Mga Hapot Hale sa mga Parabasa

Si Jesus naghulit sa bilog na daga nin Israel. Kaya paano masasabi ni apostol Pedro na an mga Judio asin an mga namamahala sa sainda “naghiro na dai nin pakaaram” kan hagadon ninda na gadanon si Jesus?—Gibo 3:17.

Kan nakikipag-olay sa sarong grupo nin mga Judio manongod sa nagin papel ninda sa pagkagadan kan Mesiyas, si apostol Pedro nagsabi: “Aram ko na kamo naghiro na dai nin pakaaram, siring sa ginibo man kan mga namamahala sa saindo.” (Gibo 3:14-17) An nagkapirang Judio tibaad dai talaga namidbid si Jesus asin tibaad dai talaga ninda nasabotan an katokdoan nia. Kun manongod sa iba, kaiba sa mga dahelan kan espirituwal na pagkadaing aram ninda iyo an kawaran nin pagmawot na mapaogma an Dios, daing binabasaran na pagkaanggot, pagkauri, asin pagkaongis.

Estudyare kun paano an kawaran nin pagmawot na mapaogma si Jehova nakaapektar sa pagmansay nin dakol dapit sa katokdoan ni Jesus. Sa parate, si Jesus nagtokdo paagi sa mga ilustrasyon, na ipinaliwanag nia sa gabos na nagmawot na makaaram nin orog pa. Pero, an nagkapira sa sainda huminale na sana, na dai naghingoa na makasabot. Sa sarong pangyayari, dawa an nagkapirang disipulo dai nagustohan an piguratibong pananaram na ginamit ni Jesus. (Juan 6:52-66) Dai nasabotan kan siring na mga tawo na an mga ilustrasyon ni Jesus buminalo sa pagigin andam ninda na bagohon an saindang kaisipan asin gawe-gawe. (Isa. 6:9, 10; 44:18; Mat. 13:10-15) Binaliwala man ninda an sarong hula manongod sa paggamit kan Mesiyas nin mga ilustrasyon sa saiyang pagtotokdo.—Sal. 78:2.

Huli sa daing binabasaran na pagkaanggot, hinaboan nin iba an mga katokdoan ni Jesus. Kan magtokdo sia sa sinagoga kan saiyang ginikanan na banwaan na Nazaret, an mga tawo “nagngalas nin labi-labi.” Alagad imbes na akoon si Jesus bilang an Mesiyas, sinda nagbangon nin mga hapot manongod sa saiyang pinaghalean: “Saen kinua kan tawong ini an mga bagay na ini? . . . Ini an karpintero na aki ni Maria asin tugang ni Santiago asin Jose asin Judas asin Simon, bako daw? Asin an saiyang mga tugang na babae kairiba niato digdi, bako daw?” (Mar. 6:1-3) Para sa mga taga Nazaret, daing halaga an katokdoan ni Jesus huli sa hamak na pinaghalean nia.

Kumusta man an manongod sa mga namomoon sa relihion? Kadaklan sa sainda daing gayo inintindi si Jesus huli sa kaagid na mga dahelan. (Juan 7:47-52) Hinaboan man ninda an saiyang katokdoan huli ta nauri sinda ki Jesus, na tinatawan nin atension kan mga tawo. (Mar. 15:10) Asin siertong bakong magayon an reaksion nin dakol na prominente kan ihayag nia na maraot sinda huli sa pagsaginsagin asin pangloloko ninda. (Mat. 23:13-36) Tamang kinondenar ni Jesus an saindang tuyong pagkadaing aram, na sinasabi: “Herak man sa saindo na mga madonong sa Ley, huli ta hinale nindo an liabe nin kaaraman; kamo mismo dai nagralaog [sa Kahadean], asin an nagraralaog inolang nindo!”—Luc. 11:37-52.

Sa laog nin tolo may kabangang taon, an maogmang bareta ihinulit ni Jesus sa Israel. Nagsanay man sia nin dakol na iba pa tanganing makikabtang sa gibohon na iyan. (Luc. 9:1, 2; 10:1, 16, 17) Epektibong marhay si Jesus asin an saiyang mga disipulo kaya an mga Fariseo nagreklamo: “Helinga! An kinaban nagsusunod na sa saiya.” (Juan 12:19) Kaya, dai man nangangahulogan na mayo lamang nin aram an kadaklan na Judio. Pero, sa pangenot nagdanay sindang “dai nin pakaaram” manongod ki Jesus bilang an Mesiyas. Puede kutanang pinararom ninda an saindang kaaraman asin pagkamoot sa Mesiyas, alagad dai ninda iyan ginibo. An nagkapira nagin kasapakat sa paggadan ki Jesus. Huli kaini, sinadol ni apostol Pedro an dakol sa sainda: “Magsorolsol kamo, kun siring, asin magbakle tanganing an saindong mga kasalan mapara, tanganing dumatong an mga panahon nin kaginhawahan hale sa persona ni Jehova asin tanganing isugo nia an Cristo na ninombrahan para sa saindo, si Jesus.” (Gibo 3:19, 20) Mahalagang mangnohon na rinibong Judio an nagpoon na magtao nin atension, kaiba an “sarong dakulang kadaklan nin mga saserdote.” Dai na sinda naghiro na dai nin pakaaram. Imbes, sinda nagsolsol asin nagkamit kan pag-oyon ni Jehova.—Gibo 2:41; 4:4; 5:14; 6:7.