Panangipaannong​—Apay ken Kasano?

NABAYAGEN a maar-aramid ti panangipaannong sakbay pay ti pannakaparsua ti planeta a Daga. Kalpasan a pinarsua ni Jehova ti bugbugtong nga Anakna, inusarna kas “nasigo a managobra” tapno maparsua ti uniberso. (Prov. 8:22, 23, 30; Juan 1:3) Idi pinarsua ti Dios ti umuna a pagassawaan, imbagana kadakuada a ‘punuenda ti daga ken parukmaenda.’ (Gen. 1:28) Ti Namarsua impaannongna kadagiti tattao ti trabaho a panangpalawa iti Paraiso nga Eden iti intero a daga. Nalawag ngarud a manipud punganay, nagbalinen a paset ti organisasion ni Jehova ti panangipaannong.

Ania ti ramanen ti panangipaannong? Apay a nasken a sursuruen dagiti Kristiano a panglakayen nga ipaannong iti sabsabali ti dadduma a trabaho iti kongregasion, ken kasano a maaramidda dayta?

Ania ti Panangipaannong?

Ti “panangipaannong” kaipapananna ti “panangitalek iti sabsabali; panangdutok iti maysa kas pannakabagi; panangipaay iti responsabilidad wenno autoridad.” (Merriam-Webster’s Collegiate Dictionary, 11th Edition) No kasta, ti panangipaannong kalikagumanna ti panangiraman iti sabsabali tapno maragpat dagiti panggep. Siempre, ramanen dayta ti panangiranud iti autoridad.

Dagidiay naipaayan iti trabaho iti kongregasion Kristiano manamnama nga aramidenda dagiti annongenda, agreportda mainaig iti trabahoda,  ken masansan nga agpaiwanwanda iti daydiay nangipaay kadakuada iti trabaho. Nupay kasta, ti panangsigurado a maaramid ti panggep ket kangrunaan a responsabilidad daydiay nadutokan a kabsat a nangipaannong iti trabaho. Nasken a siguraduenna a maar-aramid ti trabaho ket mangbalakad no kasapulan. Ngem mabalin nga adda mangyimtuod, ‘Apay a kasapulan nga ipaannong ti maysa ti trabahona no kabaelanna met nga aramiden dayta?’

Apay nga Ipaannong ti Responsabilidad?

Utobenyo ti panangparsua ni Jehova iti bugbugtong nga Anakna ken ti panangipaannongna kenkuana iti dadduma a trabaho a panagparsua. Kinapudnona, “babaen kenkuana, amin a sabsabali pay a bambanag naparsuada iti langlangit ken iti rabaw ti daga, ti bambanag a makita ken ti bambanag a di makita.” (Col. 1:16) Kabaelan ti Namarsua nga itungpal ti amin a trabaho, ngem inkeddengna a maaddaan met ti Anakna iti rag-o nga itden ti panangitungpal iti naballigi a trabaho. (Prov. 8:31) Dayta ti nakatulong iti Anak tapno masursurona ti ad-adu pay maipapan kadagiti galad ti Dios. Anagna nga inusar ti Ama dayta a gundaway tapno masanayna ti bugbugtong nga Anakna.

Idi adda ditoy daga, nangipaannong met ni Jesu-Kristo kadagiti responsabilidad kas panangtulad ken Amana. In-inut a sinanayna dagiti adalanna. Imbaonna dagiti 12 nga apostolna ken, idi agangay, dagiti 70 a sabsabali nga adalan tapno umunada a mapan ket idauluanda ti trabaho a panangasaba. (Luc. 9:1-6; 10:1-7) Isu nga idi nakadanon ni Jesus kadagiti lugar a nangibaonanna kadakuada, addan ti mabalinna a surnadan. Idi agpakadan ni Jesus ditoy daga, impaannongna kadagiti nasanayen nga adalanna dagiti nadagdagsen a responsabilidad, agraman ti sangalubongan a trabaho a panangasaba.​—Mat. 24:45-47; Ara. 1:8.

Nagbalin a gagangay iti kongregasion Kristiano ti panangipaannong ken panangsanay. Kinuna ni apostol Pablo kenni Timoteo: “Dagitoy a banag italekmo kadagiti matalek a lallaki, a, kalpasanna, makaanayto a kualipikado a mangisuro iti sabsabali.” (2 Tim. 2:2) Wen, dagiti aduanen iti kapadasan sanayenda dagidiay mangsanayto met iti sabsabali.

No ipabaklay ti panglakayen ti dadduma a naituding nga annongenna, iranranudna met iti sabsabali ti rag-o nga itden ti trabaho a panangisuro ken panangipastor. Limitado dagiti abilidad ti tao, isu a dayta ti maysa pay a rason no apay a nasken nga agpatulong dagiti panglakayen iti pannakaibaklay dagiti responsabilidad iti kongregasion. Kuna ti Biblia: “Ti sirib adda kadagidiay naemma.” (Prov. 11:2) Ti kinaemma ramanenna ti panangbigbig kadagiti limitasion. No ikagumaam nga aramiden ti amin a bukbukodmo, mabalin a mapaksuyanka ken mapaidaman ti pamiliam iti panawen a mabalin koma nga ipaaymo kadakuada. Isu a tanda ti kinasirib ti panangipaannong iti dadduma a responsabilidad. Kas pagarigan, usigenyo ti kasasaad ti kabsat nga agserserbi kas koordineytor ti bagi dagiti panglakayen. Mabalin a kiddawenna iti dadduma a panglakayen nga isuda ti mang-audit iti kuenta ti kongregasion. Babaen ti panangsukimatda kadagiti rekord, masanay met dagita a panglakayen a mangusig iti pinansial a kasasaad ti kongregasion.

