Fu san ede yu musu aksi trawan fu yepi yu du wroko na ini a gemeente?

FOSI grontapu meki, wan sma ben gi trawan wroko kaba. Baka di Yehovah meki en wan-enkri Manpikin, a gebroiki en leki „wan tumusi bun wrokoman” fu meki hemel nanga grontapu (Odo 8:22, 23, 30; Yoh. 1:3). Di Gado meki a fosi man nanga uma, a taigi den fu ’furu grontapu, èn fu basi ala sani na tapu’ (Gen. 1:28). A Mekiman gi libisma a wroko fu meki a Paradijs fu Eden kon moro bigi teleki heri grontapu tron wan paradijs. Iya, sensi a bigin a de so taki wroko ben e prati na ini na organisâsi fu Yehovah.

Fa yu kan meki trawan yepi yu nanga a wroko? Fu san ede Kresten owruman musu leri fu aksi trawan fu du son wroko na ini a gemeente? Èn fa den kan du dati?

Fa yu kan meki trawan yepi yu nanga a wroko?

Te yu e aksi wan tra sma fu yepi yu nanga wan wroko, dan dati wani taki dati yu e gi en primisi fu du wan wroko. Sobun, tra sma e yepi yu fu klari wan wroko di yu kisi. Dati wani taki dati yu e gi trawan frantwortu fu du wan tu sani.

Den sma di kisi wan wroko fu du na ini a Kresten gemeente musu du dati bun, den musu taki fa a wroko e go, èn nofo tron den e  suku rai na a sma di gi den a wroko. Ma a sma di abi a moro bigi frantwortu fu sorgu taki a wroko du, na a brada di gi a wroko. A brada disi musu sorgu taki a wroko e du bun èn a musu gi rai te dati de fanowdu. Toku wan sma kan aksi ensrefi: ’Fu san ede yu musu aksi trawan fu yepi yu efu yu man du en yusrefi?’

Fu san ede yu musu aksi trawan fu yepi yu nanga a wroko?

Prakseri fa Yehovah meki en wan-enkri Manpikin, èn fa a meki a wroko makandra nanga en fu meki ala tra sani. „Nanga yepi fu en, Gado meki ala tra sani na hemel èn na grontapu, iya, den sani di sma man si, nanga den sani di sma no man si” (Kol. 1:16). A Mekiman ben kan du ala sani ensrefi. Toku, a bosroiti fu meki en Manpikin kisi a prisiri di e kon te yu du wan bun wroko (Odo 8:31). A sani disi yepi a Manpikin fu leri sabi den fasi fu Gado moro bun. Fu taki en leti, a Papa gebroiki na okasi disi fu gi en wan-enkri Manpikin leri.

Di Yesus Krestes ben de na grontapu, a teki na eksempre fu en Papa, fu di a ben gi trawan wroko fu du. A no leri den disipel fu en ala sani wantronso, ma a du dati safrisafri. A ben seni den 12 apostel fosi fu teki fesi na ini a preikiwroko, èn baka dati a seni 70 tra disipel (Luk. 9:1-6; 10:1-7). Di Yesus doro na ini den kontren dati bakaten, dan a ben makriki fu preiki drape, fu di den disipel ben du a wroko bun. Fosi Yesus go na hemel, a gi den disipel fu en di ben kisi leri kaba, moro bigi frantwortu. Den ben musu du a preikiwroko na heri grontapu tu.​—Mat. 24:45-47; Tori. 1:8.

Na ini a Kresten gemeente a tron wan gwenti taki sma e kisi wroko fu du èn den e leri fa fu du dati. Na apostel Paulus ben taigi Timoteyus: „Yu musu fruteri den getrow sma den sani di mi taigi yu . . . dan den getrow sma srefi sa kon koni nofo fu gi tra sma leri” (2 Tim. 2:2). Iya, den sma di abi ondrofeni musu leri trawan èn den wan di kisi leri o gi tra sma leri tu.

Te wan owruman e prati a wroko di a kisi fu du, dan a e meki trawan kon abi a prisiri tu fu gi leri èn fu luku na ipi fu Gado. Fu di wi leki libisma no man du ala sani, meki owruman abi moro reide fu aksi trawan fu yepi den nanga a wroko na ini a gemeente. Bijbel e taki: „Den sma di abi sakafasi, na koni sma” (Odo 11:2). Wan sma di abi sakafasi e frustan taki a no man du ala sani. Efu yu e pruberi fu du ala sani yusrefi, yu o weri, èn a ten dati yu ben kan gebroiki fu de makandra nanga yu osofamiri. Sobun, a de wan koni sani fu aksi trawan fu yepi yu. Luku fu eksempre, a fesiman fu den owruman na ini a gemeente. A kan aksi tra owruman fu luku a moni afersi fu a gemeente. Na so fasi den tra owruman disi kan kon sabi fa sani e waka nanga a moni afersi fu a gemeente.

