1. Askem Help Blong God
?Yu Mas Mekem Wanem Blong Kasem Save Long Baebol?
1. Askem Help Blong God
Ninfa, we i laef long Itali, i talem se: “I gat wan taem we mi bin ridim Baebol evri naet bifo we mi slip. Mi mekem olsem from we mi save se Baebol i Tok blong God, mo nating se mi no laekem blong ridim, be mi wantem save wanem we God i stap talem long yumi long Baebol. Mi gat tingting blong ridim fulwan. Long stat, mi faenem se i isi. Be taem mi stap gohed, mi faenem sam haf we i had blong kasem save long olgeta, ale mi no moa ridim Baebol.”
?OLSEM wanem? ?Samting ya i bin hapen long yu tu? Plante man oli talem ‘yes.’ Be, olsem yumi ridim long stat blong magasin ya, Man we i givim Baebol long yumi, Jeova God, i wantem se yumi kasem save long Tok blong hem. ?Yu mas mekem wanem blong kasem save long Baebol? Faswan samting se yu mas askem help blong Man ya we i givim Baebol long yumi.
Ol man long taem bifo oli stap talem se ol aposol blong Jisas oli ‘no gat nem mo oli no skul gud.’ Hemia from we oli no go long ol skul blong ol man Jiu blong kasem tijing long saed blong jos. (Ol Wok 4:13) Be Jisas i mekem tingting blong olgeta i strong se oli naf blong kasem save long Tok blong God. ?Olsem wanem oli save kasem save long Baebol? Jisas i talem se: ‘Spirit ya blong givhan, we hem i tabu spirit, we bambae Papa blong mi i save sanem i kam long nem blong mi, hem bambae i save tijim yufala long olgeta samting.’ (Jon 14:26) God i yusum tabu spirit, no paoa blong hem, blong wokem wol ya mo ol laef samting long hem. (Jenesis 1:2) Hem i yusum tabu spirit ya tu blong putum tok blong hem long tingting blong 40 man we oli raetem Baebol. (2 Pita 1:20, 21) Semfala spirit ya i save halpem olgeta we oli stap traehad blong kasem save long Baebol.
?Yu mas mekem wanem blong kasem tabu spirit blong God? Yu mas prea wetem bilif blong askem God blong givim spirit ya long yu. Ating yu mas prea bakegen mo bakegen from spirit ya. Jisas i talem se: ‘Yufala i mas gohed blong askem, nao bambae yufala i save kasem. . . . Yufala i save givim ol gudgudfala samting long ol pikinini blong yufala. Be Papa blong yufala long heven, fasin blong hem i gud moa i winim fasin blong yufala. Mo hem i save givim tabu spirit long ol man we oli askem long hem.’ (Luk 11:9, 13) Jeova i glad nomo blong givim tabu spirit long olgeta we oli askem wetem wan hat we i tru. Paoa ya blong God i save halpem yu blong kasem mining blong ol tok we God i pulum ol man blong raetem long Baebol, plante taosen yia i pas. Tabu spirit i save givim waes long yu tu we yu nidim blong mekem tok blong God i wok long laef blong yu.—Hibrus 4:12; Jemes 1:5, 6.
Evri taem we yu yu sidaon blong ridim Baebol, i gud yu prea long God, yu askem long hem blong i givim tabu spirit blong hem long yu blong halpem yu blong kasem save long Tok blong hem.