Molaki yo a Botegago le Sehlopha sa Gagwe se Bušago
Molaki yo a Botegago le Sehlopha sa Gagwe se Bušago
“Ke mang yo ruri e lego molaki yo a botegago, yo a nago le temogo, yo mong wa gagwe a tlago go mmea gore a hlokomele sehlopha sa gagwe sa bahlanka gore a tšwele pele a ba nea tekanyo ya dijo tša bona ka nako e swanetšego?”—LUKA 12:42.
1, 2. Ke potšišo efe yeo Jesu a ilego a e botšiša ge a be a bolela ka pontšho e bopaganego ya mehla ya bofelo?
GE A BE a bolela ka pontšho e bopaganego ya mehla ya bofelo, Jesu o ile a botšiša potšišo ye: “Ke mang yo ruri e lego mohlanka yo a botegago le wa temogo, yo mong wa gagwe a mmeilego gore a hlokomele ba ntlo ya gagwe, gore a ba nee dijo tša bona ka nako e swanetšego?” Ke moka, Jesu o ile a tšwela pele ka go bolela gore mohlanka yo o tla putswa bakeng sa potego ya gagwe, a bewa gore a hlokomele dilo tša Mong wa gagwe ka moka.—Mat. 24:45-47.
2 Dikgwedi tše mmalwa pejana, Jesu o be a ile a botšiša potšišo e swanago le yeo. (Bala Luka 12:42-44.) O ile a bitša mohlanka yo gore ke “molaki” gomme a šupa “ba ntlo ya gagwe” e le “sehlopha sa gagwe sa bahlanka.” Molaki ke mohlokomedi wa ntlo goba molaodi yo a beilwego go hlokomela bahlanka. Lega go le bjalo, mohlokomedi le yena ke mohlanka. Mohlanka goba molaki yo, ke mang gomme o aba ‘dijo ka nako e swanetšego’ bjang? Go bohlokwa gore ka moka ga rena re lemoge mokero wo o dirišetšwago go aba dijo tša moya.
3. (a) Bahlalosi ba Mangwalo ba Bojakane ba lekile bjang go hlalosa polelo ya Jesu ya mabapi le “mohlanka”? (b) “Molaki” goba “mohlanka” ke mang gomme “bahlanka” goba “ba ntlo” ke bomang?
3 Gantši baboleledi ba bojakane ba bona mantšu a a Jesu a šupa go bao ba nago le maemo a boikarabelo gare ga batho bao ba ipolelago gore ke Bakriste. Eupša Jesu, yoo go ya ka papišo e lego “Mong,” ga se a ka a bolela gore go tla ba le lešaba la bahlanka leo le phatlaletšego dihlopheng tše fapana-fapanego tša Bojakane. Go e na le moo, o ile a bolela ka mo go kwagalago gore go tla ba le “molaki” o tee goba “mohlanka” o tee, yoo a tlago go mmea gore a laole le go hlokomela dilo tša gagwe ka moka. Ka gona, bjalo ka ge kgatišo ye e hlalositše gantši, molaki o swanetše go emela sehlopha sa “mohlatswana” wa barutiwa bao ba tloditšwego. Go ya ka taba e dikologilego yeo e lego Ebangeding ya Luka, Jesu o be a sa tšwa go bolela ka sehlopha se. (Luka 12:32) Polelwana ‘sehlopha sa bahlanka,’ goba “ba ntlo” e šupa go sehlopha se, eupša e tšweletša karolo yeo e kgathwago ke setho se sengwe le se sengwe sa sehlopha se. Go rotoga potšišo e kgahlišago, Na setho se sengwe le se sengwe sa sehlopha sa mohlanka se tšea karolo go neeng dijo ka nako e swanetšego? Karabo e ba molaleng ge re hlahloba ka mo go tseneletšego seo Mangwalo a se bolelago.
Mohlanka wa Jehofa Mehleng ya Bogologolo
4. Jehofa o ile a hlalosa bjang setšhaba sa Isiraele ya bogologolo gomme ke selo sefe se bohlokwa seo se swanetšego go elwa hloko mabapi le setšhaba seo?