Ti panangipaannong iti rebbengen ket saan laeng a mangipaay iti gundaway kadagiti sabsabali tapno maaddaanda iti kinasigo ken kapadasan no di ket mangipaay met iti gundaway iti daydiay nangipaay iti annongen tapno mapaliiwna ti abilidad dagidiay inikkanna iti annongen. Babaen ngarud ti panangipaannongda iti dadduma kadagiti maitutop a trabaho iti kongregasion, masubok dagiti panglakayen dagiti kakabsat a lallaki ‘no maikarida’ a mairekomendar kas ministerial nga adipen.​—1 Tim. 3:10.

Kas maudi, babaen iti panangipaannong, ipakpakita dagiti panglakayen nga agtalekda iti  sabsabali. Ni Pablo sinanayna ni Timoteo babaen ti panagkaduada iti trabaho a panagmisionero. Nagbalinda a nakasingsinged. Ni Pablo inawaganna ni Timoteo kas “maysa a pudpudno nga anak iti pammati.” (1 Tim. 1:2) Kasta met, nakasingsinged ti panagkadua da Jehova ken Jesus bayat a nagkaduada a nangparsua iti amin a dadduma a banag. Babaen ti panangitalek dagiti panglakayen iti trabaho iti sabsabali, mapatanorda ti nasinged a relasion kadakuada.

No Apay nga Agkedked ti Dadduma

Nupay ammo ti dadduma a panglakayen dagiti pagimbagan ti panangipaannong, bumdengda a mangaramid iti dayta, nalabit gapu ta mariknada a maksayan ti autoridadda. Mabalin nga ipagarupda a masapul a kanayon a kontroladoda a mismo ti bambanag. Ngem laglagipenyo a sakbay nga immuli sadi langit ni Jesus, inikkanna iti autoridad dagiti adalanna a mangitungpal iti nadagsen nga annongen, nga ammona a dakdakkelto ti magapuananda ngem iti naitungpalna!​—Mat. 28:19, 20; Juan 14:12.

Nalabit a nangipaannong ti dadduma a panglakayen kadagiti naglabas, ngem saan a makapnek dagiti resulta. Mabalin a mariknada a nasaysayaat ken naparpartak ti pannakaitungpal ti trabaho no isuda a mismo ti mangaramid. Ngem usigentayo ti ulidan ni Pablo. Ammona ti kinapateg ti panangipaannong, ngem ammona met a dagiti agsansanay saanda a kanayon a maaramid ti trabaho a kas iti namnamaenna. Iti umuna a panagdaliasatna kas misionero, sinanay ni Pablo ti agtutubo a ni Marcos a kaduana iti panagdaliasat. Ngem kasta unay ti pannakaupay ni Pablo idi binaybay-an ni Marcos ti annongenna sa nagawid. (Ara. 13:13; 15:37, 38) Kaskasdi, saan a simmardeng ni Pablo a nangsanay iti dadduma. Kas nadakamaten, inawisna ti agtutubo a Kristiano a ni Timoteo a mangkadua kenkuana iti panagdaliasat. Idi nasanaynan ni Timoteo a mangibaklay kadagiti nadagdagsen a rebbengen, imbatinan idiay Efeso, nga inikkanna iti autoridad a mangdutok kadagiti manangaywan ken ministerial nga adipen iti kongregasion.​—1 Tim. 1:3; 3:1-10, 12, 13; 5:22.

Kasta met ita, saan koma a sumardeng dagiti panglakayen a mangsanay kadagiti kakabsat a lallaki gapu laeng ta manangyaleng-aleng ti maysa kadakuada. Nainsiriban ken napateg a sursuruen ti agtalek kadagiti sabsabali ken mangsanay kadakuada. Ngem ania dagiti masapul a laglagipen dagiti panglakayen no mangitalekda iti annongen?

No Kasano ti Mangitalek iti Annongen

No mangipaaykayo iti annongen, usigenyo dagiti kualipikasion dagiti kakabsat. Idi kasapulan ti mangasikaso iti inaldaw a panangiwaras iti taraon idiay Jerusalem, nangpili dagiti apostol iti ‘pito a napaneknekan a lallaki a napno iti espiritu ken sirib.’ (Ara. 6:3) No mangipaaykayo iti dakkel a trabaho iti maysa a di mapagtalkan a tao, mabalin a dina maaramid ti trabaho. Gapuna, babassit a trabaho ti ipaannongyo nga umuna. No makitam a mapagtalkan, mabalin a maitungpalna ti dakdakkel a responsabilidad.

