Be Ng’ato Nyalo Winjo Tiend Weche Manie Muma?

“Joodwa ne hinyo somo Muma Jumapil ka Jumapil. An to ne ok ahero timo kamano ahinya. Nang’eyo ni Muma en Wach Nyasaye, to kata kamano thoth gik ma ne ahinyo somo ne tek winjo tiendgi.”​—Steven, ma ja Britain.

“Kane an jahigini 17, ne atemo mondo asom Muma. Ne ayudo ka otek ahinya winjo, omiyo chunya ne ool mi aweyo.”​—Valvanera, ma nyar Spain.

“Nitie kinde ma ne asomo Muma nikech kaka ja Katholik, ne aneno ni onego atim kamano. Tieko some ne okawa higini adek! Kata kamano, ne awinjo mana tiend gik matin e iye.”​—Jo-Anne, ma nyar Australia.

MUMA pod e buk mong’ere ahinya e piny mangima. En e buk ma ji ng’iewo ahinya moloyo buge mamoko, oyudore e dhok mang’eny, kendo oyudore bende e yore mopogore opogore kaka e tep, CD kod DVD. To ema podi thoth joma nigi Muma, yudo ka teknegi winjo tiend weche manie iye. Be in bende ineno kamano?

Be Nyasaye Dwaro ni Wawinj Tiend Wachne?

Muma wacho niya: ‘Ndiko duto owuok kuom much Nyasaye.’ (2 Timotheo 3:​16) Ee, Jehova Nyasaye e Wuon Muma. Be odwaro ni mondo wawinj tiend Wachne? Koso dibed ni en owuon nomiyo Muma obed buk miwinjo tiende mana gi joma nok kende, kaka jotend din gi josomo madongo manono Muma?

Non ane ndiko maluwogi mogol ei Muma wuon:

“Chikni eni machikoi tinende, ok otek ahinya matamoi, bende ok obor kodi.”​—Rapar mar Chik 30:11.

“Wecheni koyawore kelo ler; omiyo weche donjo ni jo ma riekogi tin.”​—Zaburi 119:130.

‘E sa nogo Yesu ne mor ngang’ kuom roho maler, kendo nowacho niya: “Agoyoni erokamano, A Wuora, Ruodh polo gi piny, nikech nipando wechegi ni joma riek kod joma ong’eyo wach, to nielogi ne nyithindo matindo.”’​—Luka 10:21.

Kuom adier, Jehova ma e Wuon Muma, dwaro ni wawinj tiend Wachne! Kata kamano, adier en ni, nitie ji mang’eny ma chunygi tir mapod yudo ka winjo tiend weche manie bugni teknegi. Ang’o manyalo konyogi? Sula maluwo biro chiwo puonj moko adek manyalo konyi winjo tiend Muma.