Confianza mayordomomanta, Diospa Llaqtanpi Punta Apaqkuna

‘Qamkunaqa allin yuyayniyoq confianza mayordomo hinayá kaychik, paytam wasinpi patronnin churarqa sirvientemasinkunata imam horapi mikuchinanpaq.’ (LUC. 12:42.)

1, 2. ¿Imamantam Jesus rimarqa tukupay tiempopi imakuna pasananmanta rimaruspan?

TUKUPAY tiempopi imakuna pasananmanta rimaruspanmi, Jesusqa nirqa: “Qamkunaqa allin yuyayniyoq confianza sirviente hinayá kaychik, paytam wasinpi patronnin churarqa sirvientemasinkunata imam horapi mikuchinanpaq”, nispa. Qatiqninpim chay sirvienteta nirqa allin rurasqanrayku tukuy kapuqninkunapiña nanachikunanpaq (Mat. 24:45-47).

² Achka killa puntatapas Jesusqa yaqa chaynatam nirqa (leey Lucas 12:42-44). Chaypim sirvienteta suticharqa ‘mayordomowan’. Mayordomoqa huk wasimanta hinaspa sirvientemasinkunamanta encargakuq sirvientem. Hinaptinqa, ¿pitaq Jesuspa nisqan sirvienteqa otaq mayordomoqa?  ¿Imaynatam sirvientemasinkunata imam horapi mikuchin? Kaykunamanta yachayqa ancha allinmi, chaynapim yachasun Diospa imayna mikuchiwasqanchikmanta.

3. a) Jesuspa nisqan ‘sirvientemanta’, ¿pikuna kasqantam runakuna piensanku? b) ¿Pitaq ‘mayordomoqa’ otaq ‘sirvienteqa’, hinaspa pikunataq ‘sirvientemasinkunaqa’?

³ Achka runakunam ninku mayordomomanta otaq sirvientemanta Jesus nispanqa iglesiakunapi lliw punta apaqkunamanta rimasqanta. Kay rikchanachiypim ‘patronqa’ tupan Jesusman, payqa manam nirqachu iglesiakunapi achka sirvientekuna kasqantaqa. Payqa nirqam huk ‘mayordomolla’ otaq ‘sirvientella’ kananta, paymi patronninpa lliw kapuqninkunamanta nanachikunan karqa. Kay revistam achka kutita yachachirqa mayordomoqa “aslla” ovejakuna otaq hanaq pachaman riy suyaq llapan cristianokuna kasqanta. Lucas libropi nisqanman hinaqa mayordomomanta manaraq rimachkaspanmi Jesusqa paykunamantaqa rimarqaña (Luc. 12:32). ‘Sirvientemasinkuna’ nispanqa hina paykunallamantam rimachkan, ichaqa sapakamamantam. ¿Llapallankuchu encargakunku Diosmanta tiempollanpi yachachiwananchikpaq? Bibliapa nisqanta allinta estudiaspanchikqa yachasunchikmi kaymanta.

Jehová Diospa ñawpaq tiempopi sirvienten

4. a) ¿Imaynatam Dios suticharqa ñawpaq tiempopi Israel nacionta? b) ¿Pikunallam israelitakunata yachachiqku?

⁴ Ñawpaq tiempopim Israel nacionta Jehová Dios suticharqa sirvientey nispa, nirqam: “Qamkunam testigoy kankichik. Akllakusqay sirvienteymi kanki”, nispa (Isa. 43:10, NM). Qawasqanchikman hinaqa, Diospa akllasqan sirvienteqa lliw israelitakunam karqaku. Chayna kaptinpas, sacerdotekuna hinaspa Leviy ayllumanta kaqkunallam Israel casta runakunataqa yachachiqku (2 Cro. 35:3; Mal. 2:7).

5. ¿Imatam Jesus nirqa ñawpaq tiempopi Israel nacionmanta?

