Sanebimɔi ni Jɛ Kanelɔi Adɛŋ

Yesu kpa Israel maŋ muu lɛ fɛɛ eshiɛ. Belɛ, mɛni hewɔ bɔfo Petro kɛɛ akɛ “lé ni” Yudafoi lɛ kɛ amɛnukpai lɛ ‘leee hewɔ’ amɛha agbe Yesu lɛ?—Bɔf. 3:17.

Beni bɔfo Petro kɛ Yudafoi akuu ko wieɔ gbɛfaŋnɔ ni amɛná yɛ Mesia lɛ gbele lɛ mli lɛ he lɛ, ekɛɛ amɛ akɛ: “Mile akɛ, lé ni nyɛleee hewɔ ni nyɛfee, tamɔ nyɛnukpai lɛ nɔŋŋ.” (Bɔf. 3:14-17) Ekolɛ Yudafoi lɛ ekomɛi eyayooo akɛ Yesu ji Mesia lɛ, ni amɛyanuuu etsɔɔmɔi lɛ hu ashishi. Yɛ amɛteŋ mɛi krokomɛi agbɛfaŋ lɛ, jwɛŋmɔ ni ejaaa, hetsɛ̃, nyɛ̃ɛ ni amɛnyɛ̃ɔ Yesu, kɛ Nyɔŋmɔ suɔmɔnaa nii ni amɛsumɔɔɔ akɛ amɛfee lɛ hewɔ amɛyooo akɛ Yesu ji Mesia lɛ.

Susumɔ bɔ ni Yehowa suɔmɔnaa nii ni mɛi babaoo sumɔɔɔ akɛ amɛfeɔ lɛ ná bɔ ni amɛbu Yesu tsɔɔmɔi lɛ amɛha lɛ nɔ hewalɛ lɛ he okwɛ. Bei pii lɛ, Yesu tsɔɔ nii yɛ abɛbuai amli ni etsɔɔ mɛi fɛɛ ní taoɔ ale babaoo lɛ abɛbuai nɛɛ ashishi. Kɛlɛ, amɛteaŋ mɛi komɛi shiɔ amɛyaa, ni amɛbɔɔɔ mɔdɛŋ akɛ amɛaanu abɛbuai nɛɛ ashishi. Be ko lɛ, kaselɔi lɛ ekomɛi po amli fu yɛ mfonirifeemɔ wiemɔ ko ni Yesu kɛtsu nii lɛ hewɔ. (Yoh. 6:52-66) Kaselɔi nɛɛ eyayɔseee akɛ Yesu abɛbuai lɛ miibi ni amɛtsake amɛsusumɔi kɛ amɛnifeemɔi. (Yes. 6:9, 10; 44:18; Mat. 13:10-15) Amɛku amɛhiɛ hu amɛshwie gbalɛ ni kɛɔ akɛ Mesia lɛ kɛ abɛbuai baatsu nii yɛ enitsɔɔmɔ mli lɛ nɔ.—Lala 78:2.

Mɛi krokomɛi kpoo Yesu tsɔɔmɔi lɛ yɛ ehe jwɛŋmɔ fɔŋ ni amɛná lɛ hewɔ. Beni etsɔɔ nii yɛ kpeehe ni yɔɔ emaŋ ni ji Nazaret lɛ, mɛi lɛ “ahe jɔ̃ amɛhe.” Shi yɛ nɔ najiaŋ ni amɛaakpɛlɛ Yesu nɔ akɛ Mesia lɛ, amɛbibii saji yɛ ehe akɛ: “Nɛgbɛ mɔ nɛ yaná nii nɛɛ kɛjɛ? . . . Ani jeee ŋaalɔ lɛ nɛ, Maria bi lɛ, kɛ Yakobo kɛ Yose kɛ Yuda kɛ Simon nyɛmi lɛ? Ani jeee enyɛmimɛi yei lɛ hu kɛ wɔ yɔɔ biɛ lɛ?” (Mar. 6:1-3) Akɛni Yesu jɛ weku ni bɛ nɔ ko tsɔ mli hewɔ lɛ, Nazaretbii lɛ ebuuu enitsɔɔmɔ lɛ.

Ni jamɔŋ hiɛnyiɛlɔi lɛ hu? Amɛteŋ mɛi babaoo hiɛ jwɛŋmɔ ni tamɔ nakai nɔŋŋ, ni no haaa amɛbo Yesu toi. (Yoh. 7:47-52) Kɛfata he lɛ, amɛhe tsɛ̃ Yesu ní mɛi babaoo miibo lɛ toi lɛ, ni no ha amɛkpoo etsɔɔmɔi lɛ. (Mar. 15:10) Agbɛnɛ hu, hiɛnaanɔbii lɛ ateŋ mɛi babaoo amli fu akɛni ekpa amɛsatofeemɔ kɛ shishiumɔ nifeemɔi lɛ ahe mama lɛ hewɔ. (Mat. 23:13-36) Akɛni amɛkpoo akɛ amɛaale anɔkwale lɛ hewɔ lɛ, eja gbɛ akɛ Yesu wie eshi amɛ akɛ: “Kpoo ha nyɛ, mlatsɔɔlɔi, ejaakɛ nyɛkɔ nilee lɛ naa samfee! Nyɛ diɛŋtsɛ lɛ nyɛboteee [Maŋtsɛyeli lɛ] mli, ni mɛi ni taoɔ mli abote lɛ hu, nyɛtsiɔ amɛ gbɛ.”—Luka 11:37-52.

Yesu kɛ afii etɛ kɛ fã shiɛ sanekpakpa lɛ yɛ Israel. Etsɔse mɛi babaoo hu koni amɛshiɛ. (Luka 9:1, 2; 10:1, 16, 17) Yesu kɛ ekaselɔi lɛ shiɛ jogbaŋŋ aahu akɛ Farisifoi lɛ wie akɛ: “Naa, je lɛ efã kɛnyiɛ esɛɛ.” (Yoh. 12:19) No hewɔ lɛ, jeee akɛ Yudafoi lɛ ateŋ mɛi babaoo leee nɔ ko kwraa. Kɛlɛ, ‘amɛleee’ akɛ Yesu ji Mesia lɛ. Kulɛ amɛbaanyɛ amɛkase Mesia lɛ he nii babaoo ni amɛsumɔ lɛ waa, shi amɛyafeee nakai. Amɛteŋ mɛi komɛi ye kɛbua ni agbe Yesu. No hewɔ lɛ, bɔfo Petro wo amɛteŋ mɛi babaoo hewalɛ akɛ: “No hewɔ lɛ, nyɛtsakea nyɛtsuiiaŋ, ni nyɛkua nyɛsɛɛ, koni agbe nyɛhe eshai lɛ, beni afee ni hejɔɔmɔ yinɔ ajɛ Nuŋtsɔ [Yehowa] hiɛ aba, ni etsu Yesu Kristo mɔ ni ejie eto nyɛ momo lɛ.” (Bɔf. 3:19, 20) Esa kadimɔ waa akɛ Yudafoi akpei abɔ bɔi wiemɔ lɛ toi boo “ni osɔfoi lɛ tete ateŋ mɛi pii” hu fata he. Amɛfeee amɛnii akɛ mɛi ni leee nɔ ko dɔŋŋ. Shi moŋ amɛtsake amɛtsui ni Yehowa kpɛlɛ amɛ nɔ.—Bɔf. 2:41; 4:4; 5:14; 6:7.