Kay revistata leeqkunaq tapukusqan

Israel suyuntintataq Jesús predicaran chayqa, ¿imaraykutaq apóstol Pedro judío runakunamanta kamachikuqkunamantapas niran “mana yachaspa[n]” ruwaranku nispa, paykunapuni Jesusta wañuchinankuta munashaqtinku? (Hech. 3:17.)

Jesusta wañuchisqankumantan huk t’aqa judío runakunata apóstol Pedro niran: “Ñoqaqa yachanin qankunapas kamachikuqniykichiskunapas Jesusqa pichus kasqanta mana yachaspa wañuchisqaykichista”, nispa (Hech. 3:14-17). Wakinninkuqa yaqapaschá mana yacharankuchu, Jesús Mesías kasqanta mana reparasqankurayku otaq yachachikuyninkunata mana allinta entiendesqankurayku. Wakintaq mana Diospa munayninta ruwayta munasqankurayku, Jesusta pisichasqankurayku, envidiakusqankurayku, cheqnikusqankurayku ima.

Qhawarisunchis imata askha judiokuna ruwaranku Diosmanta yachaypi pisita interesakusqankurayku. Jesusqa rikch’anachiy simikunawanmi yachachiq, astawan yachay munaqkunamantaq chaymanta sut’inchaq. Wakin runakunan ichaqa mana astawan yachayta munaqkuchu, chayraykun ripuqku. Huk kutipiqa qatikuqninkunapas phiñakurankun huk rikch’anachiywan Jesús yachachishaqtin (Juan 6:52-66). Rikch’anachiykunawan yachachispan Jesusqa yachayta munaran imayna kasqankuta imayna yuyaykusqankuta cambiayta munankumanchus icha manachus chayta, chay runakunaqa manan mayqenninkupas chayta entienderankuchu (Isa. 6:9, 10; 44:18; Mat. 13:10-15). Chaymantapas manan repararankuchu rikch’anachiykunawan Mesías yachachinanmanta huk profecía willasqanta (Sal. 78:2).

Wakin runakunataq Jesusta pisipaq qhawarisqankurayku mana uyariyta munarankuchu. Nazaret llaqtanman rispan sinagogapi yachachisqa, hinan runakunaqa hatuntaraq ñawinkuta kicharispa yachachisqanmanta admirakusqaku. Prometesqa Mesías kasqanta reparanankumantaqa, ima familiamanta kasqantan astawanqa qhawariranku. Khaynatan tapukuranku: “¿Maypitaq kay runaqa kaykunata yachamurqan? [...] ¿Manachu payqa Mariaq churin carpintero? ¿Manachu payqa Jacoboq, Josepa, Judaspa, Simonpapas wawqen? ¿Manachu panankunapas ñoqanchiswan kashanku?” nispa (Mar. 6:1-3). Arí, wakcha familiamanta kasqanraykun yachachikuyninkunata pisicharanku.

¿Imanisunmantaq religionpi umalliqkunamantari? Paykunapas Nazaret llaqtamanta runakuna hina piensaspan yaqa llapanku pisillata Jesusta uyariranku (Juan 7:47-52). Chaymantapas envidiakurankun askha runakuna payta qatikusqankurayku (Mar. 15:10). Hinaspapas paykunaqa kirunkutaraqmi phiñakuymanta k’utupakuranku iskay uya llulla kasqankuta Jesús sut’iman orqoqtin (Mat. 23:13-36). Paykunallamantan mana yachayta munarankuchu, chayraykun Jesús niran: “¡Ay, qankunamanta kamachikuy simita yachachiqkuna! Qankunaqa Diosmanta yachay llavetan hap’ikapunkichis. Qankuna kikiykichispas manan [Reinoman] haykunkichischu, haykushaqkunatapas hark’ankichismi”, nispa. (Luc. 11:37-52).

Jesusqa kinsa wata partintan allin willakuykunata Israelpi predicaran. Chaymantapas askha qatikuqninkunatan yachachiran pay hina predicanankupaq (Luc. 9:1, 2; 10:1, 16, 17). Jesuspas qatikuqninkunapas allintan chay llank’ayta apariranku, chaymi fariseokunapas niranku: “Qhawariychis, llapallanmi paypa qhepanta ripushanku”, nispa (Juan 12:19). Rikusqanchis hina, judío runakunaqa yacharankun Jesusmanta. Ichaqa manan repararankuchu Jesús Mesías kaspa tukuy imatapas ruwashasqanta. Munaspaqa paymanta astawan yachaspan munakunkuman karan, ichaqa manan chaytachu ruwaranku. Wakinqa yanapakurankuraqmi wañuchisqa kananpaq. Chaymi apóstol Pedro askha judío runakunata niran: “Huchaykichista saqepuspa Diosman kutirikuychis huchaykichiskuna pichasqa kananpaq, ahinapin Señor Diosqa sumaq kawsaypi samarichisunkichis, Jesusta kachamuspasuykichis. Paytan Diosqa ñawpaqmantaña akllarqan qankunapaq Cristo kananpaq”, nispa (Hech. 3:19, 20). Waranqanpin judío runakunaqa chayta uyarispa kasukuranku, “sacerdotekunapas askhan Jesuspi iñirqanku”. Paykunaqa manañan mana yachaq hinachu ruwaranku huchallikusqankumantapas sonqonkutan nanachikuranku, chayraykun Jehová Diospa allin qhawarisqan kapuranku (Hech. 2:41; 4:4; 5:14; 6:7).