⁵ Sirvientemanta Jesus rimaspan, ¿ñawpaq tiempopi Israel nacionmantachu rimachkarqa? Manam. Judiokunatam Jesus nirqa: “Diospa munaychakusqanmanqa manam yaykunkichikñachu, chaymanqa yaykunqaku paypa munasqanman hina kawsaqkunañam [otaq mosoq nacionñam]”, nispa (Mat. 21:43). Qawasqanchikman hinaqa, Jehová Diosqa huk naciontañam akllanan karqa. Chayna kaptinpas Jesuspa rikchanachisqanpi sirvienteqa Diosmantam yachachinan karqa ñawpaq Israel nacionpi ‘sirviente’ hina.

Confianza sirviente rikurimusqanmanta

6. ¿Ima naciontaq rikurimurqa 33 watapi Pentecostes fiestapi, hinaspa pikunataq kanku?

⁶ Mosoq nacionqa otaq ‘Diospa cheqap akllasqankunaqa’ hanaq pachaman riy suyaqkunam kanku (Gal. 6:16; Rom. 2:28, 29; 9:6). Chay nacionqa rikurimurqa 33 watapim, Pentecostes fiestapi cristianokunaman chuya espiritunta Dios huntaykachiptin. Chay tiempomantam hanaq pachaman rinankupaq akllasqa kaqkunaqa chay nacionniyoqña kaspanku Jesuspa nombrasqan sirviente kanku. Paykunam kamachisqa karqaku allin noticiata willakunankupaq hinaspa yachachinankupaqpas (Mat. 28:19, 20). ¿Llapallankuchu encargakunanku karqa iñiqkunata Diosmanta yachachiypi? Qawasunchikyá Bibliapa nisqanta.

7. a) ¿Ima ruranankupaqmi apostolkunaqa puntata kamachisqa karqaku? b) Chaymanta, ¿ima llamkaytam chaskirqaku?

⁷ Jesusmi 12 apostolkunata akllarqa hinaspam kamachirqa allin noticiata willakunankupaq. Chaytam puntataqa rurananku karqa (leey Marcos 3:13-15). Chay rurasqankuqa tupanmi griego rimaypi apóstolos nisqanwan, kayqa “kamachisqa kay” ninanmi. Ichaqa congregacion rikurinanpaq kachkaptinmi, apostolkunaqa huk ‘oficioyoq’ karqaku otaq iñiqkunata nanachikuyta qallarirqaku (Hech. 1:20-26).

8, 9. a) ¿Ima ruraypim 12 apostolkuna Pentecostes pasayta kallpanchakurqaku? b) Diospa Llaqtanpi Punta Apaqkuna, ¿pikunatam akllarqaku sapaq ruraykunata ruranankupaq?

 ⁸ ¿Imata ruranankupaqmi apostolkunaqa kallpanchakurqaku? Yachanapaq qawasun Pentecostes qepata ima pasasqanta. Bibliam willawanchik viudakunaman mikuyta aypuptinku sasachakuy kasqanmanta. Chaymi apostolkuna lliw iñiqkunata huñuruspan nirqaku: “Sichum Diospa palabran yachachiyta dejarusaqku mikuyta servinaykupaq hinaptinqa manam allinchu kanman”, nispa (leey Hechos 6:1-6). Chaymi akllarqaku chuya espiritupa huntasqan yachayniyoq 7 runakunata ‘paykunaña’ chayta ruranankupaq. Chaynapi apostolkuna iñiqkunaman Diospa ‘palabranta yachachinankupaq’. Chayna tanteasqankutam Dios bendecirqa, chaymi “Diospa palabranta aswan-aswan willakuptinku llapa iñiqkuna aswan-aswan mirarqa Jerusalen llaqtapi” (Hech. 6:7). Qawasqanchikman hinaqa, apostolkunam iñiqkunataqa Diospa Palabranmanta yachachinanku karqa (Hech. 2:42).

