Xana Vanhu Va Nga Swi Kota Ku Twisisa Bibele?

“Swirho swa ndyangu wa ka hina a swi hlaya Bibele Sonto yin’wana ni yin’wana. A ndzi nga swi tsakeli ngopfu ku yi hlaya. A ndzi tshemba leswaku Bibele i Rito ra Xikwembu, kambe swo tala swa leswi a ndzi swi hlaya a ndzi nga swi twisisi.”—Steven, wa le Britain.

“Loko ndzi ri ni malembe ya 17, ndzi sungule ku hlaya Bibele. Ndzi kume swi tika swinene ku yi twisisa, hiloko ndzi tshika.”—Valvanera, wa le Spain.

“Ndzi hlaye Bibele hinkwayo kan’we hikuva leswi a ndzi ri Mukhatoliki ndzi vone swi fanerile ku yi hlaya. Swi ndzi tekele malembe manharhu ku yi heta! Kambe swo tala swa leswi a ndzi swi hlaya a ndzi nga swi twisisi.”—Jo-Anne, wa le Australia.

BIBELE ka ha ri yona buku leyi dumeke swinene emisaveni. Ni sweswi ka ha ri yona leyi xavisiwaka ngopfu ku tlula tibuku letin’wana hinkwato, vanhu vo tala va na yona, yi kona hi tindzimi to tala naswona yi kumeka ni le ka ti-CD ni ti-DVD. Hambiswiritano, vanhu vo tala swa va tikela ku yi twisisa. Xana na wena swa ku tikela?

Xana Xikwembu Xi Lava Leswaku Hi Twisisa Bibele?

Bibele yi ri: “Matsalwa hinkwawo ma huhuteriwe hi Xikwembu.” (2 Timotiya 3:16) Hakunene Yehovha Xikwembu u hi nyike Bibele. Xana u lava leswaku hi yi twisisa? Kumbe, xana u endle hi vomu leswaku vanhu hinkwavo va nga yi twisisi Bibele kambe yi twisisiwa ntsena hi vanhu lava nga tatiki xandla vo fana ni vafundhisi ni vakambisisi va Bibele?

Kambisisa tindzimana leti landzelaka leti humaka eBibeleni:

“Xileriso lexi ndzi ku lerisaka xona namuntlha a xi nonon’hwi ngopfu eka wena, hambi ku ri ku va ekule swinene.”—Deteronoma 30:11.

“Ku paluxeka ka marito ya wena ku humesa ku vonakala, ku endla lava nga riki na ntokoto leswaku va twisisa.”—Pisalema 119:130.

“Hi nkarhi wowolowo [Yesu] a tsakisisa hi moya lowo kwetsima, a ku: ‘Ndza ku dzunisa erivaleni, Tatana, Hosi ya tilo ni misava, hikuva swilo leswi u va fihlele hi vukheta lavo tlhariha ni lava va nga ni ku twisisa, kutani u swi hlavutele swihlangi.’”—Luka 10:21.

Hakunene Xikwembu xa swi lava leswaku u twisisa Bibele! Hambiswiritano, ntiyiso wa mhaka hileswaku vanhu vo tala va timbilu letinene va kuma swi va tikela ku yi twisisa. I yini lexi nga va pfunaka leswaku va yi twisisa? Swihloko leswi landzelaka swi hlamusela swiringanyeto swinharhu leswi nga ku pfunaka leswaku u twisisa Bibele.