Mbaʼérepa solterokuéra ikatu ovyʼa?

“OMENDA ha opa árare oiko hikuái vyʼápe.” Péicha ningo oñemohuʼã jepi umi kuénto mitãme g̃uarã. Ha umi pelíkula ha novéla upéichante avei, haʼetévaicha voi noñemendáirõ ndojevyʼamoʼãiva mbaʼe. Ha heta tetã rupi ojejopy umi kariaʼy ha kuñataĩme omenda hag̃ua. Peteĩ kuñataĩ hérava Debby ha orekóva 25 áño heʼi: “La hénte ningo ñanemokyreʼỹ ñamenda hag̃uánte voi. Haʼeténgo ku ñamendárõmante javyʼátava”.

Upéicharõ jepe, peteĩ ohayhu añetéva Ñandejárape nopensái upéicha. Pór ehémplo, yma ningo umi Israelgua omendajoa, péro la Biblia omombeʼu avei oĩ hague soltéro ha soltéra oikovaʼekue vyʼápe. Koʼág̃a rupi avei heta ermáno ha ermána odesidi nomendamoʼãiha, ha oĩ avei umi nomendáiva ndaikatúigui reínte. Upévare ikatu ñañeporandu: Ikatu piko peteĩ ermáno térã ermána nomendáiva oiko vyʼápe?

Jesúspe ningo oñemeʼẽvaʼekue peteĩ tembiapo ijetuʼúva, upévare haʼe nomendaivaʼekue. Ha Jesús voi heʼi hemimboʼekuérape oĩtaha ijapytepekuéra odesidíva avei nomendái (Mat. 19:​10-12). Heʼi avei peteĩ soltéro osẽ porã hag̃ua omoingevaʼerãha iñakã ha ikorasõme iporãnteha avei oiko omendaʼỹre.

Oĩ ningo umi odesidíva nomendamoʼãiha ikatu hag̃uáicha oiporupaite itiémpo Jehovápe g̃uarã. Péro, koʼãichaguápentepa oipytyvõta pe konsého Jesús omeʼẽvaʼekue? (1 Cor. 7:​34, 35.) Nahániri, ikatúnte avei oipytyvõ umi ermáno ha ermána omendasévape péro koʼag̃aitérõ ndotopáiva gueteri iñirũrã. Peteĩ ermána soltéra hérava Ana ha orekóva 30 áño árimi, heʼi: “Akokueheténgo peteĩ che kompañéro de traváho chemongetami de golpete. Cheaguara ningo añete upévare, péro pyaʼe aipeʼa che akãgui, pórke chéngo amendase peteĩ chepytyvõtavare añemoag̃uive hag̃ua Jehováre”.

Ánaicha avei heta ermána omendase Jehovápe oservívarente, ha upévare nomendáinte (1 Cor. 7:39; 2 Cor. 6:14). * Haʼekuéra ningo omombaʼe rupi Ñandejára heʼíva, oikosevénte haʼeño otopa peve imenarã. Mbaʼépa oikotevẽ hikuái oiko hag̃ua vyʼápe upéicha?

Jahechakuaavaʼerã umi nomendáiva ikatuha ojapo hetave mbaʼe

Mbaʼépa ikatu jajapo ñaime porã hag̃ua nañandegustapáiramo ñane situasión? Ñapensavaʼerã ikatuhánte avei javyʼa. Peteĩ ermána soltéra hérava Carmen ha orekóva cuarenta áño rupi, heʼi: “Avyʼa la arekóva reheve ha ndaikói apensa umi mbaʼe ndarekóivare”. Sapyʼánte ningo ikatu voi ndajavyʼái ha ñañeñandu ñaneaño. Péro tuicha ñanepytyvõ akóinte jajerovia hag̃ua Jehováre jaikuaávo heta ermáno oĩha avei ñane situasiónpe. Jehová ningo oipytyvõma  heta hembiguái soltérovape ojapo hag̃ua heta mbaʼe porã ha ogueropuʼaka hag̃ua umi mbaʼe vai ohasáva (1 Ped. 5:​9, 10).

