Qanoq ilillutit Biibilimik paasinnissinnaasutit

1. Atuakkiortuanut ikioqqugit

Ninfa Italiami najugalik ima oqaluttuarpoq: “Innannginninni Biibilimik atuartarnikuuvunga. Atuartarpunga nalunnginnakku Guutip oqaaserigaa. Atuarnerlu nuannarinngikkaluarlugu paaserusuppara Guuti Biibilimi qanoq allassimanersoq. Biibilip naallugu atuarnissaa anguniagaraara. Aallaqqaammut paasiuminartippara, paasiuminaatsortaanulli killikkama taava atuartarunnaarpara.”

NINFAP misigisimasai ilisarnartippigit? Inuppassuit ilisarnartippaat. Soorlu allaaserisap matuma siuliani paasigipput Biibilimik atuakkiortup, Jehovap Guutip, illit oqaatsiminik paasinninnissat kissaatigaa. Qanorli ilillutit paasinnissinnaavit? Siullermik, atuakkiortoq qinnuigisariaqarpat ikioqqullutit.

Jiisusip apustilii ‘inuinnaasutut immikkut ilinniagaqarsimanngitsutut’ isigineqarput rabbinerit ilinniarfianni upperisarsiornikkut ilinniartitaasimannginnamik. (Apustilit Suliaat 4:13) Taamaakkaluartorli Jiisusip taakku Guutip oqaasianik paasinnissinnaanerannik uppernarsaavigai. Jiisusi ima nassuiaavoq: ‘Illersuisup [Ikiuisup, NV], Anersaap Illernartup, Ataatap uanga atinni aallartitassaata tamanik ajoqersussavaasi.’ (Johannesi 14:26) Guutip nunarsuarmik uumassusilinnillu tassaniittunik tamanik pinngortitsigami anersaani illernartoq, imaluunniit nukini sulisoq, atorpaa. (1 Mosesi 1:2) Aamma taanna atorpaa Biibilimik allattut 40-t missaanniittut eqqarsaatiminik Biibilimut allannissaannut isumassarsisikkamigit. (2 Petrusi 1:20, 21) Biibilimik paasinnikkusuttut anersaaq taanna aamma iluaqutigisinnaavaat.

Guutip anersaavanik illernartumik qanoq ilillutit pisinnaavit? Upperlutit qinnutigisariaqarpat. Aap, imaassinnaavoq qinnutigisaqattaartariaqarit. Jiisusi ima oqarpoq: “Qinugitsi [Qinujuaritsi, NV], tunineqassaasi taava. . . . Ilissimi . . . qitornasi tunissutinik ajunngitsunik tunisinnaagassigit, taava qularnannginnerungaarpoq Ataatap qilammiittup imminut qinusut Anersaamik Illernartumik tuniumaarai.” (Lukasi 11:9, 13) Jehovap anersaaminik illernartumik ilumoorlutik qinnutiginnittut tamatuminnga tunerusungaarpai. Nukik sulisoq tamanna oqaatsit isumassarsiarititaasut ukiut tusindillit matuma siorna Biibilimi allanneqarsimasut isumaannik paasinninnissamut iluaqutigisinnaavat. Aamma Guutip anersaava tusarliussaq sunniinertooq Biibilimiittoq naapertorlugu inuunissamut pisariaqartumik ilisimassuseqalernissannut iluaqutigisinnaavat. — Hebræerit 4:12; Jaaku 1:5, 6.

Taamaattumik Biibilimik atualernerit tamatigut Guuti qinnuigisaruk anersaamik illernartumik tuneqqullutit oqaasiinik paasinninnissamut iluaqutissattut.