Wãwen Ro Ejelok Beleir Rej Lo Lõñliñ

“IM RAR mare im mõnõnõ iben dron toõn wõt air mour.” Ekkã air kwalok nan kein ilo jemlokõn inoñ ko an ajiri ro. Pija im buk ko rej kwalok kin yokwe eo ebwilbwil ikõtan lio im leo rej kalikar ejja lemnok in wõt bwe ñõn am lo mõnõnõ kwoj aikwij mare. Bareinwõt, enañin aolep mõntin ailiñ ko rej jibed jiroñ im likao ro bwe ren mare. Debby ej ba ikijen ien eo ke ear 20 jima an yiõ, “Armij rej kõmõn bwe kwon lemnok bwe mejenkajik eo wõt an juõn jiroñ ej ñõn mare. Rej kwalok lemnok eo bwe enaj emõnlok ar mour wõt elikin ar mare.”

Juõn armij ej bõk lemnok eo an Jeova eban kõtlok bwe lemnok rot in en jelet e. Meñe ear juõn mõnit ibwiljin dri Israel ro ñõn mare, Baibel eo ej konono kin limaro im lõmaro rar jab belele me rar lo jerammõn ilo mour ko air. Ranin, jet dri Kristian ro rej kãlet ñõn jab mare, bõtab elõñ ro jet rejjab mare kin wãwen ko ibeir. Jekron ta un eo unin air jab mare, ejjab oktõk kajitõk in: Ewi wãwen juõn dri Kristian emaroñ lo tõbrõk ilo an ejelok belen?

Jisõs mõke ear ejelok belen, jemelele men in ñe jej lemnok kin jerbal eo kar lelok ñõn e. Ear jiroñ dri kalor ro an bwe jet ian ro dri kaloran enaj kar bareinwõt ejelok beleir elañe eo air “maroñ.” (Mat. 19:​10-​12) Ilo wãwen in, Jisõs ear kwalok bwe ñõn lo tõbrõk kin an ejelok beled, jej aikwij mõnõnõ in bõk ak kõtlok bwe wãwen mour rot in en ber ilo buruer im lemnok ko ar.

Nan in kakabilek eo an Jisõs ej jerbal wõt ke ñõn eo ej mõke kãlet ñõn jab belele bwe en wujleplok aolepen an ilo jerbal eo an Anij? (1 Kor. 7:34, 35) Jab aolep ien. Lemnok kin wãwen ber eo an juõn dri Kristian me emaroñ kõnan mare ak ejjab maroñ lo juõn eo emõn ñõn an mareiki. Juõn sister ejelok belen im 30 jima an yiõ etan Ana, ear ba: “Jet ran ko remotlok, iar ilbõk ke juõn armij jen jikin jerbal me ejjab juõn ian Dri Kennan ro an Jeova ear kajitõk an mareik iõ. Ilo juõn wãwen iar mõnõnõ, bõtab iar mõkõj im kabwijrõk iñjake in kinke ikõnan mare wõt juõn eo me enaj karuaklok iõ ñõn Jeova.”

Kõnan eo ñõn mare wõt “ilo Iroij” ej jibõñ elõñ sister ro einwõt Ana ñõn bõpraik air mareik juõn dri jab tõmak. * (1 Kor. 7:​39; 2 Kor. 6:​14) Kin air koutiej nan in kakabilek eo an Anij, rej bebe ñõn jab belele, ilo tõre in. Ewi wãwen remaroñ lo tõbrõk ilo air kõmõne men in?

Katak ñõn Lemnok Wõt kin Men ko Remõn

Wãwen ar lemnok emaroñ jibõñ kij ñõn mõnõnõ wõt kin wãwen eo jej ber ie, meñe jar jab kãlet ñõn ber ilo wãwen in. Carmen, juõn sister 40 jima an yiõ im ejañin mare ear ba: “Ij lõñliñ kin men ko eor iba, im ijjab ettõnak kin men ko ejelok iba.” Emol, emaroñ or ien me jej ebwer ak buromõj kin ar mõke iar. Bõtab ar jela bwe ro jeer im jãter  ibelakin lõl rej ion ejja wãwen in wõt emaroñ kakajur kij ñõn wõnmanlok wõt ilo beran. Jeova ear jibõñ elõñ ro ejelok beleir ñõn lo tõbrõk im ñõn kamarmir abañ ko jet.​—1 Pit. 5:​9, 10.

