Akamana Anga​—Eaa te Puapinga, Akapeea me Rave?

KUA rave ke ia ana teia mea e akamana anga i tetai tangata kia rave i tetai angaanga i mua roa ake ka angaia mai ei to tatou paraneta Enua. Kua anga a Iehova i tana Tamaiti anau tai e oti, kua taangaanga i tana Tamaiti ei “pu rave angaanga,” kia anga i te ao katoa nei. (Mase. 8:22, 23, 30, NW; Ioa. 1:3) I te anga mai anga te Atua i nga tokorua mua kua akakite aia kia raua kia “akaki i te enua nei, e e akavi.” (Gene. 1:28) Kua oronga Tei Anga mai i te angaanga na te tangata, kia akamaata atu i te Parataito i Edene kia kako rava te enua katoa. Ae, mei te akamataanga mai a Iehova e tona au tavini i te akamana anga i tetai kia rave i te angaanga.

Eaa te o maira ki roto i te akamana anga i tetai kia rave i te angaanga? Eaa te aronga pakari Kerititiano ka inangaro ei kia kite e akapeea te akamana anga i tetai ke kia rave i tetai au angaanga i roto i te putuputuanga, e ka akapeea e rauka ai ia ratou te rave i te reira?

Eaa te Akamana Anga?

“Ko te akamana anga” tona aiteanga koia oki “kia oronga i te mana ki tetai; kia iki i tetai ei mata; kia tuku i tetai apainga me kore i tetai tikaanga.” (Merriam-Webster’s Collegiate Dictionary, 11th Edition) No reira, ko te akamana anga i tetai ka anoanoia koe kia kapiti mai i etai ke ki roto i te  akatupu anga i tetai au akakoroanga. Te tau ua ra i reira e, ka taki atu te reira ki te oronga anga i tetai tikaanga ki tetai tangata.

Ko te aronga tei orongaia tetai angaanga kia rave ratou i roto i te putuputuanga Kerititiano, te umuumuia ra ratou kia akatupu i taua tuanga angaanga ra, kia akakite mai e te akapeea ra te angaanga, e ko tei matauia, kia ripoti atu ki te tangata nana i oronga mai i te angaanga. Inara ko te apainga tikai no taua angaanga ra, tei runga te reira i te taeake tei ikiia kia tuku atu i taua angaanga ra. Ka anoanoia aia kia akapapu e te rave meitakiia ra te angaanga e kia apii atu me ka inangaroia. Inara penei e ka ui tetai aronga e, ‘Eaa ka akamana atu ei i tetai ke me ka rauka ia koe uaorai i te rave i te angaanga?’

Eaa te Puapinga o te Akamana?

E akamanako ana no runga i te anga mai anga a Iehova i tana Tamaiti anau tai, e te akamana anga iaia kia akaoti i te anga mai i te au mea ravarai. Ae, “nana oki i anga i te apinga tini ravarai nei, ko to te rangi, e to te enua nei, ko tei akaraia nei e te kore e akaraia.” (Kolo. 1:16) Ka rauka ua i Tei Anga mai i te rave i te au mea tini ravarai, kareka ra kua inangaro rai aia i tana Tamaiti kia kite katoa i te rekareka o te akatupu anga i teia au angaanga puapinga. (Mase. 8:31) Kua riro teia ei tauturu i te Tamaiti kia akamaata atu i tona kite no runga i to te Atua au tu. I roto i tetai tu, kua taangaanga te Metua i taua atianga ra kia tereni i tana Tamaiti anau tai.

Iaia i te enua nei, kua aru a Iesu Karaiti i tona Metua i roto i te tuku anga i te apainga na etai ke e rave. Kua apii marie ua aia i tana pipi. Kua tono aia i te au apotetoro e 12, e i muri mai i te au pipi ke atu e 70 kia aere na mua iaia, kia akamata i te angaanga tutu aere. (Luka 9:1-6; 10:1-7) I muri mai i te tae atu anga a Iesu ki taua au ngai ra, kua akanoo takereia te tango nona kia akamaata atu i te angaanga. Tona akaruke anga i te enua nei, kua oronga atu a Iesu i te angaanga tei puapinga rava atu, tei kapiti mai i te angaanga tutu aere i te ao katoa nei, ki tana au pipi tei tereniia.—Mata. 24:45-47; Anga. 1:8.

