Hende Por Komprondé Beibel?
Hende Por Komprondé Beibel?
“Nos famia tabata lesa Beibel tur djadumingu. Ounke mi no tabata gusta mashá, mi tabata kere sí ku Beibel ta e Palabra di Dios. Pero mi no tabata komprondé kasi nada ku mi tabata lesa.” —Steven, Gran Bretaña.
“Tempu ku mi tabatin 17 aña, mi a purba lesa Beibel. Mi a hañ’é difísil pa komprondé, pues, gewon mi a stòp di les’é.”—Valvanera, Spaña.
“M’a yega di lesa Beibel un biaha pasobra mi tabata haña ku komo katóliko, mi mester les’é. A tuma mi tres aña pa kaba di les’é! Pero mi no a komprondé kasi nada.”—Jo-Anne, Oustralia.
BEIBEL ta keda e buki mas popular na mundu. Te ainda e ta e buki mas bendí; e ta disponibel pa mas hende, na mas idioma, i den mas forma ku nunka, sea pa lesa, skucha i mira. Sinembargo, hopi hende ku tin un Beibel ta hañ’é difísil pa komprondé. Bo tambe ta sinti asina?
E Outor di Beibel Ke pa Nos Komprondé Su Palabra?
Beibel ta bisa: “Tur Skritura ta inspirá pa Dios.” (2 Timoteo 3:16) Sí, Yehova Dios ta e Outor di Beibel. E ke pa nos komprondé su Palabra? Òf ta èksprès el a laga skirbié na un manera ku kasi ningun hende no por komprond’é, ku eksepshon di algun hende privilegiá, manera pastornan i ekspertonan riba tereno di Beibel?
Konsiderá e siguiente versíkulonan saká for di Beibel mes:
“E mandamentu akí ku mi ta ordená bo awe no ta muchu difísil pa bo, ni e no ta fuera di alkanse.”—Deuteronomio 30:11.
“Mi yu, si bo ke risibí mi palabranan i warda mi mandamentunan den bo, e ora ei lo bo diserní e temor di SEÑOR, i deskubrí e konosementu di Dios.”—Proverbionan 2:1, 5.
“Na e mesun momento ei Hesus a regosihá grandemente den spiritu santu, i a bisa: ‘Mi ta alabá bo, o Tata, Señor di shelu i tera, ku bo a skonde e kosnan akí pa sabínan i inteligentenan i a revelá nan na mucha chikitu.’”—Lukas 10:21.
Pues, manera bo por mira, e Outor di Beibel ke pa bo komprondé su Palabra! Sinembargo, echo ta ku hopi hende sinsero ta hañ’é un buki difísil pa komprondé. Kiko por yuda nan? E siguiente artíkulonan ta duna tres sugerensia ku por yuda bo komprondé Beibel.