Be Hiẹ Sọgan Mọnukunnujẹ Biblu mẹ Ya?

“Whẹndo mítọn nọ hia Biblu to dimanche lẹpo. N’ma nọ duvivi etọn sọmọ. N’yọnẹn dọ Ohó Jiwheyẹwhe tọn wẹ Biblu, ṣigba suhugan nuhe n’nọ hia lẹ tọn wẹ nọ vẹawuna mi nado mọnukunnujẹemẹ.”—Steven, Grande-Bretagne.

“To whenue n’tindo owhe 17, n’tẹnpọn nado hia Biblu blebu. E vẹawuna mi nado mọnukunnujẹemẹ, enẹwutu n’gbọ bo hònúpla.”—Valvanera, Espagne.

“N’hia Biblu blebu to ojlẹ de mẹ wayi na n’lẹndọ taidi Katoliki de, n’dona wàmọ. Owhe atọ̀n wẹ e yí to asie nado hia ẹ fó! Ṣigba n’ma mọnukunnujẹ nususu de mẹ.”—Jo-Anne, Australie.

BIBLU wẹ gbẹsọ yin owe he gbayipe hugan to aihọn mẹ. E gbẹ́ nọ yin sisà hugan owe devo depope bo tin-to-aimẹ todin hugan gbede pọ́n na suhugan gbẹtọ lẹ tọn, to suhugan ogbè lẹ tọn mẹ to kasẹti ji, CD ji, po mọmọ po sọyi. Ṣogan, e nọ vẹawuna susu mẹhe tindo Biblu lẹ tọn nado mọnukunnujẹemẹ. Be mọ wẹ e te na hiẹ lọsu ya?

Be Jiwheyẹwhe Jlo Dọ Mí Ni Mọnukunnujẹ Ohó Etọn mẹ Ya?

Biblu dọmọ: “Owe-wiwe lẹpo [yin] gbingbọ́n sọn Jiwheyẹwhe” dè. (2 Timoti 3:16) Mọwẹ, Jehovah Jiwheyẹwhe wẹ yin Dowatọ Biblu tọn. Be e jlo dọ mí ni mọnukunnujẹ Ohó etọn mẹ ya? Kavi e desọn ojlo mẹ bo hẹn Biblu dózin na mẹlẹpo bọ mẹṣinṣinyan delẹ taidi sinsẹ̀ngán lẹ po weyọnẹntọ he nọ dindona Biblu lẹ po wẹ sọgan mọnukunnujẹemẹ ya?

Gbadopọnna wefọ Biblu tọn he bọdego ehelẹ:

“Gbedide ehe he yẹn degbena we to egbehe, e ma yin sinsinyẹn gbau na we gba, mọ e ma tin dẹn boboe gba.”—Deutelonomi 30:11.

“Hùnhùn ohó towe lẹ tọn na hinhọ́n omẹ; e na nuyọnẹn hlan mayọndenọ lẹ.”—Psalm 119:130.

“To ojlẹ doponẹ lọ mẹ wẹ Jesu sọ jaya gbọn [gbigbọ wiwe] dali, bo dọmọ, Yẹn dopẹna we, Otọ́, Oklunọ olọn po aihọn po tọn, na hiẹ ko yí onú helẹ whlá sọn nuyọnẹntọ lẹ, po zinzintọ lẹ po dè, bosọ do yé hia hlan ovivu lẹ.”—Luku 10:21.

Na nugbo tọn, Dowatọ Biblu tọn jlo dọ hiẹ ni mọnukunnujẹ Ohó etọn mẹ! Ṣigba, nugbo lọ wẹ yindọ e nọ vẹawuna ahunjijlọnọ susu nado mọnukunnujẹ owe ehe mẹ. Etẹwẹ sọgan gọalọ? Hosọ he bọdego lẹ zinnudo ayinamẹ atọ̀n delẹ he sọgan gọalọna we nado mọnukunnujẹ Biblu mẹ ji.