Dipotšišo tše Tšwago go Babadi

Jesu o be a rutile nageng ka moka ya Isiraele. Ka gona, ke bjang moapostola Petro a bego a ka re Bajuda le babuši ba bona ba “dirile ka go se tsebe,” ge ba be re Jesu a bolawe?—Dit. 3:17.

Ge moapostola Petro a be a bolela le sehlopha sa Bajuda mabapi le karolo yeo ba e kgathilego polaong ya Mesia, o itše: “Ke a tseba gore le dirile ka go se tsebe, go etša ge babuši ba lena le bona ba dirile.” (Dit. 3:14-17) Bajuda ba bangwe ba ka no ba ba be ba sa kwešiše Jesu le thuto ya gagwe. Ge e le ba bangwe bona, go hloka ga bona tsebo ya dilo tša moya go be go tutuetšwa ke go se be le kganyogo ya go kgahliša Modimo, kgethollo, lehufa le lehloyo.

Ela hloko kamoo go se be le kganyogo ya go kgahliša Jehofa go ilego gwa kgoma pono ya ba bantši ka thuto ya Jesu. Gantši Jesu o be a ruta ka diswantšho, tšeo a bego a di hlalosetša bohle bao ba bego ba nyaka go ithuta ka mo go oketšegilego. Lega go le bjalo, ba bangwe ba bona ba ile ba fo itshepelela, ba se dire boiteko bjo bokaalo bja go kwešiša seo se bego se bolelwa. Ka lekga le lengwe, gaešita le ba bangwe ba barutiwa ba gagwe ba ile ba kgopišwa ke seka-polelo seo Jesu a se dirišitšego. (Joh. 6:52-62) Ba bjalo ba paletšwe ke go lemoga gore diswantšho tša Jesu e be e le teko ya boikemišetšo bja bona bja go fetoša tsela ya bona ya go nagana le ditiro tša bona. (Jes. 6:9, 10; 44:18; Mat. 13:10-15) Le gona, ba ile ba hlokomologa boporofeta bjoo bo bolelago gore Mesia o be a tla ruta ka diswantšho.—Ps. 78:2.

Ka baka la kgethollo, ba bangwe ba ile ba gana dithuto tša Jesu. Ge a be a ruta ka sinagogeng motseng wa gabo wa Natsaretha, batho ba ile ba “kgotsa.” Eupša go e na le go amogela Jesu e le Mesia, ba ile ba botšiša dipotšišo mabapi le setlogo sa gagwe ka gore: “Motho yo o tšere kae dilo tše? . . . Ke mmetli morwa wa Maria e bile ke ngwanabo Jakobo le Josefa le Judase le Simone, na ga go bjalo? Dikgaetšedi tša gagwe di na le rena mo, na ga go bjalo?” (Mar. 6:1-3) Go batho ba Natsaretha, go godišetšwa ga Jesu lapeng la bobotlana go be go dira gore thuto ya gagwe e nyatšege.

Go thwe’ng ka baetapele ba bodumedi? Bontši bja bona ba be ba sa ele Jesu hloko ka mabaka a swanago. (Joh. 7:47-52) Gape, ba ile ba gana thuto ya Jesu ka gobane ba be ba mo hufegela ka ge a be a ratwa ke batho. (Mareka 15:10) Le gona, ga go pelaelo gore bontši bja bao ba bego ba tumile bo ile bja se rate ge a be a ba kgalema ka baka la boikaketši bja bona le boradia. (Mat. 23:13-36) Ka mo go swanetšego, Jesu o ile a nyatša go hloka ga bona tsebo ka boomo, a re: “Go madimabe lena bao le tsebago Molao, gobane le tšere senotlelo sa tsebo; lena ka noši ga se la tsena [Mmušong], gomme bao ba tsenago le ba thibetše!”—Luka 11:37-52.

Jesu o boletše ditaba tše dibotse nageng ka moka ka nywaga e meraro le seripa. Le gona, o ile a tlwaetša ba bangwe ba bantši gore ba phethe modiro woo. (Luka 9:1, 2; 10:1, 16, 17) Jesu le barutiwa ba gagwe ba ile ba atlega kudu moo Bafarisei ba ilego ba ngongorega ka gore: “Bonang! Lefase le mo šetše morago.” (Joh. 12:19) Ka gona, ga se gore Bajuda ba bantši ba be ba sa tsebe selo. Lega go le bjalo, ba ile ba dula ba ‘sa tsebe’ gore Jesu ke Mesia. Ba ka be ba ile ba oketša tsebo le lerato la bona ka Mesia, eupša ga se ba ka ba dira bjalo. Ba bangwe ba ile ba tšea karolo polaong ya Jesu. Ke ka baka leo moapostola Petro a eleditšego bontši bja bona ka gore: “Ka gona, itsholeng gomme le sokologe e le gore dibe tša lena di phumolwe, gore mehla ya tapologo e tle e e-tšwa sefahlegong sa Jehofa le gore a rome Kriste yo le mmeetšwego, e lego Jesu.” (Dit. 3:19, 20) Seo se lemogegago ke gore Bajuda ba dikete, go akaretša le “lešaba le legolo la baperisita,” ba ile ba thoma go theetša. Ba ile ba se sa dira dilo ka go se tsebe. Go e na le moo, ba ile ba sokologa gomme ba amogelwa ke Jehofa.—Dit. 2:41; 4:4; 5:14; 6:7.