Ñawiriqkunapta tapuyninku

Jesús tukuy Israelpi Diosmanta willarqa, chaywanpis, ¿imaraykutaq apóstol Pedro nirqa: judíos, kamachiqkunasninku ima, ‘mana yachaqkunajina ruwasqankuta’ paykunallataq Jesusta wañuchichkaptinku? (Hech. 3:17.)

Apóstol Pedroqa, Mesiasta wañuchisqankumanta juk qutu judiosta juchachaspa, ajinata nirqa: “Noqa yachani Jesusta wañuchispaqa mana yacharqankichejchu imatachus ruwasqaykichejta, nillataj kamachejkunaykichejpis”, nispa (Hech. 3:14-17). Ichá wakinkunaqa, Jesús, Mesías kasqanta mana yacharqankuchu, chayri yachachisqanta mana japʼiqarqankuchu. Wakinkunataq, ichapis Diospa munayninta mana ruwayta munarqankuchu, saqra runas, envidiakuq runas ima, kasqankurayku.

Judíos, Diosmanta mana yachayta munasqankuta, imaynatachus kawsayninkupi rikukusqanta qhawarina. Jesusqa, rikchʼanachinaswan yachachiq, astawan yachayta munaqkunamantaq sutʼinchaq. Chaywanpis wakin judiosqa, Jesuspa yachachisqanta manaña yachayta munaspa, ripurqanku. Wakin discipulosninpis, Jesús juk rikchʼanachinawan yachachisqanta mana allinta entiendespa, phiñakurqanku (Juan 6:52-66). Jesusqa, rikchʼanachinaswan yachachirqa, judíos yuyayninkuta tikrachinankupaqjinachus manachus kasqankuta yachananpaq, judiostaq chayta mana repararqankuchu (Isa. 6:9, 10; 44:18; Mat. 13:10-15). Manallataq, Mesías rikchʼanachinaswan yachachinanmanta, Biblia juk chiqapi nisqanta yacharqankuchu (Sal. 78:2, 3).

Wakintaq, Jesusta chiqnikusqankurayku qhisacharqanku. Sutʼincharinapaq, Jesús Nazaret llaqtapi juk sinagogapi yachachichkaptin runasqa, tʼukuchkaq qhipakurqanku. Chaywanpis Jesusta, Mesiastajina qhawanankumantaqa, maymantachus kasqanpi astawan tʼukurirqanku, chayrayku tapukurqanku: “¿Maypitaj kay tukuy imata yachamorqa? [...] Manachu kayqa carpintero, jinataj Mariajpa churin? Manachu wawqesnimpis Santiago, José, Judas, Simón ima kanku? Manachu panasnimpis noqanchejwan kaypi kashanku?”, nispa (Mar. 6:1-3). Arí, Jesús wakcha familiamanta kasqanrayku, yachachisqanta qhisacharqanku.

Chantá, ¿imatá chay tiempopi llulla religionesta kamachiqkunamanta nisunman? Ichá paykunapis chay runasjinallataq yuyasqankurayku, Jesusta qhisacharqanku (Juan 7:47-52). Jesusta runas uyarisqankuraykutaq, chiqnikurqanku (Mar. 15:10). Chantapis, puraq uya, llulla kasqankuta ima, Jesús sutʼinchasqanmanta phiñakusqankuta ama qunqanachu (Mat. 23:13-36). Chay fariseosqa, Diosmanta chiqa yachayta mana yachayta munarqankuchu, chayrayku Jesús juchacharqa: “Ay qankunamanta, leymanta yachachejkuna, yachayman punkoj llaventa japʼikapojkuna. Qankuna mana yaykunkichejchu, jinataj yaykuyta munajtapis jarkʼankichej”, nispa (Luc. 11:37-52).

Jesusqa, Israel llaqtapi kimsa wata khuskanniyuqta willarqa. Chantapis, chay llamkʼayta ruwanankupaq, discipulosninta sumaqta yachachirqa (Luc. 9:1, 2; 10:1, 16, 17). Arí, Jesusqa discipulosninwan sumaqta llamkʼarqa, chayrayku fariseos phiñakuspa nirqanku: “Tukuy runas payman kʼaskakapushanku”, nispa (Juan 12:19). Rikunchikjina judiosqa, Jesusta riqsirqanku. Jesús Mesiasjina imatachus ruwasqallanta mana yacharqankuchu. Paykunaqa, Jesusta allinpaq qhawaspa, paymanta astawan yachakuyta atinkuman karqa, chaywanpis mana ajinatachu ruwarqanku. Manaqa Jesusta wañuchiyta yanaparqanku. Chayrayku Pedro paykunata nirqa: “Diosman kutirikuychej Jesuspi creespa juchasniykichej pampachasqa kanampaj, Diosmantapacha kallpa jamojtin allin kawsay kanampaj, Cristota kachamunampajtaj, pimantachus qankunaman willasqaña karqa, chay Jesustamin”, nispa (Hech. 3:19, 20). Chay yuyaychaytataq may chhika judíos, “sacerdotes” ima kasukurqanku. Ajinamanta, manaña mana yachaqkunajinachu karqanku, manaqa Jehovap khuyakuyninta tarirqanku, pesachikusqankurayku (Hech. 2:41; 4:4; 5:14; 6:7).