Heta ermáno ha ermána ningo ohechakuaa nomendái haguére ikatuha ojapo hetave mbaʼe. Peteĩ ermána hérava Ester ha orekóva 35 áño ningo heʼi: “Chéverõ g̃uarã javyʼa hag̃ua jahechakuaantevaʼerã umi mbaʼe porã jahásava”. Carmen katu heʼi: “Amenda ha namendáipe amotenondéramo Jehovápe, haʼe nahakateʼỹichéne chéve mbaʼeve iporãvare” (Sal. 84:11). Upéi heʼi: “Ikatu ningo ndaikói yma aimoʼã haguéicha aikotaha, péro avyʼa ha asegíta aiko vyʼápe”.

La Biblia oñeʼẽ avei umi soltérore

Pór ehémplo, Jefté rajy ningo ndeʼirivaʼekue nomendamoʼãiha. Péro pe promésa itúva ojapovaʼekuére haʼe ohómante imitã guive oservi Jehová rógape. Oiméne upéva okambiaitéraʼe hekove, ndahaʼéi rupi peteĩ mbaʼe haʼe ohaʼarõva. Ha ndareíri ningo dos mése aja entéro hasẽ, pórke koʼág̃a nomendamoʼãvéima ha ndorekomoʼãvéima peteĩ família. Upéicharõ jepe haʼe ohechakuaa ndaivairiha la isituasión ha kyreʼỹme oservi Jehovápe oikove aja entéro. La Biblia omombeʼu voi una vés káda áño ohoha hendápe heta kuñataĩ Israelgua omokyreʼỹ ha oguerohory hag̃ua chupe upe mbaʼe porãite ojapóvare (Jue. 11:​36-40).

Yma Isaías tiémpope, oimevaʼerã ningo umi eunuco oñeñandu vai anga opensávo isituasiónre. La Biblia nomombeʼúi mbaʼérepa haʼekuéra eunuco, péro omombeʼu upévare ndaikatúi hague oike hikuái Israel kongregasiónpe, ndaikatúi avei omenda ni ifamília (Deu. 23:1). Upéicharõ jepe, Jehová oikuaa mbaʼéichapa oñeñandu umi eunuco ha oguerohory chupekuéra iñeʼẽrendu haguére chupe. Jehová opromete voi chupekuéra ‘omoĩtaha herakuéra hógape opa ára g̃uarã’. Upéva heʼise haʼe omeʼẽtaha chupekuéra tekove opaveʼỹva Jesús goviérno poguýpe. Ha Jehová ningo arakaʼeve ndahesaraimoʼãi chuguikuéra (Isa. 56:​3-5).

Jeremías káso katu idiferentevaʼekue. Ñandejára oiporavo rire chupe iprofetarã, heʼi chupe ani hag̃ua omenda oiko rupi peteĩ tiémpo ijetuʼuetereívape ha omeʼẽgui avei chupe hembiaporã ijetuʼúva. Jehová heʼi voi chupe: ‘Ani remenda ni ne família ko tetãme’ (Jer. 16:​1-4). La Biblia nomombeʼúi mbaʼéichapa Jeremías oñeñanduvaʼekue upe haguére, péro omombeʼu ovyʼa hague ojapóvo Jehová heʼíva (Jer. 15:16). Heta áño Jehová heʼi rire chupe upéva, ou ivaieterei la situasión Jerusalénpe dieciocho mése pukukue, ha oiméne ohechakuaarakaʼe iporãve hague nomendáinte (Lam. 4:​4, 10).

Mbaʼépa ikatu ojapo umi soltéro ovyʼave hag̃ua?