⁹ Tiempopa risqanman hinam apostolkunaqa huk iñiqkunata akllarqaku sapaq ruraykunata ruranankupaq. Qawasun Pablomanta hinaspa Bernabeymanta. Chuya espiritupa yanapakuyninwanmi Antioquiapi iñiqkuna paykunata kamachirqaku nacionkunaman predicanankupaq. 12 apostolkunawan mana yupasqa kaspankupas, apostolmi karqaku (Hech. 13:1-3; 14:14; Gal. 1:19). Chaymantam Jerusalenpi kaq Diospa Llaqtanpi Punta Apaqkuna apostol kanankupaq nombrarqaku (Gal. 2:7-10). Pisi tiempollamantam Diospa espiritun yanapaptin Pabloqa punta cartanta qellqarqa, chaynapim iñiqkunata Diosmanta yachachirqa.

10. Punta pachak watapi, ¿llapallankuchu hanaq pachaman riy suyaqkuna encargakurqaku iñiqkunata yachachiypi?

¹⁰ Hanaq pachaman riy suyaqkuna, ¿llapallankuchu encargakurqaku iñiqkunata Diosmanta yachachiypi hinaspa predicacion imayna apakusqanta qawaypipas? Manam. Pablom qellqarqa: ‘¿Llapallanchu apostolkuna? ¿Llapallanchu Diosmanta willakuqkuna? ¿Llapallanchu yachachiqkuna? ¿Lliwchu milagrokunata ruranku?’, nispa (1 Cor. 12:29). Hanaq pachaman riy suyaqkunaqa llapallankum predicarqaku, ichaqa pusaqllam griego rimaypi Diospa Palabrantaqa qellqarqaku.

Kay tiempopi confianza sirvientemanta

11. ¿Imamantam mayordomoqa encargasqa kachkan?

¹¹ Mateo 24:45 nisqanmi allinta qawachin allin yuyayniyoq confianza sirviente kay tukupay tiempopi hinalla kananta. Paykunatam Biblia sutichan warmipa mirayninmanta ‘puchuqkuna’ nispa (Apo. 12:17, NM). Paykunamanmi encargasqa karqa Cristopa kay Pachapi tukuy kapuqninkuna. Patronninpa kapuqninkunata mayordomopa cuidananqa kachkan: kay Pachapi kawsakuy suyaqkuna hinaspa Diosmanta allin noticia predicanapaq tukuy ima servichikusqankupas.

12, 13. ¿Imaynatam cristianoqa yachanman hanaq pachaman rinanpaq suyakuyniyoq kasqanta?

¹² ¿Imaynatam cristianoqa yachanman hanaq pachaman rinanpaq suyakuyniyoq kasqanta hinaspa Diospa cheqap akllasqan kasqantapas? Qawasun hanaq pachaman riqmasinkunaman Pablopa nisqanta: ‘Diospa espiritunpa pusasqankunaqa llapallanmi Diospa churin. Chuya espiritutaqa chaskirqankichik manam sirvientekuna hina manchakuqllaña kanaykichikpaqchu aswanqa Diospa churinña kanaykichikpaqmi chaymi Diosta ninchik: “Taytalláy” nispa. Hina chuya espiritutaqmi sonqonchikpi willawaspanchik Diospa churinña kasqanchikta yachachiwanchik. Churinña rikurirusqanchikraykum prometekusqan herenciata Diosqa Jesucristomanwan kuska qowasunchik. Cristo hina ñakarispaqa paywan kuskataqmi hatunchasqa kasunchik’ (Rom. 8:14-17).

