Hunt’aq mayordomo Umalliq T’aqanpiwan

“¿Pitaq allin yuyayniyoq hunt’aq mayordomoqa? Paytan patronqa wasinpi kaqkunata kamachinanpaq churan, tiempollanpi kamachinkunaman mikhunatapas qonanpaq.” (LUC. 12:42.)

1, 2. ¿Imatan Jesús niran tukukuy p’unchaykunapi imakuna sucedenanmanta rimasqan qhepaman?

TUKUKUY p’unchaykunapiña tarikusqanchista yachanapaq imakuna sucedenanmanta rimasqan qhepamanmi Jesús kayta niran: “Allin yuyayniyoq hunt’aq kamachi hina kaychis. Paytan patronninqa wasinpi kaqkunata kamachinanpaq churarqan, tiempollanpi kamachinkunaman mikhunatapas qonanpaqwan”, nispa. Chaymantataq rimaran chay kamachi hunt’aq kasqanrayku premio chaskinanmanta, paytan patronnin churanman tukuy kaqninkunata qhawananpaq (Mat. 24:45-47).

² Huk kutipipas ñan Jesusqa chay hinata rimasqaña (leeychis Lucas 12:42-44). Chay kutipiqa kamachitan ‘mayordomo’ niran. Huk mayordomoqa patronninpa wasinpi kaqkunatan allinta qhawan, wasipi kaq llank’aqkunatapas kamachin. Chhaynaqa, ¿pin Jesuspa rimasqanpi kamachi otaq mayordomo? ¿Imaynatan chay kamachi tiempollanpi espiritual  mikhunata qon? Chay tapuykunaman kutichiyqa ancha importanten, yachananchismi imaynata Dios espiritual mikhuna qowasqanchista.

3. a) Bibliata t’aqwiq runakunaq nisqanman hina, ¿pikunan kanku Jesuspa rimasqan “kamachi”? b) ¿Pikunan kanku ‘mayordomo’ otaq “kamachi”, patronpa wasinpi kaq ‘kamachikunapas’?

³ Bibliata t’aqwiq askha runakunaq nisqanman hinaqa, kamachimanta otaq mayordomomanta Jesús rimaspaqa cristianoman tukuq religionkunapi umalliqninkumantas rimashanman karan. Ichaqa yuyarinanchismi, chay rikch’anachiypiqa manan Jesusqa niranchu llapa iglesiakunapi askha kamachikuna kananmanta. Payqa huklla ‘mayordomo’ otaq “kamachi” kananmantan rimaran, paymi tukuy kaqninkunata qhawanan karan. Kay revistapi askha kutitaña willasqanman hina, hunt’aq mayordomoqa Jesuspa ‘pisi t’aqa ovejankunamanta’ hawisqa qatikuqninkunan kanku. Lucas qelqa nisqanman hinaqa, chay t’aqamanta rimasqan qhepallamanmi Jesusqa hunt’aq mayordomomanta rimasqa (Luc. 12:32). Patronpa wasinpi kaq kamachikunamanta rimaspapas chay t’aqa cristianokunamantan rimashallantaq, ichaqa sapankankumanta. Chhaynaqa, ¿llapa hawisqa cristianokunachu tiempollanpi espiritual mikhuyta preparanku? Chayta yachananchispaq Bibliaq nisqanta t’aqwirisun.

Ñawpaq tiempopi Diospa kamachin

4. a) ¿Imanispan Jehová suticharan ñawpaq tiempopi Israel llaqtata? b) ¿Pikunallan Diospa kamachikuyninta llaqtaman yachachiranku?

⁴ Ñawpaq tiempopiqa Israel llaqtatan Jehová Diosqa kamachiy niran. Khaynatan niran: “Israel llaqtalláy, qankunaqa testigoykunan kankichis [askhamantan rimashan], akllakusqay kamachiy [hukllamantan rimashan]”, nispa (Isa. 43:10, NM). Qhawasqanchis hina llapa Israel runakunan Diospa kamachin karanku. Ichaqa sacerdotekunallan Leví runakunawan llaqtamanqa Diospa kamachikuyninta yachachiranku (2 Cró. 35:3; Mal. 2:7).

