Komana Munateli Kwiluka Chikupu Nsañu Yekala muBayibolu?

Steven wakwituña daBritain wahosheli nindi: “Chisaka chetu chatañaña Bayibolu hamulungu hamulungu. Hinadiluñishileña kutaña Bayiboluku. Nelukili nami Bayibolu hiIzu daNzambi, ilaña nakañenyeña kwiluka chikupu yuma yinatañileña.”

Valvanera wakuSpain wahosheli nindi: “Hinadiña nayaaka 17 yakusemuka, natachikili kutaña Bayibolu. Chankalilileña chikupu kwiluka nsañu yamuBayibolu, nawa chaleñeleli kuleka kuyitaña.”

Jo-Anne, wakuAustralia wahosheli nindi: “Natañili Bayibolu kamu hohu muloña nelukili nami hakwikala Katolika natela kuyitaña. Mwahitili yaaka yisatu hakwila nawu niyimanishi! Hela chochu, hinelukili chikupu yuma yinatañileñaku.”

BAYIBOLU himukanda welukawu chikupu mukaayi. Yabadika nyikanda yejima, antu amavulu akweti Bayibolu, wudi mumadimi amavulu, nawa ayikwatila hamatepu, haCD nihaDVD. Ilaña, antu amavulu akweti Bayibolu chayikalilaña kwiluka chikupu nsañu yamuBayibolu. Komana ninenu chayikalilaña?

Komana Nzambi Wakeñaña Nindi Twiluki Chikupu Izu Dindi?

Bayibolu yahoshaña nawu, “Nyikanda yajila yejima ayonena dehi kudi Nzambi.” (2 Timotewu 3:16) Eñañi, Yehova Nzambi diyi watwinka Bayibolu. Komana wakeñaña nindi twiluki chikupu nsañu yekala Mwizu dindi? Tahindi wasonekeli Bayibolu mumushikila kulonda antu akañanyeña kuyiluka chikupu ilaña watonda hohu antesha adi neyi akulumpi jansakililu niatudizi aBayibolu kulonda kwiluka chikupu Bayibolu?

Tiyenu mavasi amuBayibolu chiyahoshawu:

“Muloña izu dinukukuleja lelu hidakalaku, hididi kwakulehuku.”—Kuhituluka 30:11.

“Chalumbulukaña mazu eyi chaletaña chejeji, chamwinkaña wakadi maana kashinshi.”—Masamu 119:130.

‘[Yesu] hakuzañalala mudi spiritu yajila yena mpinji oyu nindi, Eyi Tata, Mwanta wewulu niiseki, nakusakilili chiwajindili akwamaana niakwakashinshi yumiyi, hiwukuyimwekesha kudi anyikeki; mwamweni Tata, dichi chiwamweni kuwaha.’—Luka 10:21.

Eñañi, Nsoneki yaBayibolu wakeñaña nindi mwiluki chikupu Izu dindi! Hela chakwila Nzambi wakeñaña nindi antu eluki Izu dindi, amavulu chayikalilaña chikupu kudiluka. Chumanyi chikuyikwasha kudiluka chikupu? Yibaaba yinalondeluhu yinashimuni njila jisatu jikuyikwasha kwiluka chikupu nsañu yekala muBayibolu.