¹³ Hanaq pachaman riqkunaqa chuya espiritupa akllasqanmi kanku, hinaspam ‘hanaq  pachapi huñunasqa kanankupaq qayasqa’ kanku (Heb. 3:1). Jehová Diospunim paykunataqa invitan. Paykunañataqmi mana iskayrayaspa Diospa churin kanankupaq invitacionta chaskinku. Bibliam nin: “Qamkunataqa chuya Diosmi akllasurqankichik, chaytaqa llapaykichikmi yachankichik”, nispa (1 Juan 2:20). Manam paykunachu akllakunku chayna suyakuyniyoq kaytaqa, Diosmi chuya espiritunwan chaytaqa ruran (2 Cor. 1:21, 22; 1 Ped. 1:3, 4).

Imayna kanankumanta

14. ¿Imaynatam hanaq pachaman riy suyaqkuna qawanku Diospa qayasqan kasqankuta?

¹⁴ ¿Imatam kikinkumanta piensananku hanaq pachaman rinankupaq qayasqa kaqkunaqa? Paykunaqa yachankum hanaq pachaman rinankupaq suyakuyniyoq kasqankuqa invitacionlla kasqanta. Yachankum premiota chaskinankupaqqa wañukunankama kasukuq kanankuta. Humillakuspankum Pablo hina kaynata ninku: “Wawqe-panillaykuna, manaraqmi ñoqapas haypaniraqchu aswanqa ñawpaq rurasqaykunata qonqaruspaymi hamuq kaqkunata ruranaypaq kallpanchakuchkani. Carrerapi hinam kallpachkani chayanayman, chaynapi Jesucristontakama Diospa qayawasqan premiota chaskinaypaq”, nispa (Fili. 3:13, 14). Hanaq pachaman riqkunamanta qepaqkunaqa kallpanchakunankum ‘Diospa qayasqanman’ hina ‘humildadwan’ ‘manchakuywan hinaspa respetowan’ kawsanankupaq (Efe. 4:1, 2; Fili. 2:12; 1 Tes. 2:12).

15. ¿Imatam rurananchik Jesuspa wañukusqanta Yuyariptinchik huk iñiqmasinchik tantata mikuptin hinaspa vinota tomaptin? ¿Imaynataq paykunaqa kananku?

¹⁵ ¿Imatam rurananchik huk iñiqmasinchik hanaq pachaman riy suyakuyniyoq kasqanta nispan, Jesuspa wañukusqanta Yuyarinapaq huñunakuypi tantata mikuptin chaynataq vinota tomaptin? Manam juzgananchikchu, paymi Diosmanqa cuentata qonqa (Rom. 14:12). Chuya espirituwan nombrasqa kaqkunaqa manam suyankuchu hukkunamanta aswan allin qawasqa kaytaqa. ‘Sapaq ovejakunamanta’ otaq kay pachapi kawsakuy suyaq ancha experienciayoq cristianokunamantaqa, manam piensankuchu Bibliamanta paykuna aswan allinta entiendesqankuta nitaq chuya espirituwan aswan huntasqa kasqankutapas (Juan 10:16; Apo. 7:9). Manam  suyankuchu paykunalla aswan respetasqa kaytaqa nitaq piensankuchu ancianokunamanta aswan autoridadniyoq kasqankutapas.

16-18. a) Hanaq pachaman riy suyaq cristianokuna, ¿llapankuchu Bibliamanta chayllaraq entiendesqankuta yachachinku? Huk ejemplowan willarimuy. b) ¿Imanasqataq Diospa Llaqtanpi Punta Apaqkunaqa imatapas tanteaspankuqa mana tapunankuchu hanaq pachaman riy suyaq lliw cristianokunata?

¹⁶ Hanaq pachaman riy suyaqkuna Bibliamanta mosoq yachachikuyta entienderuptinku, ¿kanmanchu imapas llapallanku willanakuspa yachachinankupaq? Manam. Hanaq pachaman riq cristianokuna sirvientemasinkunata Diosmanta yachachinanku kaptinpas, sapakamam huk rurayniyoq kanku (leey 1 Corintios 12:14-18). Qawasqanchikman hinaqa, punta pachak watapiqa lliw cristianokunam predicarqaku, ichaqa wakillanmi Bibliapa libronkunata qellqarqaku hinaspa iñiqmasinkupa rurasqankuta qawaqku.