5. ¿Ima cambio kananmantan Jesús rimaran?

⁵ Chhaynaqa, kamachimanta Jesús rimaspa, ¿Israel llaqtamantachu rimasharan? Manan, judío runakunatan Jesús niran: ‘Diospa qhapaqsuyunqa qankunamanta qechusqan kanqa, paypa munayninman hina ruwaq [llaqtamantaq] qonqa’, nispa (Mat. 21:43). Chaypi nisqan hina, Jehová Diosqa huk mosoq llaqtatan akllanan karan. Chaywanpas, rikch’anachiypi Jesuspa rimasqan kamachimantaqa manan llapankuchu yachachinanku karan, imaynan ñawpaq tiempopi Diospa ‘kamachin’ Israel runakunapas mana llapankuchu yachachiranku hinata.

Hunt’aq kamachin rikhurin

6. ¿Ima llaqtan paqariran 33 wata Pentecostés fiestapi, pikunan chay llaqtapi tarikuranku?

⁶ Chay mosoq llaqta “Diospa cheqaq Israel llaqtanqa” hanaq pachapaq akllasqa cristianokunan kanku (Gál. 6:16; Rom. 2:28, 29; 9:6). Chay llaqtaqa 33 watapin rikhuriran, cristianokuna Diospa santo espiritunta chaskiqtinku. Chaymantapachan Diospa espiritunta chaskiq lliw cristianokuna chay llaqta ukhupiña tarikuranku, paykunan Patrón Jesuspa churasqan kamachi karanku. Chay llaqtapi kaqkunaqa llapallankun kamachisqa karanku allin willakuykunata predicanankupaq, runakunata Jesuspa qatikuqnin kanankupaq yanapanankupaqpas (Mat. 28:19, 20). Ichaqa, ¿llapankuchu preparankuman espiritual mikhunata? Qhawarisunchis chay tapuyman Bibliaq kutichisqanta.

7. a) ¿Ima llank’aytan ñawpaqta apostolkuna chaskiranku? b) ¿Ima llank’aytawanmi qhepaman chaskiranku?

⁷ Jesusqa 12 apostolkunata akllaspan allin willakuykunata predicamunankupaq kacharan. Chay llank’aytan paykunaqa hunt’ananku karan (leeychis Marcos 3:13-15). Predicanankupaq kachasqa kasqankuqa allintan tuparan apóstolos nisqa griego simiwan, chaymi “kachay” simimanta hamun. Ichaqa cristiana congregación qallarinanpaq pisillaña kashaqtinmi apostolkunaqa huk llank’aytawan  chaskiranku: ‘Umalli kanankupaq’ (Hech. 1:20-26).

8, 9. a) ¿Ima ruwaymanmi 12 apostolkuna qokuranku Pentecostés fiestamantapacha? b) ¿Pikunamanmi ancha chaniyoq llank’aykunata encargakuran, imatan qhepaman Umalliq T’aqa ruwaran?

⁸ Chaymantapacha, ¿ima ruwaymanmi apostolkuna qokuranku? Chayta yachanapaq qhawarisun Pentecostés fiesta qhepaman imachus sucedesqanta. Biblian willan viudakunaman mikhunata rakikusqanpi sasachakuy kasqanmanta. Chay hawan apostolkunaqa discipulokunata huñuspa niranku: “Ñoqaykupaqqa manan chaninchu Diospa simin yachachiyta saqespa yanapay rakiypi llank’anaykuqa”, nispa (leeychis Hechos 6:1-6). Chayraykun allin preparasqa hermanokunata churaranku chay ruwaymanta encargakunankupaq, chhaynapi paykuna Diospa siminmanta yachachiyman qokunankupaq. Chay decidisqankutaqa bendeciranmi Jehová Dios, chayraykun “Diospa siminmanta willakuyqa hinantinman chaya[ran], Jesuspi iñiqkunapas Jerusalén llaqtapi aswan-aswanta askhayarqan” (Hech. 6:7). Rikusqanchis hina, apostolkunaqa espiritual mikhuyta preparaypin llank’aranku (Hech. 2:42).