Jahecháma la Biblia oñeʼẽha heta soltéro rehe, umíva ningo ombaʼapo kyreʼỹ vaʼekue Jehovápe g̃uarã ha Haʼe oipytyvõ chupekuéra. Ha koʼág̃a rupi avei javyʼavéta ñambaʼapo kyreʼỹramo Jehovápe g̃uarã. Pór ehémplo, ikatu ñasẽ japredika, la Biblia heʼimavaʼekue voi hetaiterei kuña omombeʼuvaʼerãha pe marandu porã (Sal. 68:11). Umíva apytépe ningo oĩ hetaiterei ermána soltéra. Ha Jehová ningo ovendesi la ojapóva hikuái. Upévare  hetápema haʼekuéra oipytyvõ oservi hag̃ua Jehovápe (Mar. 10:​29, 30; 1 Tes. 2:​7, 8).

Peteĩ ermána hérava Loli catorce áñoma ojapo iprekursorádo. Ha haʼe heʼi: “Ko prekursorádo rupive ningo ahechakuaa ndahaʼeiha aime reínteva ko múndope. Ha heta la che rembiapo, upéva chepytyvõ ani hag̃ua añeñandu cheaño. Chéko chepyʼarory kaʼaruete vove, pórke ahechakuaa mbaʼéichapa aipytyvõ la héntepe predikasión rupive. Ha añetehápe chembovyʼaiterei upéva”.

Heta ermána soltéra ningo oaprende ótro idióma ikatu hag̃uáicha opredika umi oñeʼẽvape upe idióma. Pór ehémplo Ana, haʼe ningo vyʼapópe opredika umi oñeʼẽvape francéspe. Haʼe heʼi: “Che aikohápengo oĩ hetaiterei tetã ambuegua. Ha aaprende rupi ótro idióma añemongeta avei hendivekuéra. Upévare hetave mbaʼe ikatu ajapo predikasiónpe ha avyʼave avei”.

Umi nomendáiva ningo saʼive rresponsavilida oreko, ha heta oĩ oaprovecháva upéva oho hag̃ua opredika umi lugár oñekotevẽhápe. Pór ehémplo, peteĩ ermána hérava Lidiana ha orekóva 35 áño ohóma oipytyvõ heta tetãme. Haʼe ningo heʼi: “Ahechakuaa ñañehaʼãmbaitéramo ñambaʼapo Jehovápe g̃uarã hetaveha ñane amígo ha ñanderayhuveha ñande rapichakuéra. Ha heta tetãme areko che amíga ha enterovénte chepytyvõ avyʼave hag̃ua”.

La Biblia ningo omombeʼu Felipe orekoha cuatro itajýra soltéra oprofetisáva (Hech. 21:​8, 9). Haʼekuéra oiméne itúvaicha ombaʼapo kyreʼỹ Ñandejárape g̃uarã ha oprofetisáne avei hikuái oipytyvõ hag̃ua umi ermáno Cesareayguápe (1 Cor. 14:​1, 3). Upéicha avei, koʼág̃a rupi heta ermána ndofaltái rreunionhápe ha okomenta porã rupi omokyreʼỹ ermanokuérape.

Ikatu avei ñanemanduʼa Lidia rehe, haʼe ningo oikovaʼekue Filípospe (Hech. 16:​14, 15, 40). Ndajaikuaái ningo haʼépa soltéra térãpa viúda rakaʼe, péro imbaʼeporãiterei. Upévare hógape opytamivaʼekue umi superintendénte de sirkuíto, umíva apytépe Pablo, Silas ha Lucas. Ha koʼág̃a rupi avei upéicha jajapóramo jahupytýta heta mbaʼe porã.

Mbaʼépa ikatu ojapo hikuái ani hag̃ua oñeñandu haʼeño

Heta soltéro ha soltéra ovyʼáramo jepe oservi haguére Jehovápe, oikotevẽ avei ojehechauka chupekuéra ojehayhuha. Ha mbaʼépa ikatu ojapo umi soltéro ani hag̃ua oñeñandu haʼeño? Imanduʼavaʼerã hikuái Jehová ñanderayhuha, ñanepytyvõ ha ñanerenduha. Rréi David jepe sapyʼánte oñeñanduvaʼekue ‘haʼeño ha ndovyʼái’, péro oikuaa Jehová ikatuha oipytyvõ chupe upéicha jave (Sal. 25:16; 55:22). Haʼe voi heʼivaʼekue: ‘Che sy ha che ru cherejáramo jepe tyreʼỹ, nde Ñandejára reñangareko porãta cherehe’ (Sal. 27:​10, ÑÑB). Jehová ningo heʼi enterove hembiguáipe oñemoag̃ui hag̃ua hese, ha oiko hag̃ua iñamigoitéramo (Sal. 25:14; Sant. 2:23; 4:8).

