Kana Mwa Kona ku Utwisisa Bibele?

“Lubasi lwa luna ne lu balanga Bibele la Sunda ni la Sunda. Ne ni sa ikolangi hahulu ku i bala. Ne ni lumela kuli Bibele ki Linzwi la Mulimu, kono litaba ze ñata ze ne ni balile ku yona nee li ze taata hahulu ku li utwisisa.”—Steven, wa kwa Britain.

“Ha ne ni na ni lilimo ze 17, ne ni likile ku bala Bibele. Ne i li taata ku i utwisisa, mi kabakaleo na tuhela ku i bala.”—Valvanera, wa kwa Spain.

“Ne ni balile Bibele kaufela yona hañwi kakuli ne ni ikutwile kuli ka ku ba Mukatolika, ni swanela ku i bala. Ne ku ni ngezi lilimo ze talu kuli ni i feze! Kono ki ze nyinyani hahulu ze ne ni utwisisize ku yona.”—Jo-Anne, wa kwa Australia.

BIBELE isali yona buka ye tabelwa hahulu mwa lifasi. I zwelapili ku lekiwa hahulu ku fita libuka ze ñwi kaufela, i fumaneha kwa batu ba bañata ni mwa lipuo ze ñata, mi i fumaneha ka buñata ni fa matapa ni matepu ku fita lili kaufela. Nihakulicwalo, batu ba bañata ba ba na ni Bibele ba fumana taata ku i utwisisa. Mina bo?

Kana Mulimu wa Lata Kuli lu Utwisise Linzwi la Hae?

Bibele i li: “Liñolo kamukana li tahile ka Moya wa Mulimu.” (2 Timotea 3:16) Kaniti Jehova Mulimu ki yena ya lu file Bibele. Kana wa lata kuli lu utwisise Linzwi la hae? Kamba kana naa tahisize ka bomu kuli batu kaufela ba palelwe ku i utwisisa kwandaa ba sikai feela, ba ba cwale ka ba bahulu ba bulapeli ni bocaziba ba Bibele?

Ha mu nyakisise litimana ze, ze zwa mwa Bibele:

“Mulao o ni ku laela kacenu, haki o taata hahulu kuli u ku palelwe; mi ha u yo kwahule.”—Deuteronoma 30:11.

“Taluso ya manzwi a hao ya monyeha, i bonisa liseli; i fa ba ba ishuwa kutwisiso.”—Samu 119:130.

“Ka yona nako yeo, Jesu a nyakalala ka Moya o Kenile, mi a li: Na ku lumba Ndate, Mulena wa lihalimu ni wa lifasi, kakuli litaba ze, u li patezi ba ba butali ni ba ba talifile, mi u li patululezi banana ba banyinyani.”—Luka 10:21.

Kaniti luli, Mulimu wa lata kuli mu utwisise Linzwi la hae! Nihakulicwalo, batu ba bañata ba lipilu ze na ni niti ba sa fumana taata ku utwisisa Bibele. Ki lika mañi ze kona ku mi tusa? Litaba ze tatama li talusa lika ze talu ze mu kona ku eza ili ze kona ku mi tusa ku utwisisa Bibele.