4 Jehofa o boletše ka batho ba gagwe, setšhaba sa Isiraele ya bogologolo, e le mohlanka. “Lena le Dihlatse tša-ka, go realo Jehofa, le Mohlanka wa-ka, yo ke mo kgethilego.” (Jes. 43:10, PK) Mohlanka yoo o be a akaretša ditho ka moka tša setšhaba. Lega go le bjalo, go bohlokwa go lemoga gore ke baperisita le Balefi bao e bego e se baperisita feela bao ba bego ba e-na le boikarabelo ba go ruta setšhaba.—2 Kor. 35:3; Mal. 2:7.
5. Go ya ka Jesu ke phetogo efe e kgolo yeo e bego e tla direga?
5 Na setšhaba sa Isiraele ke mohlanka yo Jesu a bego a bolela ka yena? Aowa. Re tseba se ka baka la seo Jesu a se boditšego Bajuda ba mehleng ya gagwe, ge a be a re: “Le tla amogwa mmušo wa Modimo wa newa setšhaba seo se tšweletšago dienywa tša wona.” (Mat. 21:43) Go molaleng gore go be go tlo ba le diphetogo. Jehofa o be a tla diriša setšhaba se sefsa. Lega go le bjalo, ge go tliwa tabeng ya go ruta, modiro wa mohlanka wa seswantšhong sa Jesu o swana le wa “mohlanka” wa Modimo wa Isiraeleng ya bogologolo.
Mohlanka yo a Botegago o a Tšwelela
6. Ke setšhaba sefe se sefsa seo se ilego sa tšwelela ka Pentekoste ya 33 C.E. gomme ke bomang bao ba ilego ba ba karolo ya sona?
6 Setšhaba se sefsa, “Isiraele wa Modimo,” se bopilwe ka Isiraele wa moya. (Bagal. 6:16; Baroma 2:28, 29; 9:6) Se tšweletše ka morago ga go tšhollwa ga moya wa Modimo ka Pentekoste ya 33 C.E. Ka morago ga moo, Bakriste ka moka ba tloditšwego ka moya ba ile ba ba karolo ya setšhaba seo ga bjale se hlankelago e le mohlanka yo a kgethilwego ke Mong, yena Jesu Kriste. Setho se sengwe le se sengwe sa setšhaba seo se neilwe taelo ya go bolela ditaba tše dibotse le go dira barutiwa. (Mat. 28:19, 20) Eupša na setho se sengwe le se sengwe sa mohlanka woo se be se tla akaretšwa go neeng dijo tša moya ka nako e swanetšego? Anke re bone kamoo Mangwalo a arabago potšišo ye ka gona.
7. Modiro o mogolo wa baapostola mathomong e be e le ofe gomme modiro woo ka morago o ile wa oketšwa bjang?
7 Ge Jesu a be a kgetha baapostola ba gagwe ba 12, modiro wa bona o mogolo o be o akaretša go rongwa go yo bolela ditaba tše dibotse go ba bangwe. (Bala Mareka 3:13-15.) Kabelo ye e be e dumelelana le tlhaloso ya lentšu la Segerika apostolos, leo le tšwago modung wa lediri leo le bolelago “go rongwa.” Lega go le bjalo, ge nako e be e tšwele pele gomme phuthego ya Bokriste e be e le kgaufsi le go hlongwa, modiro wa baapostola o ile wa fetoga ‘wa bolebeledi.’—Dit. 1:20-26.
8, 9. (a) Ke modiro ofe o bohlokwa woo baapostola ba 12 ba bego ba tshwenyegile ka wona? (b) Ke bomang ba bangwe bao ba ilego ba newa boikarabelo bjo bogolo, go etša ge go ile gwa kgonthišetšwa ke sehlopha se bušago?