⁹ Qhepamanmi huk cristianokunaman encargakuran Dios serviypi ancha allin llank’aykunata aparinankupaq. Pablomanta, Bernabemantawan yachasun. Santo espirituq yuyaychasqanmi iskayninku Antioquía t’aqamanta misionero hina kachasqa karanku. Manaña chunka iskayniyoq apostolkunamantachu karanku chaypas, apóstol hinan reqsisqa karanku (Hech. 13:1-3; 14:14; Gál. 1:19). Qhepamanmi Jerusalén llaqtapi tarikuq Umalliq T’aqa paykunata nombraran apóstol kanankupaq (Gál. 2:7-10). Chay qhepallamanmi Pabloqa Diospa yuyaychasqan ñawpaqkaq cartanta qelqaran, chhaynapin paypas espiritual mikhuyta qoran.

10. Qallariy siglopi, ¿llapa hawisqa cristianokunachu espiritual mikhuyta prepararanku? Willay imarayku chhaynata kutichinki.

¹⁰ Ichaqa ¿llapa hawisqa cristianokunachu predicación aparikusqanta umalliranku espiritual mikhunatapas qoranku? Manan. Apóstol Pablon qelqaran: “Manan llapanchu apostolkunaqa kanku, manan llapanchu profetakunaqa kanku, manan llapanchu yachachiqkunaqa kanku, manan llapanchu milagro ruwaqkunaqa kanku”, nispa (1 Cor. 12:29). Santo espirituwan hawisqa cristianokunaqa llapankuña predicaranku chaypas, Griego rimaypi iskay chunka qanchisniyoq librokunataqa paykunamanta pusaq runakunallan qelqaranku.

Kay tiempopi hunt’aq kamachi

11. ¿Ima kaqninkunatan Patron hunt’aq kamachinman saqen?

¹¹ Mateo 24:45 textopi Jesuspa nisqanmantan sut’ita yachanchis kay tukukuy tiempopipas allin yuyayniyoq hunt’aq kamachi kashanallanta. Apocalipsis 12:17 texton chay t’aqamanta nin: ‘Warmiq Mirayninmanta kaq wakinkuna’, nispa. Chay t’aqamanmi Cristoqa kay Hallp’api lliw kaqninkunata saqen qhawananpaq. Mayordomoman saqesqan Patronpa kaqninkunaqa Diospa gobiernonta kasukuq lliw runakunan, hinantinman allin willakuykuna aparikunanpaq ruwasqa wasikuna ima.

12, 13. ¿Imaynatan huk cristiano yachan hanaq pachaman waqyasqa kasqanta?

¹² ¿Imaynatan huk cristiano yachanman hanaq pachapaq akllasqa kasqanta? Qhawarisunchis Pablo pay hina hanaq pachapaq suyakuyniyoq cristianokunata ima nisqanmanta. Kaytan niran: “Diospa Espiritunpa pusasqankunaqa Diospa wawankunan kanku. Santo Espiritutaqa chaskirqankichis manan yapamanta manchapakuypa kamachin kanaykichispaqchu, aswanpas Diospa wawankuna nisqa kaytan chaskirqankichis, chaymi Diosmantaqa mañakunkichis: ¡Yayalláy! nispa. Santo Espiritullataqmi espiritunchiswan kuska willakun Diospa wawankunapuniña kasqanchista. Wawankunachus kanchis chayqa, Diospa prometewasqanchis herenciatapas chaskisunmi. Chay herenciatan chaskisun  Cristowan kuska. Cristowan kuskachus ñak’arinchis chayqa, paywan kuskallataqmi hatunchasqa kapusunchis”, nispa (Rom. 8:14-17).