Te wan owruman e aksi trawan fu yepi en nanga wan wroko, dan den trawan e kisi na okasi fu leri du sani bun èn fu kon abi ondrofeni. Boiti dati, na owruman dati kan si sortu koni den trawan abi. Sobun, te owruman e gi brada na ini a gemeente wan wroko di den man du, dan den kan si sortu brada „bun nofo” fu tron dinari ini a diniwroko.​—1 Tim. 3:10.

Te fu kaba, te owruman e aksi trawan fu yepi en nanga a wroko fu en, dan den e sori taki den e frutrow trawan. Paulus ben gi Timoteyus leri, fu di a ben wroko makandra nanga en na ini a zendelingwroko. Den man  disi ben tron bun mati fu makandra. Paulus ben kari Timoteyus „wan trutru pikin na ini a bribi” (1 Tim. 1:2). Na a srefi fasi, Yehovah nanga Yesus tron bun mati di den ben e meki ala tra sani. Te owruman e meki trawan yepi den nanga a wroko, dan den kan tron bun mati fu den.

Fu san ede son brada e draidrai fu aksi trawan fu yepi den

Aladi owruman sabi taki a abi wini fu meki trawan yepi den, toku sonwan fu den e feni en muilek fu du dati. Kande den e draidrai fu di den denki taki den no o abi so furu frantwortu moro. Fu taki en leti, den kan denki taki sondro den a wroko no man du bun. Ma hori na prakseri taki bifo Yesus go na hemel, a gi den disipel fu en wan prenspari wroko fu du, aladi a ben sabi taki den ben o du moro bigi wroko leki en!​—Mat. 28:19, 20; Yoh. 14:12.

Kande son owruman ben aksi trawan fu yepi den nanga wan wroko na ini a ten di pasa, ma sani no ben waka soleki fa den wani. Den kan denki taki densrefi kan du a wroko moro bun èn moro gaw. Ma luku na eksempre fu Paulus. A ben sabi taki a prenspari fu meki trawan yepi en, ma a ben sabi tu taki den sma di a gi a wroko fu du, no ben o du dati ala ten soifri leki fa en ben wani. Na a fosi preikiwaka fu en, Paulus ben leri Markus, wan yongu mati fu en, fu du a zendelingwroko. Paulus ben brokosaka srefisrefi di Markus gowe libi a wroko èn a drai go baka na oso (Tori. 13:13; 15:37, 38). Toku, a sani disi no tapu Paulus fu gi trawan leri. Soleki fa wi taki kaba, a ben teki en yongu Kresten mati Timoteyus fu go makandra nanga en na ini a zendelingwroko. Di Timoteyus ben de klariklari fu teki moro bigi frantwortu, Paulus libi en na ini Efeise, èn a gi en a frantwortu fu poti opziener nanga dinari ini a diniwroko.​—1 Tim. 1:3; 3:1-10, 12, 13; 5:22.

Na so a de tu taki owruman na ini a ten disi no musu tapu fu gi brada leri, soso fu di wán fu den no du soleki fa den leri en. A de wan koni sani èn a de prenspari fu frutrow trawan èn fu gi den leri. Ma san owruman musu hori na prakseri te den e aksi trawan fu yepi den?

Fa yu kan du dati?

Fosi yu gi wan brada wan wroko fu du, prakseri san a brada disi man du. Di a ben de fanowdu fu prati nyanyan ibri dei gi son brada nanga sisa na ini Yerusalem, dan den apostel ben teki ’seibi man di ben abi wan bun nen, èn di ben abi santa yeye nanga koni’ (Tori. 6:3). Efu yu aksi wan sma di no de fu frutrow fu du wan wroko, dan a no de fu taki dati a no o du en. Sobun, gi sma pikinpikin wroko fosi. Te wan sma du den sani dati bun, dan kande a o man du moro wroko.

