Paano Mangin Malipayon sa Pagkadiminyo?

“NAGPAKASAL sila kag nagkabuhi sing malipayon tubtob sa walay katubtuban.” Ini nga mga pinamulong amo pirme ang katapusan sang mga sugilanon para sa kabataan. Amo man sini ang mensahe sang mga pelikula kag nobela parte sa gugma—nga ang pagminyo nagaresulta sa matuod nga kalipay. Isa pa, sa kalabanan nga kultura, ginapalig-on gid nila nga dapat magminyo ang mga lamharon. “Ginapabatyag nila sa imo nga ang tulumuron lang sang mga babayi amo ang pagpamana,” siling ni Debby sang mga 25 anyos sia. “Siling nila, ang matuod nga pagkabuhi magasugod lamang kon minyo ka na.”

Indi subong sini ang ideya sang hamtong sa espirituwal nga tawo. Bisan pa ang pag-asawahay kinaandan na sa mga Israelinhon, ang Biblia nagasambit sang di-minyo nga mga lalaki kag mga babayi nga nangin malipayon sa ila kabuhi. Sa karon, ang iban nga mga Cristiano namat-od nga indi magminyo, apang ang iban nagpabilin nga di-minyo bangod sang mga kahimtangan. Ano man ang rason, importante nga binagbinagon ini nga pamangkot: Paano mangin malipayon ang isa ka Cristiano nga di-minyo?

Si Jesus mismo wala nangasawa, kag ini bangod sang buluhaton nga ginhatag sa iya. Nagsiling sia sa iya mga disipulo nga ang iban niya nga mga sumulunod “magahatag sang lugar” sa pagkadiminyo. (Mat. 19:10-12) Ginapakita ni Jesus nga agod mangin malipayon sa pagkadiminyo, dapat naton batunon ukon hatagan sang lugar, ini nga sahi sang pagkabuhi sa aton hunahuna kag tagipusuon.

Ang laygay bala ni Jesus naaplikar lamang sa mga hungod nga nagpabilin nga di-minyo agod makakonsentrar sing bug-os sa pag-alagad sa Dios? (1 Cor. 7:34, 35) Indi gid man. Binagbinaga ang kahimtangan sang isa ka Cristiano nga gusto na magminyo apang wala pa makakita sing nagakaigo nga tiayon. “Sining karon lang, wala ko ginapaabot nga pangaluyagan ako sang akon di-tumuluo nga katrabaho,” siling ni Ana nga isa ka di-minyo nga utod nga mga 30 na ang edad. “Daw batunon ko man tani sia, pero ginpunggan ko ang akon balatyagon kay ang gusto ko pamanahon amo ang isa nga makabulig sa akon nga mangin suod kay Jehova.”

Kaangay ni Ana, ang handum nga magminyo “lamang sa Ginuo” makabulig sa madamo nga utod nga babayi nga indi magminyo sa di-tumuluo. * (1 Cor. 7:39; 2 Cor. 6:14) Bilang pagsunod sa laygay sang Dios, ginhatagan nila sing lugar ang pagkadiminyo, bisan sa pila lang ka tion. Paano nila ini nahimo?

Tan-awa ang Positibo nga Bahin

Ang positibo nga panimuot makabulig sa aton agod batunon ang isa ka kahimtangan nga wala naton nagustuhan. “Nalipay ako sa akon natigayon, kag wala ko na ginahandum pa ang wala sa akon,” siling ni Carmen, isa ka dalaga nga utod nga mga 40 na ang edad. Huo, may mga tion nga nagabatyag kita sing kasubo ukon kapaslawan. Pero kon nahibaluan naton nga amo man sini ang naeksperiensiahan sang madamo nga kauturan sa bug-os  kalibutan, mapalig-on man kita nga magpadayon nga may pagsalig. Ginabuligan ni Jehova nga mangin malipayon ang madamo nga di-minyo kag malandas ang ila mga kabudlayan.—1 Ped. 5:9, 10.

Nasapwan sang madamo nga mga Cristianong lalaki kag babayi ang mga bentaha sang pagkadiminyo. “Sa banta ko ang sekreto agod mangin malipayon amo ang paghibalo sa mga positibo nga bahin sang bisan ano nga kahimtangan nga imo ginaatubang,” siling ni Ester, isa ka dalaga nga utod nga mga 35 na ang edad. “Makapamana man ako ukon indi, nagapati ako nga kon unahon ko ang intereses sang Ginharian, indi gid pag-idingot ni Jehova sa akon ang maayo,” dugang ni Carmen. (Sal. 84:11) “Indi man amo sini ang ginplano ko nga kabuhi, pero malipayon gihapon ako.”

Mga Halimbawa sa Biblia sang Pagkadiminyo

Ang bata nga babayi ni Jefte wala sing tuyo nga magpabilin nga di-minyo. Apang bangod sang panaad sang iya amay, kinahanglan niya mag-alagad sa santuaryo sugod sa iya pagkapamatan-on. Wala duhaduha nga ginbag-o sini ang iya personal nga mga tulumuron, kag masakit gid ini sa iya balatyagon. Duha ka bulan sia nga naglalaw bangod indi na sia makapamana kag makatigayon sing pamilya. Apang, ginbaton niya ini kag kinabubut-on nga nag-alagad sa bug-os niya nga kabuhi. Kada tuig, ang iban nga babayi sa Israel nagadayaw sa iya pagkamasinakripisyuhon.—Huk. 11:36-40.

