Pagdelegar​—Taano Asin Paano?

AN PAGDELEGAR may mas halawig na kasaysayan kisa sa planetang Daga. Linalang ni Jehova an saiyang bugtong na Aki dangan, paagi sa paggamit sa saiyang Aki bilang “pangenot na trabahador,” linalang nia an uniberso. (Tal. 8:22, 23, 30; Juan 1:3) Kan lalangon nin Dios an enot na mag-agom, sinabihan nia sinda na ‘panoon an daga patin sakopon iyan.’ (Gen. 1:28) An Kaglalang nagtao sa mga tawo kan gibohon na pagpahiwas kan Paraiso sa Eden tanganing panoon an bilog na daga. Iyo, poon pa sa kapinonan, an pagdelegar saro nang karakteristiko kan organisasyon ni Jehova.

Ano an kalabot sa pagdelegar? Taano ta maninigong makanood an Kristianong kamagurangan na idelegar sa iba an nagkapirang gibohon sa kongregasyon, asin paano ninda magigibo iyan?

Ano an Pagdelegar?

An “pagdelegar” nangangahulogan nin “pagpaniwala sa iba; pagnombra sa saro bilang representante; pag-asignar nin paninimbagan o autoridad.” (Merriam-Webster’s Collegiate Dictionary, 11th Edition) Kaya kahagadan sa pagdelegar na iayon an iba tanganing maotob an mga katuyohan. Natural sana na maggiya iyan sa pag-asignar nin autoridad.

An mga tinawan nin gibohon sa Kristianong kongregasyon linalaoman na mag-otob kan asignasyon, magreport dapit sa kamugtakan kan trabaho, asin sa parate magkonsulta sa saro na nagdelegar. Pero, an pundamental na paninimbagan yaon sa nombradong tugang na lalaki na nagdelegar kan gibohon. Kaipuhan niang subaybayan an  kamugtakan kan trabaho asin magsadol kun kaipuhan. Pero, tibaad may maghapot, ‘Taano ta madelegar pa kun kaya na man nindong gibohon an trabaho na kamo sana?’

Taano ta Madelegar Pa?

Pag-isipan an manongod sa paglalang ni Jehova sa saiyang bugtong na Aki asin pag-asignar Nia sa saiya na makikabtang sa iba pang gibohon na paglalang. Iyo, “paagi sa saiya an gabos na iba pang bagay linalang sa kalangitan asin sa daga, an mga bagay na naheheling asin an mga bagay na dai naheheling.” (Col. 1:16) Puede kutanang ginibo kan Kaglalang an gabos na bagay na sia sana, pero gusto niang mamatean man kan saiyang Aki an kagayagayahan na resulta nin pakahaman nin mabungang gibohon. (Tal. 8:31) Nakatabang ini sa Aki na makanood nin orog manongod sa mga kualidad nin Dios. Sa sarong paagi, ginamit kan Ama an oportunidad na iyan tanganing sanayon an saiyang bugtong na Aki.

Kan si Jesus yaon digdi sa daga, inarog nia an saiyang Ama sa pagdelegar nin paninimbagan. Luway-luway niang sinanay an saiyang mga disipulo. Sinugo nia na mag-enot sa saiya an 12 apostol asin kan huri an 70 iba pang disipulo tanganing mangenot sa paghuhulit. (Luc. 9:1-6; 10:1-7) Paghaloyhaloy, pag-abot ni Jesus sa siring na mga lugar, sarong marahay na pundasyon an ikinabugtak na duman tanganing pakosogon nia. Kan si Jesus pahale na sa daga, sia nagdelegar sa saiyang sinanay na mga disipulo nin mas magabat na mga paninimbagan, kaiba na an pambilog na kinaban na paghuhulit.—Mat. 24:45-47; Gibo 1:8.

An pagdelegar asin pagsasanay nagin mga karakteristiko kan Kristianong kongregasyon. Sinabihan ni apostol Pablo si Timoteo: “An mga bagay na ini itao mo sa maimbod na mga tawo na magigin man biyong kualipikado na magtokdo sa iba.” (2 Tim. 2:2) Iyo, dapat na sanayon kan mga may kabatidan an mga magsasanay man sa iba pa.

Kun idinedelegar nin sarong magurang sa kongregasyon an pira sa mga gibohon na iinasignar sa saiya, mapapagayagaya nia an iba huli sa pagtotokdo asin pagpastor. Huling minimidbid kan kamagurangan na limitado an kakayahan nin mga tawo, sinda may orog pa nganing dahelan na magdelegar sa iba nin mga paninimbagan sa kongregasyon. An Biblia nagsasabi: “An kadonongan yaon sa mga hababa an boot.” (Tal. 11:2) Kaiba sa kababaan nin boot an pakarealisar nin saro na may mga limitasyon sia. Kun poprobaran mo na gibohon an gabos na ika sana, tibaad mapagal ka asin mabawasan mo an panahon na magagamit mo kutana sa saimong pamilya. Kaya madonong nanggad na magdelegar nin mga paninimbagan. Arog halimbawa nin tugang na lalaki na naglilingkod bilang parakoordinar kan grupo nin kamagurangan. Puede niang idelegar sa ibang kamagurangan an pag-audit sa kuenta kan kongregasyon. Paagi sa pagsiyasat sa mga rekord na iyan, magigin pamilyar an mga magurang na iyan dapit sa pinansial na kamugtakan kan kongregasyon.

