Puede daw na Masabotan an Biblia?

“An samong pamilya nagbabasa kan Biblia kada Domingo. Dai ko man talaga iyan nagustohan na marhay. Naniniwala ako na an Biblia Tataramon nin Dios, alagad an kadaklan sa binabasa ko depisilon na masabotan.”​—⁠Steven, Britania.

“Kan ako 17 anyos, prinobaran kong basahon an Biblia. Nadepisilan akong masabotan iyan, kaya nagpondo na lang ako.”​—⁠Valvanera, España.

“Binabasa ko kaidto an Biblia huling naniniwala ako na bilang Katoliko, maninigo na basahon ko iyan. Inabot ako nin tolong taon bago matapos iyan! Alagad kadikiton sana an nasabotan ko.”​—⁠Jo-Anne, Australia.

AN Biblia nagdadanay na pinakapopular na libro sa kinaban. Iyan mas mabenta pa man giraray kisa sa gabos na iba pang libro, asin makukua nin mas dakol na tawo sa mas dakol na lenguahe saka sa mas dakol na format kisa kasuarin man. Pero, an dakol na igwang Biblia nadedepisilan na masabotan iyan. Totoo man daw iyan sa saimo?

Gusto daw kan Autor na Masabotan Niato an Saiyang Tataramon?

“An gabos na Kasuratan ipinasabong nin Dios,” an sabi kan Biblia. (2 Timoteo 3:16) Iyo, si Jehova Dios an Autor kan Biblia. Gusto daw niang masabotan niato an saiyang Tataramon? O tinuyo daw nia na an Biblia dai masabotan kan gabos apuera kan pira sana na nagkaigwa nin oportunidad, arog baga nin mga klerigo asin nag-espesyalisar sa Biblia?

Pag-isipan an minasunod na mga teksto hale mismo sa Biblia:

“An togon na ini na ipinagboboot ko sa saimo ngonyan bakong labi kadepisil para sa saimo, ni harayo man iyan.”​—⁠Deuteronomio 30:⁠11.

“An mismong paghahayag kan saimong mga tataramon nagtatao nin liwanag, na nagpapasabot sa mga daing eksperyensia.”​—⁠Salmo 119:130.

“Kan mismong oras na idto [si Jesus] naggayagaya nin labi-labi sa banal na espiritu asin nagsabi: ‘Hayag takang inoomaw, Ama, Kagurangnan kan langit asin daga, huli ta maingat mong itinago an mga bagay na ini sa mga madonong asin intelektuwal, asin ihinayag iyan sa mga omboy.’ ”​—⁠Lucas 10:⁠21.

Talagang gusto kan Autor kan Biblia na masabotan nindo an saiyang Tataramon! Minsan siring, nagdadanay an katunayan na dakol na sinserong tawo an nadedepisilan na masabotan an librong ini. Ano an makakatabang? Nasa sunod na mga artikulo an tolong suhestion na makakatabang sa saindo na masabotan an Biblia.