Kua riro te akamana anga e te tereni anga i etai ke ei au tu matauia i roto i te putuputuanga Kerititiano. Kua akakite te apotetoro ko Paulo kia Timoteo e: ‘Te au tuatua taau i akarongo, ko taau ïa e tuku ki te aronga tuatua-mou, te tau kia apii atu ia etai ke ra.’ (2 Timo. 2:2) Ae, ka tereni te aronga kite pakari i te aronga te ka tereni atu i etai ke.

Na te oronga atu anga i tetai au angaanga tei tukuia kiaia, ka rauka katoa i tetai tangata pakari te rekareka no te apii anga atu e te tereni anga atu i etai ke. Na te ariki anga e kua kotingaia te kite o te tangata, e tumuanga maata i reira to te aronga pakari kia pati i etai ke, kia tauturu mai i te rave anga i te au apainga a te putuputuanga. Te akakite maira te Pipiria e: “Tei te aronga akaaka ra te pakari.” (Mase. 11:2) Te kapiti maira te tu akaaka i te kite i to tetai uaorai au kotinga. Me titau koe e naau e rave i te au mea ravarai, penei ka roiroi koe e ka akangere i toou pamiri i te tuatau tei tau tikai kia akapou koe no ratou. No reira e arataa pakari kia tua atu i te apainga. Ei akaraanga, ko te taeake e tavini ra no te pupu aronga pakari. Penei ka pati aia i tetai tangata pakari kia otita i te moni a te putuputuanga. Na te akara anga ki roto i te au rekoti ka rauka i reira i taua au tangata pakari ra i te akamatau ia ratou ki te turanga o te moni a te putuputuanga.

I te mea e te riro ra te tuku atu anga i te apainga kia etai ke ei oronga i tetai tuatau no ratou kia rauka te kite e te karape tau tei anoanoia, te akatika katoa ra te reira i te tangata e tuku atura i te apainga kia kite e eaa te au tareni o te aronga i orongaia na ratou e rave i te angaanga. No reira, na te tuku atu anga i tetai au apainga tei tau i roto i te putuputuanga, ka rauka i te aronga pakari kia timata marie i te “turanga tau” o te aronga te ka riro mai ei au tavini tauturu.—1 Timo. 3:10, NW.

I te openga i reira, na te akamana anga i tetai ke kia rave i te angaanga, te akaari ra te aronga pakari i to ratou irinaki i roto i etai ke. Kua tereni a Paulo  ia Timoteo na te angaanga kapiti anga kiaia i roto i te angaanga mitinari. Kua tupu tetai pirianga mou ki rotopu i teia nga tangata. Kua kapiki a Paulo ia Timoteo e e “tamaiti tikai i te akarongo.” (1 Timo. 1:2) Mei te reira rai te pirianga ngaueue kore tei tupu i rotopu ia Iehova raua ko Iesu, i to raua angaanga kapiti anga i te anga mai anga i te au apinga tini ravarai. Na te oronga anga i te angaanga na etai ke e rave, ka rauka i te aronga pakari tetai pirianga vaitata kia ratou.

Eaa Tetai Aronga e Emiemi Ei

Noatu kua kite i te puapinga o te reira, e ngata ana i tetai aronga pakari i te akamana i tetai ke kia rave i te angaanga, penei te tapupu ra no te mea te manako ra ratou e te oake ra ratou i to ratou uaorai tikaanga. Penei ka manako ratou e ka inangaro uaia rai ratou kia akaaere. Inara e akamaara e i mua ake ka aere ei ki te rangi, kua akamana a Iesu i tana au pipi kia rave i tetai tuanga angaanga puapinga tikai, noatu kua kite aia e e maata atu te angaanga ta ratou ka rave i tana uaorai!—Mata. 28:19, 20; Ioa. 14:12.

