Fa yu kan de koloku aladi yu no trow

„DEN trow, èn den libi koloku go doro.” Nofo tron na so den tori di sma e fruteri pikin-nengre, e kaba. Felem nanga buku di e taki fu lobi tori, e sori a srefi sortu sani disi. Den e meki sma denki taki yu musu trow fu man de koloku trutru! Boiti dati, na ini furu kulturu sma e dwengi yonguwan di kon bigi kaba, fu trow. „Sma e meki yu denki taki a wan-enkri sani di wan meisje musu du te a kon bigi, na fu trow”, na so Debby ben taki di a ben pasa 20 yari. „Den e meki yu denki taki te yu trow, dan fosi a libi e bigin.”

Wan sma di e si sani soleki fa Yehovah e si sani, no o denki na so wan fasi. Aladi a ben de a gwenti na ini Israel taki sma ben e trow, toku Bijbel e taki fu mansma nanga umasma di no ben trow èn di ben abi wan trutru koloku libi. Na ini a ten disi, son Kresten bosroiti fu no trow, aladi furu trawan no e trow fu di den no kisi na okasi dati ete. Awansi fa a du kon taki wan sma no trow, a prenspari aksi di e opo kon na: Fa wan Kresten kan de koloku aladi a no trow?

Yesus srefi no ben trow, èn wi kan frustan dati te wi e luku a wroko di a ben kisi fu du. A ben taigi den disipel fu en taki sonwan fu den bakaman fu en ben o tan sondro fu trow tu (Mat. 19:10-12). Sobun, te wi wani libi na a fasi disi, dan wi musu du dati nanga wi heri ati èn wi musu frustan krin san a libi disi wani taki.

A rai di Yesus ben gi, na soso gi wan sma di bosroiti fu no trow, fu di a wani poti ala en prakseri na a diniwroko fu Yehovah? (1 Kor. 7:34, 35) Dati no abi fu de so. Luku fu eksempre, wan Kresten di ben o wani trow, ma di no man feni wan bun trowpatna ete. „No so langa pasa, sondro taki mi ben fruwakti dati, wan man na wrokope di no de wan Kotoigi, aksi mi fu trow nanga en”, na so Ana e taki, wan sisa di pasa 30 yari èn di no trow. „A sani disi ben naki mi ati pikinso, ma mi puru a denki dati wantewante na mi ede fu di mi wani trow soso nanga wan sma di o meki mi kisi wan moro bun matifasi nanga Yehovah.”

Neleki Ana, furu sisa wani trow „soso na ini Masra”, èn a sani disi e yepi den fu no trow nanga wan sma di no de na bribi (1 Kor. 7:39; 2 Kor. 6:14). * Fu di den e gi yesi na a rai fu Gado, meki den bosroiti fu no trow teleki den feni wan bun trowpatna. Fa den kan de koloku now di den no trow ete?

Leri fu si den wini

A fasi fa wi e denki fu sani kan yepi wi fu si den wini fu wan situwâsi, srefi efu wi no ben o wani de na ini a situwâsi dati. „Mi breiti nanga san mi abi, èn mi no e sidon prakseri san mi no abi”, na so Carmen e taki. A sisa disi no trow èn a pasa 40 yari kaba. A tru taki son leisi wi e firi leki wi de wi wawan noso wi e lasi-ati. Ma te wi sabi taki furu tra brada nanga sisa na grontapu e ondrofeni den srefi sortu sani disi, dan dati kan gi wi deki-ati fu tan horidoro.  Yehovah yepi furu Kresten fu de koloku aladi den no trow, èn a yepi den na ini tra problema tu.​—1 Petr. 5:9, 10.

Furu Kresten brada nanga sisa kon si taki a abi wini te den no trow. „Mi denki taki yu o de koloku soso te yu man nyan bun fu den wini di yu abi awansi na ini sortu situwâsi yu de”, na so Ester e taki, wan sisa di no trow èn di pasa 35 yari. Carmen e taki tu: „Mi sabi taki awansi mi trow noso mi no trow, efu mi e poti Kownukondre afersi na a fosi presi, dan Yehovah no sa hori nowan bun sani na baka gi mi” (Ps. 84:11). „Kande mi libi no waka soifri leki fa mi ben prakseri, ma mi de koloku èn mi sa tan de koloku.”

Eksempre na ini Bijbel fu sma di no ben trow

Na umapikin fu Yefta no ben abi na prakseri fu no trow. Ma fu di en papa ben meki wan sweri, meki a ben musu dini na a tabernakel sensi di a ben yongu teleki a kon owru. A no de fu taki dati a sani disi di a ben musu du sondro fu fruwakti dati, ben kenki en libi èn a no ben man du san a ben firi. A ben krei tu mun langa di a kon frustan taki a no ben o man trow èn abi wan osofamiri. Ma toku, a teki a bosroiti fu du a sani disi èn a tan dini drape en heri libi langa. Tra Israel uma ben prèise en ibri yari fu di a ben gi ensrefi fu dini na a tabernakel.​—Krut. 11:36-40.