¹⁷ Ejemplopaq, wakinpim Bibliaqa nin pipas huchallikuruptin congregacion otaq ‘llapallanku’ chayta atiendenankuta (Mat. 18:17). Ichaqa, ‘llapallanku’ niptinpas congregacionpa rantinpi kaq ancianokunam atiendenku. Paykunaqa manam congregacionpi kaqkunatachu llapallanta tapunanku imatapas tanteanankupaqqa. Aswanmi ancianokunaqa ima ruranankupaq kamachisqa kasqankuta cumplinku hinaspa imatapas ruranku lliw iñiqkunapa rantinpi.

¹⁸ Chaynallataqmi, lliw hanaq pachaman riy suyakuyniyoq kaqkunamantaqa wakillanmi sirvientepa rantinpi imatapas ruranku. Paykunam kanku Jehová Diospa Llaqtanpi Punta Apaqkuna. Chaynataq Diospa Gobiernonpaq llamkayta qawanku hinaspa iñiqkunatapas yachachinku. Punta pachak watapi hinam Diospa Llaqtanpi Punta Apaqkuna imatapas tanteaspankuqa, mana tapunkuchu lliw hanaq pachaman riy suyaqkunataqa (leey Hechos 16:4, 5). Ichaqa, lliw hanaq pachaman riy suyaqkunam allin sonqoyoq runakunata Diospa llaqtanman huñuypi llamkanku. ‘Allin yuyayniyoq confianza sirvienteqa’ hanaq pachaman riy suyakuyniyoq llapan cristianokunam, ichaqa manam chayna rurayniyoqllachu kanku (1 Cor. 12:19-26).

19, 20. ¿Imaynatam kay Pachapi kawsakuy suyaqkunaqa qawananchik confianza ‘mayordomomanta’ Diospa Llaqtanpi Punta Apaqkunata?

¹⁹ ¿Imaynatam kay estudiopi yachasqanchik yanapanman kay Pachapi kawsakuy suyaqkunata? Cristopa kapuqninkuna kasqankuraykum tukuy sonqonkuwan kasukunku ‘allin yuyayniyoq confianza sirvientepa’ rantinpi kaq Diospa Llaqtanpi Punta Apaqkunapa nisqankuta. Paykunamanta yachachikuykuna chaskisqankumantam agradecekunku. Sirvienteta respetaspankupas cuidakunkum paykunata mana hatunchanankupaq. Diospa espiritunwan akllasqa mayqan cristianopas manam munanchu hatunchasqa kaytaqa (Hech. 10:25, 26; 14:14, 15).

²⁰ Hanaq pachaman riy suyakuyniyoq otaq kay Pachapi kawsakuy suyakuyniyoq kaspanchikpas, kallpanchakusunyá confianza mayordomomanta Diospa Llaqtanpi Punta Apaqkunata yanapanapaq. Rikchan-rikchan kaspayá tukupaykama kasukusunchik (Mat. 24:13, 42).

¿Yachankichu?

• ¿Pitaq “allin yuyayniyoq confianza sirviente”, hinaspa pikunataq ‘sirvientemasinkunaqa’

• ¿Imaynatam cristianoqa yachanman hanaq pachaman riy suyakuyniyoq kasqanta?

• ¿Pikunataq churasqa kachkan cristianokunapaq yachachikuykunata ruranankupaq?

• ¿Imaynatam kikinkumanta piensananku hanaq pachaman riy suyaqkunaqa?

[Kay yachachikuypa tapukuyninkuna]

[23 kaq paginapi dibujo]

Punta pachak watapi hinam, Diospa Llaqtanpi Punta Apaqkunaqa yuyayniyoq sirvientepa rantinpi kachkanku