Penei e kua akamana ana etai aronga pakari i tetai ke kia rave i te angaanga i te tuatau i topa, inara kare i mako meitaki te rave angaia te reira. Penei te manako ra ratou e e meitaki atu e e viviki atu, me na ratou uaorai e rave i te angaanga. Inara, e akamanako ana i te akaraanga a Paulo. Kua kite aia i te puapinga i te akamana i tetai tangata kia rave i te angaanga, inara kua kite katoa aia e kare e rauka ua rai i te aronga e tereniia ra i te rave meitaki i ta ratou angaanga mei tana rai e inangaro ra. I te aere anga i tona tere mitinari mua, kua tereni a Paulo i tona tokorua tutaka mapu ua, ko Mareko. Kua maata tikai to Paulo taitaia i te akaruke anga a Mareko i tana tuanga angaanga, e kua oki atu ki te kainga. (Anga. 13:13; 15:37, 38) Noatu rai, kare te reira i tapu ana ia Paulo i te tereni i etai ke atu. Mei tei taiku takereia atu ana, kua pati aia i te Kerititiano mapu ua ko Timoteo, kia riro ei tokorua tutaka nona. I te papa anga a Timoteo i te rave i tana apainga puapinga kua vaio atu a Paulo iaia ki Ephesia, i te oronga anga i te tikaanga kiaia kia iki i tetai au akaaere e te au tavini tauturu i roto i te putuputuanga.—1 Timo. 1:3; 3:1-10, 12, 13; 5:22.

Kia akapera katoa rai te aronga pakari i teia tuatau, auraka e tuku i te au i te tereni i te au taeake no te mea ua nei e kare tetai ia ratou e ariu meitaki mai ana. E tu pakari tikai e te puapinga kia apii i te irinaki i etai ke e kia tereniia ratou. Eaa ra te au mea te ka tau te aronga pakari kia akamanako me akamana ratou i tetai tangata kia rave i te angaanga?

Akapeea me Akamana

I te oronga anga i te au apainga, e akamanako i te turanga tukatau o te au taeake taau e manako ra. Te anoanoia anga kia tuaia te kai i te au ra ravarai i Ierusalema, kua iki te au apotetoro ‘e toko itu puke tangata rongo meitaki, e te ki i te vaerua tapu, e te karape.’ (Anga. 6:3) Me pati koe i tetai tangata kare e rauka kia irinakiia kia rave i tetai angaanga, penei e kare rai aia e rave i te reira. No reira e oronga i te au angaanga rikiriki na mua. Me papu e ka rauka i te irinaki i taua tangata ra, penei e maata atu tana apainga ka rauka i te rave.

Inara e maata atu te o maira. E tuketuke te tu e te tareni o te tangata. E tuketuke katoa te tu karape o tetai tangata mei tetai. Penei e meitaki atu tetai taeake oaoa ua e te mata katakata ei tangata raverave, e ko tetai e tu mako tona e te tukatau, penei e puapinga atu aia kia riro ei tauturu no te tekeretere o te putuputuanga. Tetai tuaine kite i te pae o te ati, penei kia orongaia nana e akono i te tiare no te Akamaaraanga.

I te tuku anga i tetai au apainga na etai ke, e akataka meitaki e eaa te ka anoanoia. I mua ake ka tono ei a Ioane Bapetizo i te au karere ki ko ia Iesu, kua akamarama aia kia ratou e, eaa tana e inangaro ra kia kite, e te au tuatua ta ratou ka ui atu kiaia. (Luka 7:18-20) I tetai tua, te ikuiku anga a  Iesu kia akaputu mai i te au toetoenga o te kai tei rauka mai na roto i te temeio, kua vaio aia e na ratou rai e iki e ka akapeea. (Ioa. 6:12, 13) Tei runga te maata anga i te tu o te angaanga e te tukatau o te tangata tauturu. Te tangata nana i oronga i te angaanga ki tetai kia rave, e te tangata tei patiia kia rave i te angaanga, e mea tau kia marama meitaki raua e eaa te tapapaia atura e kia ripoti putuputuia atu te reira ki te tangata nana i tuku mai i te angaanga. Kia kite raua roa ai e tei runga i te tangata nana e rave i te angaanga i te kite e eaa atu tetai ka inangaroia aia kia rave. Me e ra tetai tei akatakaia kia oti te angaanga, penei ka maata atu te akamaroiroianga me uriuriia e me akapapuia te ra e oti ei, eiaa ra kia riro mei te akaueanga rai.