¹³ Kay cristianokunaqa Diospa santo espirituntan chaskinku, hinaspa hanaq pachaman ‘waqyasqa’ otaq invitasqa kanku (Heb. 3:1). Sapankankutan kikin Jehová Dios invitan. Paykunataq kaq rato Diospa wawan kanankupaq invitacionninta chaskinku mana iskayaspa mana manchakuspa. Biblian nin: ‘Qankunamanqa Diosmi santo espiritunta qorasunkichis, llapaykichismi cheqaq kayta reqsinkichis’ (1 Juan 2:20, NM). Chayraykun mana paykunachu suyakuyninkuta akllanku, Jehová Diosmi paykunataqa santo espiritunwan sellan (2 Cor. 1:21, 22; 1 Ped. 1:3, 4).

¿Imaynatan akllasqa cristianokuna qhawarikunku?

14. ¿Imaynatan hawisqa cristianokuna qhawarinku waqyasqa kasqankuta?

¹⁴ ¿Imaynatan qhawarikunanku hanaq pachaman waqyasqa cristianokuna? May sumaq invitaciontaña chaskinku chaypas allintan yachanku, invitacionlla kasqanta. Yachallankutaqmi premiota chaskinankupaq wañunankukama Diospaq hunt’aq kanankuta. Pablo hinan sientekunku, paymi niran: “Wawqe-panaykuna, ñoqa kikiypas manan chaymanqa aypaniraqchu, aswanpas kayllatan ruwashani: ñawpa kawsayniypi kaqkunata lliwta qonqapuspaymi, ñawpaqeypi kaqman aypanaypaq anchatapuni kallpachakushani, ñawpaqllamanpunin phawashani, Jesucristowan hukllachasqa kaspay premiota chaskinaypaq, chaypaqmi Diosqa hanaq pachaman waqyawarqan”, nispa (Fili. 3:13, 14). Chay akllasqa cristianokunamanta kay Hallp’apiraq kashaqkunaqa tukuy atisqankutan kallpachakunanku ‘Diospa waqyasqankuna hina allinta kawsanankupaq [...] huch’uyyaykukuywan’, “manchakuywan khatatataywan” (Efe. 4:1, 2; Fili. 2:12; 1 Tes. 2:12).

15. ¿Imaynatan qhawarinanchis huk iñiqmasinchis Conmemoracionpi t’antata mikhuqtin vinota ukyaqtin? ¿Imaynatan hawisqa cristianokuna qhawarikunanku?

¹⁵ ¿Imaynatan huk cristianota qhawarinanchis hanaq pachapaq akllasqan kani nispa Conmemoracionpi t’anta mikhuqtin, vinota ukyaqtin? Manan juzgananchischu, Jehová  Diosñan yachan akllasqachus icha manachus kasqanta (Rom. 14:12). Cheqaqpaqpuni akllasqa kaqkunaqa manan wakin cristianokunamanta aswan allin tratasqa kaytachu munanku. Manan akllasqa kasqankuraykuchu piensanku experienciayoq ‘ancha askha runakunamantapas’ astawanraq Bibliata entiendenankupaq (Apo. 7:9). Manataqmi creenkuchu ‘wak ovejamanta’ kaq cristianokunamanta aswan santo espirituyoq kanankupaq (Juan 10:16). Manan Conmemoracionpi t’antata mikhusqankuraykuchu vinota ukyasqankuraykuchu munanku aswan allin tratasqa kayta, nitaq congregacionpi umalliqkunamantapas aswan autoridadniyoq kanankupaqchu piensanku.

16-18. a) ¿Llapan hawisqa cristianokunachu rimanakunku Bibliapi mosoq yachachikuykunata willanankupaq? Ejemplota willay. b) ¿Imaraykun Umalliq T’aqa mana llapa hawisqa cristianokunataraqchu tapunan ima decidinanpaqpas?