8 Ke modiro ofe o bohlokwa woo baapostola ba 12 ba bego ba tshwenyegile ka wona? Karabo e ka bonwa ditiragalong tšeo di ilego tša direga ka morago ga letšatši la Pentekoste. Ge go be go tsoga ngongorego mabapi le go abela bahlologadi dijo, baapostola ba 12 ba ile ba kgobokanya barutiwa gomme ba re: “Ga se mo go kgahlišago gore re tlogele lentšu la Modimo e le gore re abe dijo ditafoleng.” (Bala Ditiro 6:1-6.) Ke moka, baapostola ba ile ba kgetha banna ba moya bao ba swanelegago gore ba okamele “modiro wo wo o nyakegago”; e le gore baapostola ba ka ikgafela “bodireding bja lentšu.” Thulaganyo ye e ile ya tliša ditšhegofatšo tša Jehofa gomme “lentšu la Modimo la tšwela pele le gola, gomme palo ya barutiwa ya tšwela pele e ata kudu Jerusalema.” (Dit. 6:7) Ka gona boikarabelo bjo bogolo bja go fepa ba bangwe ka dijo tša moya e be e le bja baapostola.—Dit. 2:42.
9 Ge nako e dutše e e-ya, ba bangwe le bona ba ile ba newa boikarabelo bjo bogolo. Ka tlhahlo ya moya, phuthego ya Antiokia e ile ya kgetha Paulo le Baranaba bjalo ka baromiwa. Ba ile ba tsebja e le baapostola, le ge ba be ba sa akaretšwe go ba 12. (Dit. 13:1-3; 14:14; Bagal. 1:19) Go kgethwa ga bona go ile gwa kgonthišetšwa ke sehlopha se bušago seo se bego se le Jerusalema. (Bagal. 2:7-10) Nakwana ka morago ga moo, Paulo o ile a ba le karolo go neeng dijo tša moya. O ile a ngwala lengwalo la gagwe la mathomo le le buduletšwego.
10. Lekgolong la pele la nywaga, na ke Bakriste ka moka ba tloditšwego ka moya bao ba bego ba tšea karolo go lokišetšeng dijo tša moya? Hlalosa.
10 Lega go le bjalo, na Bakriste ka moka ba tloditšwego ka moya ba be ba okamela modiro wa boboledi le wa go lokišetša dijo tša moya? Aowa. Moapostola Paulo o re botša gore: “Ga se bohle e lego baapostola, na ga go bjalo? Ga se bohle e lego baporofeta, na ga go bjalo? Ga se bohle e lego barutiši, na ga go bjalo? Ga se bohle ba dirago mediro e matla, na ga go bjalo?” (1 Bakor. 12:29) Gaešita le ge Bakriste ka moka ba tloditšwego ka moya ba ile ba tšea karolo modirong wa boboledi, ke feela ba mmalwa—banna ba seswai ba fapa-fapanego—ba ilego ba dirišwa go ngwala dipuku tše 27 tša Mangwalo a Bakriste a Segerika.
Mohlanka yo a Botegago Mehleng Yeno
11. Ke “dilo” dife tšeo mohlanka a kgethetšwego go di hlokomela?
11 Mantšu a Jesu ao a begilwego go Mateo 24:45 a bontšha gabotse gore sehlopha sa mohlanka yo a botegago le wa temogo se be se tla ba se dutše se le gona mehleng ya bofelo. Kutollo 12:17 e bolela ka sona e le “ba šetšego” ba peu ya mosadi. E le sehlopha, mašaledi a a kgethilwe go dilo ka moka tša Kriste tša lefaseng. “Dilo” tšeo molaki yo a botegago a kgethetšwego go di hlokomela ke dilo tšeo Mong a di ratago mo lefaseng, tšeo di akaretšago balatedi ba Mmušo ba lefaseng le meago yeo e dirišetšwago go bolela ditaba tše dibotse.
12, 13. Mokriste o tseba bjang ge e ba a bileditšwe legodimong?
12 Mokriste o tseba bjang ge e ba a e-na le kholofelo ya go ya legodimong le ge e ba e le karolo ya mašaledi a Isiraele wa moya? Karabo e hwetšwa mantšung ao moapostola Paulo a a boditšego bao ba bego ba e-na le kholofelo ya go ya legodimong go swana le yena, ge a re: “Gobane bohle bao ba išwago ke moya wa Modimo, ba ke barwa ba Modimo. Gobane ga se la amogela moya wa bokgoba woo o bakago poifo gape, eupša le amogetše moya wa go amogelwa le le barwa, e lego moya wo ka wona re goeletšago ra re: ‘Aba, Tate!’ Moya wo ka bowona o hlatselana le moya wa rena gore re bana ba Modimo. Ka gona, ge e ba re le bana, re bile re bajabohwa: bajabohwa ka kgonthe ba Modimo, eupša bajabohwa-gotee le Kriste, ge feela re tlaišega gotee e le gore le rena re tagafatšwe gotee.”—Baroma 8:14-17.
