut nassuiartarpaat imminut kristumiuunerartut akornanni akisussaaffeqartunut tamanut tunngasutut. Jiisusili, assersuusiami ‘naalagaasoq’, oqanngilaq kristumiuunerartut upperisarsioqatigiivini assigiinngitsuni tamani inussiarpassuaqarumaartoq. Paasiuminartumilli oqarpoq ataasiinnarmik ‘pilittaqassasoq’, imaluunniit ‘inussiaqassasoq’, pigisaminut tamanut paarsisussanngortikkumaakkaminik. Taamaattumik, atuagassiami matumani nassuiarneqartarneratut, pilittaq ajoqersukkanut tanitanut ‘savarpannguanut’ assersuutaasimassaaq, taakkua eqimattatut isigalugit. Lukasip iivangkiiliuani versit ataqatigiinnerini erserpoq Jiisusip savarpannguit taakku eqqartoqqammerai. (Lukasi 12:32) Oqaatsimi ‘kiffat’-mi eqimattat taakku pineqarput, tamarmilli immikkut inissisimaffiat erseqqissarneqarluni. Soqutiginartoq manna apeqqutaalerpoq: Inussiaqatigiinnut taakkununnga ilaasortaasut tamarmik immikkut piffissaq eqqorlugu anersaakkut inuussutissanik tunniusseqataasarpat? Biibilimi qanoq allassimasoqarnersoq misissorutsigu tamanna akissutisissavarput.

Itsaq Jehovap kiffaa

4. Jehovap itsaq Israelikkut qanoq eqqartorpai, inuiannullu taakkununnga tunngatillugu suna maluginiassallugu pingaaruteqarpa?

⁴ Jehovap innuttani, itsaq Israelikkut, kiffaqatigiittut eqqartorpai. “Ilissi [qasseersiut] uanga ilisimannitsigaassi [qasseersiut], oqarpoq [Jehova], kiffara [ataasersiut] qinersimasara.” (Esaja 43:10) Inuianni taakkunaniittut tamarmik kiffaqatigiinnut taakkununnga ilaapput. Pingaaruteqarporli maluginiassallugu taamaallaat palasit Levikkullu palasiunngitsut inuiannik ilinniartitsinissaminnik akisussaaffeqarnerat. — 2 Nalunaarsuutit 35:3; Malaki 2:7.

5. Jiisusip oqaasii naapertorlugit qanoq allanngorujussuartoqassava?

⁵ Israelikkut taakkuuppat Jiisusip inussiatut eqqartugai? Naamik. Tamanna nalunngilarput Jiisusip nalimini juutit ima oqarfigimmagit: “Guutip naalagaaffia ilissinnit peerneqassaaq tunniunneqassallunilu inuiannut inerititaqartitsisinnaasunut.” (Matthæusi 21:43) Erseqqippoq allanngortoqassasoq. Jehovap inuiaqatigiit nutaat atulertussaavai. Anersaakkulli ilinniartitsinermut tunngatillugu inussiaq Jiisusip assersuusiaani eqqaaneqartoq itsaq Israelimi Guutip ‘kiffaata’ iliorsimaneratut iliorpoq.

Inussiaq aalajaatsoq saqqummerpoq

6. Ukiumi 33-mi piinsip ulluani inuiaqatigiinngortut nutaat kikkuuppat, kikkullu taakkununnga ilaalerpat?

⁶ Inuiaqatigiit nutaat, “Israeli Guutip pigisaa”, tassaapput anersaakkut Israelikkut. (Galatiamiut 6:16; Romamiut 2:28, 29; 9:6) Taakku piulerput ukiumi 33-mi piinsip ulluani Guutip anersaani kuimmagu. Taava kristumiut tanitat tamarmik inuiaqatigiinnut maanna inussiaqatigiittut Naalakkap, Jiisusip Kristusip, qinigaatut kiffartortunut ilaalerput. Inuiaqatigiinnut taakkununnga ilaasut tamarmik immikkut nutaarsiassamik nuannersumik oqaluussissutiginninnermik ajoqersuganngortitsiortornermillu suliassinneqarput. (Matthæusi 28:19, 20) Eqimattanulli taakkununnga ilaasut tamarmik piffissaq eqqorlugu anersaakkut inuussutissanik tunniusseqataasartussaappat? Apeqqut tamanna Biibilimi qanoq akineqarnersoq misissoriartigu.