Elõñ man im kõra ro jeer im jãter rej lo tokjen eo kin an ejelok beleir. Ester, juõn sister ejañin mare im 30 jima an yiõ ej ba: “Ij lemnok bwe wãwen eo ñõn lo mõnõnõ ej ikijen am maroñ lõñliñ wõt kin men ko remõn jekron ta men ko rej walok ñõn yuk. Ij tõmak bwe jekron ñe ij mare ak jab, elañe ij likit Ailiñ in Anij moktata, Jeova ejamin drebij jabrewõt men ko remõn jen iõ.” (Sam 84:11) Ej wõnmanlok wõt im ba: “Wãwen mour eo aõ kiõ emaroñ jab wãwen eo iar kõtmene kake, ak ij mõnõnõ wõt im enaj eindrein manlok wõt.”

Wanjoñok ko ilo Baibel kin Ro Rar Jab Belele

Lio nejin Jepta ear jab lemnok bwe eban belele. Bõtab kin kalimur eo an jemen ear aikwij ilok im jerbal ilo jikin eo ekwojarjar jen ien eo ear juõn jiroñ manlok. Ejelok berre bwe jerbal in ear jab kõtmene kake ear ukot bebe ko an im kejekron eñjake eo an ñõn kõnan mare. Ear buromõj iomin ruo aliñ ke ear kile bwe ejamin naj mare im or an baamle. Meñe eindrein, ear errã kin wãwen eo ear walok im ear mõnõnõ in jerbal toõn wõt an mour. Kajjojo yiõ, jet ian kõra in Israel ro rar nebar e kin an kwalok jitõb in karmijeteik e mõke.​—Ekaj. 11:​36-​40.

Jet ian dri eunõk ro * ilo ran ko an Aiseia remaroñ kar buromõj kin wãwen ber eo air. Baibel eo ejjab kwalok kin un eo unin rar erom juõn dri eunõk. Kin air kar eindrein, rar jab maroñ bõk kwonair ilo aolep makõtkit ko an ailiñ in Israel ak mare im neje. (Dut. 23:1) Bõtab Jeova ear melele kin iñjake ko air im ear nebar ir kin air bokake bujen eo an joñõn wõt air maroñ. Ear jiroñ ir bwe enaj kar lelok ñõn ir juõn ‘men in kakememej’ im “juõn ãt ñõn in drio” ilo mweo imõn. Ilo bar juõn wãwen, dri eunõk rein retiljek renaj kar bõk kejatrikrik eo ñõn mour in drio iomin Iroij eo an Messaia eo, Jisõs. Jeova ejamin naj kar meloklok ir.​—Ais. 56:​3-5.

Wãwen ko iben Jeremaia rar lukkun oktõk. Elikin an kar jitõñ Jeremaia einwõt juõn dri kanan, Anij ear jiroñ e bwe en jab belele kinke ear mour ilo ien ko rebin im kin wãwen jerbal eo an. Jeova ear ba: “Kwon jab belele ak wor nejũm ajiri ilo jikin rot in.” (Jer. 16:​1-4, UBS) Meñe Baibel eo ejjab kwalok iñjake ko an Jeremaia kin nan in jiroñ kein, ej jiroñ kij bwe ear juõn armij ear lõñliñ kin nan ko an Jeova. (Jerm. 15:16, UBS) Ilo yiõ ko tokelik ke kar nitbwili Jerusalem iomin 18 aliñ im Jeremaia ear kijenmij ilo ien in ekanuij nana, ejelok berre ear lo bwe ej juõn menin meletlet ñõn bokake kien eo an Jeova ñõn jab belele.​—Liãj. 4:​4, 10, UBS.