13 Ka tsela e bonolo, batho ba ba tloditšwe ka Moya o Mokgethwa wa Modimo gomme ba ‘bileditšwe’ goba ba laleditšwe legodimong. (Baheb. 3:1) Ba biditšwe ke Modimo ka boyena. Bona ka lehlakoreng le lengwe ba arabela ka pejana ka ntle le go botšiša goba go belaela goba go boifa go tswalwa e le barwa ba Modimo. (Bala 1 Johane 2:20, 21.) Ka gona, ga ba ikgethele kholofelo ye eupša Jehofa o ba bea seka, goba o ba tlotša ka moya o mokgethwa.—2 Bakor. 1:21, 22; 1 Pet. 1:3, 4.
Pono e Nepagetšego
14. Batlotšwa ba lebelela go bitšwa ga bona bjang?
14 Bao ba tloditšwego ba swanetše go itebelela bjang ge ba dutše ba letile moputso wa legodimong? Le ge ba amogetše pitšo e kgahlišago ya legodimong, ba lemoga gore seo e fo ba feela pitšo. E le gore ba hwetše moputso wa bona ba swanetše go dula ba botega go fihla lehung. Ka boikokobetšo ba bolela mantšu a Paulo a rego: “Bana bešo, ga ke itšee ke šetše ke e swere; eupša se se lego gona ke gore: Ke lebala dilo tša morago gomme ke obelela dilo tša pele, ke phegelela pakaneng ya moputso wa pitšo ya godimo ya Modimo ka Kriste Jesu.” (Bafil. 3:13, 14) Mašaledi a batlotšwa a swanetše go dira sohle seo a ka se kgonago go ‘sepela ka mo go swanelago pitšo yeo a biditšwego ka yona, ka boikokobetšo bjo bo feletšego bja monagano,’ a dira bjalo “ka go boifa le go thothomela.”—Baef. 4:1, 2; Bafil. 2:12; 1 Bathes. 2:12.
15. Bakriste ba swanetše go lebelela bao ba jago diswantšhetšo nakong ya Segopotšo bjang, gona batlotšwa ba itebelela bjang?
15 Ka lehlakoreng le lengwe, Bakriste ba bangwe ba lebelela bjang motho yo a bolelago gore ke motlotšwa gomme a thoma go ja diswantšhetšo Segopotšong? Ga se a swanelwa go ahlolwa. Taba yeo e gare ga motho yoo le Jehofa. (Baroma 14:12) Lega go le bjalo, Bakriste bao ba tloditšwego ga ba nyake gore ba swarwe ka tsela e kgethegilego. Ga ba dumele gore go tlotšwa ga bona go ba nea bohlale bjo bohlokwa go feta bja ba bangwe ba “lešaba le legolo” bao ba nago le phihlelo. (Kut. 7:9) Ga ba dumele gore ka tshwanelo ba na le moya o mokgethwa go feta badirišani ba bona ba “dinku tše dingwe.” (Joh. 10:16) Ga ba letele go swarwa ka tsela e kgethegilego; goba go bolela gore go ja ga bona diswantšhetšo go ba dira gore ba phagamele bagolo ba kgethilwego ka phuthegong.
16-18. (a) Na batlotšwa ka moka ba tšea karolo go utolleng ditherešo tše difsa tša moya? Bontšha. (b) Ke ka baka la’ng go sa nyakege gore Sehlopha se Bušago se botšiše bohle bao ba bolelago gore ba tloditšwe pele se dira diphetho?
16 Na batlotšwa ba ka moka go dikologa lefase ba kgona go kopana bakeng sa go utolla ditherešo tše difsa tša moya ka tsela e itšego? Aowa. Gaešita le ge sehlopha sa mohlanka e le mmele o kopanego se e-na le boikarabelo bja go fepa balatedi ba Kriste ba tloditšwego, ga se bohle ba sehlopha sa mohlanka bao ba nago le boikarabelo goba kabelo e swanago ya mošomo. (Bala 1 Bakorinthe 12:14-18.) Ka ge go lemogilwe pejana lekgolong la pele la nywaga, bohle ba be ba tšea karolo modirong o bohlokwa wa boboledi. Eupša ke feela ba mmalwa bao ba ilego ba dirišwa bakeng sa go ngwala dipuku tša Beibele le go okamela phuthego ya Bokriste.