E mea tau kia rava meitaki te moni, te au apinga angaanga, e te tauturu e anoanoia ra no te tangata tei tukuia nana e rave i te angaanga. Penei ka tauturu maataia kia kite etai ke atu i teia akanoonooanga. I to Iesu oronga anga i “te au taviri o te basileia o te ao” kia Petero, i rave aia i te reira i mua i te aroaro o etai atu au pipi. (Mata. 16:13-19) Mei te reira katoa rai i roto i tetai au tu, penei e mea meitaki kia akakite ki te putuputuanga e naai e rave i te angaanga.

E mea tau katoa kia matakite. Me oki rai koe i te akatere i te angaanga taau i oronga ki tetai tangata kia rave, te karanga ra koe kiaia e, “Kare au e irinaki tikai ana ia koe.” Penei i tetai taime, kare tikai taau e tapapa atura i tupu. Tera ra, me orongaia tetai tuatau no te taeake tei tukuia atu te angaanga kia rave aia, kare e kore e ka maata atu tona manako papu e te tukatau. Kare mei te mea e kare aia e manako atu ana no runga i te tu e rave ra aia i te angaanga. Noatu e kua oronga aia i tetai tuanga na tana Tamaiti i roto i te anga mai anga i te au mea ravarai, te akao atura rai a Iehova iaia uaorai ki roto i te angaanga. Kua akakite aia ki te Pu Rave Angaanga e: “E anga tatou i te tangata i to tatou uaorai tu.” (Gene. 1:26) No reira na roto i taau tuatua e taau angaanga, e turuturu i te angaanga e raveia ra, e e akameitaki atu i te tangata no tana tautaanga. Ka riro te akara poto anga i tei oti mai ei tauturu iaia. Me kare e rave meitakiia te angaanga, eiaa e emiemi i te apii atu, e i te tauturu atu. E akamaara e ko te apainga openga, tei runga ia koe, te tangata nana i akamana i tetai ke kia rave i te angaanga.—Luka 12:48.

E manganui ua atu tei puapingaia no te au angaanga a te putuputuanga tei tukuia mai kia ratou e te aronga pakari, tei inangaro tikai i te tauturu ia ratou. Tika rava, e ka anoanoia te aronga pakari katoatoa kia kite e eaa i puapinga ai te akamana i tetai tangata kia rave i te angaanga, e ka akapeea me rave i te reira i te aru anga ia Iehova.

[Pia i te kapi 29]

TE AKAMANA ANGA

• e mataara te reira no etai ke kia kite i te rekareka no te akatupu anga i tetai angaanga

• e mataara te reira kia maata atu te ka rauka i te akatupu

• e akaari anga te reira i te tu pakari e te tu mako

• e mataara te reira no te tereni anga i etai ke

• e mataara te reira no te akaari anga i te irinaki i roto i etai ke

[Pia i te kapi 30]

AKAPEEA ME AKAMANA

• E iki i te au tangata tei tau no te rave i te angaanga

• Akamarama meitaki

• Akataka meitaki eaa te ka anoanoia i te rave

• Oronga i te au apinga angaanga e anoanoia ra

• Akamanako no runga i te angaanga, akaari e te irinaki atura koe

• Kia papa ua i te rave i te apainga

[Au Tutu i te kapi 31]

Te akamana anga te o maira te tuku atu anga i tetai angaanga e te akara anga e te akapeea ra te reira