Aksi fu leisiman

Yesus ben preiki na ini a heri kondre Israel. Dan fu san ede na apostel Petrus taki dati a Dyu pipel nanga den tiriman ’no ben sabi san den e du’, di den gi komando fu kiri Yesus?​—Tori. 3:17.

Di na apostel Petrus ben taki nanga wan grupu Dyu, dan a taigi den san den ben abi fu du nanga a dede fu a Mesias: „Mi sabi taki unu no ben sabi san unu ben du, èn so a de tu nanga den tiriman fu unu” (Tori. 3:14-17). Kande son Dyu no ben frustan taki Yesus na a Mesias, noso den no ben frustan den leri fu en. Ma trawan no ben wani teki den leri fu Yesus, fu di den no ben wani plisi Gado. Boiti dati, den ben denki takru fu Yesus, den ben e dyarusu na en tapu èn den ben abi bita-ati gi en.

Fu di furu Dyu no ben wani plisi Yehovah trutru, meki a sani dati ben abi krakti tapu a fasi fa den ben e si den leri fu Yesus. Nofo tron Yesus ben e gi leri nanga yepi fu agersitori, èn a ben e fruklari den agersitori gi den sma di ben wani sabi moro. Ma son sma di ben arki en, ben waka gowe èn den no ben du muiti fu frustan san den yere. Wan leisi, srefi son disipel ben naki futu, fu di Yesus ben gebroiki wan agersitori di den no ben frustan (Yoh. 6:52-66). Den sma disi no ben frustan taki Yesus ben e gebroiki agersitori fu si efu den ben de klariklari fu kenki a denki fu den èn sosrefi den sani di den ben e du (Yes. 6:9, 10; 44:18; Mat. 13:10-15). Den no ben poti prakseri tu na a profeititori di ben taki dati a Mesias ben o gebroiki agersitori fu gi sma leri.​—Ps. 78:2.

Trawan no ben teki den leri fu Yesus, fu di den ben e denki takru fu en, aladi den no ben sabi en. Di Yesus ben e gi leri na ini a snoga fu Nasaret, a foto pe a gro kon bigi, dan den sma ben „fruwondru”. Ma na presi fu bribi taki Yesus na a Mesias, den bigin aksi sani fu kon sabi suma na en: „Fu pe a man disi komopo nanga den sani disi? . . . A no en na a temreman, a manpikin fu Maria èn a no en na a brada fu Yakobus, Yosef, Yudas, nanga Simon? Den sisa fu en de dyaso nanga wi, a no so?” (Mark. 6:1-3) Fu di Yesus no ben gro kon bigi na ini wan prenspari famiri, meki den sma fu Nasaret ben e si den leri fu en leki soso sani.

Fa a ben de nanga den kerki fesiman? Furu fu den no ben bribi na ini Yesus, fu den srefi reide disi (Yoh. 7:47-52). Den no ben wani teki den leri fu Yesus tu, fu di den ben dyarusu taki a pipel ben e arki Yesus (Mark. 15:10). A no de fu taki dati furu prenspari sma ben atibron di Yesus krutu den fu a hoigrifasi nanga a bedrigifasi fu den (Mat. 23:13-36). Na fu espresi den man disi no ben wani bribi den leri fu Yesus. Fu dati ede, a ben fiti taki Yesus krutu den: ’Helu fu unu di sabi a Wet heri bun, bika unu puru a sroto di musu gi sma sabi; unsrefi no e go na ini [a Kownukondre] èn unu e tapu a pasi gi den sma di wani go na inisei.’​—Luk. 11:37-52.

Yesus preiki a bun nyunsu dri nanga afu yari na ini a kondre. A leri furu sma tu fu du a wroko dati (Luk. 9:1, 2; 10:1, 16, 17). Yesus nanga den disipel fu en ben abi bun bakapisi na ini a wroko fu den. Fu dati ede den Fariseiman ben kragi: „Luku! Heri grontapu e waka na en baka” (Yoh. 12:19). Sobun, a no ben de so taki furu Dyu no ben sabi notinoti. Ma a prenspari sani di den „no ben sabi” na taki Yesus na a Mesias. Den ben kan leri sabi a Mesias moro bun èn kon kisi moro lobi gi en, ma den no du dati. Sonwan fu den ben horibaka gi den sma di kiri Yesus. Fu dati ede, na apostel Petrus gi furu fu den a deki-ati disi: „Un musu abi berow, èn un musu drai un libi, so taki Yehovah kan figi un sondu puru, dan a sa gi unu krakti baka, èn a sa seni a Krestes kon, a wan di a ben pramisi unu, namku Yesus” (Tori. 3:19, 20). A moi fu si taki dusundusun Dyu bigin poti prakseri na a sani dati èn sosrefi „bun furu priester”. Den no ben e handri moro sondro fu sabi san den e du. Na presi fu dati, den sori berow èn Yehovah ben feni den bun.​—Tori. 2:41; 4:4; 5:14; 6:7.