O Nkand’a Nzambi nga Ulenda Bakulwa?

“Esi nzo eto betanganga Nkand’a Nzambi nkonso kia Lumingu. Kiayangalelanga e fu kiaki ko. Yakwikilanga vo Nkand’a Nzambi i Diambu dia Nzambi, kansi mayingi mu mana yatanganga kiabakulanga mo ko.”​—⁠Ukavova Steven wa mwisi Grã-Bretanha.

“Vava yakala ye kimbuta kia mvu 17, yateza tanga Nkand’a Nzambi. Yamona vo mpasi wakala mu bakulwa, muna kuma kiaki yayambula wo tanga.”​—⁠Ukavova Valvanera wa mwisi Espanha.

“Wau vo i nkwa dibundu dia Katolika, yatanganga Nkand’a Nzambi kadi yabanzanga vo mfwete wo tanga. Mvu ntatu yavanga muna fokola wo tanga! Kansi, kiabakula kana diambu dimosi ko.”​—⁠Ukavova Jo-Anne wa mwisi Austrália.

YAMU wau o Nkand’a Nzambi i nkanda utomene zayakana omu nza. I nkanda usundidi tekwa ke mu konso nkanda wakaka ko. Ulolo wa wantu bena yo nkanda wau ye wasekolwa mu ndinga zayingi. Vana ntandu, vena ye Nkand’a Nzambi mia mpila mu mpila, miampwena, miakete ye miakete-kete yo vayikiswa mpe mu CD ye DVD. Kana una vo i wau, ndonga ke belendanga wo bakula ko. Nga i diau mpe divangamanga kwa ngeye?

Nga Nzambi Ozolele vo Twabakula e Diambu Diandi?

Muna Nkand’a Nzambi tutanganga vo: “E sono yawonso yavumunwinwa kwa Nzambi.” (2 Timoteo 3:​16) Elo, Yave wa Nzambi Yandi wasonekesa Nkand’a Nzambi. Ng’ozolele vo twabakula Diambu diandi? Nga wakubika Nkand’a Nzambi walembi bakulwa kwa ulolo wa wantu yo vana kaka elau kwa akete nze afidi a mabundu ye akwa ngangu mu bakula wo?

Badika dina uvovanga o Nkand’a Nzambi mu sono yilende:

“O nkanikinu wau una ikukanikinang’o unu, ke wesivi oko wina ko, ngatu valuka.”​—⁠Nsiku 30:⁠11.

“O ntendo a mambu maku utemona; ubakulwis’atunga.”​—⁠Nkunga 119:130.

“Muna yau ntangwa ina, [Yesu] oyangalèle kikilu kuna mwand’avelela, oku vo, itondele, e Tata, e Mfumu ezulu ye nza, wau wasweka mambu mama kw’akwa ngangu y’alungaladi, wasengomwena mo ayingyana-ngyana.”​—⁠Luka 10:⁠21.

Yave wa Nzambi wa Nsonekesi a Nkand’a Nzambi, ozolele vo wabakula e Diambu diandi. Kansi, dialudi vo ayingi muna akwa ntima miansongi bemonanga vo diampasi mu bakula nkanda wau. Nki kilenda kubasadisa? Elongi dilanda diyika mambu matatu malenda kusadisa muna bakula o Nkand’a Nzambi.