Son eunuch na ini a ten fu Yesaya ben lasi-ati kande fu di den no ben man trow. Bijbel no e taki fa a du kon taki son sma ben de eunuch. Disi ben meki taki den no ben man du ala sani di a pipel fu Israel ben e du, èn den no ben man trow noso meki pikin (Deut. 23:1). Ma toku, Yehovah ben frustan fa den ben firi, èn a ben prèise den fu di den ben hori densrefi na a frubontu fu en nanga den heri ati. A ben taigi den taki a ben o gi den „wan monumenti” nanga „wan nen di ben o tan fu têgo” na ini na oso fu en. Sobun, den eunuch disi di ben tan du a wani fu Gado, ben o abi a howpu fu libi fu têgo na ondro a tiri fu Yesus, a Mesias. Noiti Yehovah ben o frigiti den.​—Yes. 56:3-5.

A situwâsi di Yeremia ben de na ini, ben de heri tra fasi. Baka di Gado poti Yeremia leki profeiti, Gado taigi en fu tan sondro fu trow fu di a ben libi na ini muilek ten èn fu di a ben kisi wan spesrutu wroko fu du. Yehovah ben taki: „Yu no musu teki wan wefi gi yusrefi, èn yu no musu kisi manpikin nanga umapikin na ini a presi disi” (Yer. 16:1-4). Bijbel no e taki fa Yeremia ben feni a sani disi di Yehovah taigi en, ma Bijbel e sori taki a ben de wan man di ben lobi a wortu fu Yehovah (Yer. 15:16). A no de fu taki dati na ini den muilek yari baka dati, di sma lontu Yerusalem 18 mun langa, dan Yeremia ben si o koni a ben de fu gi yesi na Yehovah en komando fu tan sondro fu trow.​—Krag. 4:4, 10.

Sani di yu kan du fu de koloku

Den eksempre fu Bijbel di wi kari ben de fu sma di no ben trow, ma Yehovah ben horibaka gi den, èn den ben du ala san den man na ini a diniwroko fu En. Na so a de tu taki na ini a ten disi, wi kan du furu bun sani fu de koloku. Bijbel ben taki na fesi taki den umasma di e fruteri a bun nyunsu, ben o de wan bigi legre (Ps. 68:11). Furu fu den umasma disi na sisa di no trow. Fu di den abi furu bun bakapisi na ini a diniwroko fu den, meki den abi  furu manpikin nanga umapikin na ini a bribi.​—Mark. 10:29, 30; 1 Tes. 2:7, 8.

Baka di Loli pionier 14 yari langa, a taki: „A pionierwroko meki mi sabi san mi musu du nanga mi libi. Leki wan sisa di no trow, mi abi furu fu du èn dati e yepi mi fu no firi leki mi de mi wawan. Mi e firi koloku na a kaba fu ibri dei, fu di mi kan si taki a diniwroko fu mi trutru e yepi sma. A sani disi e gi mi furu prisiri.”

Furu sisa ben man leri wan tra tongo, èn den ben du moro na ini a diniwroko fu den, fu di den e preiki gi sma di e taki wan tra tongo. Ana di wi ben taki fu en kaba e taki: „Na ini a foto pe mi e libi, furu trakondre sma de.” Ana lobi fu preiki gi sma di e taki Fransitongo. „Fu di mi leri wan tra tongo, meki mi man taki nanga furu fu den sma disi. A sani disi meki taki mi man preiki na ini wan tra tongo èn a preikiwroko kon moro switi gi mi.”

Fu di sma di no trow no abi so furu frantwortu, meki sonwan fu den e teki na okasi disi fu go dini na ini wan kontren pe moro preikiman de fanowdu. „Mi e bribi trutru taki o moro yu e du na ini a diniwroko fu Yehovah, o moro makriki a de fu meki bun mati èn fu firi taki sma lobi yu”, na so Lidiana, wan sisa di no trow, èn di pasa 35 yari e taki. A sisa disi e dini na tra kondre pe moro preikiman de fanowdu. „Mi kon abi furu bun mati di de fu difrenti kulturu nanga kondre. Den mati disi di mi abi, meki taki mi de koloku trutru.”

Bijbel e taki fu Filipus a preikiman fu a bun nyunsu, di ben abi fo umapikin di no ben trow èn di ben taki profeititori (Tori. 21:8, 9). A ben musu de so taki den umapikin disi ben de fayafaya na ini na anbegi neleki den papa. Kande den ben gebroiki a grani di den ben abi fu taki profeititori, fu a bun fu den tra Kresten na ini Sesarea (1 Kor. 14:1, 3). Na ini a ten disi tu, furu sisa di no trow e gi trawan deki-ati, fu di den e go na den Kresten konmakandra doronomo èn den e teki prati na den.