7. Apustilit aallaqqaammut suna pingaarnertut suliassaraat, suliassarlu kingusinnerusukkut qanoq annertusineqarpa?

⁷ Jiisusip apustilini aqqaneq-marluk toqqarmagit, taakkua suliassaat pingaarnerpaaq tassaavoq nutaarsiassamik nuannersumik allanut oqaluussissutiginninnissaq. (Atuaruk  Markusi 3:13-15). Suliassaq tamanna oqaatsip grækerisuup apoʹstolos-ip isumavianut, oqaluummit “aallartitsineq”-mik isumaqartumit naggueqartumut, naapertuuppoq. Piffissalli ingerlanerani ilagiillu kristumiut ilusinikkiartortillugit apustilitut suliassaq nakkutilliisutut suliassanngorpoq. — Apustilit Suliaat 1:20-26; 15:1-22.

8, 9. (a) Apustilit aqqaneq-marluk pingaarnerpaamik suna ulapputigaat? (b) Siulersuisoqatigiinnit uppernarsarneqartutut kikkut aamma akisussaafferujussuaqalerpat?

⁸ Apustilit aqqaneq-marluk pingaarnerpaamik suna ulapputigaat? Tamanna piinsip ulluata kingorna pisunit erserpoq. Uillarnernut ullormut nerisassanik agguaanermut tunngatillugu isumaqatigiinngissuteqartoqalermat apustilit aqqaneq-marluk ajoqersukkanik katersortitsipput imalu oqarlutik: “Iluanngilaq Guutip oqaasia sumiginnarutsigu nerisassat isumaginissaat pillugu.” (Atuaruk Apustilit Suliaat 6:1-6). Taava apustilit qatanngutinik angutinik anersaakkut piumasaqaatinik eqqortitsisunik allanik ‘tamakkuninnga suliaqartussanngortitsipput’ apustilit namminneq ‘oqaatsimik kiffartuutiginninnermik’ aallussilluarsinnaaniassagamik. Aaqqissuussineq tamanna Jehovamit pilluaqquneqarpoq, “[Guutimmi] oqaasia siammariartorpoq, ajoqersukkallu Jerusalemimiittut amerliartuinnarput”. (Apustilit Suliaat 6:7) Tassa apustilit anersaakkut inuussutissanik agguaanermut akisussaanerpaatitaapput. — Apustilit Suliaat 2:42.

⁹ Piffissap ingerlanerani aamma allat akisussaafferujussuaqalerput. Anersaap illernartup siulersuineratigut Paulusi Barnabalu ilagiinnit Antiokiamiittunit ajoqersuiartortinneqarput. Aamma apustilitut ilisimaneqalerput, aqqaneq-marlunnut taakkununnga ilaanngikkaluarlutik. (Apustilit Suliaat 13:1-3; 14:14; Galatiamiut 1:19) Toqqagaanerat siulersuisoqatigiinnit Jerusalemimiittunit uppernarsarneqarpoq. (Galatiamiut 2:7-10) Tamatuma kinguninngua Paulusi anersaakkut inuussutissanik agguaaqataavoq allakkani isumassarsiarititaasut siulliit allakkamigit.

10. Kristumiut tanitat tamarmik ukiuni hundredelinni siullerni anersaakkut inuussutissanik piareersaaqataappat? Nassuiaruk.