Ma moro de fanowdu. Ibri sma abi difrenti fasi èn sani di den man du bun. A no ala sma abi a srefi ondrofeni tu. A ben o bun fu poti wan brada di abi switifasi leki zaalwaktiman, aladi wan brada di sabi seti sani finifini o man yepi a sekretarsi fu a gemeente moro bun. Wan sisa di sabi fa fu seti sani moi, kan kisi a wroko fu seti bromki gi a Memrefesa.

Te yu e gi trawan wroko fu du, dan fruteri den finifini san den musu du. Fosi Yohanes a Dopuman seni boskopuman go na Yesus, a taigi den san a wani sabi èn san den musu aksi en (Luk. 7:18-20). Na a tra sei, di Yesus  taigi den disipel fu en fu piki den brede di ben tan abra baka di a ben gi den sma nyanyan na wan wondru fasi, dan a meki densrefi bosroiti fa den ben o du dati (Yoh. 6:12, 13). Nofo tron, a de na a wroko èn na den sani di a sma man du. A sma di e kisi a wroko musu frustan san den e fruwakti fu en, èn a sma di e gi a wroko musu sabi fa a wroko e waka. A sma di e gi a wroko musu luku san a e libi gi a sma di e du a wroko, fu bosroiti. Efu a wroko musu kaba na wan spesrutu dei, a ben o moro bun te den ala tu e taki èn e agri o ten dati musu de, na presi fu poti wan dei nomo sondro fu den taki nanga makandra.

A sma di kisi a wroko fu du musu kisi a moni, den wrokosani, nanga a yepi di de fanowdu fu du a wroko. Kande a ben o bun tu fu meki trawan kon sabi suma o du a wroko. Di Yesus gi Petrus „den sroto fu a kownukondre fu hemel”, dan tra disipel ben de drape tu (Mat. 16:13-19). Na a srefi fasi, a ben o bun son leisi fu meki a gemeente sabi suma kisi a frantwortu fu du wan spesrutu wroko.

Yu musu luku bun sosrefi taki yu no e suku fu bemui tumusi na ini a wroko di yu gi wan sma fu du. Dati kan meki taki a sma e denki taki yu no e frutrow taki a man du a wroko bun. A tru taki son leisi a wroko no du na a fasi fa yu ben wani. Ma efu yu e gi a brada di kisi wan wroko fu du, na okasi fu teki en eigi bosroiti na ini son afersi, dan a o si taki a man du a wroko èn a o kon kisi ondrofeni. Ma dati no wani taki dati yu no musu broko yu ede kwetikweti fa a e du a wroko. Aladi Yehovah gi en Manpikin na okasi fu meki sani, toku Yehovah ben abi wan prati na a wroko tu. Yehovah ben taigi a Tumusi Bun Wrokoman: „Meki wi meki libisma leki wan prenki fu wisrefi” (Gen. 1:26). Sobun, nanga den sani di yu e taki èn e du, yu o man horibaka gi a wroko èn yu o man prèise a sma gi a muiti di a e du. Te yu e taki syatu fa a wroko du, dan dati kan yepi a sma. Efu a sma no e du a wroko bun, no draidrai fu gi en rai noso fu yepi en. Hori na prakseri taki a moro bigi frantwortu de na yu di e gi trawan a wroko.​—Luk. 12:48.

Furu sma kisi wini fu di den owruman na ini a gemeente poti prakseri na den, èn gi den wroko fu du. Iya, ala owruman musu leri fu san ede a de prenspari fu aksi trawan fu yepi den du wroko èn fa den kan du dati neleki Yehovah.

[Faki na tapu bladzijde 29]

TE YU E AKSI SMA FU YEPI YU NANGA A WROKO, DAN

• yu e meki trawan kisi a prisiri tu fu du wan bun wroko

• yu o man du moro sani

• yu e sori taki yu koni èn taki yu abi sakafasi

• dati na wan fasi fu gi trawan leri

• na so fasi yu e sori taki yu e frutrow trawan

[Faki na tapu bladzijde 30]

FA YU KAN DU DATI

• Teki den yoisti sma di o man du a wroko

• Taki finifini nanga makandra

• Taki krin san a sma musu du

• Gi a sma ala sani di a abi fanowdu

• Sori taki yu e broko yu ede nanga a wroko, èn sori a sma taki yu e frutrow en

• Yu musu de klariklari fu teki a moro bigi frantwortu na yu tapu

[Prenki na tapu bladzijde 31]

Te yu e gi wan sma wan wroko, dan yu musu luku tu fa a wroko e waka