Ani Abaanyɛ Anu Biblia lɛ Shishi?

“Daa Hɔgbaa lɛ, wɔweku lɛ feɔ ekome kɛkaneɔ Biblia lɛ. Minyaaa he kwraa. Miheɔ miyeɔ akɛ Biblia lɛ ji Nyɔŋmɔ Wiemɔ, shi minuuu emli saji ni mikaneɔ lɛ fã kpotoo shishi kwraa.” —Steven, Britain.

“Beni miye afii 17 lɛ, mibɔ mɔdɛŋ akɛ makane Biblia tso muu lɛ fɛɛ. Minuuu nɔ ni mikaneɔ lɛ shishi kwraa, no hewɔ lɛ mikpa kanemɔ.”—Valvanera, Spain.

“Mikane Biblia tso muu lɛ fɛɛ shi kome, ejaakɛ minu he akɛ ákɛ Katoliknyo lɛ esa akɛ makane. Mikɛ afii etɛ sɔŋŋ kane! Shi emli saji lɛ fioo ko pɛ shishi minu.”—Jo-Anne, Australia.

BIBLIA lɛ kã he eji wolo ni ale waa fe woji krokomɛi fɛɛ yɛ je lɛ mli. Ekã he eji wolo ni aheɔ waa, mɛi pii anine nyɛɔ eshɛɔ nɔ, ni eyɛ wiemɔi pii amli fe woji krokomɛi fɛɛ. Agbɛnɛ hu, akɛ Biblia lɛ ewo nibii srɔtoi anɔ fe bei fɛɛ ni eho. Enɛ fɛɛ sɛɛ lɛ, mɛi ni yɔɔ Biblia lɛ eko lɛ ateŋ mɛi pii nuuu emli wiemɔi lɛ ashishi. Ani nakai eji yɛ ogbɛfaŋ?

Ani Nyɔŋmɔ Miisumɔ ni Wɔnu E-Wiemɔ lɛ Shishi?

Biblia lɛ kɛɔ akɛ, ‘Ŋmalɛ fɛɛ ŋmalɛ lɛ ejɛ Nyɔŋmɔ Mumɔ lɛ mli.’ (2 Timoteo 3:16) Hɛɛ, Yehowa Nyɔŋmɔ ji mɔ ni kɛ Biblia lɛ duro wɔ. Ani eesumɔ ni wɔnu e-Wiemɔ lɛ shishi? Aloo eje gbɛ efee Biblia lɛ bɔni afee ni nilelɔi fioo, tamɔ osɔfoi kɛ Biblia he nilelɔi pɛ anu shishi?

Nyɛhaa wɔsusua Biblia mli ŋmalɛi ni nyiɛ sɛɛ nɛɛ ahe wɔkwɛa:

“Nɛkɛ kita nɛɛ ní miwoɔo ŋmɛnɛ gbi nɛɛ lɛ, ewaaa haaao, ni ebɛ shɔŋŋ hu.”—5 Mose 30:11.

“Owiemɔi lɛ anaagbelemɔ haa la, ehaa kwashiai leɔ nii.”—Lala 119:130.

“Nakai ŋmɛlɛtswaa lɛ nɔ nɔŋŋ lɛ Yesu mli fili lɛ yɛ Mumɔ krɔŋkrɔŋ lɛ mli ni ekɛɛ: Miijie oyi, Ataa, ŋwɛi kɛ shikpɔŋ Nuŋtsɔ, akɛ oŋɔ nii nɛɛ otee nilelɔi kɛ ŋaalelɔi, ni ojie otsɔɔ abifabii.”—Luka 10:21.

Ekã shi faŋŋ akɛ, Nyɔŋmɔ miisumɔ ni onu e-Wiemɔ ni ji Biblia lɛ shishi! Shi eji anɔkwale akɛ, mɛi babaoo yɛ ni miitao amɛnu Biblia lɛ shishi, shi amɛnuuu shishi. Mɛni baanyɛ aye abua? Saji ni nyiɛ sɛɛ lɛ kɛ ŋaawoi etɛ ni baanyɛ aye abua bo ni onu Biblia lɛ shishi lɛ baaha.—w09 07/01-E.