¹⁰ Kristumiulli tanitat tamarmik oqaluussinermik nakkutilleeqataallutillu anersaakkut inuussutissanik piareersaaqataappat? Naamik. Apustili Paulusi ima allappoq: “Tamarmik apustiliusinnaanerpat? Tamarmik pruffiitiusinnaanerpat? Tamarmik ajoqersuisuusinnaanerpat? Tamarmik malunnangaartuliorsinnaanerpat?” (1 Korinthimiut 12:29) Paulusip matumani pivaa ilaannaat taamaassinnaasut. Kristumiut tanitat tamarmik oqaluusseqataapput, ikittuinnaalli — angutit assigiinngitsut arfineq-pingasuinnaat — allakkanik Kristumiut Allagaataanni Grækerisuuniittunik 27-nik allaqataapput.

Inussiaq aalajaatsoq ullumikkut

11. Pigisat suut inussiamut paarisassanngortinneqarpat?

¹¹ Matthæusi 24:45-mi Jiisusip oqaasiini erseqqippoq naggatissap nalaani nunarsuarmi suli inussiaqatigeeqarumaartoq aalajaallutillu silatuunik. Saqqummersitat 12:17-imi taakkununnga ilaasut arnap kinguaassaatut ‘allatut’, tassa kinguleruttutut, eqqartorneqarput. Kinguleruttut taakku eqimattatut Kristusip pigisaanik tamanik nunarsuarmiittunik paarsisussanngortinneqarsimapput. Pilittaasup aalajaatsup paarisassai tassaapput Naalakkap nunarsuarmi soqutigisai, taakkununngalu ilaapput Guutip naalagaaffiani innuttaasut nunamiusut pigisallu, soorlu naqiteriviit ataatsimiittarfiillu ‘inussiap’ nutaarsiassamik nuannersumik oqaluussissutiginninnermut tunngatillugu atortagai.

12, 13. Qanoq ililluni nalunnginneqarsinnaava qilaliarnissamik neriuuteqarluni?

¹² Kristumiup qanoq ililluni nalunngissinnaavaa qilaliarnissamik neriugisaqarnerluni anersaakkullu Israelikkunnut kinguleruttunut taakkununnga ilaanerluni? Tamatumunnga akissut apustilip Paulusip qilaliarnissamik neriuuteqaqatigisaminut oqaasiinit erserpoq: “[Guutip] Anersaavanit ingerlatinneqartut tamaasa Guutip qitornarai. Tunineqarsimanngilasimi anersaamik inussiaatitsisumik kingumut siooralersitsisumik, tunineqarsimavusili  anersaamik qitornaassuseqartitsisumik taassumuunalu ima torlulavugut: Abba, Ataataq! Anersaaq nammineq uagut anersaarput peqatigalugu nalunaajaavoq Guutip qitornarigaatigut. Qitornaaguttami kingornussisussaavuguttaaq, tassaalluta Guutip kingornussisussaatitai Kristusillu kingornussisussaaqatai; naallioqatigigatsigumi naalannarseqatigissavarputtaaq.” — Romamiut 8:14-17.

¹³ Allatut oqaatigalugu inuit taakku tamarmik immikkut Guutip anersaavanit illernartumit kinguaassiarineqarput qilammillu “qaaqqussummik” pisimallutik. (Hebræerit 3:1) Guutip taakku tamaasa immikkut qaaqquai. Taakkua ingerlaannaq qularatik annilaanganatillu Guutip qitornaasut kinguaassiarineqarnertik akueraat. (Atuaruk 1 Johannesi 2:20, 21). Tassa taamatut neriuuteqarnissartik namminneq aalajangerneq ajorpaat, Jehovalliuna taakku anersaaminik illernartumik naqissusertarai. — 2 Korinthimiut 1:21, 22; 1 Petrusi 1:3, 4.

