Yuvu Y’atangi

Wau vo Yesu wasila umbangi muna Isaele yawonso, ekuma Petelo wa ntumwa kavovela vo Ayuda ye ayadi au, ana bavondesa Yesu mu ‘kondwa zayi bavangila wo’?​—⁠Mav. 3:17.

Vava kavovesa Ayuda e ngyelele au muna lufwa lwa Masia, Petelo wa ntumwa wavova vo: “Nzeye wo vo muna kondwa zayi i nwavangila wo, diau adimosi y’akuluntu eno.” (Mav. 3:​14-​17) Ayuda akaka ke bazaya ko vo Yesu i Masia ngatu bakula malongi mandi. Akaka kondwa luzolo lwa yangidika Nzambi, ye ngindu zalembi songa, kimpala yo kumenga.

Yindula una kondwa luzolo lwa yangidika Yave kwafidila ulolo wa wantu mu lembi tambula malongi ma Yesu. Nkumbu miayingi Yesu mu yingana kalongelanga yo zayisa e nsasa kw’awana bakala ye luzolo lwa longoka. Kansi akaka bambembola, kadi ke bazola vava bakula yingana yandi ko. Lumbu kimosi, akaka muna alongoki andi ke bayangalala ko mu kuma kia mvovo mia Yesu. (Yoa. 6:​52-​66) Alongoki awaya ke bazaya ko vo Yesu yingana kasadilanga mu tala kana vo luzolo lwa soba e ngindu ye mavangu bakala lwau. (Yes. 6:​9, 10; 44:18; Mat. 13:​10-​15) Baveza mpe ungunza wayikanga vo Masia mu yingana kelongela.​—⁠Nku. 78:⁠2.

Akaka babembola malongi ma Yesu mu kuma kia ngindu zalembi songa bakala zau muna yandi. Vava kalonga mun’esambilu dia Nazarete, ina vo i mbanza kasansukila, o wantu ‘bayizengeneka.’ Vana fulu kia tambula Yesu nze Masia, bayantika yuvula mu kuma kia mpila kasansukila, oku vo: “Ondioyu, akweyi mekuntukanga mama? . . . Ke yandi i vala-nti ko, o mwan’a Maria, wa mpangi a Yakobo yo Yose yo Yuda yo Simone e? e nsanga zandi ke zina yeto ko, ovav’e?” (Maku 6:​1-3) Kuna kwa esi Nazarete, malongi ma Yesu ke makala mfunu ko wau vo nsasuka ya usukami kasansuka.

Adieyi tuvova mu kuma kia afidi a nsambila? Ayingi muna yau mpe kuma kiau akimosi kiabafila mu lembi wá malongi ma Yesu. (Yoa. 7:​47-​52) Babembola malongi ma Yesu, kadi nsita za kimpala bakala zau mu kuma kiandi, wau vo wantu ayingi batambulwila malongi mandi. (Maku 15:​10) Afidi ayingi a nsambila ke bayangalala ko vava Yesu kasengomona luvunu lwau. (Mat. 23:​13-​36) Yesu wabatumba mu kuma kia kondwa kwau kwa zayi vava kavova vo: “Tâtu kwa yeno, anganga za nsiku! e kuma kadi, nwakatula nsabi a zayi: oyeno kibeni ke nukotele ko [muna Kintinu], ana badi kota, ke nwabayambula ko.”​—⁠Luka 11:​37-52.

Muna mvu ntatu ye ndambu, Yesu wasamun’e nsangu zambote muna Isaele. Walonga mpe ayingi mu sala e salu kiaki. (Luka 9:​1, 2; 10:​1, 16, 17) E salu kasala Yesu ye alongoki andi kiafila Afarisi mu vova vo: “Se tadi nkutu, e nza yele anlandi.” (Yoa. 12:​19) Muna kuma kiaki, o kondwa kwa zayi kwa Ayuda ke mu kuma kia sia ko vo ke bazaya kikilu diambu ko. Kansi, ‘bakondwa zayi’ muna lembi bakula vo Yesu i Masia. Ayuda awaya bafwana wokesa zayi yo zola kwau muna Masia, kansi ke bavanga wo ko. Ayingi muna yau bavondesa Yesu. Muna kuma kiaki, Petelo wa ntumwa wabawondelela vo: “Dianu vo, nuvilukw’e ntima, nwavilukila, o masumu meno mavunzunwa, kimana iza sungi ya mvutulu a moyo, ituka vana ndose a Yave; katuma mpe Kristu, ndiona wayekekwa muna yeno, wa Yesu.” (Mav. 3:​19, 20) Ediadi diafila ulolo wa Ayuda kumosi ye “ndonga yingi ya nganga” mu yantika sia e sungididi muna malongi ma Yesu. Ke bavangilanga diaka mambu mu kondwa zayi ko. Kansi, bavilukw’e ntima yo vw’edienga dia Yave.​—⁠Mav. 2:41; 4:4; 5:14; 6:⁠7.