Kon sa Unsang Paagi Imong Masabtan ang Bibliya

1. Pangayog Tabang sa Diyos

“Kaniadto, mobasa kog Bibliya una matulog,” matod pa ni Ninfa nga taga-Italya. “Gibuhat nako kadto kay nahibalo ko nga ang Bibliya Pulong sa Diyos, ug bisag dili kaayo ko ganahan mobasag Bibliya, gusto kong masayod sa mensahe niana. Plano nako nga basahon ang tibuok Bibliya. Sa sinugdan, dali ra kining masabtan apan sa dihang nakaabot ko sa mga bahin nga lisod sabton, miundang ko.”

PAREHAS ba mog nasinatian ni Ninfa? Daghan ang nakasinati niana. Apan, sumala sa atong nahisgotan sa unang artikulo, gusto ni Jehova nga Diyos nga imong masabtan ang iyang Pulong. Unsay imong buhaton aron imong masabtan ang Bibliya? Una, kinahanglang mangayo kag tabang sa Diyos.

Ang mga apostoles ni Jesus giisip nga mga tawong “dili edukado ug ordinaryo” tungod kay sila wala makatungha sa relihiyosong mga eskuylahan. (Buhat 4:13) Apan gipasaligan sila ni Jesus nga mahimo nilang masabtan ang Pulong sa Diyos. Sa unsang paagi? Si Jesus misaysay: “Ang magtatabang, ang balaang espiritu, nga ipadala sa Amahan sa akong ngalan, siya magtudlo kaninyo sa tanang butang.” (Juan 14:26) Ang balaang espiritu, o aktibong puwersa, gigamit sa Diyos sa paglalang sa yuta ug sa tanang kinabuhi diha niini. (Genesis 1:2) Gigamit usab niya kana sa paggiya sa mga 40 ka tawo sa pagsulat sa Bibliya.  (2 Pedro 1:20, 21) Pinaagi niana nga espiritu, tabangan sa Diyos ang tanang gustong mokat-on sa Bibliya.

Sa unsang paagi imong madawat ang balaang espiritu sa Diyos? Kinahanglan nga imo kanang pangayoon uban ang pagtuo. Sa pagkatinuod, angay nimo kanang pangayoon nga mapinadayonon. Si Jesus miingon: “Padayon sa pagpangayo, ug kini igahatag kaninyo.” Siya midugang: “Kon kamo . . . mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan sa langit mohatag ug balaang espiritu niadtong nagapangayo kaniya!” (Lucas 11:9, 13) Si Jehova maghatag gayod sa iyang balaang espiritu ngadto sa sinserong mangayo niana. Ang maong aktibong puwersa sa Diyos makatabang kanimo sa pagsabot sa gipamulong sa Bibliya nga nasulat linibo na ka tuig kanhi. Kini maghatag usab kanimog kaalam aron imong mapadapat ang mensahe sa Bibliya.—Hebreohanon 4:12; Santiago 1:5, 6.

Busa, kon mobasa kag Bibliya, pag-ampo sa Diyos alang sa iyang balaang espiritu aron imong masabtan ang iyang Pulong.