Eqqortumik isiginnittaaseqarneq

14. Tanitat qaaqqusaanertik qanoq isigaat?

¹⁴ Tanitat qilammi akissarsisinneqarnissaminnut utaqqinerminni imminut qanoq isigisariaqarpat? Nalunngilaat qaaqqusissumik nuannerluinnartumik tunineqarsimagaluarlutik qaaqqusissutaannaasoq. Ajugaasup nersornaatisiassaa piumallugu toqumut allaat aalajaattariaqarput. Taamaattumik Paulusitut maniguullutik ima oqarput: “Qatanngutit, uanga nammineq pillunga isumaqanngilanga tigoreersimallugu, imaaliuinnarpungali: Kinguninniittut isumakkeerlugit siuninniittut isattorpakka; apuuffissaq anguniarpara ajugaasup nersornaatisiassaa piniarlugu, Guutip Kristusi-Jiisusikkut pavannga uatsinnut qaaqqusissutaa.” (Filippimiut 3:13, 14) Tanitat sapinngisartik tamaat iliuuseqartariaqarput ‘qaaqqusaanerminnut naapertuuttumik inuujumallutik, tamatigut qanilaartuullutik’, ‘mianerinnillutik uulillutillu’. — Efesosimiut 4:1, 2; Filippimiut 2:12; 1 Thessalonikamiut 2:12.

15. Kristumiut eqqaaniaalluni nalliuttorsiornermi assersuutinik ilangiisartut qanoq isigissavaat, aamma tanitat imminut qanoq isigippat?

¹⁵ Kristumiulli allat tanitaasorisoq eqqaaniaallunilu nalliuttorsiornermi assersuutinik ilangiisalersoq qanoq isigisariaqarpaat? Eqqartuuttussaanngilaat. Taassuma nammineq Jehovallu kisimik susassaraat. (Romamiut 14:12) Taamatut tanitaavissimasut immikkut soqutigineqarnissartik piumasarineq ajorpaat. Isumaqanngillat tanitaagamik immikkut ilisimasaqarlutik allaat ‘amerlangaartunut’ ilaasut misilittagaqarluartut ilaasa ilisimasaannik akimuisunik. (Saqqummersitat 7:9) Aamma isumaqanngillat  anersaamik illernartumik suleqatiminnit ‘savanut allanut’ ilaasunit tunineqarnerusarlutik. (Johannesi 10:16) Immikkut pineqartarnissaminnik piumasaqarnatillu isumaqanngillat assersuutinik ilangiisarnertik pissutigalugu ilagiinni utoqqaanertanit toqqakkanit qaffasinnerusumik inissisimaffeqarlutik.

16-18. (a) Tanitat tamarmik sallusuissutinik anersaakkut ittunik nutaanik saqqummiusseqataasarpat? Assersuuteqarit. (b) Sooq Siulersuisoqatigiit tanitanik tamanik isumasiuisariaqanngillat?

¹⁶ Tanitat nunarsuarmiittut tamarmik nunarsuaq tamakkerlugu attaveqarfigeqatigiittarpat sallusuissutinik anersaakkut ittunik nutaanik arlaatigut paasinarsisitseqataallutik? Naamik. Inussiaqatigiit eqimattatut anersaakkut inoqutigiinnik anersaakkut inuussutissanik pilersuinissaq akisussaaffigigaluaraat, inussiaqatigiinnut ilaasut tamarmiunngitsoq tamanna akisussaaffigaat imaluunniit suliassaraat. (Atuaruk 1 Korinthimiut 12:14-18). Soorlu eqqaaneqareersoq, ukiuni hundredelinni siullerni tamarmik oqaluussineq suliassaraat, ikittuarannguilli allakkanik Biibilimiittunik allaqataallutillu ilagiinnik kristumiunik nakkutilleeqataapput.