Wãwen ko ñõn Kamõnõnõik Mour eo Am

Armij ro ilo Baibel eo me kar kwalok kaki ir ilõñ rar jab belele, ak rar lo an Jeova rejetak ir im rar wujleplok ir ñõn jerbal eo an. Ejja einlok wõt ilo ran kein, makõtkit ko elap tokjeir remaroñ kamõnõnõik mour eo ar. Baibel eo ear kanan bwe kõra ro rej kwalok kin nuuj eo  emõn renaj kar erom juõn jar elap. (Sam 68:11) Ibwiljin jar in elap ej tausan kõra ro rejañin mare. Ke jerbal in kwalok nan eo air ear jebar leen, elõñ iair rar lo jerammõn kinke ear maroñ or ajiri ro nejiir ilo jitõb.​—Mark 10:​29, 30; 1 Tes. 2:​7, 8.

Elikin 14 yiõ in an ber ilo jerbal in, Loli ej kemelele: “Jerbal in pioneer ej kõmõn bwe en lap tokjen mour eo aõ mõke. Einwõt juõn eo ejañin mare, ij boub ilo aõ kõmõne elõñ makõtkit ko me rej jibõñ iõ ñõn bõprae aõ buromõj kin aõ mõke iaõ. Ij juburu jemlokõn kajjojo ran kinke imaroñ lo bwe jerbal in kwalok nan eo aõ ej lukkun jibõñ armij. Men in elap an kalõñliñ iõ.”

Elõñ sister ro rar maroñ katak juõn kajin ekãl, im emwij air kalaplok jerbal in kwalok nan eo air ikijen air kwalok nan ñõn armij ro eoktõk kajin ko air. Ana, eo me kar konono kake moktalok, ej ba: “Ilo jikin eo ij jokwe ie, elõñ tausan armij ro jen ailiñ ko jet.” Emõn iben liin kwalok nan iben armij ro rej konono kajin France. Ej wõnmanlok wõt im ba: “Katak juõn kajin me imaroñ kajerbale ñõn konono iben elõñ ian rein ear kebellok juõn jerbal ekãl im ear kõmõn bwe jerbal in kwalok nan eo aõ en lukkun kaitoktoklimo.”

Kinke ro ejelok beleir edriklok air erro, jet rar kortokjen wãwen eo ibeir bwe ren jerbal ijoko me elaplok aikwij ie. Lidiana, juõn sister ejañin mare im 30 jima an yiõ me ear jerbal ilo ene ko elaplok aikwij ie, ej ba: “Ij lukkun tõmak bwe ñe elap am boub ilo jerbal eo an Jeova enaj birurulok am kõmõn jimjera ko rebak im iñjake bwe ro jet rej yokwe yuk. Elõñ iar kõmõn jimjera ko rebak ibeir me rej armij ro reoktõk jen dron im rej itok jen ailiñ ko jet, im jimjera kein elap air kamõnõnõik iõ.”

Baibel eo ej konono kin dri evanjel eo Pilip me ear or emen jiroñ ro nejin me rar jab belele im rar dri kanan. (Jerb. 21:​8, 9) Einwõt jemeir rar kwalok air kijejeto kin jerbal ko air. Remaroñ kar kajerbal menin letok ko ñõn kanan ñõn tokjen eo an dri Kristian ro mõtair ilo Seseria. (1 Kor. 14:​1, 3) Ranin elõñ ian sister ro rejañin mare rej bareinwõt kõkãtõk ro jet kin air keini air ber im bõk kwonair ilo kwelok ko an Kristian.

Ijo turãjet, Lidia ear juõn ian dri Kristian ro ilo Pilippai me Baibel eo ej nebar e kin an kwalok jitõbõn karuwainene. (Jerb. 16:​14, 15, 40) Lidia eo me bwelen ejañin kar mare ak emij leo belen ear kwalok jitõbõn karuwainene, men in ear kamaroñ e ñõn kõmao iben overseer ro rar itoitak einwõt Paul, Sailas, im Luk. Ranin, ar kwalok kain jitõb rot in ej bõktok ejja jerammõn ko wõt.

