Le Bikokejika Kwivwana Bible?

“Kisaka kyetu kitañanga Bible Dya Yenga ne Dya Yenga. Nkyadipo nsangela yoya mpangiko. Nadi nkulupile amba Bible i Kinenwa kya Leza, ino myanda mivule yonadi ntanga’mo yadi mikomo kwivwana.”—Steven, mu Beletanye.

“Ponadi na myaka 17, natompele kutanga Bible. Namona’mba i bikomo kwivwana, naleka’byo.”—Valvanera, mu Eshipanye.

“Natangile Bible musunsa umo kete mwanda namwene amba byondi mu Katolika, mfwaninwe kutanga’ye. Namutangile mu myaka isatu mituntulu pa kupwa’ye! Ino nakomenwa kwivwanija’ye.”—Jo-Anne, mu Ostrali.

BIBLE i kitabo kiyukene kutabuka pano pa ntanda. Upotwanga kupita mabuku onso, udi na bantu bavule, mu ndimi mivule, ne bukata bwishileshile, wa kipindi nansha mutuntulu. Ino, bavule badi na Bible bakolelwanga kwivwana’ye. Le abe nobe?

Le Mwine Ulembeje Bible Usakanga Twivwane Kinenwa Kyandi?

Bible unena’mba: “Bisonekwa byonsololo [i bisonekejibwe na] Leza.” (2 Temote 3:16) Bine, Yehova Leza ye Mwine ulembeje Bible. Lelo usakanga twivwane Kinenwa kyandi’ni? Nansha le i aye mwine wasakile amba Bible ekale mukomene bonso ino wapēlejeja’ye bantu batyetye, kimfwa bakulumpe ba bipwilo ne befundi ba Bible?

Bandaula binena Bible mwine mu mavese alonda’ko:

“Mwanda kino kijila kino’ki kyo nakujidika ami dyalelo dino’di, kyokya kekyakukukolelapo pakatampe pene, mhm, nansha kwikala’kyo kulampe mpika.”—Kupituluka 30:11.

“Kupūtula kwa myanda yobe kupananga kitōkeji; kupananga kuyūkidija kudi balembakane.”—Mitōto 119:130.

“Ponkapo Yesu wadi utōkelwe mu Mushipiditu, ino wanena’mba: Nakufwijapo abe Tata, Mwine wa mūlu ne panshi, ubafuko byo wafīle byobya ku bakudyumuka, ne ku bañeni, nanshi ku twana-twa-lukeke ubasokola’byo.”—Luka 10:21.

Bine, Mwine wālembeje Bible usakanga wivwane Kinenwa kyandi! Inoko, bantu bavule ba mutyima wa binebine bamumonanga bu dibuku dikomo kwivwana. Le i bika bibwanya kwibakwasha? Bishinte bilonda’ko bimanine pa myanda isatu ikokeja kukukwasha wivwanije Bible.