¹⁷ Assersuuteqariarta: Biibilimi eqqartorneqarpoq ajornartorsiummik suliarinninnermut tunngatillugu ‘ilagiit’ akuliuttut. (Matthæusi 18:17) Ilumoortumilli taamaallaat utoqqaanertat ilagiinnut sinniisuugamik tamanna iliuuseqarfigaat. Utoqqaanertat ilagiinnut ilaasortaasut tamaasa attaveqarfiginngilaat aalajangiinnginnerminni taakkua isumaat paasiniarniarlugit. Teokratii tunngavigalugu imminnut suliassiissutigineqartoq suliaraat ilagiillu sinnerlugit iliuuseqarlutik.

¹⁸ Taamatuttaaq ullumikkut tanitat ikittunnguit inussiaqatigiinnut sinniisuunissartik akisussaaffigaat. Taakku tassaapput Jehovap Nalunaajaasuisa Siulersuisoqatigiivi. Angutit tanitat taakku oqaluussinermik anersaakkullu inuussutissanik agguaanermik nakkutilliipput. Ukiuni hundredelinni siullerni Siulersuisoqatigiit pisimanerattut, ullumikkut Siulersuisoqatigiit aalajangiinnginnerminni inussiaqatigiinnut ilaasortaasut tamaasa isumasiorneq ajorpaat. (Atuaruk Apustilit Suliaat 16:4, 5). Jehovalli Nalunaajaasui tanitat tamarmik maanna katersuinermik pingaaruteqartumik ulapputiginningaarput. “Inussiaq aalajaallunilu silatooq” eqimattatut isigalugu timiuvoq ataaseq, tamatumunngali ilaasut tamarmik immikkut assigiinngitsunik suliassaqarput. — 1 Korinthimiut 12:19-26.

19, 20. Amerlangaartut ‘inussiamut aalajaallunilu silatuumut’ taassumalu Siulersuisoqatigiivinut qanoq oqimaaqatigiissumik isiginnittaaseqarpat?

¹⁹ Paasissutissat maannamut paaseriikkavut amerlangaartunut nunarsuarmi inuunissamik neriugisalinnut suli amerliartortunut qanoq sunniuteqartariaqarpat? Kunngip pigisaanut ilaagamik Siulersuisoqatigiit, ‘inussiamut aalajaallunilu silatuumut’ sinniisuusut, aaqqissuussaannik tapersersuinertik nuannaarutigisarpaat. Amerlangaartunut ilaasut anersaakkut inuussutissat Siulersuisoqatigiit siulersuineratigut piareersarneqartartut qujamasuutigingaarpaat. Inussiaqatigiinnik ataqqinnipput, taakkuninngali inuttut ataasiakkaatut ingasattumik pingaartitsinngillat. Kristumiup kialuunniit Guutip anersaavanik tanitaasup immikkut ataqqineqarnissani kissaatiginagulu piumasarinngilaa. — Apustilit Suliaat 10:25, 26; 14:14, 15.

²⁰ ‘Kiffaagaluarutta’ tanitanut kinguleruttunut ilaasut amerlangaartunulluunniit ilaagaluarutta, aalajangiusimatigu pilittaasumik aalajaatsumik taassumalu Siulersuisoqatigiivinik tamakkiisumik suleqatiginninnissarput. Qanortoq tamatta ‘eqqumallutalu’ naggatissamut aalajaakkisa. — Matthæusi 24:13, 42. (w09 06/15-E)

Eqqaamavigit?

• “Inussiaq aalajaallunilu silatooq” kinaava, kiffallu kikkuuppat?

• Inuup qanoq ililluni nalunngissinnaavaa qilammut qaaqqusaasimalluni?

• Kikkut anersaakkut inuussutissanik nutaanik piareersaanissamut akisussaanerpaatitaappat?

• Tanitat imminut qanoq isigisariaqarpat?

[Atuaqqissaarnermi apeqqutit]

[Qupp. 30-mi assiliartaq]

Ullumikkut Siulersuisoqatigiit inussiaqatigiinnut aalajaallutillu silatuunut sinniisuupput. Ukiuni hundredelinni siullerni assingusumik aaqqissuussaqarpoq.