Mantang an pagdelegar nagtatao sa iba nin oportunidad na magkaigwa nin kinakaipuhan na kakayahan asin eksperyensia, iyan nagtatao man nin oportunidad na maheling kan nagdelegar kan paninimbagan an mga kakayahan kan mga natawan kan gibohon. Sa siring, paagi sa pagdelegar nin angay na mga gibohon sa kongregasyon, mababalo kan kamagurangan an puedeng magin ministeryal na mga lingkod “kun baga angay” sinda.—1 Tim. 3:10.

Ultimo, paagi sa pagdelegar, ipinapaheling kan kamagurangan an saindang pagtitiwala sa iba. Aktuwal na sinanay ni Pablo si Timoteo sa pagmimisyonero. Nagin dayupot na magkatood an duwang lalaking iyan. Inapod ni Pablo si Timoteo na “sarong tunay na aki sa pagtubod.” (1 Tim. 1:2) Kaagid kaiyan, nagin dayupot an relasyon ni Jehova asin ni Jesus mantang magkaibanan nindang linalalang an gabos na iba pang bagay. Paagi sa pagdelegar nin  gibohon sa iba, makakapatalubo an kamagurangan nin dayupot na relasyon sa sainda.

Kun Taano ta Nag-aalangan an Nagkapira

Minsan ngani aram an mga pakinabang, nadedepisilan an nagkapirang magurang sa kongregasyon na magdelegar, na posibleng nag-aalangan huling an paghona ninda maiinaan an saindang autoridad. Tibaad iniisip ninda na sinda an dapat na pirmeng may kapot kan manibela, sabi ngani. Pero, girumdomon na bago magsakat si Jesus sa langit, tinawan nia nin autoridad an saiyang mga disipulo na gibohon an sarong magabat na asignasyon, na kan panahon na idto aram na nia na orog pa an magigibo ninda kisa sa nagibo nia!—Mat. 28:19, 20; Juan 14:12.

An ibang magurang sa kongregasyon puedeng nagdelegar na kan nakaagi alagad mayong naheling na nakakakontentong mga resulta. Tibaad naniniwala sinda na mas marahay asin mas marikas na magigibo ninda an trabaho na sinda sana. Pero, estudyare an halimbawa ni Pablo. Aram nia an kahalagahan nin pagdelegar, alagad nasabotan man nia na dai pirmeng maaabot kan saiyang mga sinasanay an mga inaasahan nia. Sa enot na pagbiahe ni Pablo bilang misyonero, sinanay nia si Marcos, an hoben na kaibaiba nia sa pagbiahe. Nadesganar na gayo si Pablo sa pagbaya ni Marcos sa asignasyon sa saiya asin sa pagpuli sa saindang harong. (Gibo 13:13; 15:37, 38) Pero, dai kaiyan napapondo si Pablo sa pagsanay sa iba. Arog kan nasambitan na, dinagka nia an hoben na Kristianong si Timoteo na magin kaibaiba nia sa pagbiahe. Kan andam na si Timoteo na gumibo nin mas magabat na paninimbagan, binayaan sia ni Pablo sa Efeso asin tinawan sia nin autoridad na magnombra nin mga paraataman asin ministeryal na mga lingkod sa kongregasyon.—1 Tim. 1:3; 3:1-10, 12, 13; 5:22.

Kaagid kaiyan, an kamagurangan sa presenteng panahon maninigong dai magpondo sa pagsanay sa mga tugang huli sana ta an saro sa sainda dai iyan isinasaboot. Madonong asin mahalaga na makanood na magtiwala sa iba asin sanayon sinda. Pero, anong mga bagay an maninigong girumdomon nin kamagurangan kun nagdedelegar?

Kun Paano Madelegar

Sa pagdelegar nin mga paninimbagan, konsideraron an mga kualipikasyon kan mga tugang na nasa isip nindo. Kan kinaipuhan sa Jerusalem na asikasohon an aroaldaw na pagwaras nin kakanon, puminili an mga apostol ‘nin pitong lalaki na marahay an dangog, na pano nin espiritu asin kadonongan.’ (Gibo 6:3) Kun an sarong trabaho ipapagibo nindo sa saro na dai masasarigan, tibaad dai nia talaga iyan magibo. Kaya magdelegar nin saradit na gibohon nguna. Kun an sarong tawo mapatunayan na masasarigan, tibaad makaya niang mag-asikaso nin orog pang paninimbagan.