Sang panahon ni Isaias, ang iban nga eunuco mahimo nasubuan sa ila kahimtangan. Wala ginsambit sang Biblia kon ngaa nangin mga eunuco sila. Pero bangod sini, indi na sila puede mangin bug-os nga katapo sang kongregasyon sang Israel, ukon makapangasawa pa kag mangin amay. (Deut. 23:1) Sa gihapon, nahangpan ni Jehova ang ila balatyagon, kag ginkahamut-an ang ila bug-os kalag nga pagtuman sa iya katipan. Ginsilingan niya sila nga makatigayon sila sing “handumanan” kag “ngalan nga dayon” sa iya balay. Buot silingon, ining matutom nga mga eunuco may paglaum nga magkabuhi sing dayon sa idalom sang Mesianikong paggahom ni Jesus. Indi gid sila malipatan ni Jehova.—Isa. 56:3-5.

Tuhay naman ang kahimtangan ni Jeremias. Sa tapos sia gintangdo subong manalagna, ang Dios nagsugo sa iya nga indi mangasawa bangod sang mabudlay nga kahimtangan sa iya tion kag sa sahi sang iya hilikuton. “Dili ka magpangasawa,” siling ni Jehova, “ukon mag-anak sing mga lalaki ukon mga babayi sa sini nga duug.” (Jer. 16:1-4) Wala ginpakita sa Biblia ang balatyagon ni Jeremias tuhoy sa sini, apang ginapasalig sini sa aton nga sia nagkalipay sa pulong ni Jehova. (Jer. 15:16) Pagligad sang pila ka tuig, sang naagyan ni Jeremias ang 18 ka bulan nga kalalat-an sa Jerusalem, pat-od nga nakita gid niya ang kaalam sa pagsunod sa sugo ni Jehova nga indi mangasawa.—Pan. 4:4, 10.

Mga Paagi Agod Mangin Mapuslanon ang Imo Kabuhi

Ang mga karakter sa Biblia nga ginsambit kaina mga di-minyo, apang nalipay sila sa pagsakdag ni Jehova kag sa pagtuman sang iya kabubut-on. Amo man sini karon, may mga buluhaton nga makabulig agod mangin mapuslanon ang aton kabuhi. Gintagna sang Biblia nga ang mga babayi nga nagabantala sing maayong balita mangin isa ka daku nga hangaway. (Sal. 68:11) Lakip sa ila amo ang guban sang linibo ka dalaga nga mga utod. Kon mangin mabungahon ang ila ministeryo,  makatigayon sila sing espirituwal nga mga anak.—Mar. 10: 29, 30; 1 Tes. 2:7, 8.

“Ang pagpayunir naghatag sing direksion sa akon kabuhi,” paathag ni Loli, nga nagapayunir na sa sulod sang 14 ka tuig. “Subong dalaga, nangin masako kag aktibo ako sa akon hilikuton, nga nagbulig sa akon agod indi masubuan. Malipayon gid ako pagkatapos sang isa ka adlaw nga pagministeryo bangod madamo ako sang nabuligan. Nagahatag ini sa akon sing daku nga kalipay.”

Madamo nga mga utod nga babayi ang nagtuon sing bag-o nga lenguahe, kag nagpasangkad sang ila ministeryo paagi sa pagbantala sa mga tawo nga may lain nga lenguahe. “Sa amon siudad, linibo ang mga dumuluong,” suno kay Ana nga ginsambit kaina. Malipayon sia nga nagabantala sa mga nagahambal sing Pranses. “Ang pagtuon sang lenguahe agod gamiton sa pagpakig-istorya sa ila nagabukas sa bag-o nga hilikuton, gani nangin makalilipay pa gid ang akon pagbantala.”

Bangod diutay lang ang obligasyon sang mga di-minyo, ginhimuslan ini sang kalabanan agod mag-alagad sa mga lugar nga mas daku ang panginahanglan. “Nagapati gid ako nga kon masako ka sa pag-alagad kay Jehova, mahapos lang makig-abyan kag magbatyag nga ginahigugma,” siling ni Lidiana, isa ka dalaga nga utod nga mga 35 na ang edad kag nagaalagad sa mga lugar nga may mas daku nga panginahanglan. “Madamo ako sing mga abyan nga naghalin sa lainlain nga pungsod, kag bangod sini nangin mas mapuslanon ang akon kabuhi.”

Ginasiling sang Biblia nga nagapanagna ang apat ka bata nga babayi ni Felipe nga mga dalaga. (Binu. 21:8, 9) Mahimo nga makugi man sila sa pag-alagad pareho sang ila amay. Mahimo nga gingamit nila ang ila dulot nga pagpanagna para sa kaayuhan sang ila masigka-Cristiano sa Cesarea. (1 Cor. 14:1, 3) Sa karon, madamo sing mga dalaga nga kauturan ang nagapalig-on sa iban paagi sa ila regular nga pagtambong kag pagpakigbahin sa Cristianong mga miting.

