Mo mu Kona ku Utwisiseza Bibele

1. Mu Kupe Mulimu Kuli A mi Tuse

Bo Ninfa, ba ba pila kwa Italy, ba talusa kuli: “Ka nako ye ñwi ne ni na ni mukwa wa ku balanga Bibele ni si ka lobala kale. Ne ni i balanga bakeñisa kuli ne ni ziba kuli ki lona Linzwi la Mulimu, mi nihaike kuli ne ni sa tabeli ku bala, ne ni bata ku ziba za naa ñozi Mulimu mwa Bibele. Ne ni bata ku i bala kaufelaa yona. Kwa makalelo ne i li bunolo ku i bala, kono hamulaho na fumana makande a taata ku a utwisisa mi na tuhela ku i bala.”

KANA nto ye swana ne i ezahalile ku mina? Ku bile cwalo kwa batu ba bañata. Kono sina mo lu balezi mwa taba ye felile, Jehova Mulimu, yena Musimululi wa Bibele, u lata kuli mu utwisise Linzwi la hae. Kono mu kona cwañi ku utwisisa Bibele? Nto ya pili ye mu kona ku eza ki ku kupa Mulimu kuli a mi tuse.

Baapositola ba Jesu ne ba ngiwa sina “batu ba ba si ka ituta, ili batu feela” kakuli ne ba si ka ya kwa likolo za baluti ba bulapeli bwa Majuda. (Likezo 4:13) Nihakulicwalo, Jesu naa ba kolwisize kuli baa kona ku utwisisa Linzwi la Mulimu. Kamukwaufi? Jesu naa talusize kuli: “Mutiisapilu, ona Moya o Kenile o Ndate a ka luma ka Libizo la ka, ki ona o ka mi luta litaba kaufela.” (Joani 14:26) Mulimu naa itusisize moya wo o kenile, kamba maata a hae a itusisa kwa ku eza lika, kuli a bupe lifasi ni ze pila mwateñi kaufela. (Genese 1:2) Hape naa itusisize ona kwa ku susumeza bañoli ba ba bato eza 40 kuli ba ñole mihupulo ya hae mwa Bibele. (2 Pitrosi 1:20, 21) Ona moya o swana wo, waa kona ku tusa ba ba bata ku utwisisa Bibele kacenu.

Mu kona ku amuhela cwañi moya o kenile wa Mulimu? Mu swanela ku u kupa ka tumelo. Mi mane mu tokwa ku u kupa ka ku tundamena. Jesu naa ize: “Mu kupe, mi mu ka fiwa. . . . Mbali mina . . . mu ziba ku fa bana ba mina lika ze nde, Ndate ya kwa lihalimu u ka mi fita hahulu mwa ku fa Moya o Kenile ku ba ba u kupa ku yena.” (Luka 11:9, 13) Jehova u lata ku fa moya o kenile ku ba ba u kupa ku yena ka niti. Moya wo waa kona ku mi tusa ku utwisisa taluso ya manzwi a mwa Bibele ili a naa ñozwi ka susumezo ya moya o kenile lilimo-limo kwamulaho. Moya wa Mulimu hape waa kona ku mi tusa ku ziba mwa ku sebeliseza manzwi a maata a mwa Bibele mwa bupilo bwa mina.—Maheberu 4:12; Jakobo 1:5, 6.

Kacwalo, nako kaufela ha mu bala Bibele, mu lapelange ku Mulimu, ili ku mu kupa moya o kenile kuli u mi tuse ku utwisisa Linzwi la hae.