17 Ka mohlala: Mangwalo ka dinako tše dingwe a bolela ka “phuthego” e gata megato e itšego ya boahlodi. (Mat. 18:17) Le ga go le bjalo, ke bagolo feela bao ba gatago mogato wo bjalo ka baemedi ba phuthego. Bagolo ga ba botšiše setho se sengwe le se sengwe sa phuthego go kwa pono ya sona pele ba dira phetho. Ba kgatha tema yeo ba e abetšwego gomme ba gata mogato legatong la phuthego ka moka.
18 Ka mo go swanago, lehono banna ba mmalwa ba tloditšwego ba na le boikarabelo bja go emela sehlopha sa mohlanka. Ba bopa Sehlopha se Bušago sa Dihlatse tša Jehofa. Banna ba ba tloditšwego ka moya ba okamela modiro wa Mmušo le lenaneo la go aba dijo tša moya. Lega go le bjalo, go swana le lekgolong la pele la nywaga Sehlopha se Bušago ga se botšiše setho se sengwe le se sengwe sa sehlopha sa mohlanka pele se dira diphetho. (Bala Ditiro 16:4, 5.) Lega go le bjalo, Dihlatse ka moka tšeo di tloditšwego ka moya di tšea karolo ka mo go tseneletšego modirong o bohlokwa wa go buna woo ga bjale o tšwelago pele. E le sehlopha, “mohlanka yo a botegago le wa temogo” ke mmele o tee, eupša ka o tee ka o tee ba na le mediro e fapa-fapanego.—1 Bakor. 12:19-26.
19, 20. Ke pono efe e leka-lekanego yeo lešaba le legolo le nago le yona ka “mohlanka yo a botegago le wa temogo” le ka Sehlopha sa gagwe se Bušago?
19 Dintlha tše di lego ka mo godimo di swanetše go kgoma bjang ba lešaba le legolo le golago la dinku tše dingwe leo le nago le kholofelo ya go phela ka mo go sa felego lefaseng? E le karolo ya dilo tša Kgoši, ba thabela go latela ka botlalo dithulaganyo tšeo di dirilwego ke Sehlopha se Bušago, seo se emelago “mohlanka yo a botegago le wa temogo.” Ditho tša lešaba le legolo di leboga dijo tša moya tšeo di tšweletšwago ka tlhahlo ya Sehlopha se Bušago. Eupša ka nako e swanago, ka ge di hlompha sehlopha sa mohlanka, ditho tša lešaba le legolo di ba šedi gore di se ke tša phagamiša motho yo a bolelago gore ke setho sa mohlanka. Ga go na Mokriste yo a tloditšwego ka moya e le ka kgonthe yo a ka nyakago goba a letela gore a swarwe ka tsela yeo.—Dit. 10:25, 26; 14:14, 15.
20 Go sa šetšwe gore re “ba ntlo,” bao e lego ditho tša mašaledi a batlotšwa, goba re ditho tša lešaba le legolo, anke re ikemišetšeng go dirišana ka botlalo le molaki yo a botegago le Sehlopha sa gagwe se Bušago. Eka yo mongwe le yo mongwe wa rena a ka ‘dula a phakgame’ gomme a botege go fihla bofelong.—Mat. 24:13, 42.
Na o a Gopola?
• “Mohlanka yo a botegago le wa temogo” ke mang gomme ba ntlo ke bomang?
• Motho o tseba bjang ge e ba a bileditšwe legodimong?
• Ke mang yo a nago le boikarabelo bjo bogolo bja go lokišetša dijo tše difsa tša moya?
• Motlotšwa o swanetše go itebelela bjang?
[Dipotšišo tša Thuto]
[Seswantšho go letlakala 23]
Lehono, Sehlopha se Bušago se emela sehlopha sa mohlanka yo a botegago le wa temogo. Go be go e-na le thulaganyo e swanago lekgolong la pele la nywaga