Sa pihak nga bahin, si Lidia nga isa ka Cristiano sang una sa Filipos, gindayaw sang Biblia tungod sang iya pagkamaabiabihon. (Binu. 16:14, 15, 40) Ang kaalwan ni Lidia—nga mahimo dalaga ukon balo—amo ang rason kon ngaa nangin malipayon sia sa pagpakig-upod sa mga nagalakbay nga manugtatap, kaangay nanday Pablo, Silas, kag Lucas. Amo man sini nga kinaiya ang nagadala sing kaanggid nga mga pagpakamaayo karon.

Pagpalangga

Luwas sa paghimo sing mapuslanon nga mga buluhaton agod mangin malipayon, tanan kita nagakinahanglan sing gugma kag pagpalangga. Paano ini matigayon sang mga di-minyo? Una, si Jehova handa sa pagpalangga, pagpabakod, kag pagpamati sa aton. Kon kaisa, si Hari David nagbatyag nga ‘mamingaw kag napiotan,’ apang nahibaluan niya nga handa si Jehova sa pagbulig sa iya. (Sal. 25:16, 55:22) “Kon magbiya sa akon ang akon amay kag akon iloy, niyan ang GINOO magasapopo sa akon,” sulat niya. (Sal. 27:10) Ginaagda sang Dios ang tanan niya nga alagad nga magpalapit sa iya, kag mangin suod niya nga abyan.—Sal. 25:14; Sant. 2:23; 4:8.

Dugang pa, sa aton bug-os kalibutan nga paghiliutod, mabatyagan naton ang gugma sang aton espirituwal nga mga amay, iloy, kag mga kauturan nga magabulig agod mangin mapuslanon ang aton kabuhi. (Mat. 19:29; 1 Ped. 2:17) Madamong di-minyo nga Cristiano ang nakasapo sing daku nga kalipay sa pag-ilog kay Dorcas, nga “madamo sing ginhimo nga maayong mga buhat kag ginhatag nga mga dulot tungod sa kaluoy.” (Binu. 9:36, 39) “Diin man ako magkadto,  nagapangita ako sing matuod nga mga abyan sa kongregasyon nga magapalangga kag magapalig-on sa akon kon masubuan ako,” paathag ni Loli. “Agod pabakuron ini nga pag-abyanay, nagapakita ako sing gugma kag interes sa iban. Nakapangalagad ako sa walo ka kongregasyon, kag pirme ako makasapo sing matuod nga mga abyan. Masami indi ko sila kaedad—kon kaisa halos mga lola ko na sila, kag ang iban mga tin-edyer pa lang.” Sa kada kongregasyon, may mga nagakinahanglan sing pagpalangga kag kaupod. Ang pagpakita sing sinsero nga interes makabulig sing daku sa ila kag mapaayawan ang aton handum nga maghigugma kag higugmaon.—Luc. 6:38.

Ang Dios Indi Gid Malipat

Ginapakita sang Biblia nga ang tanan nga mga Cristiano dapat maghimo sing pila ka pagsakripisyo sa sining mabudlay nga tion. (1 Cor. 7:29-31) Yadtong nagpabilin nga di-minyo agod matuman ang sugo nga magminyo lamang sa Ginuo dapat gid tahuron kag palanggaon. (Mat. 19:12) Apang, ining dalayawon nga pagsakripisyo wala nagakahulugan nga indi bug-os ang ila kalipay.

“May makalilipay ako nga kabuhi nga nasandig kay Jehova kag sa pag-alagad sa iya,” siling ni Lidiana. “May kilala ako nga mga minyo na, ang iban sa ila malipayon pero ang iban indi. Gani nagapati ako nga ang akon kalipay wala nagadepende sa kon makapamana ako ukon indi.” Subong ginpadaku ni Jesus, ang kalipay nasandig sa paghatag kag pag-alagad, nga masarangan gid himuon sang tanan nga Cristiano.—Juan 13:14-17; Binu. 20:35.

Sa pagkamatuod, ang pinakadaku nga rason sang pagkalipay amo ang paghibalo nga pakamaayuhon gid ni Jehova ang bisan ano nga sakripisyo naton sa pagtuman sang iya kabubut-on. Ang Biblia nagapasalig sa aton: “Ang Dios indi di-matarong nga kalimtan ang inyo binuhatan kag ang gugma nga ginpakita ninyo para sa iya ngalan.”—Heb. 6:10.

[Nota]

[Retrato sa pahina 25]

“Nalipay ako sa akon natigayon, kag wala ko na ginahandum ang wala sa akon.” —Carmen

[Blurb sa pahina 26]

Si Loli kag si Lidiana malipayon nga nagaalagad sa lugar nga may mas daku nga panginahanglan

[Retrato sa pahina 27]

Ginaagda sang Dios ang tanan niya nga alagad nga mangin suod sa iya