Ngem adda pay nasken. Agduduma dagiti personalidad ken abilidad. Agduduma met ti kapadasan ti tunggal maysa. Mabalin a nasaysayaat no daydiay kabsat a nainggayyeman ken makaay-ayo ti kababalinna ti agserbi kas attendant, ket daydiay naurnos ken sistematiko a kabsat ti agserbi kas katulongan ti sekretario ti kongregasion. Ti maysa a kabsat a babai a nalaing nga agarkos ti mabalin a pagtalkan a mangurnos kadagiti sabong para iti Memorial.

No adda ipaannongyo iti maysa a kabsat, espesipiko a dakamatenyo ti aramidenna. Sakbay a nangibaon ni Juan a Mammautisar kadagiti mensahero a mapan ken Jesus, inlawlawagna kadakuada ti kayatna a maammuan ken no ania ti  ibagada no agimtuodda. (Luc. 7:18-20) Iti sabali a bangir, idi binilin ni Jesus dagiti adalanna nga urnongenda dagiti natedda iti taraon a milagro nga impaayna, impabiangna kadakuada no kasano ti pamay-anda. (Juan 6:12, 13) Ti panangilawlawag iti rumbeng nga aramiden ket kaaduanna nga agdepende iti kita ti trabaho ken iti kualipikasion dagiti tumulong. Daydiay agipapaannong ken daydiay natudingan a mangaramid iti trabaho nasken nga agpada a maawatanda no ania ti manamnama a resulta ken no kasano kasansan ti panagreport maipapan iti nagapuanan. Nasken nga agpada nga ammoda no ania laeng dagiti mabalin a desisionan daydiay natudingan nga agtrabaho. No nasken a maituding no kaano a malpas ti trabaho, nasaysayaat no mapagnumuan ken mapagtunosan dayta imbes nga ipilit.

Daydiay natudingan nasken a maipaayan iti pondo, alikamen, ken tulong a kasapulanna. Makatulong no mapakaammuan ti dadduma maipapan kadagiti urnos. Idi intalek ni Jesus ken ni Pedro “dagiti tulbek ti pagarian ti langlangit,” inaramidna dayta iti imatang dagiti adalanna. (Mat. 16:13-19) Umasping iti dayta, iti dadduma a kasasaad, mabalin a nasaysayaat a maipakaammo iti kongregasion no siasino ti natudingan a mangaramid iti maysa a trabaho.

Masapul met ti panagannad. No ar-aramidem pay laeng ti trabaho nga impaannongmon iti maysa a tao, iparpariknam a dika agtalek kenkuana. No dadduma, mabalin a saan a naaramid ti trabaho a kas iti eksakto a ninamnamam. Ngem no ti kabsat a naipaayan iti annongen ket maipaayan iti ad-adu a gundaway, maaddaan la ketdi iti kompiansa ken kapadasan. Siempre, saan a kaipapanan dayta a dimo pakaseknan no kasano ti panangaramidna iti trabaho. Nupay intalekna iti Anakna ti panamarsua, nakiraman pay latta ni Jehova iti trabaho. Kinunana iti Nasigo a Managobra: “Aramidenta ti tao iti ladawanta.” (Gen. 1:26) Isu a babaen iti sasao ken aramid, suportaram ti maitungtungpal a trabaho, ken komendaram daydiay agtartrabaho gapu iti panagreggetna. Makatulong kenkuana no dakamatem biit ti resulta ti trabaho. No saan a naaramid a naimbag ti trabaho, dika bumdeng a mangipaay iti kanayonan a balakad wenno tulong. Laglagipem, sika a nangipaay iti annongen ti kangrunaan nga addaan iti responsabilidad.​—Luc. 12:48.

Adu ti nagunggonaan gapu kadagiti trabaho nga impaannong kadakuada dagiti panglakayen iti kongregasion a nangipakita iti napudno a pannakaseknan kadakuada. Kinapudnona, nasken nga ammo ti amin a panglakayen no apay a nasken nga italekda ti dadduma nga annongen ken no kasano nga aramiden dayta, kas panangtulad ken Jehova.

[Kahon iti panid 29]

TI PANANGIPAANNONG ITI RESPONSABILIDAD KET

• maysa a pamay-an a mangiranud iti rag-o nga itden ti nagapuanan

• maysa a pamay-an tapno ad-adu ti magapuanan

• panangipakita iti sirib ken kinaemma

• maysa a pamay-an a mangsanay

• maysa a pamay-an a mangipakita iti panagtalek iti sabsabali

[Kahon iti panid 30]

NO KASANO TI MANGIPAANNONG

• Mangpili kadagiti maitutop nga indibidual

• Ibatad ti bambanag/makikomunikar

• Ilawlawag no ania ti nasken a maitungpal

• Ipaay dagiti kasapulan a banag

• Maseknan maipapan iti trabaho, ken ipakita ti panagtalek

• Situtulok nga awatem a sika ti kangrunaan a makinresponsabilidad

[Dagiti Ladawan iti panid 31]

Ti panangipaannong ramanenna ti panangituding iti trabaho ken panangsurnad