Kabwe Aikwij eo ñõn Lo Yokwe

Ijellokin ar baj kõmõni makõtkit ko raurõk ilo mour ko ar wõt, kij aolep eor iber iñjake eo bwe ro jet ren yokwe kij. Ewi wãwen armij ro ejelok beleir remaroñ kabwe aikwij in? Moktata, ien otemjej Jeova ej ber ñõn yokwe kij, ñõn kakajur kij im ñõn roñjake kij. Jet ien, Kiñ Devid ear iñjake an ‘mõke ian, im jorran,’ bõtab ear jela bwe emaroñ reilok ñõn Jeova kin jibõñ. (Sam 25:16; 55:22) Ear je: “Bwe jema im jinõ r’ar illok jen ña, a Jeova e naj bõk iõ.” (Sam 27:10) Anij ej kirtok aolep ro dri korijeran ñõn druaklok ñõn e, bwe ren erom ro jeran rebak.​—Sam 25:14; Jem. 2:​23; 4:⁠8.

Bareinwõt, ilo rolul in jimjãn jãtin eo ibelakin lõl, jemaroñ lo ro jemer, jiner, man im kõra ro jeer im jãtir ilo tõmak me yokwe eo air enaj kamõnõnõik kij. (Mat. 19:29; 1 Pit. 2:​ 17) Elõñ sister ro me rejañin belele rej lo elap lõñliñ ilo air lor joñok eo an Dorkas, eo ear “eobrõk kin jerbal ko remõn im mweien tiriamo ko.” (Jerb. 9:​36, 39) Loli ej kemelele: “Jabrewõt jikin ij ilok ñõne, ij bukot ro emol jimjera eo air ilo congregation eo me renaj yokwe iõ im rejetak iõ ñe ij ebwer. Ñõn kakajurlok jimjera kein, ij kajeoñ kwalok yokwe im aõ itoklimo kin ro jet. Iar jerbal ilo drualitõk congregation ko reoktõk jen dron, im aolep ien ej lõñ ro mõta remõn. Ekkã wõt air jab sister ro me ridtair wõt ña, jet iair rej lilap ro ak jodrikdrik ro.” Ilo kajjojo congregation, elõñ ro me rej aikwij okmãnãn in yokwe im mõtair. An mol ar kwalok itoklimo kin rein emaroñ lukkun jibõñ ir im emaroñ kabwe kõnan eo ar mõke ñõn kwalok yokwe im lo yokwe.​—Luk 6:​38.

Anij Eban Meloklok

Baibel eo ej kwalok bwe aolep dri Kristian ro rej aikwij karmijeteik ir mõke kin jet men im lemnok kin ien ko rebin jej mour ie. (1 Kor. 7:​29-​31) Ro im rejañin belele kinke rej beek ñõn bokake kien eo an Anij ñõn mare wõt ilo Iroij ej tellokir bwe jen kwalok koutiej im joij ñõn ir. (Mat. 19:12) Bõtab, karmijete rot in ejjab melelen bwe rejjab maroñ lukkun mõnõnõ.

Lidiana ej ba: “Mour eo aõ ekamõnõnõ ej wawa ion kõtan eo aõ iben Jeova im aõ jerbal ñõn e. Ijela kajen jet dri belele ro me remõnõnõ im jet me rejjab mõnõnõ. Men in ej kamol ñõn iõ bwe aõ mõnõnõ ejjab wawa ion elañe inaj mare ak jab.” Einwõt an kar Jisõs kwalok, mõnõnõ elaptata an wawa ion lelok im korijer, juõn men me aolep dri Kristian ro remaroñ kõmõne.​ —Jon 13:​14-​17; Jerb. 20:35.

Ejelok berre bwe un eo elaptata unin ar lõñliñ ej kin ar jela bwe Jeova enaj kejerammõn kij kin jabrewõt men jej karmijete ñõn kõmõnmõn ankilan. Baibel eo ej kalimur ñõn kij: “Anij e wãnik wõt, im E jamin meloklok ami jerbal im yokwe, eo kom ar kwalok kin etan.”​—Hib. 6:⁠10.

[Kamelele ko itulal]

[Naan ko ilo peij 25]

“Ij lõñliñ kin men ko eor iba, im ijjab ettõnak kin men ko ejelok iba.”​—Carmen

[Pija eo ilo peij 26]

Loli im Lidiana rej mõnõnõ kin air jerbal ijo elap aikwij ie

[Pija eo ilo peij 27]

Anij ej kir aolep dri korijer ro an ñõn druaklok ñõn e