¿Bibliax amuytʼañjamati?

“Sapa domingonakaw utajan Biblia liyipxirïta. Diosan amuytʼayatätap yatkchiyätsa, walja chiqanakaw jan amuyañjamäkänti ukatwa jan sinti liyiñ munirïkti.” (Steven, Gran Bretaña markata.)

“17 manïkayät ukhaw Biblia liyiñ qalltta, amuyañax wali chʼamänwa ukatwa jaytxta.” (Valvanera, España markata.)

“Católico yupaychäwinkirjamaxa, may kutikis qalltat tukuykam Biblia liyiñätapxa yatiyätwa. Ukat kimsa maranwa liytʼañ tukuyta, ukampis janipuniw kuns amuyawaykti.” (Jo-Anne, Australia markata.)

CHIQPACHANSA, Bibljam yaqha librox janipuniw utjkiti. Waljaw aljasiwayi, walja arunakar jaqukipatawa ukat waljanin utjaraki, kunayman jikxataraksna, janipuniw Bibljam yaqha librox utjkiti. Ukhamäkipansa, walja jaqinakaw Bibliat jan sum amuytʼapkiti. ¿Jumax ukhamanti jikxatasirakta?

¿Bibliat amuytʼañasxa Diosax janit munkpachäna?

Janïr uka jisktʼar qhanañchkasaxa, khitis Biblia qillqaypachäna uk amuytʼañäni, 2 Timoteo 3:16 ukan akham siwa: “Taqi Qillqatasti [Jehová] Diosan amuytʼayatawa” sasa. Jïsa, Bibliax Diosan amuytʼayatawa ukhamaxa, ¿janit taqinin amuytʼapxañap munkpachäna? ¿Jan ukax teólogos ukat eclesiásticos uka mä qhawqha yatxatata jaqinakatakikich qillqaypachänxa?

Aka jiskʼa tʼaqanakax uka jisktʼanakaruw qhanañchi:

“Aka mandamiento arunak jichhüruna churapksma ukanakax janiw jumanakatakix sinti chʼamäkiti, janirakiw jan phuqhañjamäkarakisa.” (Deuteronomio 30:11.)

“Arunakamat qhanañchäwix amuytʼayituwa, pisi amuytʼaninakarux amuytʼayiwa.” (Salmo 119:130.)

“Ukapachaw Jesusax kusisiñampi phuqtʼata Qullan Ajayu tuqi, akham säna: Yupaychsmaw Awkiy, alaxpachansa ukhamarak akapachansa Tatitupa. Jumax akanakx wali yatiñaninakatsa ukhamaraki amuytʼaninakampitsa imanttawa, ukatsti jukʼa yatiñan jaqinakaruw uñachtʼaytaxa.” (Lucas 10:21.)

Qhanäskiwa, uka jiskʼa tʼaqanakarjamaxa Bibliat sum amuytʼañaswa Jehová Diosax muni. Ukampisa, yatxatañatak chʼamachtʼaskasas walja jaqinakax janiw amuytʼañ puedipkiti. ¿Yanaptʼax utjpachati? ¡Jïsa! Kunjamsa Bibliat amuytʼañatak yanaptʼa jikxatsna ukwa kimsa tuqit jutïr yatichäwin uñjañäni.