Jehová organisasiónpe ningo ikatu jatopa heta ñanderayhúva ñande sy, ñande ru, ñane ermána ha ermánoicha ha upéva ñanembovyʼaiterei (Mat. 19:29; 1 Ped. 2:17). Yma ningo Dorcas ‘imbaʼeporã ha oipytyvõ umi oikotevẽvape’. Upévare ovyʼaiterei avei umi soltéro ha soltéra osegíva iñehémplo (Hech. 9:​36, 39). Loli omombeʼu:  “Ahahápente ningo aheka kongregasiónpe che amigarã cherayhu ha chepytyvõtava añeñandu vai jave. Rojokuaave hag̃ua katu añehaʼã chembaʼeporã ha ajepyʼapy hesekuéra. Aservíma ocho kongregasiónpe, ha katuete atopáva che amigarã. Ha ijapytepekuéra ningo oĩ umi ijedámava ha umi imitãvéva chehegui”. Péicha jahechakuaa opa kongregasiónpe oĩha oikotevẽva ojehayhu ha oñemoirũmi chupe. Jajepyʼapýramo upeichaguáre tuichaiterei ñaipytyvõta chupekuéra ha ñande avei javyʼáta japorohayhúgui ha ñanderayhúgui hikuái (Luc. 6:38).

Jehová ndahesaraimoʼãi chuguikuéra

La Biblia ohechauka enterove jajesakrifikavaʼerãha michĩmi jepe jaiko rupi peteĩ tiémpo ijetuʼúvape (1 Cor. 7:​29-31). Upévare jaguerohory ha ñamombaʼeterei umi nomendáivape iñeʼẽrendu rupi Ñandejárape, pórke ndoipotái hikuái iñirũrã peteĩ ndoservíriva Jehovápe (Mat. 19:12). Upéicharõ jepe haʼekuéra ikatúnte avei oiko vyʼápe.

Lidiana ningo heʼi voi: “Chéngo aiko vyʼápe, amotenondégui Jehovápe ha opa mbaʼe ajapóva chupe g̃uarã. Ha aikuaa oĩha umi omendáva oikóva vyʼápe ha oĩ avei umi noñontendéiva. Upévare ahechakuaa avyʼa hag̃ua natekotevẽiha amenda katuete”. Jesús niko heʼivaʼekue voi javyʼaveha ñameʼẽramo ñande rapichápe oikotevẽva ha jaservívo Ñandejárape. Ha upéva ningo enterovénte ikatu jajapo (Juan 13:​14-17; Hech. 20:35).

Javyʼaiterei ningo jaikuaágui Jehová ñanevendesitaha ñañehaʼã rupi jajapo opa mbaʼe haʼe oipotaháicha. La Bíbliape oñepromete voi ñandéve: ‘Ñandejára niko hekojojahína, ha ndahesaraimoʼãi umi mbaʼe pejapovaʼekuégui ha mborayhu pehechaukavaʼekuégui chupe’ (Heb. 6:10).

[Nóta]

[Nóta oĩva taʼanga ndive páhina 25]

“Avyʼa la arekóva reheve ha ndaikói apensa umi mbaʼe ndarekóivare.” (Carmen)

[Nóta oĩva taʼanga ndive páhina 26]

Loli ha Lidiana ovyʼa oho haguére opredika oñekotevẽhápe

[Nóta oĩva taʼanga ndive páhina 27]

Jehová ningo heʼi enterove hembiguáipe oñemoag̃ui hag̃ua hese