Oñeporandúva jepi

Oimérõ Jesús opredika Israel tuichakue, mbaʼérepa apóstol Pedro heʼi umi hudío ha imburuvichakuéra ‘ojapo hague heta mbaʼe vai ndoikuaáiguinte’? (Hech. 3:17.)

Apóstol Pedro heʼi umi hudío ojukauka hague Mesíaspe. Upévare heʼi peteĩ atýpe: ‘Che aikuaa pejapo hague ndapeikuaáigui, ha pende ruvichakuéra upéichante avei’ (Hech. 3:​14-17). Oiméne oĩ ijapytepekuéra ndohechakuaaivaʼekue Jesús haʼeha pe Mesías térã nontendéiva umi mbaʼe haʼe omboʼéva. Ha oiméne oĩ avei umi oporoapoʼíva, oipotáva mbaʼe ahéno, ndochaʼéiva hapicháre, ha ndoikuaaséiva voi mbaʼeve Ñandejáragui.

Jahechamína mbaʼépa oiko heta hudíore nomombaʼéi rupi Jehová heʼíva. Jesús ningo oporomboʼe hag̃ua omoĩmivaʼerã ehémplo, ha upéi omyesakã porã umi oikuaasevévape. Péro oĩvaʼekue umi hudío ndoikuaasevéimava mbaʼeve ha osẽ ohopa hese. Peteĩ árape ningo oĩ Jesús remimboʼekuéra ipochýva ndogustáigui chupekuéra peteĩ ehémplo oiporúva (Juan 6:​52-66). Haʼekuéra nontendéi Jesús oiporuha umi ehémplo oikuaa hag̃ua añetehápepa okambiase hikuái (Isa. 6:​9, 10; 44:18; Mat. 13:​10-15). Naimanduʼái avei hikuái peteĩ profesía heʼiha pe Mesías oiporuvaʼerãha ehémplo oporomboʼe hag̃ua (Sal. 78:2).

Heta hudío ningo nohenduseivaʼekue avei Jesúspe oapoʼígui chupe. Pór ehémplo Jesús ohórõ guare Nazarétpe oporomboʼe, umi ohendúva chupe ijurujaipa opytávo. Péro haʼekuéra ohechakuaarangue Jesús haʼeha pe Mesías oapoʼi chupe hikuái. Ha oporandujoa voi: ‘Moõgui piko oikuaa kóva hetaite mbaʼe? Ndahaʼéi piko kóva ku karpintéro, María memby ha ityvyrakuéra, Santiago, José, Judas ha Simón? Ha heindykuéra piko noĩri ñande apytépe? (Mar. 6:​1-3). Péicha jahecha nomombaʼéi hague hikuái Jesús omboʼéva ou haguére peteĩ família mboriahúgui.

Ha ohenduparakaʼe Jesúspe umi hudiokuéra rrelihión omoakãva? Haʼekuéra ningo nohenduseivaʼekue avei Jesúspe oapoʼígui chupe (Juan 7:​47-52). Haʼekuéra ningo ndochaʼéi avei Jesús rehe ohechágui mbaʼéichapa la hénte ojerepa hesénte (Mar. 15:10). Ha ndogustaivaʼekue avei chupekuéra Jesús heʼírõ guare ijapu ha hovamokõiha hikuái (Mat. 23:​13-36). Haʼekuéra ndoikuaaséinte la oikóva, upévare Jesús heʼi chupekuéra: ‘Pejererekóke peẽ pemboʼéva Moisés léi. Peẽ perekóva pende pópe peikuaa hag̃ua Ñandejárape, ha peẽ voi ndapeikuaái ha ndapehejái avavépe oikuaa Chupe’ (Luc. 11:​37-52).

Jesús ningo opredikavaʼekue 3 áño ha 6 mése pukukue Israélpe. Ha ombokatupyry avei heta hemimboʼépe opredika hag̃ua (Luc. 9:​1, 2; 10:​1, 16, 17). Jesús ha hemimboʼekuéra ojapo porãiterei hembiapo, upévare umi fariséo ojepicha ha heʼi: ‘Pehecha piko mbaʼéichapa opavave oho hapykuéri!’ (Juan 12:19). Péicha jahecha umi hudío ndahaʼeiha ndoikuaaietéva mbaʼeve Jesúsgui. Ndohechakuaaséinte hikuái Jesús haʼeha pe Mesías. Haʼekuéra ningo ikatúkuri oikuaa porã Jesúspe ha oguerohory chupe, péro ndojapói upéicha. Oĩ voi ijapytepekuéra ojukaukavaʼekue Jesúspe. Upévare apóstol Pedro heʼi chupekuéra: ‘Pejevy Ñandejára gotyo ha peñembyasy, haʼe oheja rei hag̃ua peẽme pene rembiapo vaikue. Ha Ñandejára ombou hag̃ua peẽme ára piroʼy omboúvo Jesúspe. Iñepyrũha guive voi haʼe oiporavovaʼekue chupe Mesíasramo peẽme g̃uarã’ (Hech. 3:​19, 20). Upe rire heta hudío ojapovaʼekue Pedro heʼi haguéicha, umíva apytépe heta saserdóte. Haʼekuéra ningo noñembotavyvéima ha oñembyasy hembiapo vai haguére. Upéicha rupi oĩ porã jey hikuái Jehovándi (Hech. 2:41; 4:4; 5:14; 6:7).