Wan tra eksempre na a di fu Lidia, wan Kresten fu a fosi yarihondro di ben e libi na ini Filipi. Bijbel e taki bun fu en fu di a ben abi switifasi (Tori. 16:14, 15, 40). Lidia, di kande no ben trow noso di ben lasi en masra na ini dede, ben lobi fu du bun gi sma. Dati meki a ben abi bun demakandra nanga opziener di ben e go na difrenti presi, soleki Paulus, Silas, nanga Lukas. Te wi na ini a ten disi lobi fu du bun gi sma, dan wi o kisi den sortu blesi dati tu.

San wi kan du fu meki taki sma lobi wi

Boiti taki wi musu du bun wroko fu kan de koloku, wi alamala abi lobi fanowdu. Fa sma di no trow kan meki taki trawan lobi den? Na a fosi presi, Yehovah ala ten de klariklari fu lobi wi, fu gi wi krakti èn fu arki wi. Son leisi Kownu David ben firi leki a de en ’wawan èn taki a ben e pina’, ma toku a ben sabi taki ala ten Yehovah ben o horibaka gi en (Ps. 25:16; 55:22). A ben skrifi: „Efu mi eigi papa nanga mi eigi mama ben o gowe libi mi, dan Yehovah srefi ben sa teki mi” (Ps. 27:10). Gado e gi ala den futuboi fu en a kari fu kon krosibei na en, noso fu tron bun mati fu en.​—Ps. 25:14; Yak. 2:23; 4:8.

Boiti dati, na mindri den brada nanga sisa fu wi na heri grontapu, wi kan feni papa, mama, brada, nanga sisa di lobi wi èn di kan meki wi de koloku (Mat. 19:29; 1 Petr. 2:17). Furu Kresten di no trow de koloku trutru fu di den teki na eksempre fu Dorkas, di ben ’du furu bun sani èn di ben du bun gi pôtisma’  (Tori. 9:36, 39). Loli e taki: „Ala presi pe mi e go, mi e suku bun mati na ini a gemeente di o lobi mi èn di o yepi mi te mi lasi-ati. Fu man kon moro bun nanga den mati disi, mi e pruberi fu sori lobi gi trawan èn fu sori taki mi e broko mi ede nanga den. Mi dini na ini aiti difrenti gemeente, èn ala ten mi feni bun mati. Nofo tron den mati disi a no mi speri. Sonwan fu den ben de owru sisa èn trawan ben de tini.” Na ini ibri gemeente, sma de di abi lobi nanga mati fanowdu. Te yu e sori trutru taki yu e broko yu ede nanga den sma disi, dan dati kan meki den firi bun trutru. Boiti dati, wi e sori taki wi lobi trawan, èn trawan sa lobi wi tu.​—Luk. 6:38.

Gado no sa frigiti wi

Bijbel e sori taki ala Kresten musu du tranga muiti na a wán noso tra fasi, fu di wi e libi na ini muilek ten (1 Kor. 7:29-31). A no de fu taki dati den sma di no trow fu di den wani tan gi yesi na a wèt fu Gado, fu trow soso na ini Masra, musu kisi spesrutu lespeki èn wi musu hori den na prakseri (Mat. 19:12). Ma a muiti disi di den e meki, no e meki taki den no man de koloku trutru.

Lidiana e taki: „Mi de koloku fu di mi abi wan bun matifasi nanga Yehovah, èn fu di mi e du diniwroko gi en. Mi sabi trowpaar di de koloku èn trawan di no de koloku. A sani disi sori mi krin taki awansi mi trow noso awansi mi no trow na ini a ten di e kon, mi kan de koloku.” Soleki fa Yesus taki, dan wan sma o de koloku te a e gi sani èn te a e dini trawan. Disi na wan sani di ala Kresten man du.​—Yoh. 13:14-17; Tori. 20:35.

A no de fu taki dati a sani di e gi wi a moro bigi prisiri, na fu sabi taki Yehovah sa blesi wi gi ala a muiti di wi e meki fu du a wani fu en. Bijbel e gi wi a dyaranti disi: „Gado no de onregtfardiki taki a sa frigiti den wroko fu unu èn taki a sa frigiti a lobi di unu sori gi a nen fu en.”​—Hebr. 6:10.

[Futuwortu]

[Prenspari pisi na tapu bladzijde 25]

„Mi breiti nanga san mi abi, èn mi no e sidon prakseri san mi no abi.”​—Carmen

[Prenki na tapu bladzijde 26]

Loli nanga Lidiana e prisiri fu dini na presi pe moro preikiman de fanowdu

[Prenki na tapu bladzijde 27]

Gado e gi ala den futuboi fu en a kari fu kon krosibei na en