Pero, dakol pa an kalabot. Magkakalaen an mga personalidad asin kakayahan. Nagkakalaenlaen man an mga eksperyensia nin lambang tawo. An sarong tugang na lalaki na makikatood asin may marahay na disposisyon tibaad magin marahay na attendant, mantang an saro na organisado asin sistematiko tibaad magin kapakipakinabang nanggad bilang katabang kan sekretaryo kan kongregasyon. An sarong Kristiana na may artistikong kakayahan tibaad tawan nin paninimbagan na mag-areglar nin mga burak para sa Memorial.

Kun nagtatao nin mga paninimbagan, malinaw na sambiton kun ano an inaasahan. Bago sugoon ni Juan Bautista an mga mensahero ki Jesus, ipinaliwanag nia sa sainda kun ano an gusto niang maaraman asin sinabi nia nin eksakto kun ano an ihahapot ninda. (Luc. 7:18-20) Sa ibong na lado, kan instruksionan ni Jesus an saiyang mga disipulo na tiponon an mga tada kan kakanon na itinao sa milagrosong paagi, ipinabaya nia sa sainda an mga  detalye. (Juan 6:12, 13) An kadaklan na bagay nakadepende sa klase kan gibohon asin sa mga kualipikasyon kan katabang. An nagdelegar asin an dinelegaran kan gibohon maninigo na parehong may pakasabot dapit sa inaasahan na mga resulta asin kun gurano kaparateng magrereport dapit sa kamugtakan kan trabaho. Maninigo na aram nindang duwa kun anong mga bagay an ipapabaya na sa dinelegaran kan trabaho. Kun an gibohon dapat na matapos sa sarong partikular na petsa, tibaad mas nakakamotibar kun pag-oolayan asin pagkakaoyonan an petsang iyan imbes na ipaotob sana iyan.

An inasignaran maninigo na tawan kan kinakaipuhan na pondo, gamit, asin tabang. Tibaad makatabang kun sasabihon sa iba an manongod sa areglo. Kan ipagkatiwala ni Jesus ki Pedro an “mga liabe kan kahadean kan kalangitan,” ginibo nia iyan sa atubangan nin iba pang disipulo. (Mat. 16:13-19) Siring man, sa nagkapirang kamugtakan tibaad marahay na sabihon sa kongregasyon kun siisay an may paninimbagan sa sarong partikular na gibohon.

Kaipuhan man na mag-ingat. Kun pinagmamaigotan pa man giraray nindo na kontrolon an trabaho na idinelegar na nindo sa saro, garo man sana nindo sinasabing, “Dai talaga ako nagtitiwala sa saimo.” Totoo, kun minsan an resulta tibaad bakong arog kan eksaktong linalaoman nindo. Pero, kun an tugang na tinawan nin paninimbagan igwa nin katalingkasan, posibleng marhay na magkaigwa sia nin kompiansa asin eksperyensia. Natural sana na dai ini nangangahulogan na mayo nang pakilabot an nagdelegar sa kun paano inaasikaso kan dinelegaran an gibohon. Minsan ngani tinawan ni Jehova nin papel sa paglalang an saiyang Aki, kaiba pa man giraray Sia sa gibohon na iyan. Sinabi nia sa Pangenot na Trabahador: “Gibohon niato an tawo sa satong ladawan.” (Gen. 1:26) Kaya paagi sa saindong mga tataramon asin gibo, suportaran an ginigibo kan tawong dinelegaran kan gibohon, asin komendaran sia sa mga paghihingoa nia. An halipot na pagrepaso kan resulta makakatabang sa saiya. Kun dai nagigibo nin tama an trabaho, dai mag-alangan na magtao nin dugang pang sadol o tabang. Girumdomon na an pangultimong paninimbagan yaon sa saindo bilang nagdelegar.—Luc. 12:48.

Dakol an nakinabang huli sa pagdelegar sa sainda nin mga gibohon sa kongregasyon kan may edad nang mga lalaki na may tunay na interes sa sainda. Tunay nanggad, an gabos na magurang sa kongregasyon kaipuhan na makanood kun taano asin kun paano madelegar, bilang pag-arog ki Jehova.

[Kahon sa pahina 29]

AN PAGDELEGAR

• sarong paagi na ipamate sa iba an kagayagayahan huli sa nahaman

• sarong paagi na makahaman nin mas dakol

• pagpaheling nin kadonongan asin kababaan nin boot

• sarong paagi na sanayon an iba

• sarong paagi na ipaheling an pagtitiwala sa iba

[Kahon sa pahina 30]

KUN PAANO MADELEGAR

• Pumili nin mga indibiduwal na angay sa gibohon

• Makikomunikar/magpaliwanag nin malinaw

• Linawon kun ano an maninigong mahaman

• Itao an kinakaipuhan na mga bagay

• Magin interesado sa gibohon, asin ipahayag an saindong pagtitiwala

• Magin andam na akoon an pangultimong paninimbagan

[Mga Ritrato sa pahina 31]

Kaiba sa pagdelegar an pag-asignar nin gibohon asin pagsubaybay sa kamugtakan kan trabaho