¹⁶ ¿Rimanakunkuchu pachantinpi kaq akllasqa cristianokuna Bibliapi mosoq yachachikuykunata willanankupaq? Manan. Hunt’aq kamachimanta llapankuña Cristoq hawisqa wayqenkunaman espiritual mikhuyta qonanku chaypas, manan llapankuchu kaq llank’ayta aparinku (leeychis 1 Corintios 12:14-18). Ñawpaqpi qhawarisqanchis hina, qallariy siglopiqa llapan cristianokunan allin willakuykunata predicaranku, ichaqa wakillanmi Bibliapi librokunata qelqaranku cristiana congregaciontapas umalliranku.

¹⁷ Kaywan rikch’anachisun, mayninpin Biblia nin, ‘Iñiq t’aqan’ otaq congregacionmi comité judicial nisqapi huk iñiqmasita correginan, nispa (Mat. 18:17, Edición 1988). Ichaqa congregacionpi umalliqkunallan chaytaqa ruwanku. Paykunaqa manan sapanka iñiqmasikunatachu tapunku imata decidinankupaqpas. Paykunallan chaytaqa ruwanku llapa iñiqmasikunaq rantinpi.

¹⁸ Chhaynallataqmi, santo espirituwan hawisqa cristianokunamantapas pisilla hunt’aq kamachita representanku. Paykunan kanku Jehová Diospa testigonkunamanta Umalliq T’aqa. Kay cristianokunan umallinku Reinomanta predicayta espiritual mikhuytapas preparanku. Qallariy siglopi hina, Umalliq T’aqamanta cristianokunaqa manan sapanka hawisqa cristianokunatachu tapunku imata decidinankupaqpas (leeychis Hechos 16:4, 5). Ichaqa llapan hawisqa cristianokunan tukuy sonqowan allin willakuykunata predicanku. “Allin yuyayniyoq hunt’aq kamachi[qa]” huk cuerpo hinan, sapanka miembrokunataq ruwanayoqkama kanku (1 Cor. 12:19-26).

19, 20. ¿Imaynatan qhawarinku ancha askha runakunamanta kaqkuna ‘allin yuyayniyoq hunt’aq kamachita’ Umalliq T’aqantawan?

¹⁹ ¿Imaynatan kay estudiopi yachasqanchis yanapan ancha askha runakunamanta kaq cristianokunata? Kay cristianokunaqa “allin yuyayniyoq hunt’aq kamachi[q]” representanten Umalliq T’aqatan sonqomanta kasukunku. Paykunaqa agradecekunkun Umalliq T’aqaq preparasqan espiritual mikhuymanta. Respetankuña akllasqa cristianokunata chaypas, manan paykunata hatunchankuchu. Manan mayqen hawisqa cristianopas hatunchasqa kaytaqa munanchu (Hech. 10:25, 26; 14:14, 15).

²⁰ Akllasqa cristianokunamantaña, ancha askha runakunamantaña kanchis chaypas, yanapashallasunpuni hunt’aq mayordomota Umalliq T’aqantawan. Rikch’asqalla kashasun, kay tiempo tukukunankamataq Diospaq hunt’aq kasun (Mat. 24:13, 42).

¿Kutichiwaqchu?

• ¿Pikunan kanku “allin yuyayniyoq hunt’aq kamachi”, patronpa wasinpi kaq ‘kamachikunapas’?

• ¿Imaynapin huk cristiano yachan hanaq pachaman waqyasqa kasqanta?

• ¿Pin espiritual mikhunata preparan?

• ¿Imaynatan hawisqa cristianokuna qhawarikunanku?

[Tapuykuna]

[23 paginapi dibujo]

Ñawpaq siglopi hinan kay tiempopi Umalliq T’aqaqa ‘allin yuyayniyoq hunt’aq kamachita’ representan